Like dissolves Like -- المثيل يذيب المثيل !

[امة الرحمن/فاطمة]

السلام عليكم ورحمة الله وبركاته

سبحان الله بتمر علينا في شريط حياتنا ومضات إيمانية ورسائل ربانية كتير من (جنس الدنيا) اللي احنا عايشينها

لكن محتاجة بس قلب يقظ يلقط الرسايل دي..ويتدبرها ..ويترجمها لمعنى يتقرب به لربنا عز وجل.



(طبعا الموضوع مش هشرح فيه دروس كيمياء )

لكن اعتبروه رسالة و دعوة أن كل واحد يبحث في مجال دراسته عن الرسائل الربانية اللي ربنا يرسلها له من (جنس الدنيا) بتاعته...ويفيدنا بخواطره دي..
هبدأ مع أول خاطرة

(1)




المهم يعني ايه
Like dissolves Like
؟؟

دي قاعدة في علم الكيمياء معناها
أن المثيل يذوب في مثيله
أو جنس مثيله

يعني المادة العضوية تذوب في المادة العضوية
زي مثلا البوية بتذوب في الجاز
عشان كده نلاقي لما حد هدومه بتتبقع بالبوية بيغسلها بالجاز


وكذلك المادة ذات الروابط الأيونية تذوب في مركب ذي روابط أيونية
زي الملح بيذوب في الماء


سبحان الله!

المعنى ده ممكن نسقطه على ذنوب كتير في حياتنا
الذنوب هنا = (المادة اللي محتاجين نذوبها)
والذنوب دي كما أخبر النبي صلى الله عليه وسلم بتعمل نكتة سوداء... (بقعة) على القلب
فاحنا محتاجين نذوب البقعة دي من جنس ومثيل المادة دي


مثلا عصيت ربنا بعيني
فأعمل في المقابل طاعات كتير بعيني تذيب أثر بقعة المعصية في قلبي:
كالنظر في المصحف
عبادة التأمل في مخلوقات الله
البكاء من خشية الله
وكلها طاعات من نفس الجنس (العين)

عصيت ربنا بلساني
فأعمل في المقابل طاعات كتير بلساني تذيب أثر بقعة المعصية في قلبي:
كذكر الله
تلاوة القرآن
قول الطيب من الكلام وإفشاء السلام

عصيت ربنا بإيدي
فأعمل في المقابل طاعات كتير بإيدي تذيب أثر بقعة المعصية في قلبي:
كالكتابة على الكيبورد في منتدانا هنا : )


عصيت ربنا بأذني
فأعمل في المقابل طاعات كتير بأذني تذيب أثر بقعة المعصية في قلبي:
كسماع القرآن ودروس العلم

عصيت ربنا في مكان
فأعمل في المقابل طاعات كتير وفي نفس المكان


وكل الكلام الكتير ده اختصاره في قول الله تعالى:
"وَأَقِمِ الصَّلاةَ طَرَفَيِ النَّهَارِ وَزُلَفاً مِنَ اللَّيْلِ إِنَّ الْحَسَنَاتِ يُذْهِبْنَ السَّيِّئَاتِ ذَلِكَ ذِكْرَى لِلذَّاكِرِينَ "
[هود:114]


وجزاكم الله خيرا


منقول من منتدي أحلي حياة في طاعة الله

القاعدة الثانية


القاعدة الثالثة


القاعدة الرابعة


القاعدة الخامسة



القاعدة السادسة


القاعدة السابعة


القاعدة الثامنة

[فاطمة سعد]

رد: Like dissolves Like -- المثيل يذيب المثيل !

وعليكم السلام ورحمه الله وبركاته

راااااائع جداا يا فاطمة فعلا راائع
تقبل الله منا ومنكم

[~باغية الجنان العلى~]

رد: Like dissolves Like -- المثيل يذيب المثيل !

جميـــل يا فاطمة
بارك الله فيكِ على طيب النقل


في دراستي كانت تستوقفني عظمة الخالق في خلقه
في مادة التشريح الجزء الفلاني تم اكتشاف الحكمة من خلقه بهذه الطريقة


في مادة الفيسولوجي هذه العملية تحدث بهذه الطريقة لاجل كذا
وهذا الانزيم موجود في مكانين والسبب هو رابط يجمع بين المكانين
والظروف التي تتاح هنا هي الظروف المناسبة تماما ...والانزيم لا يعمل الا كما يجب


وفي مادة الاجنــة ,,كم يلزمنا
وقفــــــــــــــــــــــــات
ولا يسعنا حينها الا ان نقول {فَتَبَارَكَ اللَّهُ أَحْسَنُ الْخَالِقِينَ}


وهكذا في موضوع دراسة


نرى في داخلنا ابداع الخالق في خلقه


فالتنظيم والحكمة ودقة عمل اجزاء الجسم وما فيه حتى اصغر ذرة او جزء


فسبحان ربي


والحمد لله على عظيم نعمائه


ونسأل الله ان يغفر تقصيرنا واسرافنا في امرنا


فنحن نخرق في نعمه ولا نستطيع لا عدا ولا حصرا


ورغم ذاك لم تنهانه رحمته جل في علاه بنا واحسانه الينا عن معصيته !!


فالله المستعان


______
قال جل شأنه


{ وَفِي أَنْفُسِكُمْ أَفَلا تُبْصِرُونَ }

[امة الرحمن/فاطمة]

رد: Like dissolves Like -- المثيل يذيب المثيل !

بارك الله فيكن

ورفع الله قدركن.. اللهم آمين

صدقت باغية الجنان العلي انتي مثلي

سبحان الله وفي الأمراض سبحان الله الواحد شاف أد إيه النعم وأد إيه لو خطأ واحد ممكن يقلب الدنيا خالص

[امة الرحمن/فاطمة]

رد: Like dissolves Like -- المثيل يذيب المثيل !

(2)

قاعدة شبيهة ممكن تندرج تحت نفس الموضوع لكن من وجه آخر..

قاعدة

Like loves Like

معناها

المثيل ينجذب لمثيله

أو المثيل يحب مثيله

فكذلك اللي قلبه مفتون بحاجة غصبا عنه قلبه هينجذب للحاجة دي ومثيلاتها..

قلبه مفتون بشهوات هيفكر وينجذب للشهوات ومن يثيرون شهواته

قلبه مشغول بدنيا هيفكر وينجذب للدنيا وصحبة الدنيا

وعلى العكس

قلبه بيحب الطاعة هينجذب ويحب الطاعة وأهل الطاعة

قلبه مشغول بالآخرة هيفكر في الاخرة

القاعدة دي تتعب فعلا

لأنها بتعرف الانسان حقيقة قلبه !!

قلبي ..

طاهر .. ولا .. نجس؟!!

وكل واحد يعاين كده ويراجع قائمة اهتماماته ويشوف هو بيحب ايه ويكره ايه

وبيحب على أساس ايه ..ويكره على أساس ايه

وبيحب مين..ويكره مين

النبي صلى الله عليه وسلم قال:

"المرء على دين خليله فلينظر أحدكم من يخالل"

بص في وش صاحبك كده

وشوف ده الصاحب اللي أحب أحشر معاه يوم القيامة وأدخل معه الجنة؟

ولا العكس...هل أحب الصاحب التاني ده بهيئته وألفاظه وريحة فمه دي

أبقى أنا مثيله : ( ؟!!

صاحبتي اللي حجابها مدلع و صوتها عالي وألفاظها ....

أبقى أنا مثيلتها؟!]

يقول الله تعالى:

"الْمُنَافِقُونَ وَالْمُنَافِقَاتُ بَعْضُهُم مِّن بَعْضٍ"

كأنهم عجينة واحدة وصنف واحد !

وفي مقابلها:

"وَالْمُؤْمِنُونَ وَالْمُؤْمِنَاتُ بَعْضُهُمْ أَوْلِيَاء بَعْضٍ "

جاء في تفسيرها:

إن المنافقين والمنافقات مع وحدة طبيعتهم لا يبلغون أن يكونوا أولياء بعضهم لبعض .

فالولاية تحتاج إلى شجاعة وإلى نجدة وإلى تعاون وإلى تكاليف.

وطبيعة النفاق تأبى هذا كله ولو كان بين المنافقين أنفسهم . إن المنافقين أفراد ضعاف مهازيل , وليسوا جماعة متماسكة قوية متضامنة , على ما يبدو بينهم من تشابه في الطبيعة والخلق والسلوك . والتعبير القرآني الدقيق لا يغفل هذا المعنى في وصف هؤلاء وهؤلاء . .

يعني الصاحب المؤمن اللي بمصاحبتي له إن شاء الله أكون مثيله ...هتاخد منه مزايا وماتعدش!

وخطورة

Like loves Like

أننا يوم القيامة...هنبقى صنف من 2
( فريق في الجنة وفريق في السعير)
ونحشر للجنة أو النار على حسب الغالب علينا

كما قال تعالى:

"لِيَمِيزَ اللّهُ الْخَبِيثَ مِنَ الطَّيِّبِ وَيَجْعَلَ الْخَبِيثَ بَعْضَهُ عَلَىَ بَعْضٍ فَيَرْكُمَهُ جَمِيعاً فَيَجْعَلَهُ فِي جَهَنَّمَ أُوْلَـئِكَ هُمُ الْخَاسِرُونَ"

أسأل الله أن ينجينا من النار ويجعل عاقبتنا الحسنى!

طيب لو بتحب حاجة حلوة لكن لا ترى نفسك مثيلها؟

أبشر !..لعلك تكون مثله يوما ما...بس انت قارب وسدد

يعني كن أقرب ما تكون منه... زي ما بيقول المثل

"من جاور السعيد يسعد"

ولعلك تدخل في قول الشافعي رحمه الله:

أحب الصالحين ولست منهم لعلي أن أنال بهم شفاعة

وأكره من تجارته المعاصي ولو كنا سواء في البضاعة

فالحب تابع لحقيقة المحبوب!

كما قال ابن القيم رحمه الله:

"كن من أبناء الآخرة و لا تكن من أبناء الدنيا ، فالإبن يتبع أمه"

[lo2lo2.maknon]

رد: Like dissolves Like -- المثيل يذيب المثيل !

سبحانك يارب
موضوع قيم جدا جزاكي الله خيرا يا فاطمه
والله مواضيعك قيمه جدا ومفيده جدا
انا خرجت من موضوع التنميه البشريه كان رائع جدا
جيت لقيت ده احسن واحسن
جزاكي الله عنا كل خيرا
ومنتظرين المزيد من ابداعاتك

[فاطمة سعد]

رد: Like dissolves Like -- المثيل يذيب المثيل !

ماشاء الله تعالى

نفع الله بك اختنا
مكن خدمة بقا من فضلك

يا ريت نحافظ على تخريج الاحاديث وكمان ذكر اسم السورة التى وردت فيها الايه حتى يزداد الموضوع بريق وجمال .......................

[الفلسطينية هبه النصراوي]

رد: Like dissolves Like -- المثيل يذيب المثيل !

و عليكم السلام و رحمة الله و بركاته

تبــــــــــارك الرحمــــــــــن


موضوع رااااااااائع أحسنتِ صنعاً و نقلاً أختي الكريمة

وفقكِ اللــــــــــــه لما يحبه و يرضاه

[امة الرحمن/فاطمة]

رد: Like dissolves Like -- المثيل يذيب المثيل !

الخاطرة دي منقولة عن أحد إخواننا الأطباء

(3)

السلام عليكــم ورحمـة الله وبركاتــه ،،



في حاجة في الجسم اسمها عملة الطاقة

ATP

دي عملة الجسم بيستخدمها لما يبذل اي مجهود زاد او قل

لكن اذا زاد المجهود بزيد استهلاك وحدات الطاقة دي

وكلما قل وسهل المجهود قل استهلاك العملات دي

المهم مثال بنحسه كلنا :

طلوع السلم والنزول منه

طلوع السلم دا شيء مجهد جدا لذا يحتاج لاستهلاك

ATPs

كتير

عكس نزول السلم فعل سهل جدا ومقدار استهلاك وحدات الطاقة دي بتكون قليلة برده

كذلك بحس ان لو واحد عايز يبقي حاجة كويسة في شأن سواء دنيويا او أخرويا ويكون قدره عالي

لازم يستهلك جهد "ِATPs " ;كتير

لو عايز يجيب تقدير في الكلية لازم يذاكر جامد ويجتهد

أما لو مش في دماغه تقدير ولا حاجة دا امر سهل جدا ومش هيستهلك منه اي ATPs

هو بس يقعد يلعب وينام وخلاص

كذلك لو واحد عايز ترتقي درجاته في الفردوس الأعلي

ربنا يرزقنا واياكم الفردوس الأعلي بغير سابقة حساب ولا عذاب

آمين

لذلك لابد من الاجتهاد في الطاعة والتقرب لله تعالي

أما لو مش في دماغه فده يكفيه انه ينام ويعمل اللي بداله من معصية لله وما اسهلها في وقتنا دا

بس دي نقطة

ــــــــــــــــــــــــــ

ممكن الموضوع دا يؤخذ من جهة اخري :

ان طلوع السلم بيبقي عكس اتجاه الجاذبية علشان كدا بيبقي صعب

والنزول منه بيبقي مع اتجاه الجاذبية علشان كدا بيبقي سهل

فبحس ان الجاذبية دي بالنسبة للأنسان بمثابة " هواه "

لو واحد بيعمل حاجة وهو في اتجاه جاذبيته "-اقصد هواه ومحابه - بيعملها سهل جدا ومش بيحس انه عمل مجهود

أما لو بيعمل حاجة والحاجة دي في عكس اتجاه جاذبيته فالأمر هيبقي صعب اوي وربما ميعملهاش اصلا

لصعوبتها علي نفسه

وكل واحد له جاذبيته

واحد بيحب معالي الأمور والطاعة وواحد بيحب سفاسف الأمور والمعاصي

لذلك ياريت نخلي الجاذبية بتاعتنا في اتجاه الخير والطاعة لا في الاتجاه المعاكس




فكل واحد برده يشوف جاذبيته لأي شيء ويخلي جاذبيته دايما في اتجاه مراضي الله عز وجل

أسأل الله ان يرضي عني وعنكم

وأعوذ بالله ان اذكركم به وأنساه

آمين

والحمد لله رب العالمين

[امة الرحمن/فاطمة]

رد: Like dissolves Like -- المثيل يذيب المثيل !

بإذن الله أختي المصرية فيروز سيتم

بارك الله فيكم جميعا
ورفع الله قدركن وجزانا الله وإياكن كل خير

[فاطمة سعد]

رد: Like dissolves Like -- المثيل يذيب المثيل !

وعليكم السلام ورحمة الله وبركاته

ماشاء الله تعالى اختنا الكريمة
جهد رائع

أسأل الله ان يرضي عني وعنكم

وأعوذ بالله ان اذكركم به وأنساه

آمين

اااااااااااااااااااااامين

[امة الرحمن/فاطمة]

رد: Like dissolves Like -- المثيل يذيب المثيل !

جزاكِ الله خيرا

وبارك الله فيكِ

[امة الرحمن/فاطمة]

رد: Like dissolves Like -- المثيل يذيب المثيل !

(4)

تخيل لو جيت تريح ظهرك على نجيلة جنينة فنمت من غير ما تاخد بالك على (مستوطنة نمل) !!

أكيد طبعا هتفضل تتنطط وتخبط في جسمك من أكل النمل

طيب ايه اللي حسسك بقرص النملة أو مجرد مشية النملة عليك؟

السر في الخلية العصبية


Neural Transmission

انتقال الاشارات بين الخلايا العصبية



في جسمنا..سبحان الله .. ملايين الخلايا العصبية هي اللي بتوصل الاحساس من الجلد لحد المخ .. والمخ هو اللي بيبعت إشارة لأعضاء جسمك أنها تنتفض وتتحرك عشان تتخلص من ألم القرصة

فقرصة النملة دي عاملة زي إشارة كهربية بتعدي من الخلية العصبية لجارتها ثم لجارتها لحد ما توصل للمخ

وإلا ما كانتش وصلت !!


وكون أن كل خلية بتوصلها لجارتها فده معناها أن في
* طرف مُرسِـــل
* طرف مُستقبـِـل


كذلك ..
ده الحال في عملية افتتان رجل بامراة أو العكس ..عملية من طرفين:

طرف مرسل : الفاتن أو الفاتنة

طرف مستقبل : المفتون أو المفتونة

و في العملية دي ليس المرسل بالضرورة "فاتنا كان أو فاتنة" هو المسئول عن حدوث الفتنة

فقد يكون الخلل في الاستقبال

و ده يحصل لو لم نجد أن الطرف المرسل قد أرسل شيئا "فوق المسموح به"

زي مثلا بنت محترمة لابسة حجاب طويل وساتر.. فتعرض لها واحد وقعد يعاكسها

هي ماعملتش حاجة !
المشكلة فيه هو .. هو اللي عنده خلل ومفتون

لكن هي لازم تفكر برضو هل أنا فيّ حاجة أو عملت حاجة سببت فتنة لغيري وأنا مش واخدة بالي ؟!

وكذلك العكس صحيح..

الطرف المستقبل مش هيستقبل رسالة إلا لو كان الطرف المرسل فعلا بعت رسالة

فمينفعش يجي الطرف المرسل ويقول أنا ما بعتش حاجة هو اللي عمال يستقبل رسايل من الهوا مع نفسه!


فاحذر أخي الكريم أن تكون سبب فتنة لإحدى الفتيات من حيث لا تدري!
سواء بكلمة .. أو بإشارة .. أو بإبتسامة...أو حتى بكلمة ثناء

ممكن ما تكونش قاصد تفتنها أو توقعها في شباكك
لكن أنت لا تعلم حالها ولا ضعف قلبها

و برضو الشباب اللي بيروحوا صالات الجيم مخصوووص عشان يبقى شكله كوول ومفتول العضلات ويعجب البنات

أينعم رسالة الفتنة بتاعتك هتوصل بس هتوصل لبنت أنت نفسك هتستحقرها لما تعرف أنها على استعداد تسيبك عشان واحد شكله أحلى منك !

فأنت من قصيرها خلي شكلك حلو عشان نفسك وعشان أنت إنسان مسلم.


وكذلك أنتِ أختي الحيية الطيبة
تفقدي شكل حجابكِ عند خروجكِ من البيت
تفقدي نبرة صوتكِ وانتقي كلماتكِ إذا "اضطررتي" لخطاب رجال حتى لو كان رجل كبير في السن !!

أنتِ مش بتشوفي راجل في سن السبعين ولازالت عنده شهوة رغبة في الزواج؟؟

وأنتِ بالذات يزيد التأكيد عليكِ أكثر لأن النبي صلى الله عليه وسلم حذّر الرجال من فتنة النساء

وحديث عن أن المرأة لو خرجت من بيتها متعطرة فهي زانية
و شوفي حتى التشبيه...عشان يبشع المسألة عندك
لأنها هتفتن كل رجل مرت عليه..

وفي أحاديث تانية بتؤكد أن المرأة إذا خرجت من بيتها استشرفها الشيطان وزيّنها في عيون الرجال

معنى الحديث ده بالذات لو فهمتيه هتتخضي !!
أن الشيطان يجي عند كل جزء من جسدك ويزينه في عين رجل

أكيد احساس صعب جدا لما تتخيلي أنكِ ماشية (فتنة متنقلة)

فأنتِ خذي بالأسباب واقطعي الارسال عن الشيطان وعن الرجل المفتون

قال الله تعالى:
"إِنَّ الَّذِينَ فَتَنُوا الْمُؤْمِنِينَ وَالْمُؤْمِنَاتِ ثُمَّ لَمْ يَتُوبُوا فَلَهُمْ عَذَابُ جَهَنَّمَ وَلَهُمْ عَذَابُ الْحَرِيقِ"

وقال سبحانه وتعالى:
"قُل لِّلْمُؤْمِنِينَ يَغُضُّوا مِنْ أَبْصَارِهِمْ وَيَحْفَظُوا فُرُوجَهُمْ ذَلِكَ أَزْكَى لَهُمْ إِنَّ اللَّهَ خَبِيرٌ بِمَا يَصْنَعُونَ 30 وَقُل لِّلْمُؤْمِنَاتِ يَغْضُضْنَ مِنْ أَبْصَارِهِنَّ وَيَحْفَظْنَ فُرُوجَهُنَّ وَلَا يُبْدِينَ زِينَتَهُنَّ إِلَّا مَا ظَهَرَ مِنْهَا وَلْيَضْرِبْنَ بِخُمُرِهِنَّ عَلَى جُيُوبِهِنَّ وَلَا يُبْدِينَ زِينَتَهُنَّ إِلَّا لِبُعُولَتِهِنَّ أَوْ آبَائِهِنَّ أَوْ آبَاء بُعُولَتِهِنَّ أَوْ أَبْنَائِهِنَّ أَوْ أَبْنَاء بُعُولَتِهِنَّ أَوْ إِخْوَانِهِنَّ أَوْ بَنِي إِخْوَانِهِنَّ أَوْ بَنِي أَخَوَاتِهِنَّ أَوْ نِسَائِهِنَّ أَوْ مَا مَلَكَتْ أَيْمَانُهُنَّ أَوِ التَّابِعِينَ غَيْرِ أُوْلِي الْإِرْبَةِ مِنَ الرِّجَالِ أَوِ الطِّفْلِ الَّذِينَ لَمْ يَظْهَرُوا عَلَى عَوْرَاتِ النِّسَاء وَلَا يَضْرِبْنَ بِأَرْجُلِهِنَّ لِيُعْلَمَ مَا يُخْفِينَ مِن زِينَتِهِنَّ وَتُوبُوا إِلَى اللَّهِ جَمِيعًا أَيُّهَا الْمُؤْمِنُونَ لَعَلَّكُمْ تُفْلِحُونَ 31"

[راجيه جوار الحبيب محمد]

رد: Like dissolves Like -- المثيل يذيب المثيل !

ماشاء الله
رااااااائع جداً أختى فاطمه
الله يجعل نقلك هذا فى ميزان حسناتك يارب
و يجزى خيرا صاحب الموضوع أو صحبته

[امة الرحمن/فاطمة]

رد: Like dissolves Like -- المثيل يذيب المثيل !

اللهم آمين وإياكِ بارك الله فيكِ

وجزاكِ الله خيرا