يوميات ابو معاذ قبل الجواز ...... متجدد باذن الله

[ضيف]

السلام عليكم ورحمة الله وبركاتة

حياكم الله شبابنا الغالى

الاول

انتم عاملين ايه الايام دية مع ربنا

بجد

احنا محتاجين نرجع لربنا فالدنيا صغيرة خالص ومسيرها هتنتهى
فلازم من دلوقتى من هذه اللحظة

يكون فيه توبة صادقة مع الله

وخاصة اننا فى ايام كريمة من الاشهر الحرم

وهى دية وصيتى لكم جميعا

التوبة الصادقة

قبل الممات

ودلوقتى

ممكن حد يقول ايه دة ياعم الشيخ انت قلبت الموضوع كدة ليه
دة احنا كنا فاكرين الموضوع بقى اسرار وكلام من دة قبل الجوار وهتحكيلنا بقى
المغامرات بتاعتك

اقوله

اصبر شويه عليا

فقبل ما هحكى لكم يومياتى قبل الجواز

تعالو نعيش مع بعض الحكايات اللى ممكن تفتحلى خيالى وتفكرنى بنفسى

ايام شبابى

انتم مستعدين الان الاول تتوبوا بجد توبة صادقة

تمام

تعالوا الان الى :

احداث ممزوجة بين الواقع والخيال

مكتوبة بطريقة جميلة تحمل معها الدعابة الخفيفة

بعنوان :

(( الراحة طعمها حلووووووو ))

قفزت هذه الجملة إلى خاطري وأنا ممدد على الكنبة يوم الجمعة في تكاسل لذيذ ... أغمضت عيني في استمتاع وتتابعت الأفكار كشلال وجد طريقه بين صخور جبل أبو علبة :

" هي دي العيشة ولا بلاش ... الواحد خلص دراسة, وخد تأجيل من الجيش , وفي وظيفة محترمة .... مش ناقص حاجة تاني إلا إني أبقى وزير .... لا لا لا ... الوزير شغلانة متعبة .... وكيل وزارة أحسن ... ساعتها هبقى إنسان متسلط ورخم كده أذل الناس و ... "

قطع حبل أفكاري إحساسي بقبلة على رأسي .... فتحت عيني في بطء كمن يرفع 50 كيلو حديد لأول مرة في حياته ... لقيتها امي بتبتسم ابتسامتها الساحرة ... رددت الابتسامة في محبة

ورجعت تاني لتلك الأفكار السادية وأنا بفكر في أحسن طريقة أعذب بيها المواطنين و أودي .............. ثواني ... في حاجة مش طبيعية ...

فتحت عيني نص فتحة وبصيت من طرفها لأجد امي جالسة على الكرسي بجانبي باتسامتها التي لم تفارقها ناظرة إلي ...

أخذت نفسا عميقا ثم زفرت في تكاسل مغمضاً عيني وقد أدركت ما ترمي إليه ...

أنا : خير يا امي ... شكلك عايزة تقولي حاجة ...

الوالدة: لا يا حبيبي أبدا ... أنا بس بطمن عليك ...

- يا أمي .... يا أمي ... ده أنا عارفك وفاهمك ... قولي بس عاوزة إيه ؟؟؟

- أبدا يا تامر ... ولا حاجة ....

- طيب أنا هنام بقى ...

- اتفضل يا حبيبي ...

- .................

- بقولك إيه يا تيتو ... هوه انت مش ناوي ؟؟؟

باغتني السؤال مسببا لي مغصاً معوياً... خصوصاً مع هذا الـ "تيتو" اللي متطنش ... فتحت عيني وبصيت ليها ورددت في قلق :

ناوي على إيه يا امي ؟؟؟

الوالدة : مش ناوي تعمل زي محمود ابن خالتك ؟؟؟

فكرت في سرعة ... محمود جاب شقة .... رجله اتكسرت ... اتخانق مع أبوه ...

أنا : ممكن ...

-نعم ؟؟؟

-لا ... مش قصدي ... انت عايزاني أعمل زيه ازاي يعني ؟؟

-يعني ... زي معمل الجمعة اللي فاتت ...

-إيه ... صلى الجمعة يعني ؟؟؟

-يوووووووه على دماغك القفل دي ... قصدي تتأهل ... تكبر كده و .... و ... وتتجوز

اتنفضت من على الكنبة في غضب :

-أيوه بقى قولي كده ... احنا رجعنا للموال ده تاني ... وبعدين هوه الواحد لازم يتجوز عشان يبقى كبير عندكو يعني ؟؟؟

-ما هو يا تامر أنا لازم أفرح بيك ...

عدت إلى وضع الاسترخاء على الأريكة محاولا تأجيل الموضوع بأي شكل :

-طيب طيب ... لما أخلص دراسة ...

-يابني مانتا خدت الليسانس !!!

-آه ... قصدي لما أشوف موضوع الجيش ...

-انت يا تيتو مش خدت تأجيل ؟؟؟

-صحيح ... خلاص لما أجيب شقة يبقى ربنا يحلها ...

-أومال الشقة اللي أبوك اتشحطط وجابهالك من إسكان الشباب بالعافية دي بتاعة مين ...

اتعدلت في القعدة وأنا بهمهم :

-يادي الـ ... هوه الواحد لحق يتمتع بحياته ...

-أفندم ؟؟؟

-ولا حاجة يا أمي ... بصراحة ... أنا مبفكرش في الجواز دلوقتي ...

-ليه يابني بس ... ده الجواز ستر وغطا ...

-ستر وغطا ... ستر وملاية ... أنا مش عايز ...

اقتربت وجلس بجانبي على الكنبة ووضعت يدها على كتفي وعلى وجهها تلك الابتسامة الساحرة :

-ولا حتى عشان خاطر ماما حبيبتو ؟؟؟

-يا امي متضغطيش عليا ... أنا مش عاوز اتجوز دلوقتي ...

رفعت يديها من على كتفي وابتسامته تتلاشى ... واديتني جنب ....

في سري " آآآآآه .... هنبتدي "

اغرورقت عيناها بالدموع ثم انفجرت باكية :

-يا تامر ما هو العمر بيجري ... وأنا نفسي أفرح بيك قبل ما أموت ... هوه ده كتير عليا ؟؟؟

يا قلبي اللي عامل زي الخساية المستوية ... مقدرتش أستحمل ... خدتها في حضني وطبطبت عليها :

-يا امي إيه لازمته الكلام ده بس ... ربنا يخليكي لينا ... أومال مين اللي هيعملي صينية البطاطس ؟؟؟

ابتعدت عني قليلا ونظر ت إلي وقد توقفت عن البكاء :

-يا سلام .... يعني هوه ده كل اللي همك ... صينية البطاطس ...

-أكيد لأ يا امي ... أنا بهرج ...

-آآآآه ...

-انتي برضه بتعملي محشي تحفة ...

-تصدق إنك أرخم عيل في ولادي ...

-تصدقي إنك أحلى أم في الدنيا ...

ابتسمت ابتسامتها الملائكية وقالت :

-يعني خلاص .... هتتجوز

-ما دام ده يرضيكي يا امي يبقى أتجوز البلد كلها لو تحبي

-لا ياخويا ... بطلوا بقى العين الفارغة بتاعتكو ... هنجوزك واحدة بس ...

رددت مبتسما باستسلام :

-اللي تؤمر بيه يا جميل ....

-طيب العروسة جاهزة عندي ...

بدأت أقلق ... وقلبي يعمل طاخ بوم ... طاخ بوم :

-عندك عروسة ... ودي تطلع مين إن شاء الله ؟؟؟

-سحر ... سحر بنت خالتك ...

-سحر ؟؟ .... البت سحر ؟؟؟ ... العيلة دي .؟؟؟

-عيلة إيه يابني ... انت عارف عندها كام سنة دلوقتي ؟؟؟ ... 20 سنة

-إيه ده ؟؟ .... هيا بتاكل السنين ولا بتاخد هرمونات ؟؟؟

-متبطل استظراف ... منتا من ساعة ما اشتغلت وانتا ولا بتبص على حد من قرايبك ...

-معلش يا أمي منتي عارفة ظروف الشغل ...

-ماشي ياخويا ... ظروف الشغل ولا ظروف اللف والدوران ... المهم .. أنا خدتلك ميعاد ... هنروحلهم الخميس الجاي

التفت فجأة في دهشة :

-ميعاد ؟؟ .... وانتي إيه اللي عرفك إذا كنت هوافق ولا لأ ؟؟؟

ردت وعلى وجهها ابتسامة ماكرة :

-عيب عليك ... ده أنا أمك يا ولد ... وكمان أنا عارفة إزاي أجيب آخرك ...

قامت لتخرج وأنا أردد :

-دانتي يا امي طلعتي !!! ... آخر مرة بجد أقع في الاشتغالة دي تاني ...

ضحكت بصوت عالي وقالت :

-مانتا كل مرة بتقول كده يا واد يا خيبة ...

-ربنا يهدينا ويهديكي يا امي...

-الخميس الجاي إن شاء الله .... فاهم ؟؟؟

-حاضر ... ربنا يستر ... !!!!!

والمرة القادمة

هنشوف هيروح ازاى وهيقابل العروسة ازاى

بس

خليكوا معانا

وما تنسوش الدعاء

متواصل معاكم

[ضيف]

رد: يوميات ابو معاز قبل الجواز ...... متجدد باذن الله

يوميات ابو معاز قبل الجواز ... متجدد باذن الله

ـــــــــ

الحلقة الاولى : الراحة طعمها حلوووووووووووووو

الحلقة الثانية : بشوف العروسة

الحلقة الثالثة : عروسة من بولاق

الحلقة الرابعة : تابع عروسة من بولاق

الحلقة الخامسة :عروسة مؤدبة وجميلة ومتدينة كمان !!

الحلقة السادسة : تابع عروسة مؤدبة وجميلة ومتدينة كمان

الحلقة السابعة : حكاية تامر مع مس هيام

الحلقة الثامنة : تابع حكاية تامر مع مس هيام

[أبوالمعالـي]

رد: يوميات ابو معاز قبل الجواز ...... متجدد باذن الله

السلام عليكم ورحمة الله وبركاته

جزاك الله كل خير شيخنا الفاضل أبو معاذ

ما شاء الله تبارك الله

بداية جميلة ورائعة

والله أنني حسيت بأجواء القصة كاملة

وهذا يدل على عمق المعنى للكلمات اللطيفه

أحبك في الله

ومتابعين بإذن الله

[أبو سعيد الأزهرى]

رد: يوميات ابو معاز قبل الجواز ...... متجدد باذن الله

بسم الله ماشاء الله
ايه ده يا أبومعاذ انت شكلك
جايب مسلسل
روعه
بس تامر ده هو هو ابو معاذ فعلاً ولا شخصيه أخرى
معاك
الى النهايه
احبك فى الله

[تائب بإذن الله]

رد: يوميات ابو معاز قبل الجواز ...... متجدد باذن الله

ايه الجمال ده يامولااناااااااا

بجد شوقتنى لباقى الحكايه

اسجل اعجابى ومتابعتى لك اخى الحبيب

عقبالنا يارب احنا كمان ^_^

[ابورقية محمد مختار]

رد: يوميات ابو معاز قبل الجواز ...... متجدد باذن الله

ايه الجمال ده يامولااناااااااا

بجد شوقتنى لباقى الحكايه

اسجل اعجابى ومتابعتى لك اخى الحبيب

عقبالنا يارب احنا كمان ^_^

[أبو عبد الرحمن مصطفى]

رد: يوميات ابو معاز قبل الجواز ...... متجدد باذن الله

جزاك الله خيرا










هو الواد ده اسمه معاذ ولا تامر








.

[mega byte]

رد: يوميات ابو معاز قبل الجواز ...... متجدد باذن الله

ماشاء الله ياشيخنا
دائما ماتتحفنا بحكاياتك الرائعة
جزاكم الله عنا خير الجزاء
وحفظك الله وأطال عمرك وحقق أملك
ووالله إني أحبك في الله

[MOHAMED IC3]

رد: يوميات ابو معاز قبل الجواز ...... متجدد باذن الله

جميلة اوى
جزاك الله خيرا

[ضيف]

رد: يوميات ابو معاز قبل الجواز ...... متجدد باذن الله

الحلقة الثانية


(( بشوف العروسة ))



وبعد خلاص ما وافق تامر على الذهاب عند العروسة

تعالوا نشوف ايه اللى حصل :



"استنى يابني أعدلك أم الكرافتة ... انت فاكرنفسك رايح تجيب كشري من عند أم تفيدة ؟؟؟"



بصيت لأسامة أخويا الصغير وهو بيعدل الكرافتة :



- خلص يا عم الظريف ... بدل ما......



مامته بتنادى عليه : "يلا يا تيتو ... هنتأخر يا حبيبي"



- حاضر يا أمي .... قال يعني انتو خلصتو ...



خرجت الصالة حانقا وأنا بمشي في قرف لأفاجأ بمحمد بيبصلي وعلى وجهه ابتسامة ماكرة :


- إيه الحلاوة دي .... مامتك عارفة إنك خارج لوحدك ...


مزاجي لا يسمح بالتهريج ... نظرت إليه بقرف :


- أيوه ... ...



مامته لسه بتنادى : " متيلا يا تاااااااااااامر "



- طيب .... حاضر يا أمي جاي ...

المهم

نزلنا وركبنا التاكسي وتوجهنا إلى بيت خالتي (( اللى هى ام العروسة )).... يااااااااااه ... الواحد فعلا بقاله كتير ... كتييييييير أوي مجاش هنا ...



طلعنا فوق حيث استقبلتنا خالتي بالأحضان وملصت وداني مخرقة جنابي بكلام زي السم بسبب انقطاعي عنهم ... ما شاء الله ... فعلا هي دي أخت أمي ...



قعدنا في الصالون وبعدين دخل أبويا وعمي بعد الـ "يا ساتر" المشهورة .... وقعدنا كلنا

(( وطبعا ان مش موافق على البظرميط دة اللى هو الاختلاط علشان محدش يفهمنى غلط ))



- منورينا يا أختي (خالتي مخاطبة أمي)



- بنورك يا حبيبتي ( أمي مخاطبة خالتي)



- لا بجد منورينا يا جماعة (عمي مخاطبا إيانا)



- بنورك يابوحسن (والدي مخاطبا عمي)



انا - مفيش كوباية ميه ؟؟؟



التفت الجميع إلي فجأة لدرجة جعلتني أحس أني تفوهت بلفظ قبح ... وفجأة هتفت خالتي :



- ياعين أمك ياخويا ... معلش الواحد سرح ... يا سحر .... سحاااااااااااااااااار ... هاتي الشربات



"شربات ؟؟ .... هوه احنا لسه اتفقنا على حاجة ؟؟؟"



شوية ودخلت سحر ... وطبعا من كسوفها حطت العصير على الترابيزة وهمت بالخروج ... راحت أمي منادية عليها ومقعدها جنبها (ياه ... زي الأفلام العربي تمام)



قعدت البنت قصادي ... وكانت مكسوفة جدا ... بصيتلها وحسيت ببعض الراحة ... مش جايز يبقى الجواز مش وحش أوي في الآخر برضه ؟؟؟



أخذ الكل يدخل في رغي جانبي حتى بدأت أمي الكلام فسكت شهريار ... أقصد جميع من في الغرفة ... وقالت :



- احنا يا أم حسن يشرفنا ويآنسنا إننا نطلب إيد بنتكو سحر لابننا تامر ...



- وده يشرفنا يا أم تامر .... ابنك ابن حلال مصفي ومتربي ...



- خلاص ... يبقى على بركة الله (زغرودة من الطرفين)



" إيه ده ... بكل بساطة كده ؟؟؟
... هوه احنا طرش في الزفة ؟؟؟ "



قطع عمي الزغاريد بقوله :

- طيب مش هنتفق الأول يا أم حسن مع الناس ؟؟؟



ردت خالتي :

- أكيد يابو حسن تامرمش هيتأخر عليها بحاجة ... ولا إيه ؟؟



توجهت الأنظار كلها إلي ... فازدرت ريقي بصعوبة ... وخلرجت كلماتي بصوت مبحوح ... :

- إيه ؟؟؟ ... أكـ ..... احم ... أكيد ... طبعا ... بس ...



خالتي : على خيرة الله ... يبقى عايزين شبكة بـ 20 ألف .... ما هي البنت غالية علينا طبعا ...


اسبهللت ومنطقتش ...



- وطبعا الشقة اللي هوه هيجيبها دي حاجة احتياطي ... يعني ربط كلام ... البت لازم تخش في شقة واسعة متشطبة سوبر لوكس ... ويا سلام لو تكون في المعادي زي أختها ...





هممت بالتكلم هذه المرة لولا أن سبقتني الحاجة :

- يا أم حسن مانتي عارفة إن تامر لسه خريج ويادوب بيقبض على قده ...


- ماهو يا أم تامر لازم أضمن مستقبل البنت



- محدش قال حاجة يا أم حسن ... بس برضه خفي علينا شوية يا أختي



- ماهو أنا كده خافة عليكو أوي عشان انتي أختي ...
حد غيركو كنت خليته يدفع مهر وشبكة وشقة كبيرة من دلوقتي ويكون معاه عربية ووظيفته تكون مدير فما فوق ... أومال ؟؟؟ ... هي سحر قليلة ؟؟؟



- لا يا خالتي ... جوزيها لوزير الصحة أحسن ...



رمقتني أمي بنظرة جانبية كأني عيل صغير قطع كلام الكبار ... وحاولت تلمحلي أسكت ... لكن على مين ... أنا اتكلمت على طول :



- يا جماعة احنا عايزين الدنيا تمشي وأنا مش هقدر على الحاجات دي كلها ...
فالحل إننا نسأل العروسة ..:CANG7PCN:

والتفت في ثقة إلى سحر وسألتها :

- ها يا سحر ... ترضي اني أجيب الحاجات دي كلها وأنا لسه بادئ حياتي .... اتكلمي متتكســ .....





- لأ طبعا



فاجئني ردها السريع ... بس أثلجت صدري كبطيخة بقالها اسبوع في الديب فريزر .... ثم أكملت سحر :



- طبعا مينفعش ...
أنا ولاء صاحبتي جالها مهر 50 ألف جنيه ...





اتسعت عيناي مع هذا الرد الغريب وماسورة الكلام لا تزال تنبعث من فمها :



- ومحاسن بنت عمي جوزها معاه عربية بي إم الجديدة .... وهدى أختي ساكنة في المعادي ... أنا مش أقل منهم .... ولا إيه يا مامي ؟؟؟



رددت عليها بكل عفوية :



- أكيد لا يافندم ... حضرتك محتاجة أمير على حمارة عرجة ....



وقفت وتوجهت للباب وأنا بقول للحاجة :



- يلا يا أمي نلحق نركب اليخت عشان نروح الفيلا قبل ما طيارتنا توصل .....



وخرجنا معلنين نهاية هذا الحوار ....



- - - - - - - - - - - - - - - - - - - -


وبعدها بكام يوم كدة


ممددا على الكنبة وفي إيديا كوباية النعناع وسرحان مع نفسي و ..... الحاجة دخلت عليا ...



- خير يا أمي ... في إيه تاني



- يابني متزعلش نفسك ....



- أنا زعلان عشان تفكير البنت نفسها يا أمي ... خلاص ... كل حاجة بقيت بيت وفلوس بالعبيط وكلاكس بيب بيب ؟؟؟



- خلاص يابني متزعلش نفسك بقه



- وأزعل نفسي ليه ... ؟؟؟ .... الحمد لله أنا معنديش مشاكل ...



- ................................



- بقولك إيه يا تامر ....



- خير يا أمي ...



- مش هنفرح بيك بقه يا ضنايا ؟؟؟

- تاااااااااااااااااااااااااااااااني ؟؟؟؟؟

والحلقة القادمة
مع

مغامرة جديدة وعروسة جديدة

فتابعونا

[أبوالمعالـي]

رد: يوميات ابو معاز قبل الجواز ...... متجدد باذن الله

أسعدك الله يا شيخنا الفاضل

والله أنا بضحك طوال فترة القراءة

فيها كلمات عفوية حلوة جدا

وأسلوب التنقل في الحوار جميل

يشعرك بواقع الأحداث

ولما نشوف آخرتها مع تامر ومامته..

جزاك الله كل خير أدخلت الضحكة علينا والله

أحبك في الله

ومتابعين بإذن الله

لكن يا ريت تثبت الحكايه مع إعلان بنر في الصفحة الرئيسيه

[ابو مالك محمد المصرى]

رد: يوميات ابو معاز قبل الجواز ...... متجدد باذن الله

ماشاء الله ياشيخنا
دائما ماتتحفنا بحكاياتك الرائعة
جزاكم الله عنا خير الجزاء

[تائب بإذن الله]

رد: يوميات ابو معاز قبل الجواز ...... متجدد باذن الله

ماشاء الله على الطلبات

شقه ومهر وشبكه يعنى الواحد يشتغل حرامى عشان يتجوز ^_^

متابعين معاك يامولااناااا اما نشوف اخرتها ايه

سلمت يداك

[مـسـلـم]

رد: يوميات ابو معاز قبل الجواز ...... متجدد باذن الله

ممتعة ... ربنا يبارك فيك

القصة دي بجد ؟؟

[محمدعبدالجواد]

رد: يوميات ابو معاز قبل الجواز ...... متجدد باذن الله

رااااائع يامولانا
أمتعنا بكل ماعندك