[منقول] ديييييييييييب على قفايا ..

[M_Eldegwy]

بسم الله الرحمن الرحيم


سلام الله عليكم ورحمته وبركاته إخوة الإيمان .. طبتم وطاب ممشاكم وتبوأتم من الجنة مقعدا


أنا جيت النهاردة أذكرلكوا شوية مواقف حصلت معايا حسيت بيها بتقول دييييييييييب علي قفايا


وكلهم بيعلموني حسن الظن .. بس تقولوا لمين


الموقف الأول


مرة واحد قريبنا ساكن بعيد عن البلد

كان محتاج شقة يبات فيها هو وأصحابه عشان كان عندهم مشوار في بلدنا

المهم ربنا يسر .. واديناهم شقة في بيتنا مش ساكنين فيها

فأول ما وصلوا .. فكان فيهم واحد لابس نضارة شمس رغم إننا كنا بالليل .. فقلت في نفسي طب وعلي إيه المنظرة يعني ..

وعدت الليلة الحمد لله ومشيوا

واحنا بنفطر بابا بيحكي عنهم ووسط الحكاوي قال .. ويعيني فيهم واحد ضرير

يااااااااااااه علي الصدمة ... طب ليه أنا وحشة كده وظنيت في الراجل سوء ..

تبت يارب ومش هاعمل كده تاني ..

لكن تقول لمين .. يأتي الموقف التالي

كنت ماشية في الشارع مع واحدة صحبيتي .. وقابلنا واحدة تعرف صحبتي دي

وكانت كبيرة في السن ومع ذلك سبحان الله لقيتها راسمة حواجبها بالقلم الكحل ..

قولت في نفسي برده في نفسي لا يلفظ به لساني ..

ولكن ما أقبح أن يطلع الله علي قلبك فيجد ما لا يرضي

رب تب علينا وعلي عصاة المسلمين

المهم قولت في نفسي ..

سبحان الله ليه عاملة في نفسها كده وكمان كبيرة في السن يعني ممنوش لازمة

بعد ما مشيت .. مرضتش أكلم صحبتي ولا أقولها إيه اللي عملاه في نفسها ده

ولقيت صحبتي بتقولي .. دي جارتنا في البيت القديم .. يعيني جلها مرض خطير وقع شعر حواجبها فاضطرت ترسمهم بقلم



يااااااااااااااااااه حسيت قلم بيقول دااااااااااب علي قفايا

انني لم أعذرها ( وإن كان العذر مقبول أو مرفوض ) إلا أنني أسأتُ الظن
يارب اعف عني وتب عليا يارب

الموقف التالت والأخير ..

كنا في المدينة الجامعية .. عملنا مشروع كده تحفيظ قرأن .. وكتبنا إعلان ..

أي واحدة عاوزة تحفظ .. وأي واحدة عاوزة تحَفَّظ تتوجه للمشرفة والمشرفة تتواصل معانا

المهم جات واحدة حافظة ما شاء الله أجزاء كثيرة وعاوزة تساهم كمحفظة

في وسط ما احنا بنتناقش جت واحدة ربنا يعافينا فيها حاجة مش مظبوطة .. حاجة في المخ يعني

فجاية بتقولي انتوا اللي عملتوا الاعلان .. قلتها أيوة

وانا بقول في نفسي .. ربنا يستر دي عاوزة تحفظ معانا ولا إيه .. وهنتعامل معاه ازاي

قولتلها إنتي عاوزة تحفظي

قالتلي لا

قلت في نفسي طب الحمد لله

قالت أنا عاوزة أحَفَّظ ..

قلت ما شاء الله تحَفَّظِي

قالت أيوة أنا حافظة أول جزء في البقرة وجزء عم بالأحكام ومعايا كراسة بكتب فيها الواجب ..

وأتبعت قائلة وكمان لازم نعلم البنات الأخطاء اللي بيوقعوا فيها في سورة الفاتحة

وبدأت تتلو قراءة .. صدقا أوقفتني واجمة لا أدري ما أقول

صوت جميل وقراءة صحيحة وأحكام منضبطة اللهم بارك

أخجلتني كثيرااااااااااا ... تماسكت أمامها وبدون وعي قلت لها علميني

ربنا تب عليا وارزقني حسن الظن بعبيدك .. واعف عما سلف


وصلِ اللهم وسلم وزد وبارك علي رسول الله محمد صلي الله عليه وسلم

منقول

[ساعى إلى الريان]

رد: ديييييييييييب على قفايا ..

اللهم تب علينا

[أبو محمد وعبدالرحمن الشبل]

رد: ديييييييييييب على قفايا ..

والله ربنا يحفظك

فين حسن الظن حاسس اننا دلوقتى الا من رحم ربى طبعا

اى حد فينا بيشوف حاجة مش بتعجبة بيظن سوء رغم انة مش يعرف الشخص دا لية بيعمل كدا