Tweet
قعدة مع نفسك :)
ممكن تقعد معانا شوية و تكمل قراية للأخر ؟
البنى ادم مننا 3 أنواع :
-نوع عارف الصح و بيعمله و ماشى بيه
-نوع عارف الصح و بيحاول يمشى بيه
-نوع عارف الصح و مبيمشيش بيه و مش ناوى كمان
(متقوليش ان فى حد ميعرفش الصح أصلا)
كل نوع من دول فيه درجات
أول نوع فيه اللى مداوم ع الصح على قد ما يقدر مهما كان اللى حواليه ، و فيه اللى بيتأثر كتير بالظروف ، و اللى محتاج زقة كل شوية .
تانى نوع ده من أمنياته انه ينضم لأول نوع، بس بيحس ان دايما فى حاجات معطلاه أو بتشده لتحت كل ما يفكر يطلع لفوق.
تالت نوع بقى قفل الموضوع ده من أول سطر، مش عايز يواجه نفسه ولا يشوف ان هو غلط "أنا كده" ، "يا واد يا مؤمن" ، "انت هتعملنا فيها شيخ" ، ....
أول نوع ده لازم يوصل لمرحلة التحدى و التحكم، انه يبقى متحكم ف نفسه و بيخضعها لرغباته ف انه يفضل يعمل الصح مهما كان اللى حواليه و يفضل متمسك بمبادئه ف الزمن الجميل ده ، و يدوّر دايماً ع اللى يزقه لقدام مش يشده لوره، و يبقى عارف ان "أحب الأعمال الى الله أدومها و ان قل" يعنى يشوف هو يقدر يعمل ايه و يبقى مداوم عليه و يفضل يعمل الحاجة دى بكل الطرق و ينفذ الخطة اللى ف دماغه، حتى لو كان عايز يداوم على انه يصلى ركعتين قيام كل يوم أو يصحى يصلّى الفجر جماعة مثلاً، و عشان كده لازم يكون ظابط الخطة صح ، مش يقول أنا عايز أعمل كذا و يسيبها للظروف (كمثال: أنا دلوقتى عايز أصحى كل يوم أصلى الفجر جماعة ، طيب تمام أنا هنام الساعة 8 مثلا و أصحى قبل الفجر أصلى و أبدأ يومى) (على فكرة اليوم كده بيبقى مريح جداً)
و الكلام ده ف كل حاجة مش ف العبادة بس
النوع التانى ده عايز قعدة رجالة مش أكتر ، شوفلك ساعة كده تقدر تقعد فيها لوحدك خالص ف هدوء ف مكان مفهوش أى حاجة تعملها لا كمبوتر ولا بتاع ، و هات ورقة و قلم و حاسب نفسك، أنا بعمل ايه غلط؟ طب ليه بعمل كده؟ طب اقدر اعمل الصح ازاى أو ايه أول خطوة اخدها؟ ، أنا هعمل كذا كذا دلوقتى ، و لما أشوف فلان هقول له كذا ، بتحط خطة عشان تبقى أحسن و بتواجه نفسك أول بأول، هل بتخلى عن قيمى و مبادئى عشان قعدة حلوة و شوية هزار و شتيمة؟ هل صحابى (اللى بعتبرهم كده) هما اللى بيجرونى لكده؟ ممكن، ما أنا لما ببقى لوحدى بشوف ان اللى احنا بنعمله ده غلط، هل علاقتى بربنا كويسة؟ بصلى و منتظم ولا بكسّل و بعدى؟ بغش؟ (لا دى عايزة قاعدة لوحدها) ، بكدب؟ بتكلم ع الناس من وراهم؟ ....
كل ده عايز ارادة عشان تاخد قرار مش أكتر، تاخد قرار انك أول ما الادان اللى جى يأدن هتقوم تتوضا و تنزل تصلى ف الجامع اللى تحت بيتكو و تدعى و تتذلل لخالقك و تطلب منه ييسرلك الطريق الصح اللى يرضاه، لو صلاتك بقت صح حياتك هتتظبط كتير و اسأل مجرب.
اعمل كشكول فيه جدول بمواعيد الصلاة و صليت ايه ف معاده و ايه لأ، عملت ايه غلط النهارده و بكرة هتصلحه بكذا ، قيّم نفسك على طول و واجهها عشان تعرف تبقى أحسن.
هتبدأ أول ما تخلص قراية الموضوع ده :)
أما النوع التالت بما انه مبيقراش معانا دلوقتى أصلا، فمحتاج انك تفضل وراه تنبهه و تزن عليه انه مينفعش يفضل كده، لو تأكدت انه مش هيقتنع و هيفضل يجرك معاه لتحت بس (مش لازم يكون قصده بس انت أكيد هتتأثر بيه) ابعد عنه و ادعيله ربنا يهديه، لأن الصاحب اللى اخترته غلط ده مش هينفعك بحاجة لما تبقى زيه
(الْأَخِلَّاء يَوْمَئِذٍ بَعْضُهُمْ لِبَعْضٍ عَدُوٌّ إِلَّا الْمُتَّقِينَِ )
اللهم اجعلنا من المتقين
منقول
تعليق