نفسي في اب يسمعني

[غير مسجل]

رد: نفسي في اب يسمعني

انا لما قلت ليكم اني فعلا خلاص حالة ميئوس منها ماكنتش غلطان
انا حاولت اكتب ليكم امبارح كتير علشان ابشركم اني بقيت اصلي كدا وبدأت ابعد عن الحرام علشان تساعدوني ولو بدعوة
بس معرفتش اكلمكم
الوقتي بكتب ليكم وانا حالي اتغير تاني وبدأت افكر في المعاصي وارجع للي كنت بعمله ومش قادر اشيل الفكرة دي من دماغي
بحاول ارتكب معصية الوقتي علشان ارجع مجرم تاني
كان نفسي استمر في التوبة
بس الظاهر اللى زي مكتوب عليه يعيش عاصي منافق ضال ويموت كافر على حاله دا
لو مكتبتش ليكم
اعرفوا اني بقى انتحرت ولا حصلي حاجة

[فريق استشارات سرك فى بير(الاخوة)]

رد: نفسي في اب يسمعني

لا ياولدي الحبيب
حالتك مش ميئوس منها إن شاء الله
وانت فعلا غلطان في أقناع نفسك بيأسك من حالتك
دا أكبر غلط.. ما تخليش الشيطان يسيطر على تفكيرك
عشان كده لازم تقف مع نفسك بحزم شديد وما تفوتش عليك فرصة التوبة النصوح والعودة إلى الله تعالى
وبدل ما تصمم على ارتكاب الذنوب والمعاصي اللي حكمت على نفسك بيها إنك تموت على ضلال عياذًا بالله، ودا أكبر خطأ طبعا

راجع نفسك كويس قبل عمل أي معصية، وتذكر أن الله يراك ، وسيحاسبك ،
وتذكر أيضًا بكل يقين أنه معك وسيحميك من شرور الشيطان وهوى نفسك
بس بشرط إنك تلجأ إليه وتستغيث برحمته
أكثر من الدعاء في كل وقت إن ربنا يبعد عنك أي طريق للمعصية
إستغيث بالله سبحانه .. هو الحي القيوم .. سبحانه هو من نستغيث برحمته
ردد دائما:
يا حي يا قيوم ، برحمتك أستغيث ، أصلح لي شأني كُلَّه ، ولا تكلني إلى نفسي طرفة عين

افتكر دايمًا وفكر بجدية في الجنة والنار
خليك ذكي وفطن وفرق بين العمل اللي يوصلك للنجاة من النار والفوز بالجنة ، والعمل اللي يوصلك للنار ، عياذًا بالله
مش ها تخسر حاجة لما تضغط على نفسك وتدوس على رغباتها لما تمتنع عن المعصية
وها تكسب كتير بأمر الله لما تعود لربك وتحافظ على الأعمال الصالحة

منتظرك بأمر الله تعالى ترد على، مهما كانت أحوالك
لكن ضروري تتواصل معنا وتكتب ردك بكل اللي حاسس بيه
وان شاء الله ربنا هايوفقك ويعينك

منتظرك قريبا جدا وبسرعة يا ولدي الحبيب
غفر الله لي ولكم ، وهدانا وإياكم الى ما يحب ويرضى

[غير مسجل]

رد: نفسي في اب يسمعني

انا كنت بقول كدا الله يراني وما ينفعشي ارتكب معصية وحرام والكلام دا كله بس خلاص لما القلب بيفجر بتبقي مش فارقة معاه اي حاجة
انا قلبي فاجر كافر يا أبتي
انا ضايع اعتبرني اصلا مش مسلم لا صلاة ولا صوم ولا طاعة ولا اي حاجة بجانب دا ارتكتب جميع المعاصي اللي تخطر على بالك
تخيل كدا وشوف حياتي عاملة ازااي واحد كافر ماشي على الارض
بس الاسم في البطاقة مسلم
انا ربنا كارهني خلاص هو بس سايبني كدا علشان لما يجي ياخدني لا يفلتني زي ما بتقولوا
انا منتظر الموت في اي لحظة على الحال اللى انا فيها دي ومش عارف اقول لربنا ايه وقتها لما يسألني عن ذنوبي وانا عارف ان كل اللى بعمله حرام في حرا م وكفر والحاد وكل حاجة بس مش قادر اتوب او ارجع له صح
يمكن هو مش عاوزني علشان كدا بيوقفلي كل حاجة قدامي علشان ما ارجعشي
ربنا كرهني صح يا ابتي
كرهني ومش عاوزني طب ليه سايبني اعصيه كتير كدا ما ياخدني بقى ويريحني من الهم والغم اللى انا عايش فيهم دول
انا تعبان اوي
بجد نفسي اموت وارتاح يارب بقا خدني

[فريق استشارات سرك فى بير(الاخوة)]

رد: نفسي في اب يسمعني

ولدي الكريم.. لو إرتكبت جميع المعاصي ؛ دا مش معناه إنك تعتبر نفسك مش مسلم ، ومن المعاصي دي القتل مثلًا؟
يعني إنت قتلت حد؟
أكيد لأ طبعًا، وطبعًا إنت عارف كويس إن القتل من أكبر الكبائر
طيب إيه رأيك في اللي بيقتل بدون وجه حق؟
تفتكر حاله إيه مع نفسه؟
ويا ترى لو تاب ربنا ها يقبل توبته ولا لأ؟

عارف قصة اللي قتل مائة نفس بدون حق؟
فاكرها ولا لأ؟
عمومًا إدي لنفسك الفرصة واصبر وانت بتقرأ قصته على الروابط دي:

http://www.alminbar.net/alkhutab/khutbaa.asp?mediaURL=6910


http://www.alssunnah.com/main/articles.aspx?selected_article_no=1949&menu_id=135 4

وقول لي رأيك بعدها
وشيل من دماغك تمامًا إن ربنا بيكرهك وافتكر الحديث القدسي:
عَنِ النَّبِيِّ صَلَّى اللَّهُ عَلَيْهِ وَسَلَّمَ ، قَالَ :
" يُنَادِي كُلَّ لَيْلَةٍ سَاعَةً فِيهَا مُنَادٍ : هَلْ مِنْ دَاعٍ ، فَأَسْتَجِيبَ لَهُ ، هَلْ مِنْ سَائِلٍ فَأُعْطِيَهُ ، هَلْ مِنْ مُسْتَغْفِرٍ ، فَأَغْفِرَ لَهُ ؟ " .
وخليك عارف أنك مش لوحدك بتعصي ربنا وبترتكب ذنوب كثيرة
دا حال كل العباد، بس بيختلف من واحد لآخر، واقرأ الحديث دا كويس:
قال رسول الله صلى الله عليه وسلم:
" والَّذي نفسِي بيدِه ، لَو لَم تُذنِبُوا لذهبَ اللهُ بِكُم ، و لجاءَ بقومٍ يُذنِبُون فيستَغفِرونَ اللهَ فيغفرُ لَهم "
واقرأ شرحه على الرابط دا:
http://www.binbaz.org.sa/mat/12041

ياولدي الحبيب.. ماتدعيش على نفسك بالموت، لكن إدعي إن ربنا يهديك ويعينك على طاعته والرجوع إليه،
ويبعد عنك الشيطان وهوى نفسك

غفر الله لي ولك وهدانا إلى الحق وإلى صراطه المستقيم

[غير مسجل]

رد: نفسي في اب يسمعني

انا عارف كل الكلام دا اللى انت كاتبه للاسف وبقوله كمان للناس شوفت الخيبة التقيلة بتاعتي بس مش قادر او مش عارف اقتنع به واصدق واعمل به
انت فاكر ان انا نفسي مش اتوب وابقى كويس والله نفسي يتغير حالي بس باللي انا فيه دا فالوصول لدا مستحيل اصلا ان ارجع تاني
للاسف محدش حاسس بي ولا بالنار الى جوايا الوقتي وانا بكتب بس اعمل ايه قلبي تقريبا كدا بقي اسود واتقفل وربنا ختم عليه

[فريق استشارات سرك فى بير(الأخوات)]

رد: نفسي في اب يسمعني

بسم الله الرحمن الرحيم.
الأخ الفاضل/
السلام عليكم ورحمة الله وبركاته، وبعد:

فنسأل الله أن يسهل أمرك، وأن يغفر لك ذنبك.

فإنّ التغيير الحقيقي يبدأ بالمواظبة على الصلاة، فهي عنوان الفلاح، ورمز الجدية والنجاح، وأرجو أن تغض بصرك، وتبتعد عن مواطن النساء، فإن طلاب الشهوات لا يتقدمون، ولا عجب فإن المعاصي تخذل أهلها، وتجلب عليهم الشؤم والنكبات، ونحن ننصحك بالمسارعة إلى التوبة، وإياك والتسويف! فإن الله يمهل ولا يهمل.

وأرجو أن تحول إرادتك الخيرة إلى عمل، فإن الأماني تحقق بالعزائم الصادقة والهمم العالية.

ومما يعنيك على التغيير ما يلي:-
1- اللجوء إلى من يجيب من دعاه، ويصرف قلوب الناس إلى طاعته.
2- مصادقة أصحاب الهمم العالية.
3- تجنب المثيرات كالنظرة والكلمات والاختلاط والخلوة بالأجنبيات.
4- وضع برامج مناسبة للتغيير، على أن تراعي فيها ما يلي:-

أ- التدرج في الإصلاح، فإن من يحاول الإصلاح جملة يفقده جملة.
ب- التنوع.
ج- المعقولية، فلا تكلف نفسك فوق طاقتها فتمل.
د- تحديد الهدف.
هـ- البعد عن الذنوب، فإنها تقيد صاحبها، كما قال الحسن البصري لمن قال له: لا أستطيع أن أنهض لصلاة الفجر، فقال: ( قيدتك الذنوب).
و- عدم استعجال النتائج.
ز- محاولة التجديد في البرامج.

وأرجو أن تبدأ التغيير بالتوبة النصوح، فإنها تمحو ما قبلها وتعين أهلها، واعلم بأنه سبحانه يقول: (( إِنَّ اللَّهَ لا يُغَيِّرُ مَا بِقَوْمٍ حَتَّى يُغَيِّرُوا مَا بِأَنفُسِهِمْ ))[الرعد:11].

فإن الندم توبة، والتائب من الذنب كمن لا ذنب له، واليأس من رحمة الله من أكبر الجرائم، وربنا ما سمى نفس رحيماً إلا ليرحمنا، ولا سمى نفسه تواباً إلا ليتوب علينا، ولا سمى نفسه غفوراً إلا ليغفر لنا ذنوبنا وإسرافنا في أمرنا، وهو القائل: { قل يا عبادي الذين أسرفوا على أنفسهم لا تقنطوا من رحمة الله إن الله يغفر الذنوب جميعاً } وقد جاء جماعة وقالوا للنبي صلى الله عليه وسلم إن الله يقول: { والذين لا يدعون مع الله إلهاً آخر } ونحن دعونا غير الله، وقال: { ولا تقتلوا النفس التي حرم الله إلا بالحق } ونحن قتلنا، وقال: { ولا يزنون } ونحن وقعنا في الزنا، فنزلت رحمة الرحيم بقوله: { إلا من تاب وآمن وعمل عملاً صالحاً فأولئك يبدل الله سيئاتهم حسنات وكان الله غفوراً رحيماً } وهو سبحانه يفرح بتوبة عبده حين يتوب إليه، ولن يعدم الناس من رب يفرح بتوبة العصاة خيراً.

ولا يخفى عليك أن هناك أموراً تعين الإنسان على الثبات بعد التوبة، وهي كما يلي:-

1- اللجوء إلى الله الذي يقبل التوبة عن عباده ويعفو عن السيئات.

2- مفارقة بيئة المعصية وأماكنها وكل ما يذكر بها من المناظر والمواقع والأرقام والإيميلات والذكريات.

3- الابتعاد عن رفقة المعصية.

4- الإخلاص في التوبة بأن تكون لله، وليس خوفاً على الشرف أو من الفضيحة أو من المرض أو غيرها.

5- الصدق في التوبة، فتوبة الكذابين هي أن يتوب الإنسان باللسان ويظل القلب متعلقاً بالمعصية متشوقاً إلى أيامها، ويكون اللسان متفاخراً بها وبذكرياتها.

6-الإكثار من الحسنات الماحية، قال تعالى: { إن الحسنات يذهبن السيئات }.

7- شغل النفس بالمفيد، وتلاوة كتاب ربنا المجيد.

8- تجنب الوحدة، لأن الشيطان مع الواحد.

9- وضع الأجهزة الخاصة كالكمبيوتر واللابتوب في أمكان مفتوحة.

10- استحضار مراقبة الله.

11- عدم اليأس من رحمة الله بعد المعصية - وإن تكررت - لأن هذا ما يريده الشيطان، وقد قيل للحسن البصري رحمه الله: ( نذنب ونتوب ونذنب ونتوب .. إلى متى؟ قال حتى يكون الشيطان هو المخذول ) وكان السلف يقولون: ( رب معصية أورثت ذلاً وانكساراً أفضل من طاعة أورثت افتخاراً ).

وقد أحسن الشافعي في قوله:

تعاظمني ذنبي فلما قرنته ** بعفوك ربي كان عفوك أعظما

وهذه وصيتي لك بتقوى الله ثم بتفادي أسباب الوقوع في المخالفة، وعليك بمعاداة الشيطان الذي همه أن يحزن أهل الإيمان، واعلم أنه يدفع للمعصية ثم يقول للعاصي لا فائدة من التوبة، وقد يقول لك أتظن أن الناس لا يعرفونك فيكف تجلس معهم؟ فاحذر من تيئيس الشيطان وتقنيطه لك من توبة الله.


وبالله التوفيق والسداد.

[غير مسجل]

رد: نفسي في اب يسمعني

السلام عليكم ورحمة الله وبركاته
جزاكم الله خيرا على كل ردودكم الكافية الشافية

يا أخي العزيز..... أنا متابع موضوعك من أول يوم، ومش هاخبي عليك إن حالتي مشابهه لحالتك تماما ودخلت هنا أدور على كلام اسمعه يمكن الاقي نفسي قبلته،،، وبصراحه لاقيت كلامك اثر فيا كأني انا الي بيتكلم.. وبصراحه اكتر لقيت الناس الطيبة اللي ردو عليك كلامهم مقنع جدا ومريح........ وانا فعلا بدأت اعمل بيه والحمد لله بعدت عن المعاصي ورجعت لربي وبادعي دايما اني مارجعش واعصيه تاني،،،،
ونصيحتي ليك يا اخي العزيز انك لازم تساعد نفسك وتكون اقوى من كده وتستعين بالله وتسمع كلام اخوانا الطيبين
انا كنت هاكتب موضوع يشبه موضوعك لكن لاقيت الاجابه هنا على كل كلامي،،،،،عشان كده باطلب منك تبدأ من النمهارده وتحارب الشيطان وتبعده عنك

[غير مسجل]

رد: نفسي في اب يسمعني

مش عارف ارد عليكم اقول ايه بس مش عارف يمكن كلامكم دا لم يؤثر في ذرة واحدة وكأن محدش اتكلم مش تقليل والله من ردكم بس للاسف دا في انا ان قلبي مقفول ومش قابل اي كلام من دا
انا وصلت لحاجة ان الهداية مش بايد البشر ولكن بايد الله هو قال ولو شاء الله لهدي الناس اجمعين
ويمكن انا من الناس اللى ربنا مش رايد لهم الهداية فهفضل كدا زي ما انا لغاية ما موت واقابله بحالتي دي
حياة صعبة ربنا ما يوري حد بجد اللى انا فيه

[فريق استشارات سرك فى بير(الاخوة)]

رد: نفسي في اب يسمعني

ولدي الحبيب..
إقرأ هذا الموضوع بقلب مفتوح واصبر حتى نهايته، على الرابط:

http://www.saaid.net/rasael/314.htm

نفعك الله بما فيه... منتظر ردك إن شاء الله

[فريق استشارات سرك فى بير(الاخوة)]

رد: نفسي في اب يسمعني

ولدي الحبيب..

أريد التواصل معك على الخاص، ضروري ياولدي الكريم...

[غير مسجل]

رد: نفسي في اب يسمعني

صراحة لم اقرأ هذا الرابط وما فيه فتحت الرابط بس مش قرأت يمكن كسل أو عدم اهتمام بما فيه قلت لنفسي هو يكون فيه ايه زيادة اهو كله كلام في كلام في كلاموخلاص
بس النهاردة اتغير جوايا حاجات كتير او يمكن اخدت خطوة في الطريق لربنا لم اترك فرض اليوم ومسحت حاجات من على جهازي كتير وكنت طول اليوم بسمع يا قران او حاجات اسلامية
نفسي دي تكون توبة واكون راجل مغ ربنا
ادعولي

[فريق استشارات سرك فى بير(الاخوة)]

رد: نفسي في اب يسمعني

الحمد لله رب العالمين.. ثبتك الله يا ولدي وتقبل منا ومنكم
أسأل الله تعالى أن يشرح لك صدرك وييسر لك أمرك ويديم عليك نعمة مداومة طاعته والعمل الصالح ورزقك بالقبول.. بفضله وبرحمته

مازلت أحتاج للتواصل معك على الخاص بأمر الله، بأي طريقة تحبها..
فقط حدد لي طريقة التواصل معك يا ولدي الحبيب إذا كنت تحب ذلك،
وإذا كنت لا تود ذلك؛ فلا عليك ياولدي وليس هناك أي حرج، فالأمر متوقف عليك وعلى رغبتك في حدود تعاملي معك

بارك الله فيك يا ولدي وحفظك من كل شر وسوء

[غير مسجل]

رد: نفسي في اب يسمعني

السلام عليكم ورحمة الله وبركاته
ادعولي كتير بالله عليكم نفسي تروادني وانا بمسك نفسي بالعافية
انا مش عارف اتواصل معاك ازاي يوالدي يغتي غن طريق ايه

[غير مسجل]

رد: نفسي في اب يسمعني

اخبرتك ابي هذا القلب لم يدخله الايمان وتشبع بالكفر والفساد مهما بكيت فقلبي هو
لا استطيع ترك المعصية اصبحت مدمن لها

[فريق استشارات سرك فى بير(الاخوة)]

رد: نفسي في اب يسمعني

وعليكم السلام ورحمة الله وبركاته

ولدي الغالي ..
الموضوع في بدايته ممكن يبقى صعب شوية ويحصل إنتكاسة مره واتنين
المهم انك لا تيأس أبدًا من رحمة الله، وقاوم نفسك والشيطان على قدر ما تستطيع
أكثر من الاستغفار يا ولدي الحبيب ليفتح الله لك أبواب خيرات كثيرة
إعقد العزم والنية إنك تصلي الظهر النهارده في المسجد، واستعد قبل الأذان بوقت يكفي إنك تدخل المسجد قبل الأذان،
وياريت تستعد من دلوقت وتصلي الضحى.. ركعتين أو أكثر...، وبعد كده إبدأ في قراءة سورة البقرة، وحاول تقرأ منها عدد صفحات كثيرة بقدر استطاعتك
وسيب كل حاجه تلهيك عن ذكر الله أو توقعك في المعاصي
ولما تروح المسجد اجتهد في الدعاء إن ربنا يثبتك ويعينك
وكل ما تراودك نفسك لمعصية قاومها بكل قوة، واستعن بالله وارجوه أن يصرف عنك شر نفسك وشر الشيطان

أعانك الله يا ولدي الحبيب وقواك وثبتك على صراطه المستقيم وصرف عنك شر الشيطان وشركه، وهدى نفسك وزكاها بفضله ورحمته

ولدي الحبيب..
أفضل طريقة ممكن نتواصل بها إن شاء الله:
بتسجيل اسمك في المنتدى وتكون عضو معانا، أي إسم أو كُنية تختاره، ومش لازم إسمك الحقيقي
وبعد كده تدخل قسم: التواصل الإيمانى للشباب

ودا قسم خاص للشباب فقط،
وبعد تسجيلك إن شاء الله، إعمل إضافة موضوع جديد في قسم التواصل الإيماني، واكتب فيه توضح لي إنك صاحب موضوع (نفسي في اب يسمعني)
اللي انت كاتبه هنا، واطمئن تمامًا يا ولدي.. أي موضوع جديد يضاف في لا يظهر للأعضاء مطلقًا، ويظهر لفريق المراقبة فقط،
واللي أتشرف أكون من بينهم، زي ما بيحصل هنا في سرك في بير، وبعد كده بنظهر الموضوع لو صاحبه طلب
المهم إن موضوعك هايظهر بإسم عضويتك اللي هاتسجله، وبعد كده هابعت لك رساله بأمر الله عشان ترد علي، وبكده يتم التواصل بيننا إن شاء الله
والرسائل دي خاصة جدا، ولا يقرأها أحد غيرنا
وخليك متواصل معايا هنا بأمر الله تعالى لحين ما تكتب لي موضوع جديد في قسم التواصل الإيماني إن شاء الله