القرار الصعب

[اسد الانبار]

رد: القرار الصعب

جزاكم الله خيرا

[قلبي ملك لربي]

رد: القرار الصعب

بارك الله فيكم
متابعين وننتظر الباقي ان شاء الله
لا تتأخرو في تنزيل الحلقات

[مبتدئ]

رد: القرار الصعب

السلاااااااااام عليكم ورحمة الله وبركاته

إزيكم يا شباب
آسف جدا على التأخير.. معلش كان فيه ظروف

إن شاء الله أكمل النشر بانتظام من تاني...

[مبتدئ]

رد: القرار الصعب

••~ الحلقــة الخامســة ~••

حــوار جــريء




رأينا ما حدث في الحلقة الماضية من دفاع سامية عن حجابها وعدم اقتناعها بكلام أسماء وندي حتى وصلت إلى أمر سكت فيه الجميع منتظرا رد أسماء

حين قالت سامية أن المحجبات قبيحات رفعت أسماء يدها إلى وجهها وظنت سامية أن أسماء سوف تصفعها على وجهها لذا سارعت إلى وضع يديها على وجهها لتحمى نفسها

تعالوا نرى ما حدث و موقف كل واحدة منهم

سامية تضع يديها على وجهها وقد أغمضت عينيها
شروق تنتقل ببصرها بين أسماء وسامية

ندى تنظر إلى سامية وتبتسم



أسماء : ههههههههههههههههه مالك يا بنتي فيه إيه ؟

سامية : هـــــــــــــــه أنا كنت فاكرة انك هتضربينى بالقلم

ندى : هههههههههههه ليه كده إيه اللي بتقوليه ده ؟

أسماء : ها ياستى إيه رأيك بقى ؟

تنظر سامية وشروق إلى وجه أسماء التي قد كشفت عنه والذي لم تكن تراه من قبل حيث أن سامية كانت دائما تتجنب الاحتكاك بأسماء

سامية : انتى أمورة قوى

شروق : إيه ده بسم الله ما شاء الله انتى أمورة قووووووووووى
وأنا اللي بوهم نفسي أنى حلوة

سامية : انتى بجد أموره قوى ..... بس ليه كده مش مبينة جمالك
دا أنا أول مرة أشوفك كده

أسماء : شكرا ليكم على المبالغة الرقيقة دية وأنا يا سامية قولتلك قبل كده انى قلت لأمر الله ورسوله سمعا وطاعة وأنا واثقة إن ربنا هيكافئنى

كان لفعل أسماء صدى عميق في نفوس شروق وسامية وبالأخص سامية لذا كانت تجد صدى لكلام أسماء وندى يتردد بداخلها فلأجل ذلك أنصتت بكل اهتمام لكلامهن

شروق:طب وعلى كده محصلش معاكم إن حد اتهمكم بأنكم تبع الجماعة الفلانية أو العلانية ؟

أسماء :يا شوشو الإسلام فيه حزبين بس هما
حزب الحق و ده اللي ربنا بينصره عشان هو بينصر ربنا ، يعني بيطيعوا أوامره ومبيعملوش اللي نهى عنه

سامية : طب والحزب التانى ؟

ندى : الحزب التانى هو حزب الباطل، وده حزب أو ناس بتعصي ربنا وتملى الأرض بالفساد والظلم
ويقولوا لو أنتي اتحجبتى ده اسمه تخلف ورجعية ، وإن الحجاب ده استبداد وكلام فاضي من ده .........بس
تعرفي لو انتى التزمتى بأوامر الله ومنها الحجاب مثلا هتبقى ضمن حزب الحق المفلحين ولكن لما بقى تحطي في وشك ألوان وميك آب
وتلبسي الضيق واللي بيحدد جسمك ساعتها هتركبى سفينة الهلاك مع الناس اللي بتعارض فكر الإسلام حتى ولو كانوا مسلمين ، وهتبقى معاهم ضد دينك

شروق : إيه ده بجد ؟

أسماء : أيوه
شفتوا بقى يا حبايبى ازاى انتم بتهربوا من ربنا وتجروا على طريق الشيطان بالأفكار الغريبة دية وتبدلوا الحلو بالوحش


سامية : يعنى أفهم إن الحجاب ده عبادة كبيرة ؟

أسماء: طبعا يا سوسو عبادة ، وعبادة سامية كمان ياست سامية ملهاش دعوة بآراء الناس وأفكارهم ، واللي يختاره يبقى هو الصح ، لإن ده شرع
واللي شرعه هو العزيز الحكيم


شروق : بس الزن على الودان أمر من السحر وأنا على طول بسمع كلام بيوجعنى

ندى : في سبيل الله تعالى ورجاء رحمته والفوز بالجنة اضربي بأقوال شياطين الإنس والجن دول الحيطة
وامسكي وعضي بالنواجذ ( ضروسك ) على شرع الله واقتدى بأمهات المؤمنين أحسن من الاقتداء بغيرهم

سامية : يعنى هي التحجيبة اللي أنا لابساها دي متنفعش ؟

أسماء : لا للأسف ياسوسو متنفعش تعرفي ليه ؟

سامية : ليه ؟

أسماء :عشان محققتش شروط الحجاب

سامية : وإيه هي شروط الحجاب ؟

أسماء : شروطه يكون يبستر وكمان لازم يكون واسع مش بيبين حاجة خالص ويكون تقيل عشان ميوصفش اللي تحته وميكونش زى لبس الرجالة
واللي أهم من كده يكون بعيد عن لبس الغير مسلمين وكمان ميكونش حجاب من كل فيلم أغنية
تعرفي ليه ميكونش فيه كذا لون أو ألوان فاقعة قوى ؟

سامية : ليه ؟

أسماء:عشان الحجاب ده ربنا شرعه لإبطال النظرة المحرمة


شروق : يعنى اللي إحنا لابسينه ده مش حجاب ؟

ندى : لا ياحبيبتى دية تحجيبه مش حجاب ، الحجاب اللي قالت عليه أسماء اللي يبستر الجسم كله أما التحجيبة فدية اللي على الرأس بس

سامية : طب ازاى أنا هبقى شيك بالحجاب من غير مايكون ملون ومدندش كده ........ مش ربنا بيقول " خذوا زينكم عند كل مسجد " ؟

أسماء : صدق الله العظيم بس الآية انتى قولتيها مش في مكانها الصح

سامية : إزاى ؟

أسماء : أقولك إزاى .......الحجاب لازم ميكونش زينة في نفسه أو فيه ألوان تجذب النظر
ودليلي على كده إن الله عز وجل قال "ولا يبدين زينتهن إلا ما ظهر منها" صدق الله العظيم ،
أما الآية اللي انتى قولتيها " يابنى ادم خذوا زينتكم عند كل مسجد " فديه موجهة للرجال والنساء بمعنى إننا لازم نلبس أفضل حاجة عندنا بما شرعه الله لنا ،
ودليلي على كده قول رسول الله صلى الله عليه وسلم " إذا خرجت إحداكن فلا يقربن الطيب " بمعنى متحطش ريحه مش ديه بردوا من الزينة ،
بس من الزينة المحرمة خارج المنزل

ندى : ده مش معناه إننا نكون متبهدلين يعنى لكن لازم لبسنا ميلفتش النظر لينا


أسماء : وده حال أمهات المؤمنين ، تعرفي أمنا عائشة رضي الله عنها احتجبت وكانت صغيرة يعنى الكلام ده لينا ولا مش لينا يا سوسو؟

سامية : لينا طبعا...بس أنا والله بعمل حاجات حلوة كتيييير ومش بعمل حاجات وحشة

ندى :يا سوسو الدين ميقومش أبدا إلا لو الواحد شافه من كل جانب ليه ، يعنى لازم تقبلي قول الله ورسوله في كل حاجة
وإوعى تكوني زى اللي ربنا قال فيهم " أفتؤمنون ببعض الكتاب وتكفرون ببعض فما جزاء من يفعل ذلك إلا خزي في الحياة الدنيا ويوم القيامة يردون إلى أشد العذاب "

وغير كده انتى مقريتيش قول الله تعالى " وإذا سألتموهن متاعا فسألوهن من وراء حجاب ذلكم أطهر لقلوبكم وقلوبهن" ...
أطهر بقى لقلب مين خديجة وعائشة وفاطمة وأمهات المؤمنين أمال بقى إحنا قلوبنا عامله ازاى ؟؟؟؟؟

سامية : بس والله أنا كويسة ؟

ندى : وأنا قولتلك إنك وحشة؟ بس انتى فكرتينى بواحدة شايلة فوق رأسها قفة مليانة حسنات
بس مخرومة للأسف والحسنات عمالة تقع منها عشان مش ملتزمة بالحجاب ،
وعاوزاكى تعملي مقارنة بين عدد اللي شافوكى من غير الحجاب الصح من غير المحارم كل يوم مع عدد الحسنات ، ياترى قد بعض؟

وعلى فكرة المحتجبة ديه بتعمل الفطرة اللي هي الستر ، أما الاستثناء هو الكشف والتعري

أسماء : وخليكم فاكرين إن أول فتنة وقعت في الجنة من الملعون إبليس هي التعري من اللباس لأبونا آدم وأمنا حواء ،
وده اللي نفهمه من " فطفقا يخصفان عليهما من ورق الجنة" يعنى الستر معنى من معاني الحياء ومن الإيمان ، زى ما النبي صلى الله عليه وسلم قال



الله أكبر ...الله أكبر ...الله أكبر ...الله أكبر

وهنا انقطع الحديث بأذان العصر وبعد الصلاة انصرف الجميع وظل الكلام يتردد في نفوس شروق وسامية حتى وصلا إلى منزلهما

وفى المساء وقفت سامية في شرفتها تعيد ما دار من كلام عن الحجاب ومدى اقتناعها بذلك
وفجأة حدث أمر كان من شأنه أن يطيح بكل ما فعلته أسماء وندى

ترى ما هذا الشيء؟



هذا ما سنعرفه في الحلقة القادمة

انتظرونا

[حاملة الرايه]

رد: القرار الصعب

بارك الله فيكم يسر الله لنا ولكم

في انتظار البقيه ان شاء الله

موضوع مميز جزاكم الله خيرا

[حاملة الرايه]

رد: القرار الصعب

تم تثبيت الموضوع هنا بارك الله فيكم

المواضيع المميزة بقسم القصص الدعوية &**_متجدد _

[مبتدئ]

رد: القرار الصعب

ما شاء الله لا قوة إلا بالله

جزاكم الله خيرا أختنا أمل لا ينقطع على هذه المبادرة الطيبة
بارك الله فيكم ونفع بنا وبكم

[مبتدئ]

رد: القرار الصعب

••~ الحلقــة السادســة ~••

ضيـف لم يكـن في الحـسبان





انتهت الحلقة الماضية بحدوث أمر لسامية كان من شأنه أن يطيش بما قامت به أسماء وندى وجعل سامية في حالة كبيرة من الاضطراب
ترى ما هو ؟
هذا ما سنعرفه في هذه الحلقة



وقفت سامية في شرفتها تعيد ما دار من مناقشات مع أسماء وندى حول الحجاب وهل هي حقا قد اقتنعت واطمئن قلبها لهذا الأمر ؟

أم أنها لا تزال رافضة وإن أبدت اقتناع ظاهري ؟

وفى أثناء إبحارها في أفكارها سمعت رنين هاتفها فأخرجته لتجد أمامها اسم قد أغفلته من حساباتها دون قصد ولم تضعه في الحسبان .........إنه معتز "حبيبها "



سامية : ألو ....... أيوة يا معتز إزيك ؟

معتز : الحمد لله إزيك إنتى يا سمسمة

سامية : تمام

معتز :إيه يا بنتي انتى مشيتي على طول يعنى رغم إني قولتلك إنى عاوزك .....وكل ما أتصل بيكى تليفونك مغلق ...إيه الحكاية؟

سامية : أبدا والله أنا روحت صليت الظهر وبعد كده قعدت أتكلم شوية مع أصحابي لغاية العصر فصلينا ومشينا

معتز: يااااااااااااااه لغاية العصر !......إيه هو الموضوع بقى اللي أهم منى

سامية : أبدا والله ....لا أهم منك ولا حاجة

معتز : طيب يا سمسمة .. إيه بجد الموضوع المهم قوى ده

سامية :عادى يعنى

معتز : ممممممممم.......الظاهر إن الحكاية فيها حاجة ... تعالى على الميل
عشان أنا حاسس الموضوع هيطول

سامية : حاضر



ومع انتهاء الاتصال شعرت سامية وكأن قلبها ينخلع

سامية : ياااااااااااااه أنا ازاى نسيت معتز

وزفرت زفرة قوية وقالت ياااااااارب ثم توجهت إلى جهاز الكمبيوتر وهى تكاد تبكى
فهي بين أمرين أولهما ما قالته أسماء وندى عن الحجاب ، وثانيهما معتز..ذلك الفتى الذي سلب قلبها وهى تعلم يقينا أنها لن تستطيع أن تجمع بينهما ولابد من التضحية بأحدهما ثم بدأت المحادثة على الايميل

(10:54 مساءاً) معتز : احكيلى بقى إيه اللي حصل ؟
(10:55 مساءاً) سامية : أبدا والله عادى متشغلش بالك
(10:55 مساءاً) معتز: ازاى يعنى أنا حاسس أن الموضوع مهم جدا لأنه خلاكى تنسى زيزو حبيبك
سامية تنظر للمحادثة وتسأل نفسها هل أخبره أم أسكت ؟

(10:57 مساءاً) معتز : يابنتى انتى فين ؟
(10:57 مساءاً) سامية : معاك
(10:57 مساءاً) معتز : ولا انتى معايا ولا حاجة خالص
(10:57 مساءاً) سامية : معاك والله معلش متزعلش
(10:58 مساءاً) معتز : أنا حاسس انك متغيرة بقالك كذا يوم كده من ساعة ما قولتيلى إن أسماء وندى اتصلوا بيكى لما كنتى تعبانة
(10:58 مساءاً) سامية : متغيرة ازاى يعنى ؟
(10:59 مساءاً) معتز : يعنى مبقتيش تكلميني ولا بقيتي تردى عليا ولا أى حاجة كأنك نسيتينى
(11:01 مساءاً) سامية : لا يا معتز أنا منستكش ولا حاجة
(11:01 مساءاً) معتز : طيب فيه إيه؟ أنا حاسس إن اللي غيّرك أسماء وندى ، صح ولا أنا غلطان ؟
(11:01 مساءاً) سامية : هما عاوزنى أغيّر حجابي
(11:01 مساءاً) معتز : آه قولتيلى أنهم عملولك غسيل مخ
(11:01 مساءاً) سامية : غسيل مخ يعنى إيه ؟
(11:02 مساءاً) معتز : يعنى انتي حجابك غلط ولو ماغيرتيهوش تبقى كافرة والكلام الحمضان ده
(11:02 مساءاً) سامية : أبدا والله هما مقالوش إنى هبقى كافرة ولا حاجة
(11:03 مساءاً) معتز: بصى يا سامية انتى كده كويسة وأحلى واحدة في عيني وسيبك من الناس المعقدة دية ، أنا شايف الحجاب ده أصلا عبارة عن حد خانق الواحدة
(11:03 مساءاً) سامية : ازاى يعنى ؟
(11:03 مساءاً) معتز : يعنى مبتبقيش على حريتك ولازم تلبسي حاجة طويلة بقي وواسعة تكفي تلبس جنبك واحدة تانية وتمشي مبهدلة وشكلك وحش أو تلبسي حجاب طويل يغطي نص جسمك والدنيا حر جدا ...دى حاجة تخنق
(11:05 مساءاً) سامية : يعنى أنت معترض ع الفكرة ؟
(11:05 مساءاً) معتز : طبعا انتى لسة صغيرة خالص يابنتى وكمان ........................

وأخذ معتز في سرد حجج وأعذار لسامية، رغم إن كل تلك الأعذار قد قالتها هي لأسماء وندى وتلقت منهما جوابا شافيا إلا إن كلام معتز أنساها كل تلك الإجابات ورسخ في قلبها الأفكار المؤيدة لحجابها وانساقت دون أن تشعر خلف كلامه بدعوى الحب

وبعد أن انتهت من الحديث خرجت مرة أخرى للشرفة تتأمل النجوم وقلبها يدق بعنف فلو أنها غيرت حجابها سيضيع منها قلبها بضياع حبيبها



وسرعان ما اتخذت قرارها وتوجهت مرة أخرى للكمبيوتر وهذه المرة ليس من أجل أن تحدثه مرة أخرى لكن من أجل توجيه رسالة بريد الكتروني لأسماء وكان هذا نصها

[frame]أنا فكرت في كلامكم بس لقيت انى مش مقتنعة بيه بصورة كبيرة
ولقيت إن فيه أسباب تانية مش هتخلينى أقدر أغير حجابي منها..
إن الحجاب هيقلل من جمالي وكمان مش هيخلينى أنيقة
ومش هقدر أشتغل في أي حتة أنا عايزاها وأنا حاسة حتى لو غيرته دلوقتى هرجع لحجابي بعدين ،
وغير ده كله مين هيتجوزنى وأنا مبهدلة كده وماما وبابا مش راضين خالص
وأنا مقتنعة بشكلي كده والحمد لله أنا محترمة وكل الناس بتحترمني،
وعشان كده يا أسماء ياريت متكلمونيش تانى في الموضوع ده لو سمحتم .... سلام[/frame]



وبعد أن صلت أسماء الفجر ذهبت إلى جهازها فوجدت رسالة من سامية وقد ظنت أنها ستفرحها بقولها أنها ستأتي اليوم وقد غيرت حجابها ... إلا أنها صدمت من الأمر وبعد أن قرأت الرسالة تنهدت قائلة
لاحول ولا قوة إلا بالله العلى العظيم ليه كده بس يا سامية

يا ترى إيه اللي غيرك على طول كده ؟

مممممممممممممم………أنا حاسة إن الموضوع فيه حاجة،الحجج اللي قالتها حجج خايبة قوى ..........لما أشوفها النهاردة إن شاء الله اعرف في إيه ؟



في الجامعــــة.......


تقابلت أسماء مع ندى وشروق وقصت لهم أسماء رسالة سامية

شروق :يااااااااااااااه بجد............. أكيد البنت دي حد لعب في دماغها

ندى : لا حول ولا قوة إلا بالله ، بس أنا حاسة إن الكلام ده مش كلامها لإنها المرة اللي فاتت كانت حتى لو قالت حجة أو عذر كانت بتقوله وهى مكسوفة وحاسة إنه حجة بتتحجج بيها ، أما الحجج دية زى ما قالت أسماء حجج خايبة قوى

أسماء: وده اللي مخلينى محتارة وقلت أقولكم عشان نشوف ممكن نعمل إيه ؟

ندى : طب هي فين دلوقتى

شروق : مش عارفة المفروض إنها تيجى دلوقتى عشان المحاضرة
مش عارفة إيه اللي أخرها

أسماء : طب ماتتصلي بيها كده يا شروق

شروق : طيب ………..مش بترد عليا

ندى : ممممممممممممم........طب يالا نحضر المحاضرة



وبعد المحاضـــــرة ......

شروق : أنا هتصل بمامتها أشوفها فين ؟

أسماء : ياريت

شروق : السلام عليكم.....ازيك يا طنط .... الحمد لله....هي فين سامية ياطنط …..
بجد! لا أنا مقابلتهاش .....خلاص هشوفها كده يمكن تهنا من بعض


ندى : إيه هي مش في البيت ؟

شروق : مامتها يتقول أنها نزلت الجامعة الصبح

أسماء : وليه محضرتش طيب ؟

شروق : مش عارفة ، وعمالة اتصل بيها مش بترد

ندى : خلاص دلوقتي تيجي ، يمكن في حاجة أخرتها....... المهم تعالوا نجيب أى أكل عشان أنا مفطرتش



وفى أثناء ذهابهن إلى المطعم لمحت ندى فتاة تشبه سامية تجلس مع شاب

ندى : أسماء شروق هي دي سامية اللي هناك ؟

شروق : فين ........ إيه ده دي هيّا

أسماء : طب استنوا أنا هجرب أتصل بيها ، عاوزة أتأكد من حاجة



معتز : مين اللي بيتصل بيكى

سامية : دي أسماء

معتز : طب هاتى الموبايل أنا هكنسل عليها مش عاوزين وش



أسماء : أنا كنت متأكدة إن الحكاية فيها سر ... هو خد منها الموبايل وكنسل عليا

ندى : أنا شفته قبل كده هو معانا في الدفعة

شروق : آه ده اسمه معتز .... أنا هروح أتكلم معاها

أسماء : لا يا شروق استني الموضوع مايتعالجش كده خالص

شروق : أمال إزاى ؟

أسماء : سيبى الموضوع ده عليا ..... أنا واثقة إن الحل اللي في دماغي هو إن شاء الله اللي هيكون الحل الأمثل

شروق وندى : حل إيه ده ؟

أسماء : الحل هو ......................





ترى ما هو الحل لتلك المشكلة


هذا ما سنعرفه في الحلقة القادمة

[عطر الكلام]

رد: القرار الصعب

السلام عليكم ورحمة الله وبركاته

جزاكم الله خير اخانا علي هذه القصة

اكيد في بنات كتير بتعيش الواقع دة والصراع ده

يارب يكون فيها حلول للبنات دي

ويجعلها في ميزان حسناتكم

[مبتدئ]

رد: القرار الصعب

وعليكم السلام ورحمة الله وبركاته

بارك الله فيكم أختنا، جزانا الله وإياكم كل خير
إن شاء الله نكمل

[مبتدئ]

رد: القرار الصعب

••~ الحلقــة السابعــة ~••

الحل يبدأ من هنا

انتهينا الحلقة الماضية عند هذا الحل الذي اقترحته أسماء لحل مشكلة سامية

ترى ما هو الحل؟

هذا ما سنعرفه في هذه الحلقة

أسماء : الحل هو غادة !

شروق باستغراب : غادة ............. غادة مين ؟

ندى : ممممممممممم ................. انتى قصدك على غادة فولى اللي في علوم ؟

أسماء : بالظبط يا ندى هي دي الحل

ندى : إزاى يعنى ؟.......... فهمينا

أسماء : هفهمكم كل حاجة اصبروا بس شوية هتصل بيها أشوفها فين

أسماء : السلام عليكم ......... إزيك يا دودو عاملة إيه .............طب الحمد لله

انتى فين دلوقتى يادودو.......خلاص إحنا جاينلك عند القسم........آه معايا ندى وأخت تانية اسمها شروق …..عند القسم اتفقنا ، يلا سلام

شروق : أنا مش فاهمة حاجة

أسماء : تعالوا الأول نجيب الأكل ونعمل حساب غادة وهقولكم على كل حاجة

شروق : ماشى يلا

في طريق الذهاب إلى غادة

أسماء : بصوا الحكاية إن غادة ماشاء الله بليغة جدا ، سبحان الله كلامها بيدخل القلب على طول و.....

شروق : آه هتخليها تكلم سامية يعنى

أسماء : لا يا شروق مش بالظبط اصبري هفهمك

شروق : طيب كملي

أسماء : غادة دي أنا اتعرفت عليها في مسجد تجارة كنت روحت أصلى مرة هناك في أول السنة وقالت موعظة جميلة جدا جدا عن بداية العام الدراسي
وإزى نتجنب الفتن والفرق الدينية اللي في الجامعة وحاجات كتيرة جدا

شروق : ها كملي

أسماء : أنا قلت سامية مش هتقبل كلام منى ولا من ندى علشان كده قلت
غادة هي اللي تقدر تكلمها

شروق : يا بنتي ازاى هتكلمها وانتى قولتى إنها مش هتكلمها ؟!!!!!!!!!!

أسماء :هو فيه حل بفكر فيه يارب ينفع

شروق : حل إيه ؟

أسماء : لما نشوفها بس الأول

ندى : هي قالتلك هتستنانا فين ؟

أسماء : أهى هناك أهى

أسماء : السلام عليكم ورحمة الله وبركاته ....إزيك يا قمر ؟

غادة :وعليكم السلام ورحمة الله وبركاته....إزيك انتى يا أسماء
إزيك يا ندى عاملين إيه ؟

ندى : الحمد لله تمام ... أحب أعرفك على شروق بنت زى العسل معانا في الدفعة

غادة : إزيك ياشروق .... نورتى قسم النبات

شروق : شكرا لذوقك ياغادة القسم منور بأصحابه

ندى : يالا ياجماعة بقى تعالوا ناكل ونتكلم

غادة : طيب تعالوا في مكان هادى شوية نعرف نأكل فيه ونتكلم

وبعد الفراغ من تناول الطعام

أسماء : بصى يادودو المشكلة هي إن فيه أخت لينا على علاقة بشاب والشاب ده كان سبب في أنها رفضت تغير حجابها للأحسن بعد ما خلاص كانت راضية

غادة : لا حول ولا قوة إلا بالله

أسماء : فاكره موعظة أول السنة

غادة : طبعا ........مالها الموعظة ؟

أسماء : أنا عاوزاكى تعملي موعظة زيها في نفس المسجد عن علاقة الأولاد بالبنات في الجامعة وقصص الحب الوهمية دية

غادة : من عنيا يا حبيبتي مادام الأمر فيه خير أنا مستعدة أساعد معاكم

ندى : بس فيه مشكلة

غادة : إيه هي ؟

ندى : إزاى هنجيب سامية من آداب عشان تصلى في مسجد تجارة وهى أصلا مش هتقبل تتكلم معانا وهتتهرب مننا

أسماء : دي فعلا مشكلة بس أنا الحمد لله لقتلها حل مع شروق

شروق : معايا أنا ......... إزاى ؟

أسماء :الموضوع كله يتوقف على توفيق ربنا ثم عليكى انتى يا شوشو، بصى الحكاية كلها إنها أنتيمتك انتى وهتتقبل منك أى كلام .....
المهم بعد بكرة إن شاء الله هيكون فيه محاضرة لغاية قبل الظهر ومحاضرة بعد العصر معنى كده إنك ممكن تصلى الظهر انتى وسامية في مسجد تجارة مع غادة

شروق : طب ثواني .... إزاى هخلى سامية تصلى معايا في مسجد تجارة ؟

أسماء : مممممممممم ممكن تقوليلها تعالى نصلى فى مسجد تجارة أكبر من بتاعنا وأهو تجديد بردوا ونتمشى شوية نشم نفسنا …..أى حاجة يا شوشو بقى

ندى : طبعا أى حاجة بس بدون كذب ماشى

شروق : طبعا

أسماء : وأنا إن شاء الله هرد على رسالتها دى عادى خالص
وانتى ياغادة جهزي نفسك كده

شروق : طبعا هتكونوا موجودين فى المسجد

أسماء : لا طبعا مع إنى نفسي أكون موجودة بس مش هينفع ، إحنا لازم نصلى عندنا في آداب، يمكن ده يكون سبب فى إن سامية تيجى معاكى ... اتفقنا

غادة : إن شاء الله تمام متقلقوش أنا كده كده كنت بعمل زى نظام مبسط عن الموضوع ده فى المنتدى وده هيساعدنا كتير

أسماء : ربنا يبارك فيكى

وفى المساء ....

جلست أسماء تعد الرسالة لسامية وكان نصها

[frame]بسم الله الرحمن الرحيم

الحمد لله رب العالمين والصلاة والسلام على نبي المرسلين

صلى الله عليه وسلم

السلام عليكم ورحمة الله وبركاته

إزيك يا سامية……أنا لما قريت رسالتك زعلت جدا جدا إن الكلام ده يطلع منك رغم إنك كنتى متحمسة وخصوصا بعد ما كلمتك المرة اللي فاتت مش عارفة إيه اللي غيرك كده ؟

يمكن الأسباب اللي انتى كاتباها دي هي اللي غيرتك كده
بس أنا هوضحلك الحكاية كلها

انتى قولتى إن تغيير الحجاب هيقلل من جمالي ومش هيخلينى أنيقة ، بالعكس يا سامية فى كتير من المحجبات بيكونوا أجمل بكتير بالحجاب بالذات بقى لما الإيمان يدخل قلبهم .. ياالله شعور جميل قوووووووووووووووووووى

تلاقى كده وش الواحدة منور تعرفي ليه ؟

عشان هما عارفين إن الجنة سلعة الله الغالية ، وإن الجنة محفوفة بالمكاره والنار محفوفة بالشهوات فمتفتكريش إن الطريق لربنا سهل وممهد

لأ ياسامية القوة الحقيقية إنك تتخطى كل العقبات ديه عشان توصلي لربنا

ولسان حالك بيقول " وعجلت إليك ربِّ لترضى "يارب تكوني فهمتينى

أما بخصوص إن الحجاب ده هيمنعك من الشغل أنا معاكى ممكن متشتغليش في بعض الأماكن، بس ممكن برضه تلاقي شغل في أماكن أفضل ترضي ربنا

بس حتي لو هيمنعك من الشغل في أماكن معينة فده أحسن بكتيييييييييييير من فقدان رضا الله عز وجل وفقدان الجنة والحياة الأبدية ومش معنى فقدان الشغل يعنى فقدان الرزق

ابن آدم ياسامية مش بيموت غير لما يستوفى أجله ورزقه ، ده ربنا يا سامية ضمن الرزق للمسلم والكافر ، فهل ده معناه إنه مش هيرزقك وانتى بتطيعيه ؟؟؟؟ لأ طبعا

أما ياستى بخصوص إنك ممكن تقلعيه بعد ما تلبسيه.. إوعى يا سامية تفكري في كده ، دي الدنيا كلها بما فيها من متع كتيرة ومتنوعة لا تساوى عند الله جناح بعوضة مهما زاد جمالها ، شفتي يا سامية جناح بعوضة فحرام عليكى تبيعي الجنة بحاجة أحقر من جناح بعوضة
وبعدين محدش فينا ضامن عمره يا سامية ، الموت بييجي فجأة ، وساعتها يبقي خلاص كلللللل حاجة انتهت، مفيش حاجة في الدنيا هتنفعنا لما نيجي نقابل ربنا إلا أعمالنا اللي عملناها عشان يرضي عننا

أما موضوع الجواز ده……… [/frame]

وهنا ارتفع رنين هاتفها المحمول

أسماء : السلام عليكم ورحمة الله وبركاته .... إزيك يا شوشو

شروق : وعليكم السلام ورحمة الله وبركاته ... الحمد لله تمام

بقولك أنا اتصلت بطنط والدة سامية وعرفت منها إن سامية مافتحتهاش فى الموضوع ده ولا أخدت رأيها أصلا

أسماء : لا حول ولا قوة إلا بالله وكمان بتكذب ، ده أنا قاعدة بكتب ليها رد على رسالتها

شروق : أنا لما عرفت مصدقتش

أسماء : متقلقيش خير إن شاء الله

وبعد انتهاء المكالمة ..

عادت أسماء لتكمل الرسالة
وهى لا تصدق إن سامية كذبت عليها

[frame]أما بخصوص موضوع الجواز ..ده يا سامية بتاع ربنا ما انتي ممكن تعرفي شاب وتحبوا بعض وبعد كده كل واحد يروح لحاله وشوفي بقى لمس إيديك كام مرة ؟

ودق قلبك ليه كام مرة ؟ وفى الآخر مالكمش نصيب ، وبعدين زي ما قلتلك تقدري تحافظي علي لبسك الحجاب الصح وفي نفس الوقت مش تكوني مبهدلة ولا حاجة ، ويا ستى الجواز في الوقت ده نصيب ورزق، ما أنا أهو مخطوبة وأنا كده الحمد لله

أنا شايفة إن العذر ده عذر وحش قوى يا سامية
يعنى انتى ترضى تظهري مفاتن جسمك وتغضبي ربنا عشان تتجوزي ؟

أنا عارفة إنك أذكى من كده

أما بخصوص بابا وماما أنا شايفة الموضوع مش صعب ولا حاجة ، لا طاعة لمخلوق فى معصية الخالق وعلى العموم سيبى الموضوع ده عليا أنا

أما بقى موضوع الاحترام يا ستي، أنا عارفة إنك محترمة ياسامية، بس شوفي وانتي ماشية في الشارع كام واحد بيبصلك بصة مش محترمة ، ده يستاهل إنك تغضبي ربنا وتسيبيه يتمتع بالنظر لجسمك؟
عارفة يا سامية ساعات لما تشوفي واحد بيبص لواحدة بصة مش محترمةكده تقولي في نفسك .. لو كانت البنت محترمة مكانتش هتسمح لواحد زي ده يبص لها كده
وأنا محبّش أبدا حد يقول عليكي كده يا سامية، ولا انتي تحبي كده
ما تسمحيش لحد يفكر حتى يقول عليكي كده

وعلى العموم ياسامية دي نصيحة منى، أنا لما اتحجبت كده مفكرتش غير فى الجنة وان اللي بعمله ده بيرضى ربنا ، تخيلي كده جنات تجرى من تحتها الأنهار ياااااااااااااااااااااااااااه شوفي ملكك في الجنة أد إيه حاجة تخلى الواحدة تتمنى تدخلها دلوقتى
وعلى العموم ده مقطع حلو اسمعيه

ودي أنشودة لأحمد أبو خاطر جميلة

http://www.saaid.net/flash/df5e7030ba.htm

يا ريت يا سوسو تكوني فهمتي كلامي ومعلش طولت عليكى

السلام عليكم ورحمة الله وبركاته[/frame]

تري كيف ستتصرف شروق ؟ وكيف ستجعل سامية تصلي معها في مسجد تجارة؟

هل ستوافق سامية علي الذهاب بهذه البساطة ؟

وهل ستنجح غادة في مهمتها ؟

هذا ما سنعرفه معا في الحلقة القادمة بإذن الله تعالي

[مبتدئ]

رد: القرار الصعب

جزاكم الله خيرا يا شباب
نتابع السلسلة

[مبتدئ]

رد: القرار الصعب

••~ الحلقــة الثامنة ~••


كلمة غيرت حياتي





كنا نتساءل كيف ستسطيع شروق إقناع سامية بالذهاب لمسجد تجارة ؟ وهل ستنجح الخطة التي رسمها الفتيات ؟
هيا بنا نعرف ماذا حدث ..

فى اليوم المحدد

جاءت سامية قبيل دخول الدكتور للمدرج مباشرة

وجلست بعيداً عن أسماء وندى
وكانت شروق غير جالسة بجوارهما

وبعد انتهاء المحاضرة..

أسرعت شروق إلى سامية

شروق : إزيك يا سوسو .... عاملة إيه يابنتى ؟

سامية : الحمد لله كويسة

شروق : على فكرة أنا زعلانة منك موووووووووووت

سامية : ليه بس كده ؟

شروق : يعنى مش عارفة ليه ؟

سامية : معلش يا شوشو والله أنا متلخبطة شوية اليومين دول

شروق : ممممممممم شكل الموضوع هيطول تعالى نشرب حاجة وتحكيلى



وذهبت سامية مع شروق وتجولتا إلى أن وصلتا إلى قرب مسجد تجارة

شروق : سامية أنا مش فاهمة منك حاجة خالص

سامية : معلش والله الحكاية كلها معقدة مش عارفة ليه ؟

شروق : طب واحدة واحدة معايا ........... هي أسماء وندى زعلوكى فى حاجة ؟

سامية : أبدا يا شروق بس أنا بعت رسالة لأسماء وفهمتها إن الموضوع مش فى بالى دلوقتى

شروق : سبحان الله.... إيه هو لعب عيال ؟ دا انتي عيطتي في حضني زى الأطفال وقولتى إنك مش هتسامحى نفسك على تقصيرك ....فاكرة؟

سامية : أهو اللي حصل بقى

وارتفع صوت المؤذن يعلن أذان الظهر

شروق : طب تعالى نصلى فى مسجد تجارة أهو جمبنا وبعد الصلاة ربنا يسهلها

وتوجهتا إلى المسجد ....



وبعد انتهاء الصلاة

قامت غادة لتلقى موعظتها

غادة : بسم الله الرحمن الرحيم
إن الحمد لله نحمده ونستعين به ونستغفره ونعوذ بالله من شرور أنفسنا ومن سيئات أعمالنا
من يهد الله فهو المهتد ومن يضلل فلا هادى له

أخواتى فى الله
السلام عليكم ورحمة الله وبركاته

سامية : أنا هقوم يا شروق

شروق : يابنتى تقومي ليه ؟هنسمع الأخت عشر دقايق ونقوم ، وبعدين بصى وراكى مش هتعرفى تعدى

سامية في نفسها : يييييييه هي حبكت دلوقتى ، كده معتز هيزعل منى عشان هتأخر عليه

غادة: أخواتى الغاليات..
أنا هتكلم معاكم النهاردة فى موضوع مهم جدا جدا جدا

يمكن كلنا واقعين فيه إلا من رحم ربى
الموضوع باختصار إننا لما بنخرج من الثانوي وندخل الجامعة
بنخرج من جو منعزل لجو مفتوح ، من حرية مقيدة إلى حرية كاملة
والأهم من كده إننا بنمر بمرحلة نفسية ممكن تخلى أى واحدة مننا تبعد عن ربنا
وهى مش عارفة إنها بتعمل حاجات حرام وهيا مش واخدة بالها

أنا كلمتي النهاردة عن ..

••~ الحب في الجامعة ~••



ورغم أن سامية كانت تتلفت يمينا ويسارا تريد منفذا تمر منه إلا أن كلمة الحب فى الجامعة جعلتها تلتفت إلى غادة بسرعة لترى وتسمع ما تقول عن الحب فى الجامعة

غادة : موضوع الحب ده خطير جدا ياجماعة


ويمكن الواحدة مننا بتحب الشاب من دول بالأخص الشاب الرومانسي اللي دايما يقولها كلام جميل ...
لكن ياترى فيه مرة واحدة مننا سألت نفسها هو الحب ده حرام ولا حلال ؟

كتير مننا هيقولوا حلال .... طيب سؤال تانى
ترضى ربنا يشوفك وحبيبك ماسك إيدك ؟

كل واحدة تجاوب فى نفسها .... طبعا لاء ده الواحدة ممكن تموت من الخوف لو أبوها أو أمها شافوها كده ……….
ما بالكم ربنا ؟

طيب ياترى ترضى تموتي وانتى قاعدة معاه وتقابلي ربنا كده ؟

ياترى كده هتكون خاتمتك مختومة بالسعادة ولا بالندم والحسرة

ياااااااااااااااااااااااااااااااااااه تخيلي نفسك كده
إنك واقفة أدام ربنا وبيسألك


يا فلانة ما كانت علاقتك بفلان ؟
هتردى تقولي إيه ؟.........فكرى كده
هتردى تقولي ده حبيبي أو صاحبي يارب ، مش هتتكسفي من نفسك
وانتى بتقولي لربنا كده ؟

طب تخيلي كده ربنا بيقولك
لو كان هو حبيبك فماذا كنت أنا؟
وماذا كان محمد - صلى الله عليه وسلم -؟

ساعتها هتردى تقولي إيه ؟

وتخيلي ربنا بيقولك يا فلانة أنتى كنتى تعلمين أن هذه العلاقة تغضبني وكنتى لا تبالي
أهان عليكى غضبى ؟



كل واحدة مننا لازم تقف مع نفسها شوية وتفكر فى الموقف ده كويس قوى

أظنك ساعتها مش هتكونى عارفة مصيرك إيه ؟

ويا ترى هيكون شعورك إيه لو سمعتي المنادى ينادى خذوها إلى النار

!!!يااااااااااااااااااااه النار !!!.............. جهنم

ده أنا مكنتش أقدر أستحمل شوية مية سخنين شوية ييجوا على إيدى ،وتصرخي .. وتصرخي .. وتنادى

ولكن مفيش مجيب ساعتها …..الموقف صعب قوىىىىىىىىىىى

طب لو شافك رسول الله - صلى الله عليه وسلم - وانتى قاعدة معاه وسألك مين ده ؟

هتقوليله إيه ؟ هتردى عليه ازاى ؟


هتقولى ده حبيبي اللي هيتقدم ليا بعد ما أخلص دراسة ؟

ياأختى خلى بالك ،لو ربنا نظر ليكى نظرة غضب وانتى بتقوليله كلام الحب الحرام ده

معناه إن كل شيء ضاع منك دنيتك وآخرتك وهتفضلى غرقانة فى غضب ربنا لو ماتوبتيش ليه



أمنا عائشة - رضي الله عنها ذكرت النار فبكت فقال رسول الله -صلى الله عليه وسلم- : ما يبكيك يا عائشة ؟
قالت : ذكرت النار، هل تذكرون أهليكم يوم القيامة ؟
قال : والذي نفسي بيده في ثلاث مواطن فإن أحدا لا يذكر إلا نفسه : إذا وضعت الموازين ووزنت الأعمال حتى ينظر ابن آدم أيخف ميزانه أم يثقل ، وعند الصحف حتى ينظر أبيمينه يأخذ كتابه أم بشماله ، وعند الصراط " إسناده جيد

يااااااااااااااااااااااه أعظم تلات مواقف محدش هيعرف حد فيها

خلى بقى حبيبك ينجيكى من عذاب الله

لو ربحت كفة السيئات خليه ساعتها يحط شوية حسنات عشان تدخلي إنتى الجنة
وخليه لو وقعتي من على الصراط يشيلك ويضحى بنفسه علشانك

مش هو ده كلامه اللي بيضحك عليكى بيه
ويقولك أنا ممكن أعمل أى حاجة علشانك ، أنا ممكن أموت نفسي علشانك
كذاب .....أيوة كذاب
خليه ساعتها ينفعك فى موقف محدش هيقدر ينفع أهله فيه
يوم يفر المرء من أخيه وأمه وأبيه وصاحبته وبنيه ، هيجرى منك



أختى إنتى عاوزة إيه ؟
جنة وحياة وسعادة وتكوني ملكة على الحور العين
ولاّ نار وحميم وزقوم وغسلين وبغض الله عز وجل

اختاري
ها اخترتى إيه ؟

تعرفي .. لو بتخافى عليه بجد سيبيه لله .......


لأنك ماشية معاه فى طريق آخرته جهنم
لو سبتيه عشان ربنا.. لو فيه الخير ربنا هيرده ليكى تانى ، ولو غير كده هيرزقك باللي أحسن منه
إفتكري إن كل شعرة فيكى هتتحرق جسمك هيولع
على إيه ده كله وإيه اللي يستاهل إنك تدخلي النار بسببه

لو بتحبيه بجد سيبيه عشان إنتى كده بتفتنيه في دينه
إنتى عارفة إيه جزاء اللي يفتن حد فى دينه ؟

وإوعى تقولي دي علاقة بريئة ...اقفى كده مع نفسك وفكري
فيه ملكين يمين للحسنات وشمال للسيئات

كلامك معاه نظراتك ليه دقات قلبك رناتك ليه رسايلك هتتكتب فين؟
في الحسنات؟ ........ لا طبعا أكيد في السيئات

الأرض اللي أنت واقفة عليها هتشهد ليكى ولا عليكى ؟
إيدك .. رجلك .. قلبك .. عينك



طب تعرفي إيه المصيبة الكبرى ربنا بيقول "ولا تجعلوا لله أندادا "
واسمعي كمان
" ومن الناس من يتخذ من دون الله أنداداً يحبونهم كحب الله "يعنى إيه؟
يعنى الحب اللي في قلبك ليه ده بيخليكى أحيانا تقدميه على ربنا

مش مصدقة؟............
طب كام مرة أذن عليكى الأذان وانتى معاه ومصليتيش علشانه
الحب اللي في قلبك ده مين أولى بيه ربنا ولاّ هو؟

معنى " ند " هو أى شيء ينازع الله فى ملكه وحكمه وحبه وتوحيده
معنى إنك بتقدمي حد على ربنا معنى كده حاجة خطيرة جدا جدا، معناها البعد والطرد من رحمة ربنا

يااااااااااااااااااااااه دا انتى ضايعة خالص كده

طب والحل !! الحل بسيط ؟؟


من ترك لله شيئا عوضه الله خيرا منه

لو سبتيه عشان ربنا لو فيه الخير ربنا هيرده ليكى تانى
ولو غير كده هيرزقك باللي أحسن منه

أختي.. ما تخلى ربنا يختار ليكى ؟

أكيد هيختار ليكى أفضل من اختيارك إنتى لنفسك



معلش أنا عارفة إنى طولت قوي بس هقولك حاجة بسيطة كمان بس، تخيلي كده في طريقين
طريق فيه ربنا والجنة وطريق فيه حبيبك وغضب ربنا ها هتختارى إيه ؟
ربنا ولا حبيبك؟
سيبيه لله وانجي من عذاب القبر ، وانجي من الوقوع من على الصراط ، وانجي من اشتعال القبر عليكى
ولو ألح عليكى قوليله
أنا مستعدة أضحى بكل حاجة علشانك .....إلا ربنا
أنا مستعدة اخسر كل حاجة علشانك .....إلا ربنا
وتأكدي إن لو الإنسان ده فيه الخير ليكي ربنا هيرده ليكى تانى

الكلام كتير جدا ....بس المهم يكون فيه قلوب ذكية تقدر تعرف نجاتها من فين ؟
نجاتها مع ربنا ولا مع حبيبها ؟

أقول قولي هذا وأستغفر الله لي ولكم
سبحانك اللهم وبحمدك أشهد أن لا إله إلا أنت أستغفرك وأتوب إليك

والسلام عليكم ورحمة الله وبركاته



نظرت شروق لسامية فوجدت عينا سامية قد تعلقت بمكان غادة ، ودموعها تنساب منها دون صوت وفجأة نظرت إلى شروق وارتمت فى حضنها

وقالت : ربنا ربنا يا شروق
وحينها بكى كلاهما بصوت مسموع


كلنا يعرف لماذا بكت سامية ، لكن .. لماذا بكت شروق ؟؟

هل تخفي سراً لا يعلمه أحد؟!!

هذا ما سنعرفه معا في حلقتنا القادمة إن شاء الله

[روضه الحرمين]

رد: القرار الصعب

جزاكم الله خيرا
متابعين

[omanas88]

رد: القرار الصعب

السلام عليكم
متابعين معكم