مسلسل جديد ( البيت بيتك )

[صاحبة العمرين]

بالفعل اختي فالتعليم عندنا سيء جدااا لدرجة لا توصف ،
سندرس الامر دا ان شاء الله الحلقة الجاية ،
قوليلي : انتي جربتي التعليم المنزلي دا ؟
.
.
سعيدة بمتابعتك

انا الاسعد اختي.. ربنا يعزك
جربت التعليم المنزلي حتى ٤ سنوات و كان فيه فصل منتسوري يذهب اليه طفلي و كان بيساعدني في كده كتير و كان بيننا و بين الأمهات مسابقة نصف عام لأكثر ام تقدم انشطة و تثري طفلها.. مكسبتش و لا مرة بس كان عندي نشاط كبير افضل من الان بكثير جدا
و علاقتي بابني كانت مميزة جدا

الان لتغير ظروف أسرتي للأسف مفيش محفز حولي و بدأت التعليم الموازي من سنتين .. لكن عمليا يصعب تحقيقه الا في اوقات الاجازة
او اني اغيبه يوم او يومين زيادة بالأسبوع... و مع ذلك أشعر بفرق في علاقتي بابني اتجهت للأسوأ للأسف ربنا يصلحنا و أولادنا يا رب

الخلاصة بالنسبة لي التعليم المنزلي يحتاج بيئة محفزة و مساعدة للأم لانه يصعب كليا الاعتماد عليها وحدها فيه على الأقل بالنسبة لقدراتي
و التعليم الموازي قد يكون حل لكنه ليس حلا قاطعا

[moslma lillah]

انا الاسعد اختي.. ربنا يعزك
جربت التعليم المنزلي حتى ٤ سنوات و كان فيه فصل منتسوري يذهب اليه طفلي و كان بيساعدني في كده كتير و كان بيننا و بين الأمهات مسابقة نصف عام لأكثر ام تقدم انشطة و تثري طفلها.. مكسبتش و لا مرة بس كان عندي نشاط كبير افضل من الان بكثير جدا
و علاقتي بابني كانت مميزة جدا

الان لتغير ظروف أسرتي للأسف مفيش محفز حولي و بدأت التعليم الموازي من سنتين .. لكن عمليا يصعب تحقيقه الا في اوقات الاجازة
او اني اغيبه يوم او يومين زيادة بالأسبوع... و مع ذلك أشعر بفرق في علاقتي بابني اتجهت للأسوأ للأسف ربنا يصلحنا و أولادنا يا رب

الخلاصة بالنسبة لي التعليم المنزلي يحتاج بيئة محفزة و مساعدة للأم لانه يصعب كليا الاعتماد عليها وحدها فيه على الأقل بالنسبة لقدراتي
و التعليم الموازي قد يكون حل لكنه ليس حلا قاطعا

اه تمام ، ربنا يباركك في اولادك ،
جزاك الله خيرا غاليتي هدرس الموضوع كدة وربنا يقدر الخیر لاولادنا جميعا .

[صاحبة العمرين]

اه تمام ، ربنا يباركك في اولادك ،
جزاك الله خيرا غاليتي هدرس الموضوع كدة وربنا يقدر الخیر لاولادنا جميعا .

امين يا رب و إياك يا أخيتي
انتي تبع اي مسار الان..
ممكن نشجع بعض

[moslma lillah]

السلام عليكم
الحلــــــ(13)ــــــــقة

ضياء وزميله في العمل مجدي:
مجدي : تفتكر هنلحق نسلم الشغل قبل نهاية الشهر ؟
ضياء : لازم يا مجدي وإلا هنطير انا وانت والمشكلة ان انا حسيت من المدير انه قاصد يضيق عليا انا وانت .
مجدي : اشمعنا انا وانت ؟
ضياء : يعني الزملاء الباقيين عندهم خبرات اكتر مننا , ما شاء الله ياسر بيروح مأموريات كتير عشان هو شاطر في الانجليزي وعندك باسم شغال ببرامج الأوفس وواخد شهادة PFA وشكري بيحضّر عفاريت قصدي بيحضر ماجستير ادارة الاعمال .
مجدي : ههههه واحنا بطيـــــــخ .
ضياء : مهو احنا لازم نتحرك يإما فعلا هنضيع , يعني المرة اللي فاتت من كام شهر المدير كان عاوز يسفرني والمرة دي اهو بيضيق علينا فمفيش مفر يا صاحبي , هتبقي معايا في المرحلة الجاية ولا هتحضر بتنجان مع مراتك وولادك في البيت ؟!
مجدي : والله مفيش أحلي من البتنجان , بس معاك يا صاحبي ربنا يعينا يارب .
ضياء : بس بص مفيش كسل ولا نوم من أولها عشان نثبت فعلا للمدير ولنفسنا قبله اننا قدها وهنتغير للاحسن وهنموت نفسنا .


اول زيارة للعريس بعد القَبول :
بابا : ازيك يا حبيبي عامل ايه .
العريس : الحمد لله ازيك يا عمي .
بابا : بخير يا بني الحمد لله , انت ازيك وازاي الاسرة الكريمة ؟
وليد : الحمد لله بيسلموا عليكوا كلهم .
ماما ووسام دخلوا
ماما : ازيك يا وليد .
وليد : الحمد لله يا ماما ازاي حضرتك , ازيك يا وسام عاملة ايه ؟
وسام : الحمد لله تمام .
أحمد : سلام عليكم ازيك يا وليد !
وليد : ازيك يا احمد مبروك يا عم للأهلي , انا بقيت عمال ادعي انكوا تكسبوا .
بابا : هههههه مش قلتلتك يا احمد , الله يبارك فيك يا حبيبي هاردلك للزمالك بقي .
وليد : عادي يا عمي , انا مسالم جدا حتي جايب ورد أحمر _ وبينظر لوسام _ عشان الأهلي طبعا .
واتكلموا في الجهاز ومين عليه ايه ونظام الشقة وتحديد فترة الخطوبة , والزيارة الجاية العريس هيجيب والده ووالدته , وانتهت الزيارة الحاسمة .

الحج حسين كان منتظر مكالمة ضرورية من شغله وها هو تليفونه يرررن :
الحج حسين : سلام عليكم ايه الاخبار يا استاذنا ؟
استاذ سامي : ايوة يا استاذ حسين انا بعتذر والله اني مش هفرحك , اسمك مطلعش في قرعة الحج السنة دي .
الحج حسين :_وش حزين _ الله المستعان ,ماشي يا بني تسلم , ربنا يكتبهالنا يارب .

ماما : ايه الاخبار ؟
بابا : للاسف , لسه ربنا مختارنيش .
ماما : معلش قدر الله وما شاء فعل , كله مكتوب يا حج لعله خير .
بابا : ونعم بالله , كان نفسي اوي يا عزة , دنا كنت حاطط أمل جدا اني هحج السنة دي وعمال اتخيل نفسي وانا هناك في الكعبة وعلي عرفات وقلبي عمال يرفرف , اوحش مكالمة في حياتي احساس بالحسرة صعب اوي ويا عالم هعيش للسنة الجاية ولا لأ ! دموووووووع
ماما طبطبت عليه وقالت : ربنا يطول في عمرك في طاعته وانت خدت الثواب بالنية متزعلش نفسك , وفي باب خير وثواب جديد اتفتحلك اهو وهو _ جواز بنتك التانية _ وما أعظمه من ثواب لو جددنا النية واهو لعلنا نروح سوا انا وانت السنة الجاية ولا عاوز تهرب مني ! انا وراك وراك .
بابا : هههههه انا اقدر برده يا وزة عمري ,ربنا يكتبهالنا يارب , اتصدقي جبرك بخاطري دا برد قلبي وعقلي انصرف لوسام وجهازها .

التليفزيون كان مفتوح علي الشيخ حازم شومان بارك الله في عمره وكان يتحدث عن فضل عشر ذي الحجة
_ايام لا تعوض_
https://www.youtube.com/watch?v=NeWEbZf6lk8

شيماء وأولادها :
رغد :يا ماما انا زهقت من اللعب بتاعتي وبابا خد مني التاب وانتي مش بتلعبي معايا خالص ولا أنس .
ش : ليه يا حبي طب وأنس مش بيعلب معاكي ليه ؟
رغد : بيقولي انا ولد ومش بلعب مع البنات .
ش : يا أنس تعالي يا حبيبي : ايه يا أنوس مش بتلعب ليه مع اختك حبيبتك؟
أنس : مهي الميس قالتلنا كدة في المدرسة يا ماما .
ش : صح يا حبيبي فعلا متعلبش مع البنات في المدرسة او الشارع انما رغد اختك تلعب معاها وتضحك معاها .
تيجوا نلعب استغامية
أنس ورغد : اه هيييييه .

والباب بيتفتح بالمفتاح وأنس ورغد في صوت واحد : بابا جه بابا جه..

والي اللقاء في الحلقة القادمة ..

فاكهة الحلقة :
داخل الحلقة وهي ايام لا تعوض فلنغتنمها لنفوز بها , وكل عام وانتم بخيــــــــــــر .

سؤال :
هل تريدون تفاصيل الخطوبة وفترة الخطوبة ولا الموجز ؟؟

#مسلسل_البيت_بيتك
#موقع_الطريق_إلي_الله

[محبة الحبيب محمد]

عليكم السلام ورحمة الله وبركاته
جزاكِ الله خيرًا أختنا
اللهم ارزقنا حجًا مبرورًا
اللهم أمين
بالنسبه للخطوبة وتفاصيلها فالاختصار فيها أفضل بوركتي

[moslma lillah]

عليكم السلام ورحمة الله وبركاته
جزاكِ الله خيرًا أختنا
اللهم ارزقنا حجًا مبرورًا
اللهم أمين
بالنسبه للخطوبة وتفاصيلها فالاختصار فيها أفضل بوركتي

واياك غاليتي
اللهم امين
تمام

[moslma lillah]

الحلــــ(14)ـــــقة من مسلسل
( البيت بيتك )

ترررن .. جرس الباب يرن
أحمد يفتح : اتفضلوا اتفضلوا ..
العريس وأهله : سلام عليكم ..
الحج حسين : وعليكم السلام اتفضلوا, نورتوا .
مدام عزة : كل سنة وانتو طيبين يتعاد عليكوا بخير .
أم العريس : وانتي طيبة يا حبيبتي علينا وعليكوا زي اليومين دول تكونوا جايين من الحج يارب .
الحج حسين والدمعة هتفر من عينه : ياااااااارب يا حجة جميعا .
مداك عزة : اصل الحج كان مقدم السنة دي وللاسف مقبلش فزعلان جداا يعيني .
أبو العريس : معلش قدر الله وما شاء فعل ربنا يكتبهالك السنة الجاية ياااارب وتبقي خلصت من جواز العروسة بالمرة .
ام العريس : امال فين عروستنا , نفسي اشوفها جدا انا ارتحتلها والله من قبل مشوفها من كلام وليد عنها وعنكوا كلكوا أسرة بشوشة طيبة .
الحج حسين : ربنا يحفظك يا حجة سبحان الله نفس الإحساس بالظبط عندنا ناحيتكوا وناحية وليد شاب خلوق بشوش حسيته ابني التاني .
وسام داخلة ...
ام العريس : ما شاء الله اللهم بارك .
وسام : ازيك يا طنط _وسلمت عليها_ , ازيك يا عمو , وبصت للعريس ازيك _مع كسوف _ .
اتكلموا كلهم مع بعض في المواضيع العامة وأحوال البلد الحلوة والـ.. الحلوة برده, وهناك تقارب في الآراء .
وسام كانت محضرة طبق التقديم وأحمد الذوق قدمه .
العريس استأذن الحج حسين انه يجلس مع وسام في الصالون المجاور _الواقع تحت أنظار الجميع _بمفردهم, فوافقه الحج حسين ,
وهنا ارتفعت نبضات قلب وسام, وزاد كسوفها ليتجاز كسوف الشمس .
وليد : ازيك يا وسام .
وسام : الحمد لله بخير .
وليد : ايه رأيك في أمي وأبويا ؟
وسام : ما شاء الله عسولين خالص ربنا يبارك فيهم حبيتهم .
وليد : وهم كمان حبوكي , قوليلي بقي خلصتي الدبلومة بتاعتك ؟
وسام : لا لسه فاضلي دورتين وامتحن وأخد الشهادة .
وليد : جميل شكلك مهتمة بيها اوي ! هي جميلة للبنات والحقيقة دي من الحاجات اللي عجبتني جدا فيكي انك مهتمية بالتربية وأساليبها الحديثة لإني بشوف مهازل في تعامل الأمهات مع أولادهم فكنت حريص اني أركز علي الموضوع دا وأنا بختار شريكة حياتي .
وسام : ربنا يعينا علي حمل الرسالة دي ونقدر نربي جيل يتحمل المسئولية .
وليد : يارب , مش عاوزة تسأليني علي أي حاجة ؟!
وسام : امممممممم مش عارفة هسألك علي شغلك مش بفهم فيه , ممكن هواياتك ؟!
وليد : حلو, بحب كل ألعاب الرياضة خاصة التنس وبعدين كرة القدم , وانتي ؟!
وسام : اه , انا بحب الشغل اليدوي زي مثلا التحف دي انا اللي عاملاها .
وليد : واو مبدعة جميلة جدا .
وسام : شكرا , وبحب التدريس يعني كنت ناوية بعد اما اخلص الدبلومة دي اني هدرس عربي بنية التعليم وبنية اني انفذ اللي اتعلمته في الدورات علي الأولاد بشكل عملي .
وليد : ما شاء الله ربنا يوفقك مهنة التدريس جميلة برده للست انا موافق .
وسام : موافق! هههههه
وليد : طب مش موافق هههههههه .
_ راسم الدور بدري اوي _
وتمت المقابلة الفردية والمقابلة الجماعية علي خير بتحديد موعد الخطوبة وهتكون علي الضيق في بيت وسام وعقبال كل عرسانا وعرايسنا .

رغد في الحضانة :
جوان : يا رغد يا رغد, قومي من علي كرسيا .
رغد : لا دا مكاني أنا .
جوان : قومي لاحسن أجيبلك الشيطان أبو عين حمرا وشعر منكوش وعنده ضوافر كبييييرة وشكله يخووووف وهيطلعك في الضلمة يا ماما .
رغد : يا مااااااااما .
الميس سمعت جوان وقالت: مين قالك الكلام دا يا جوان ؟
جوان : عادي يا ميس , مش هو الشيطان كدة ؟! اخواتي هم اللي قالولي .
الميس : لا يا حبيبتي كلامهم غلط , احنا منعرفش شكل الشيطان ولا كمان نعرف شكل الملائكة الجميلة , ربنا أخفاهم عننا فمينفعش حد يقولي شكل الملائكة ولا شكل الشياطين واللي يقولي كدة اقوله كلامك غلط , ماشي يا حبايبي .
والميس طبطبت علي رغد عشان حست انها خافت من كلام جوان .

ضياء وزمايله في الشغل :
مجدي : الحمد لله يا ضياء اننا قدرنا نسلم الشغل الجبل دا .
ضياء : الحمد لله مفيش أحلي من الإصرار والنشاط والعزيمة والدعاء .
باسم : انما ايه النشاط دا يا عم مجدي .
مجدي : انا طول عمري نشيط بس كنت مدكن هههههه .
ياسر : لا وايه ضياء كان منطلق في الكلمتين الانجليزي اللي قالهم قدام المدير ههههه , بس علي فكرة كلمة ديون بالانجليزي debt ال b هنا مش بننطقها ههههههههه .
ضياء : حد قالك تصححلي حاجة ! اللي عنده كلمة كويسة يقولها واللي مش عنده يكتمها احسن بدل ميكسف نفسه .
ياسر : ايه يا عم هو الهزار مينفعش معاك , وبعدين انا كنت بقولك رأيي بصراحة .
ضياء : هزار ايه وصراحة ايه دا استهزاء بالناس يا محترم .
ياسر : لا لا يا ضياء انا مقصدش صدقني انا ساعات كدة بقول كلام مش قاصد معناه, انما انت ما شاءالله طلعت قدها وقدود .
ضياء : ولا تقصد, كلامك لا يعينيني بأي شيء _ هو بيعبر عن اللي ف قلبك _ المهم لو عاوز تكلمني تاني تخلي بالك من كلامك معايا لاني اقدر ارد عليك واجيبلك بلاوي في شغلك زي منت قاعدلي ع الواحدة كدة فبلاش يكون دا التعامل بينا خلينا بُعاد او نتعامل بالحُسني .
ياسر : يا عم انت كبرت الموضوع ليه! هات راسك ابوسها حقك عليا .
باسم : متصلوا علي النبي يا جدعان عاوزين نفرح بضياء ومجدي لانهم سبب في ترقيتنا كلنا .
شكري : احلي تورتة لأحلي ضياء ومجدي الجدعان الأبطال الناجحين .

والمدير دخل عليهم وجمع كل العاملين بشركته وألقي السلام عليهم وقال : انا سعيد وفخور بالاستاذ ضياء والاستاذ مجدي , لانهم قدروا في وقت قليل جداا انهم يخلصوا الشغل المطلوب منهم وبأعلي جودة وقدروا يتخطوا ضعفهم في اللغة الانجليزية وفي برامج الأوفيس فأنا بحييهم أمام الجميـــع وبطلب منهم المزيد والمزيد والمزيد هم وباقي زملائهم حتي تتقدم شركتنا لتكون شركة دولية ثم عالمية بعون الله اولا ثم بجهدكم جميعا ايها المحاسبين والإداريين الكِرام ,
فليتفضل الاستاذ ضياء باستلام مكافأته البسيطة مني وتصفيــــــــــــــق ,
وليتفضل الاستاذ مجدي باستلام مكافئته ايضا وتصفيق ,
وتم صرف مكافأة لكل قسمهم وشكرا لكم .
مجدي : هييييييييييييييه مبروك يا ضياء يا صديقي ياللي اتسببت في نجاتي بعد ربنا بجد ازاي بيقولوا مفيش صاحب بيتصاحب !وانا عندي ضياء احلي صاحب.
ضياء : ههههه حبيبي يا زميلي , قل بفضل الله وبرحمته فبذلك فليفرحوا هو خير مما يجمعون , يلا روح فرح عيالك .

ضياء كلم شيماء وقالها تسبقه علي بيت ماما وبابا _ ليحتفل معهم _ .



محمد ابن الحج مختار العطار :
محمد : بابا عاوز فلوس .
الحج مختار : فلوس ايه انت مش لسه واخد من أمك امبارح 50 ج , غور مفيش فلوس معايا واياك تطلب مني اي جنيه روح لأمك اللي مدلعاك يا ضايع.
محمد : بقي كدة !
الحج مختار : قصدك ايه يا وله وترااااااخ علي وشه .

خرج محمد من دكان والده الحج مختار شايط وفي أعلي درجات الغضب منه + تأثير البلاء الذي دمر شبابنا .
محمد وأصحابه :
محمد _وش مقهور وحزين _ : انا عاوز اروح أولع المحل علي دماغ ابويا .
سمير : ايه يا عم انت اتجننت دا ابوك يله اوعي تأذيه مهما حصل , ربنا هيعذبك .
حامد : تعال تعال روق دلوقت , خد دول سلف .
محمد : شكرا يا صاحبي .

وسام وشيماء :
وسام : ازيك يا شوشو عاملة ايه! كان نفسي تبقو موجودين .
شيماء : معلش بقي ضياء كان مشغول جدااا كان بيبات في المكتب اصلا .
وسام : يعيني ربنا يوفقه , الناس كانوا هنا واتفقنا علي معاد الخطوبة إن شاء الله .
شيماء : بجد مبروك يا سومة يا حبيبتي , امتي ؟
وسام : الاسبوع الجاي .
شيماء : ماشاء الله علي خير يارب , طيب بصي انا جيالكوا دلوقت وضياء هيطلع من الشغل عليكوا برده .
وسام : جميل طيب يلا في انتظاركوا .



شيماء والأولاد وصلوا ف بيت العيلة السعيد

ماما : اهلا يا شوشو عاملة ايه والعيال وضياء المشغول دا انا زعلانة منه .
شيماء : معلش والله يا ماما انا اصلا مكنتش بشوفه من الانشغال لسه بقول لوسام كان بيبات في المكتب والله, هو علي وصول إن شاء الله .
بابا : اه مهو قالي ربنا يعينه ويوفقه .

وصل ضياء في وقته بس الحلقة خلصت ....

بالنسبة للفاكهة فالعريس جايب طبق حلويات شرقي مفيش مكان للفاكهة بقي ... والسلام عليكم

[moslma lillah]

الحلـــــــ( 15 )ـــــــقة :

ضياء لسه واصل من الشغل علي بيت نسايبه : سلام عليكم جميعا والف مبروك يا وسام ربنا يتمملك علي خير يارب , انا عاوزكوا انتوا كمان تباركولي قبل معتذر عن عدم وجودي .
كلهم : مبرووووووووووك ,علي ايه بقي ؟؟
ضياء فتح موبايله علي فيديو تكريمه وجمعهم كلهم حواليه وفرّجهم .
_ مضمون الفيديو للتذكير ( والمدير دخل عليهم وجمع كل العاملين بشركته وألقي السلام عليهم وقال : انا سعيد وفخور بالاستاذ ضياء والاستاذ مجدي , لانهم قدروا في وقت قليل جداا انهم يخلصوا الشغل المطلوب منهم وبأعلي جودة وقدروا يتخطوا ضعفهم في اللغة الانجليزية وفي برامج الأوفيس فأنا بحييهم أمام الجميـــع وبطلب منهم المزيد والمزيد والمزيد هم وباقي زملائهم حتي تتقدم شركتنا لتكون شركة دولية ثم عالمية بعون الله اولا ثم بجهدكم جميعا ايها المحاسبين والإداريين الكِرام ,
فليتفضل الاستاذ ضياء باستلام مكافأته البسيطة مني وتصفيــــــــــــــق ,
وليتفضل الاستاذ مجدي باستلام مكافئته ايضا وتصفيق ,
وتم صرف مكافأة لكل قسمهم وشكرا لكم ) _
كلهم : ما شاء الله اللهم بارك ربنا يوفقك ويعينك ويفتحها عليك .
ضياء : فأنا بعتذر والله انتو عارفين ميشغلنيش عنكم إلا الشديد القوي, ربنا يكملها علي خير يارب ويجعله زوج صالح .
ماما : يارب , ماشي يا ضيا سماح المرة دي, عشان كان نفسي تبقي موجود في القاعدة المهمة دي لإنك أخو وسام الكبير بس الحمد لله انك أنجزت في شغلك ولا يهمك .
ضياء : حبيبتي يا ماما, يلا يا شوشو خدي كدة الحاجة دي عاوزين نفرح ونهيص .
احمد : بس قولي بجد يا ضياء انت قدرت ازاي تتعلم في الفترة القليلة دي! انا اعرف ان الحاجات دي صعبة جداااا .
ضياء : مفيش حاجة صعبة الإنسان هو اللي بيحدد اذا كانت صعبة ولا هيقدر يعملها .
بابا : صح , انت بطل يا ضياء ما شاء الله عليك .
احمد : طيب بالمناسبة دي انا عاوز اخد رأيكوا ادخل ثانوي صنايع ولا عام وعلمي ولا أدبي انا محتار جداااا بس انا مايل للثانوي الصنايع.
ماما : صنايع ايه يا وله عاوز تبقي صنايعي !
بابا : يا ست استني اما نشوف مميزات وعيوب كل واحد واحمد بيحب مواد ايه ومش بيحب ايه!
ضياء : بص يا ابوحميد القرار قرارك انت واحنا مجرد هنقولك رأينا واللي نعرفه , اللي اعرفه عن ثانوي صنايع انه كفكرة جميلة وياريت يطبق عندنا في مصر صح ان العلم ميكونش علي الورق وخلاص لا بيشتغلوا عملي ولكن للاسف احنا بلد متأخرة جدااا وكل أدواتها قديمة .
احمد : قديمة ازاي ؟
ضياء : يعني مثلا الثانوي الصنايع كله شغل عملي علي الآلات والأجهزة وكلها قديمة مش مواكبة عصر التقدم اللي احنا فيه فيجي الشاب يتخرج ميقبلش في شغل حلو لإن صنعته وخبرته قديمة ومتأخرة فيروح عليه يعيني الشغل دا وكمان راحت عليه كل كليات الثانوي عام سواء علمي أو أدبي .
بابا : ايوة فعلا وهيبقي ولا حصلنا سما ولا أرض .
ماما : طب وليه ان شاء الله ! منتا شاطر يا احمد في الرياضة والعلوم وفي باقي المواد برده .
احمد : ايوة انا بحب العلوم جدااا وبالذات الفيزياء .
بابا: طيب يا بطل احنا قولنالك رأينا وعليك الاختيار وادعي ربنا يختارلك الخير وانا واثق انك هتعمل الصح فاكر ؟!هههههه.
احمد : هههههه فاكر عم غسان مطر المرعب , طيب ربنا يختارلي الخير شكرا لكم .

وفي هذه الأثناء البنات شيماء ووسام ف المطبخ بيحضروا وليمة العشا وبعده التورتة حلاوة خبر خطولة وسام وترقية ضياء ..
شيماء : في محل فساتين تحفة فتح جمبي , عاوزاكي تبقي قمر ان شاء الله وانا عليا المكياج .
وسام : طيب اعمليلي بروفا كدة انهاردة , شوفتي المكياج الموضة اليومين دول ؟!
شيماء : طبعا دا البنات اتجننت , شوفتي بيغيروا شكلهم من الألف للياء بس متقلقيش انا هظبطك وهتبقي قمر إن شاء الله, المهم عاوزين نحضر البيت ونظبطه وهنعزم مين وكدة لان هتلاقي الاسبوع عدا في ثواني .
وسام : يلا طيب نطلع ونقدم الحاجة ونتكلم معاهم .

رغد : جدو جدو .
جدو حسين : حبيبة جدو وقلب جدو .
رغد : انا عاوزة حتة الشكولاتة بتاعتك دي .
شيماء : ينفع كدة يا رغودة ؟ عيب منتي معاكي حتتك .
جدو : يا سلام ! سيبيها يا بت يا شوشو ,اتفضلي يا قلبي احلي شكولاتة لحبيبة جدو واحلي حتة لأنوس كمان .
أنس : لا يا جدو شكرا انا معايا حتتي وفيها شكولاتة , عيب اخد من حد .
جدو : لا مش عيب يا حبيبي طالما انا اللي بعطيك وانت مطلبتش فمتكسفش ايدي, وهنا قاعدة تربوية يا شيماء ( الامتثال للكبير هو الأدب ) .
شيماء : يعني ايه يا بابا ؟
بابا : يعني سماع كلام الكبير _ الكبير سناً أو مقاماً أو الإثنين معاً _ يعتبر هو الأدب حتي لو مخالف طباعي , يعني مثلا الأطفال متعودين علي شيء معين في بيتهم زي مفيش أكل الشارع وييجوا عندي فنعطيهم انا او جدتهم مثلا بونبوناية او شكولاتة اسمعك تقولي اصلهم عندهم برد او مش متعودين عليه فالأفضل هنا انك مكتسفيش ايد الكبير, ومش كل حاجة غلط اقول عليها عيب لا في حاجات عيب وفي حاجات ميصحش نعملها فالعيب هي الحاجات اللي ليها علاقة بالفُحش والبذائة زي مثلا مينفعش نقلع قدام حد او نسيب باب الحمام مفتوح علينا أو نشتم , واللي ميصحش زي مثلا ان اخد حاجة مش بتاعتي او اضرب اختي .
شيماء : انا مقصدتش والله يا بابا , ربنا يزيدنى أدب ويباركلنا فيك .
بابا : منا عارف يا بت, أنا قلت ألفت انتباهك بس .

ماما :طيب احنا كدة الوقت هيجري انا هكلم خالاتكوا وهقولهم انها خطوبة علي الضيق .
وسام : مش لازم يا ماما , مهي خالتي سهير لما فاتن بنتها اتخطبت مقالتش لحد .
ماما : بس كلنا زعلنا صح ولالأ ؟
شيماء :والله هو موضوع مُحير متقوليش يزعلوا منك , تقولي يحسدوكي .
ماما : بصوا انا مبحبش أزعل حد, هو كل واحد براحته وخالتك لما عملت كدة اكيد كان عندها وجه نظر برده او مكنتش تعرف ان دا ممكن يزعل حد وبعدين متنسوش حاجة !.
شيماء : ايه هي ؟
ماما : ان الخطوبة في البيت بتبقي خنقة والعائلات ما شاء الله بتبقي كبيرة انما لو في قاعة بتبقي واسعة وبتعزمي كله بقلب جامد فالبيوت خنقة وضيقة فالواحد بيبقي عاوز عدد قليل .
وسام : ماما عندها حق احنا نقول, وخالتي سهير حبيبتنا كلنا _ عشان منديش فرصة للشيطان اننا نغتاب حد ربنا يسامحنا _ .
شيماء :اصلها مش جواز عشان كله يجي إنما دي وعد بالجواز ويا تصيب ويا تخيب مقصدش عليكي يا سومة ربنا يتمملك فرحتك علي خير يارب اقصد ياما خطوبات اتفشكلت والبنات نفسيتها بتتعب لما تدعو الناس في كل مرة وميحصلش نصيب .
ماما : انا هعمل اتصالاتي وانتو شوفوا بقي زينة الشقة ومكياج وسام وفستانها وانا وأبوكوا نكلم الناس ونفكر في الأكل .

محمد ابن العطار بيجري في الشارع زي المجنون , شكله عامل مصيبة ....يا تري عمل ايه ؟؟؟
.
.
هنعرف الحلقة الجاية إن شاء الله والسلام مسك الختام .....

#مسلسل_البيت_بيتك
#moslma_lillah
#منتدي_الطريق_إلي_الله

[محبة الحبيب محمد]

جميل جدااا أختنا
حلوه اللفتات دي
جزاك الله خيرا

[moslma lillah]

جميل جدااا أختنا
حلوه اللفتات دي
جزاك الله خيرا

واياك غاليتي

[menna elshugiri]

تأخرتم كثيرا على الحلقة .. اين انتم

[محبة الحبيب محمد]

تأخرتم كثيرا على الحلقة .. اين انتم

ابشري أختي
الأخت مسلمة تكتبها وستنزل إن شاء الله
شكرا على المتابعه

[moslma lillah]

تأخرتم كثيرا على الحلقة .. اين انتم

حاضر غاليتي ، اعتذر ع التأخير ،
في الطريق ان شاء الله ،
اسعدتني متابعتك جدا اختي واهلا ومرحبا بكي معنا

[امة الله 2015]

بسم الله ما شاء الله خيالك واسع
نفع الله بك

[moslma lillah]

بسم الله ما شاء الله خيالك واسع
نفع الله بك

تسلمي يا غالية ،
بوركتِ