[جديد] ابو معاذ فى الجيش ... ممكن يكون سلسلة

[ضيف]

ازيك يادفعة

معلش بقى ياعساكر

هبدأ معاكم الحكاية لما كنت فى الجيش

وهبدأ من اول جمعة كانت هناك

وايه اللى ممكن استفادة


وممكن يكون الموضوع متجدد بإذن الله








جه عليا اول يوم جمعة و انا في الجيش ( ايام ما كنت في الجيش)



و يوم الجمعة كان اجازة و الناس بتيجي زيارة لولادها اللي في الجيش ، و زي كل الشباب اللي في مركز التدريب كان احساسنا اننا مش هانشوف ناس من بره الجيش غير بعد سنة علي الاقل


و جت الفرصة اني اشوف الناس دول و قلت استلف تليفون من اى حد و اطمن عل اهلي


و فعلا رحت ارض الزيارة مع زمايلي و بدأت اشوف ناس من جديد و الاهالي بيسلمو علي ولادهم و دموع الفرح مغرقاهم ، فاشتقت اكتر اني اسمع صوت اهلي و خصوصا اني كنت قايلهم مايجوش يزوروني ( علشان مايتعبوش نفسهم ) علشان كانوا فى الواحات


و فعلا لقيت واحد جابلي تليفون من اخوه و ماصدقت اتصل بأهلي ، خدت التليفون و اتصلت بس للاسف ماحدش رد



فقلت اكلم اخويا و اشوف ايه الموضوع ، رد عليا و قاللي انه قاعد مع ابويا في البيت علشان امي جتلي زيارة ، ماعرفتش اعمل ايه من المفاجأة


بصيت في الساعة لقيت الوقت بيجري و معدش غير ساعة و ربع قبل الزيارة ما تخلص ، و بدأت ادور في وشوش الناس و اللي كانو بالآلاف و قلبي بيدق و بدأت اتحرك في المكان و اروح و اجي فيه و انا بدور


و فجأة


عيني وقعت علي واحدة من بعيد و حسيت انها امي ، جريت عليها و اتأكدت انها هي و الفرحة مش سايعاني ، رحتلها و خبطت علي كتفها و بصتلي بشكل اول مرة اشوفه في عينها و مش قادر اوصفه و اترميت في حضنها و هي مفتوحة في العياط ( بصراحة ماقدرتش امسك نفسي و اتفتحت في العياط انا كمان )


و كنت اول مرة اعرف معني دموع الفرحة ، و بعد ما هدينا اطمنت منها علي ابويا و خدت تليفونها و كلمته و اطمنت عليه ، و لان الاوقات الحلوة بتعدي بسرعة لقيت الساعة عدت كانها ثانية و الزيارة خلصت و اتقلبت دموع الفرحة لدموع حزن و فراق


و ساعتها بس عرفت قيمة النعمة اللي انا فيها

و عرفت قيمة ان ابوك و امك يكونو راضيين عنك و بيدعولك ،

و خدت نفس كبيييير و رجعت تاني للحياة العسكرية بس المرة دي و انا مطمن شوية ،




نصيحة :

( اعرف قيمة النعمة و هي بين ايدك قبل ما تروح منك ، و احمد ربنا عليها و حافظ عليها ، و خد بالك ان النعمة لو زالت مش كلها بيرجع تاني ) .

واشوفكم بكرة مع

ابو معاذ فى الجيش

[أبومصعب محمود ابراهيم]

رد: ابو معاذ فى الجيش ... ممكن يكون سلسلة

نصيحة :

( اعرف قيمة النعمة و هي بين ايدك قبل ما تروح منك ، و احمد ربنا عليها و حافظ عليها ، و خد بالك ان النعمة لو زالت مش كلها بيرجع تاني ) .

نصيحة غاااااااالية ..... مصداقاً لقوله عز وجل
(لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيد)
فجزاكم الله خيراً شيخنا الفاضل ونفع بكم
وأنا على فكرة لم أدخل الجيش
ففى انتظارك شيخنا لنعلم ماذا يحدث فى الجيش

[محمد عبدالحكيم الكامل]

رد: ابو معاذ فى الجيش ... ممكن يكون سلسلة

مشاء الله تبارك الله
ربنا يحفظك شيخنا
ومنتظرين بقية الحكاية المشوقة
ولكن هوا أنت شيخنا متقدرش تجمد شوية
منا بقالي أكثر من ثلاث سنوات وانا مشوفش أمي ولا أبي ولا أحد من أهلي
جزاك الله خير وبارك الله في عمرك

[حسن العربى]

رد: ابو معاذ فى الجيش ... ممكن يكون سلسلة

السلام عليكم ورحمة الله
ماشاء الله يا ابو معاذ
وفقك الله شيخنا لكل خير
ونصيحتك غالية عندنا
جعلنا الله ممن يستمعون القول فيتبعون احسنه
استمر شيخنا نحن معك متابعون
وفقك الرحمن لكل خير

[(محمود صلاح الدين)]

رد: ابو معاذ فى الجيش ... ممكن يكون سلسلة

جزاك الله خيرا يا ابو معاذ

وعلي فكره انا لسه خارج من الجيش طاظه بقالي 3 شهور بس

فا لو احتاجت اي مساعده احنا ف الخدمه يعنى

بس مش ف الخدمه الوطنيه طبعاااااااااااااا ربنا يبعدنا عنها

والله يا شيخنا انا عمري ما حسيت بان الجيش اللى احنا فيه ده يعتبر رباط في سبيبل الله او جهاد

لانه مجتمع مليئ بالفساد وقلة الادب والمحسوبيه والرشوه والسرقه واكبر ما فيه (سب الدين )

والله عندما خرجت من الباب اخر مره وجاءت في ذهني ان هذه اخر مره ادخل فيها هذا المكان

وجدت نفسي اقول ( الحمد لله الذي نجانا من القوم الظالمين )

يلا بقي كفايا كده عشان انا من امبارح عمال اقول ف كلام يودي ف دهيه ع المنتدي ده

وربنا يوفقك في هذه الموضوع المميز يا ابو معاذ

[ضيف]

رد: ابو معاذ فى الجيش ... ممكن يكون سلسلة

جزاك الله خيرا يا ابو معاذ

وجزاك الله مثله اخى

وعلي فكره انا لسه خارج من الجيش طاظه بقالي 3 شهور بس

فا لو احتاجت اي مساعده احنا ف الخدمه يعنى

نحمد الله على عودتكم بالسلامة
ويسر الله لكم اموركم

بس مش ف الخدمه الوطنيه طبعاااااااااااااا ربنا يبعدنا عنها

والله يا شيخنا انا عمري ما حسيت بان الجيش اللى احنا فيه ده يعتبر رباط في سبيبل الله او جهاد

الله المستعان
بس
مش كل الاماكن كدة علشان انا كنت فى مكان ممتاز وكان معظم من معنا بيصلوا ومنهم رتب كنت احسدهم على تدينهم

لانه مجتمع مليئ بالفساد وقلة الادب والمحسوبيه والرشوه والسرقه واكبر ما فيه (سب الدين )

والله عندما خرجت من الباب اخر مره وجاءت في ذهني ان هذه اخر مره ادخل فيها هذا المكان

وجدت نفسي اقول ( الحمد لله الذي نجانا من القوم الظالمين )

يلا بقي كفايا كده عشان انا من امبارح عمال اقول ف كلام يودي ف دهيه ع المنتدي ده

ليه كدة يادفعة
واذا كان هناك شىء فى المنتدى برجاء اخبارنا به لنبتعد عن اى خطأ ونرتقى معا

وربنا يوفقك في هذه الموضوع المميز يا ابو معاذ

واياكم اخى الغالى
وكمان عاوزينك تبقى معانا على طول ونتواصل اكثر
بارك الله فيكم

[(محمود صلاح الدين)]

رد: ابو معاذ فى الجيش ... ممكن يكون سلسلة

لا لا لا يوجد اي شيئ ف المنتدي ان شاء الله

انت فهمتني غلط بس شوف هذا الموضوع وانت هتفهمني صح
الى متي يا عرب ؟؟؟؟؟؟؟؟؟ الي متي يا مسلمين

الموضوع ده انا كتبته امبارح + الرد بتاع النهارده حاجه عظيمه خالص

يعنى لو كان فيه امن دوله زي زمان

ما كنش زماني معاكم اصلا هههههه

ووالله يا ابو معاذ انا موجود علي طول ومعاكم واريد التواصل دااااااائما معكم ان شاء الله

جزاكم الله خيرا ودامكم علي طاعته

[ضيف]

رد: ابو معاذ فى الجيش ... ممكن يكون سلسلة

وقريبا ان شاء الله نكمل بقية السلسلة

فتابعونا

[ضيف]

رد: ابو معاذ فى الجيش ... ممكن يكون سلسلة

الحلقة التانية

مع

ابو معاذ فى الجيش


بفضل الله تعالى تم اختيارى لأكون خطيب وامام المسجد واستلمت المسجد والمكتبة وكانت ايامى كلها داخل المسجد

المهم

وانتم عارفين الكلام اللى بيكون بين العساكر

حيث

الاسافين والخوابير وخلافة

وكنت قبلها لا امسك سلاح ولا خدمة وكل مهمتى خطبة الجمعة والصلاة واربع دروس كل اسبوع

وافتكر كان هناك شده حرب

فاطروا لنزولى خدمات على الكتيبة اسابيع قليلة

وفى احد الايام

استدعى ظابط الامن والنباطشى الخطيب والامام

اللى هو انا

وذهبت كعادتى دائما انى اتكلم مع الجميع بإرياحية دون الشدة اللى بيعملوها من تقفيز وغيره

المهم

دخلت على ضابط الامن بالشبشب وقلت السلام عليكم

فنظر الىّ وقال وكمان بالشبشب مش كفاية اللى عملتوا امبارح

روح قفز وتعالى بسرعة

رحت قفزت

وقلت السلام عليكم

فقال : فين التحية ياعسكرى ؟؟؟؟

قلتلوا رقيب مجند يافندم

قالى وبتتلامض

انت النهاردة تمامك سجن روح احلق وتمم فى السجن

قلتلوا ليه

قال : نفذ الامر وبعد كده اتظلم

قلتلوا : النهاردة الاربع وازاى هخطب الجمعه وانا سجن

قال احنا هنتصرف

فخرجت من المكتب وانا افكر ازاى هروح السجن واحلق وانا مش عارف ليه
كدة من غير ذنب

وكان هذا الكلام قبل الظهر

فروحت المسجد وصلينا الظهر

وقبل العصر بقليل وجدت افراد الامن بتبحث عنى حتى اتمم فى السجن

وهما مش عارفين ليه اصلا

وانا رافض انى احلق علشان خطبة الجمعة

المهم

قبل العصر قلت انا اعرف ظابط فى كتيبة الدبابات وكان ماشاء الله عليه ملتزم وكان يزورونى كثيرا

فذهبت اليه لأحكى له هذا الامر

فقال : ياشيخ احمد انت جاى ليه علشان اكلم ضابط الامن ؟؟

قلت ايوه

قال طيب قبل ما اكلمه انت ليه مصلتش ركعتين قضاء حاجة
وهتلاقى ربنا يرشدك للصح

المهم

ذهبنا معا لصلاة العصر

وبعد الاذان صليت ركهتين صدقا صلاة ملهوف احسست بعدهم ببرودة على القلب وسكينة لم اعهدها من قبل

ثم

ذهبت لضابط الامن

فوجدت امرا لم احسب له

وجدت الطابط يرسل عساكر الامن

طيب ليه

هو انا خطير للدرجة دية

المهم العساكر قالت اوعى تحلق وتعالى بسرعة

وروحت معاهم

وحكى لى ضابط الامن الحكاية

فقال

بعد ما انت مشيت بساعتين قلت للعسكرى بتاع الاوامر ورينا تمام الشيخ احمد ايه النهاردة على اساس انى تممت فى السجن

يقول ففتحت دقتر الاوامر

فرايت ان اللى كان خدمة ليلة امس عسكرى اسمه محمود عبد المجيد

فقلت لعسكرى الاوامر

هو الشيخ احمد مش هو كان خدمة ليلا

فقالوه : لاء

قال يبقى انا كنت هحبسه غلط

وكان الامر

انه بالمرور على الخدمة ليلا وجد ان فرد الخدمة نايم وعلق منه السلام

فلما قام قالوه اسمك ايه

فقال احمد عبد المجيد

فكتب الضابط اورنيك ذنب باسم احمد عبد المجيد

وانتى الامر بتفهم الامر

وعدت الى مسجدى لتحضير الخطبة

والذى تعلمته من هذا الموضوع :

اللجوء الى الله دوما حتى فى احلك الظروف

[سيف المصرى]

رد: ابو معاذ فى الجيش ... ممكن يكون سلسلة

سبحان ملك الملوك
طالما الموضوع بقى كدا يا رديف ههههههه استقبل منى يا حج
قفز وتعالى بسرعه =))

[(محمود صلاح الدين)]

رد: ابو معاذ فى الجيش ... ممكن يكون سلسلة

ياااااااااااااااااااااااااااااااااااااه ياااااااااااااشيخ ابو معاااذ

والله قلبت عليا المواجع

اياااام ومواقف ومصطلحات كلاميه نفسي امحيها من ذاكرتي نهااااااااائياً

بجد بتعب من تذكر اي حاجه في الايام دي حتي لو حد حكالي عليها كده

ممكن الكلام ده بيحصلي دلوقتى عشان انا ما كملتش سنه خروج من الجيش

وبعيد عن كل السامعين يعنى انا قضيت سنتين وشهرين 26 شهر

سلاح قوات جويه ... ممكن تقولي يعنى انت كنت قوات جويه وزعلان اقولك اه

لاني كنت في السلوم ربنا ما يكتبها علي حد

لا ميه ولا نور ولا فيه شجره توحد الله في المكان كله

يلا الحمد لله وجزاك الله خيرا يا ابا معاذ

وربنا يهدي منظمة الجيش كلها من اصغر عسكري لاكبر رتبه فيه لانهم بجد فيهم ناس ما تعرف اي حاجه لا عن دينها

ولا عن الدنيا حتي .. كل اللي بيفكر فيه الميري .. وازاي استخدمه علي الاصغر مني رتبه حته ولو كان اكبر مني سناً

واكتر كلمه تقريبا قولتها في جيشي كله ... حسبي الله ونعم الوكيل

جزاكم الله خيرا

وفي انتظار الباقي ان شاء الله

[ابواسية]

رد: ابو معاذ فى الجيش ... ممكن يكون سلسلة

سلمت يمينك شيخنا متابهون ان شاء الله نحبك في الله

[ضيف]

رد: ابو معاذ فى الجيش ... ممكن يكون سلسلة

(( 3 ))

ياااااااااه اخيرة هبقى قوة اساسية



مشوار طويل وصعب لمدة 45 يوم لا عارفين نشرب ولا ناكل ولا ننام ولا أي حاجة


لكن كنا بنتصرف

الجيش علمنا أننا نتصرف في أي موقف

وكنت أنا مبسوط جدا بالجو العام المحيط بيا , وكانوا زميلي بيبصوا لي على أني مجنون جاي من كوكب تاني علشان مبسوط في أداء الخدمة العسكرية

وصلت الغردقة


صحراء جرداء لا زرع فيها ولا ماء طبعا ده فى اللواء بتاعنا اللى رايحينه من رايحين نبلبط

هو ده الكلام

كنت مبسوط جدا بوحدتي الأساسية , أنا اتحرمت من الرماية والتدريب على المدفع بتاعي طوال فترة مركز التدريب

لكن دلوقتي هأعوض كل اللي فاتني وهابقى زي (أدهم صبري ) بعرف أستخدم كل انواع الاسلحة

جندي مجند " .... .... ...."

أفنــــــــــــــــــــــــــــدم

" أنت بتعرف تخطب جمعه........ مش كده ؟ "

ترددت في الأجابة ........ لأني كنت اعرف مخزى السؤال .... ولكني أريد أن أحمل سلاحي وأتتدرب عليه وإلا تتضيع فترة خدمتي بوحدتي الأساسية كما ضاعت فترة تتدريبي في مركز التدريب

يالله بقى ما باليد حيلة

" أيوة يا أفندم أنا بعرف اخطب "

" أعملوله جواب الحاق على قيادة اللواء ........... وأديله كل الشغل اللي المفروض يخلص قبل التفتيش بتاع الشئون المعنوية"

قيادة اللواء

اللي بيسمع الأسم لأول مرة ممكن ميعرفش يعني أيه (زي ما أنا سمعته أول مرة )

قيادة اللواء ..... الشؤون المعنوية

مجموعة عساكر بيقودها ضابط برتبة (نقيب ) أسمه (... ... ... ) مسؤولة احضار الترفية للعساكر مع خطب الجمعه والدروس (يعني من الأخر من حقهم يتنططوا على أي حد حتى لو أعلى منهم رتبة أو أقدمية



التفتيش خلص الحمد لله

ونجحت في أول إختبار ليا وخلصت شغل كتير جدا في وقت قياسي مع انى مكنتش محضر خطبة جمعه بس قلت اتكلم عن ايه والحمد لله اخترت خطبة عن الجهاد فى سبيل الله وده خلاني مباشرة اعلق
عريف / ... ... ... بعد مرور وقت قصير

الترقية دي كانت مهمة قوي بالنسبة لي .......... لكن الأهم هي الشهرة الواسعة اللي أخدتها بين القادة والضباط وزملائي .

وبقيت حكمدار الكتيبة .



يوم الخميس الساعة 1:30 باليل

مكنش جايلي نوم

وطلعت أقعد مع زملائي النوبتجية الليلي

قاعدين بنضحك وبنهزر والدنيا ربيع والجو بديع

بوم بوم بوم بوم بوم

منين ضرب النار ده مع ان السلاح اللي مع عساكر الخدمة سلاح مش بيكون فيه ذخيرة ....... بيكون عياقة بس

ضرب نار وناس بتصرخ وبتقول (ألحقونا .......... حرس سلاح )

جرينا وأحنا مش عارفين نعمل أيه

ده صوت زميلنا اللي وقفين خدمة على وقود العربيات والدبابات

جرينا عليهم وأحنا ماسكين طوب في أيدينا ( والله طوب )

وصلنا لهم

لكن بعد فوات الأوان

3 شباب في العشرينات من عمرهم

مضروبين بالنار ومسروقة أسلحتهم الميري

أترموا على الأرض ودمائهم الطاهرة بتغرق أجسامهم وبتفيض منها أنهار بتروي الأرض وبيجري الدم في خط معوج زي ما يكون تعبان أحمر بيجري من جسم الشهيد



" بدو طلعوا عليهم وقتلوهم , علشان يسرقوا سلاحهم "

" ايوة ما دي مش أول حادثة من نوعها يعني "

" طب المفروض الخدمة تقف بذخيرة حية علشان يحافظوا على ارواحهم "

" ما هو المفروض أنهم واقفين بذخيرة حية ....... لكن القائد مانعها عنهم بطريقة غير رسمية يعني علشان الحواذث الخطأ "

" طب يعني هما هايصرفوا تعويضات للعساكر دي أد أيه ؟ "

" لو الحكاية وصلت للمحكمة العسكرية زي ما هي كده ........... القائد بتاعنا هايتسجن فيها ويتعزل من رتبته "

طبعا مكنش فيه كلام غير عن الموضوع ده والدعاء لزملائنا الشهداء

ولأني كنت من أول الموجودين في مكان الحادث فأني كنت متوقع حضوري للشهادة في المحاكمة العسكرية

لكن المحاكمة العسكرية أنعقدت وأصدرت الحكم من غير شهود وكان حكمها غريب جدا

حكمت بالإعدام على ( ... و ... ) رميا بارصاص (اللي هما ماتوا أصلا ) وذلك لأهمالهم في تأدية الخدمة العسكر وعدم إطاعة الأوامر العسكرية المستديمة وحاجات كتير كده تخليهم مجرمين حرب ( وكل ده على أساس أنهم كانوا نايمين في الخدمة ) وكمان حرموهم من مكافأة القوات المسلحة

وكان تنفيذ حكم الإعدام غريب قوي

3 أفرولات (بدل مموه من بتوع العساكر ) متعلقين على 3 خشبات

وأنضرب عليهم نار

على الأفرولات الفارغة

على اصدقائنا الشهداء

وقعت على الأرض وأنا أجهش بالبكاء

أنا متأكد أن زملائي ماتوا لأن مكنش معاهم حاجة يدافعوا بيها عن أنفسهم ضد نار قاتلهم

هما كانوا بيصرخوا قبل ما يموتوا

يعني كانوا صاحيين وشايفين القتلة وهما بيقربوا منهم

يعني المحكمة العسكرية جاملت القائد بتاعنا على أساس ( الحي أولى من الميت )

3 شباب في العشرينات من عمرهم ماتوا مقابل أى عقيد يحتفظ بوظيفته

ومع إحتفاظه بوظيفته

متهيألي الشهداء ( نحسبهم كذلك ) هايكونوا أكتر

وأتعلمت الدرس الثانى ليا في الجيش :



الضرب في الميت ....... مش حرام


وتابعونا من جديد