( فكّر ، ركّز و خليك زيهم ) ..؟؟ مفاجأة رمضان الجديدة إن شاء الله

[A_E_B]

الحمد لله وحده والصلاة والسلام على من لا نبي بعده

قبل أى حاجه .. كل عام وأنتم بخير

رمضان مبارك

أسأل الله أن يرزقنا العمل الصالح ويتقبله منا ويرزقنا الإخلاص في القول والعمل ويرزقنا حسن العمل في هذا الشهر وفي غيره من الشهور

سلسلة جديدة في رمضان هذا

مفاجأة رمضان السنة ديه هتكون :

( فكّر ، ركّز و خليك زيهم )

!! ايه الكلام الغريب ده !!

انت جاى تهزر ولا ايه !! يعنى ايه بقه الكلام الغريب ده ؟!!

السلسلة حتكون مكونة من حلقات .. كل حلقة إن شاء الله من 3 أجزاء

نشرح الأجزاء باختصار :

الأول : فكّر

في رمضان خصوصا بتزيد الطاعات وبتزيد الاعمال الصالحة من كل واحد فينا وكمان بنزيد من الأذكار ..

لكن هل فعلا فكّرنا في ايه الأحسن نعمله أو ايه الذكر اللى نقوله أو ايه النوايا اللى ننويها او ازاى نعمل العمل بتاعنا على أحسن وجه ؟؟

في الجزء ده حنفكّر مع بعض إن شاء الله في كل ده للوصول للأفضل إن شاء الله

الثاني : ركّز

في حياتنا بتعدّى علينا نعم كثيييييييييييير جدا من نعم ربنا .. و بنتقلب في نعم الله ليل نهار في كل وقت وحين .. نعم لا تُعد ولا تُحصى ..

لكن هل فعلا ركّزنا في النعم ديه وذكرناها ؟ هل ركّزنا في اننا نعرف نعم الله ؟ هل ركّزنا اننا نشكر نعم الله ؟ وهل فعلا فاكرين نعم الله علينا ولا اتشغلنا عنها ؟؟ وازاى نشكر نعم الله .. كيف يكون شكر نعمة الله علينا ؟؟

في الجزء ده حنركّز مع بعض إن شاء الله في كل ده ازاى نعرف نعم الله نتذكرها و ازاى نحقق شكر النعم

الثالث : خليك زيهم

أحوالنا دلوقتى شايفين انها زي مكان عليها السلف الصالح ؟!! طيب هما كانوا عايشين ازاى واحنا عايشين ازاى ؟؟ ايه اقوالهم وايه افعالهم وايه حياتهم ؟ وازاى نقدر نستفيد منهم ونحاول نبقى زيهم

قال صلى الله عليه وسلم : (

خير الناس قرني ، ثم الذين يلونهم ، ثم الذين يلونهم )

في الجزء ده نحاول إن شاء الله نتعرف على أقوالهم وأفعالهم و ازاى كانوا بيعيشوا رمضان وغير رمضان علشان نحاول نبقى زيهم

ده باختصار شرح لسلسلتنا في رمضان السنة ديه إن شاء الله

وإن شاء الله تعجبكم ويكون فيها بعض الفائده

ونسأل الله أن يتقبل منا ومنكم

وإن شاء الله نبدأ بأولى حلقاتنا غدا بإذن الله ..

فانتظرووووونا ....

[M_S_A]

رد: ( فكّر ، ركّز و خليك زيهم ) ..؟؟ مفاجأة رمضان الجديدة إن شاء الله

جزاك الله خيراً اخى الحبيب ونفع الله بكم

واثابك الله الفردوس الأعلى

احبك فى الله


وفى انتظارك اخى الحبيب

بارك الله فيك

[Dr.hala]

رد: ( فكّر ، ركّز و خليك زيهم ) ..؟؟ مفاجأة رمضان الجديدة إن شاء الله

جزاكم الله خيرا

[شروق]

رد: ( فكّر ، ركّز و خليك زيهم ) ..؟؟ مفاجأة رمضان الجديدة إن شاء الله

جزاكم الله خيرا اخونا وتقبل الله منكم صالح الاعمال

[moslma lillah]

رد: ( فكّر ، ركّز و خليك زيهم ) ..؟؟ مفاجأة رمضان الجديدة إن شاء الله

ما شاء الله

سلسلة مُوفقة إن شاء الله

متابعون معكم إن شاء الله

بارك الله فيكم

[ضياء التقوي]

رد: ( فكّر ، ركّز و خليك زيهم ) ..؟؟ مفاجأة رمضان الجديدة إن شاء الله

جزاكم الله خيراً

[A_E_B]

رد: ( فكّر ، ركّز و خليك زيهم ) ..؟؟ مفاجأة رمضان الجديدة إن شاء الله

الحمد لله وحده والصلاة والسلام على من لا نبى بعده

نبدأ بحمد الله سلسلة

" فكّر ، ركّز و خليك زيهم"

وبدون مقدمات كثير ..

مع الحلقة الأولى

1- فكّر

مع بداية شهر رمضان .. دايما بحب أذّكر بالحديث العظيم جدا .. وهو قول الرسول عليه الصلاة والسلام :

( من صام رمضان إيمانا و احتسابا غفر له ما تقدم من ذنبه )

إذن حتى تتحقق المغفرة ويتحقق الهدف من الصوم ويُغفر لنا ما تقدم من ذنوبنا ونكون من الفائزين لابد من شرطان ..

أن يصوم الإنسان إيمانا و إحتسابا ... لازم نظبط النية

إيمانا : بالله و بما أنزل و بما فرضه علينا ... فنصوم لأنه فرض علينا يجب صيامه ... و لأنه من أركان الإسلام ... مش لأننا بنصوم علشان متعودين نصوم .. ولا علشان كله بيصوم .. لا

الموضوع لازم يكون عبادة مش عادة .. فبنتعبد لله بالصيام

و إحتسابا : نحتسب الأجر و المغفره ...و إنى بصيامى هذا أحتسب أن يغفر الله لى ما تقدم من ذنبي ..وأنى سأثاب بهذا الصوم

ده الشرح المبسط للحديث والنية اللى لازم تبقى موجود .. لكن عايزين نفكّر هل ممكن يكون فيه حاجات تفسد علينا صومنا واحنا مش واخدين بالنا ؟؟

عايزين نفكّر ازاى نصوم احسن صيام ؟

قال رسول الله صلى الله عليه وسلم : ( وإذا كان يوم صوم أحدكم فلا يرفث ولا يصخب ، فإن سابه أحد أو قاتله فليقل : إني امرؤ صائم )ا

ديه أول حاجه عايزين نفكّر فيها ونحطها في دماغنا

لو عايزين نوصل لأفضل الصيام .. لا نرفث ولا نصخب

الرفث : هو الفحش من القول .. الكلام الفاحش .. كلام في حاجات ميصحش نتكلم فيها .. وديه ممكن يدخل فيه الكلام مع البنات للولاد او الكلام مع الولاد للبنات .. كلام الحب والصحوبية و الجيرل فريند والبوفريند والكلام ده .. ومنشتمش حد منسبش حد .. منغتابش حد

الصخب : الصياح والخصام .. الخناق والزعيق وتعلية الصوت والنرفزة .. يبقى منتخانقش ولا نزعق ولا نتنرفز على حد

خلينا هاديييييين

ولو حد نرفزنا او شتمنا او اتخانق معانا .. ببساطه جدا نقول : إنى صائم

لو قدرنا نعمل كده يبقى احنا فكّرنا صح ازاى نصوم صح

خلينا هاديييين

____________________________________________ __

2- ركّز

الجزء ده بجد .. جزء مهم جدااااا .. الجزء ده كثييير مننا غافلين عنه .. وانا اولهم

رغم ان الجزء ده بيشترك فيه كل الخلق ..

وهو التقلب في نعم الله عزّ وجلّ

لكن مين اللى بيركّز في انه يذكر نعم الله ؟؟ ومن اللى بيركّز يشكر نعم الله عليه ؟؟

قال الله عزّ وجلّ : ( فَاذْكُرُوا آلَاءَ اللَّهِ لَعَلَّكُمْ تُفْلِحُونَ )ا

فعايزين نركّز في اننا نذكر نعم الله .. لأن ده حيقودنا إلى معرفة نعم ربنا وحيقودنا لشكرها .. فيحصل الفلاح

ففي أول حلقة عايزين نركّز في نعمة عظيمة جداااااااااا .. يمكن كثير مننا محسش بيها او مركّزش فيها

النعمة ديه انك دلوقتى في رمضان .. ولسه عايش ..

النعمة أن الله بلغك رمضان

كثيييير جداااا بندعى من قبل رمضان بكثير ان يبلغنا الله رمضان .. ويُروى ان الصحابة كانوا يدعون قبل رمضان بستة أشهر ان يبلغهم الله رمضان

علشان تعرف نعمة ربنا عليك انك بلغت رمضان اقرأ الحديث ده :

( كان رجلان أسلما مع النبي صلى الله عليه وسلم واستشهد أحدهما وأخر الآخر سنة - يعنى الثاني مات بعده بسنة - قال طلحة بن عبيد الله فأريت الجنة فرأيت فيها المؤخر منهما أدخل قبل الشهيد فعجبت لذلك فأصبحت فذكرت ذلك لرسول الله صلى الله عليه وسلم أو ذكر ذلك لرسول الله صلى الله عليه وسلم فقال رسول الله صلى الله عليه وسلم أليس قد صام بعده رمضان وصلى ستة آلاف ركعة وكذا وكذا ركعة صلاة السنة )

يعنى اللى مات متأخر سنة سبق الشهيد بصوم رمضان والصلاة والنوافل

طيب وهل كل اللى كان بيدعى ان ربنا يبلغه رمضان بلغ رمضان ؟؟

لا .. كثير ماتوا قبل رمضان .. ومنهم من مات في أخر شعبان .. منهم من مات في اخر يوم في شعبان .. وكان عندى أخ صاحبي مات في أخر يوم في شعبان

فديه نعمة عظيمة جدا أن الله بلغك رمضان وتقدر تعمل أعمال صالحة تسبق بها الكثير

طيب عايزين نركّز ازاى نشكر النعمة ديه ؟؟

شكر هذه النعمة يكون بالاجتهاد في الطاعات في الشهر ده .. لان ربنا بلغك الشهر فيكون شكر النعمة اننا نطيع ربنا في الشهر ده ونستغل النعمة ديه لعل الله يتقبل منا

___________________________________________ ________

3- خليك زيهم

ولأنى طولت في الجزئين اللى فاتوا وشكلى حتضرب من اول حلقة

حنختصر في الجزء الثالث

في رمضان ازاى كانت احوال السلف ؟؟ هل زينا بنفرح قوى لما بنقرأ قرآن نصف ساعه في اليوم ؟؟ ولا كانوا بيعملوا ايه ؟؟

حنشوف مثالين بس .. علشان مطولش:

الأول : كان مالك بن أنس إذا دخل رمضان يفر من الحديث ومجالسه أهل العلم ويقبل على تلاوة القرآن من المصحف

الثاني : كان سفيان الثوري إذا دخل رمضان ترك جميع العباد وأقبل على قراءة القرآن

الإمام مالك والإمام سفيان الثوري -رحمهما الله- كانوا لما يدخل رمضان يسيبوا كل العلوم الثانية ويسيبوا الحديث ويسيبوا مجالسة أهل العلم ويركزوا على تلاوة القرآن

فياريت احنا كمان نسيبنا من الدخول في النقاشات الفقهية والمناظرات والمحاورات والجدال وحتى البرامج الدينية الأحسن نسيب ده كله ونركز في قراءة القرآن في شهر رمضان .. واكيد طبعا نسيبنا من الكارتون والفوازير والمسلسلات وبكار ورشيده والحاجات ديه

.. ياريت نخلينا زيهم

_______________________________________ ___________________

بكده خلصت الحلقة الأولى .. يارب متكونوش زهقتوا ..

وبكره إن شاء الله نلتقى في الحلقة التانية إن شاء الله

وجزاكم الله خيرا

ابسط ما تساهم به نشر الحلقات ولو بالايميل

-----------------------

إنتظرونا غدا بإذن الله مع الحلقة الثانية

إنتظرونـــــــــــــــا ....

[سهير(بنت فلسطين)]

رد: ( فكّر ، ركّز و خليك زيهم ) ..؟؟ مفاجأة رمضان الجديدة إن شاء الله

السلام عليكم
جزاكم الله كل خير وجعله في ميزان حسناتكم

[Dr.hala]

رد: ( فكّر ، ركّز و خليك زيهم ) ..؟؟ مفاجأة رمضان الجديدة إن شاء الله

جزاكم الله خيرا

موضوع رائع وهااااام جدا

[محبة التوحيد]

رد: ( فكّر ، ركّز و خليك زيهم ) ..؟؟ مفاجأة رمضان الجديدة إن شاء الله

جزاكم الله خيرا ..ننتظر باذن الله

[A_E_B]

رد: ( فكّر ، ركّز و خليك زيهم ) ..؟؟ مفاجأة رمضان الجديدة إن شاء الله

الحمد لله وحده والصلاة والسلام على من لا نبى بعده

نبدأ بحمد الله سلسلة

" فكّر ، ركّز و خليك زيهم"

وبدون مقدمات كثير ..

مع الحلقة الثانية

1- فكّر

في الحلقة السابقة كان الكلام عن ترك ما قد يُفسد الصوم من الأقوال والأعمال .. الحاجات اللى ممكن تضيع صيامنا وتقلل ثوابه

طيب لو فكّرنا ايه اللى ممكن نعمله فيحسّن صومنا ونبقى ممن صام أفضل الصيام ؟

نقرأ الحديث ده : ( كان رسول الله صلى الله عليه وسلم أجود الناس ، وكان أجود ما يكون في رمضان حين يلقاه جبريل ، وكان يلقاه في كل ليلة من رمضان فيدارسه القرآن ، فلرسول الله صلى الله عليه وسلم أجود بالخير من الريح المرسلة )

الرسول صلى الله عليه وسلم كان أجود ما يكون في رمضان وكان في رمضان أجود بالخير من الريح المرسلة

فلو فكّرنا في الحديث ده نفهم أنه لازم في شهر رمضان بالأخص نزيد من كل أنواع الخير : الصدقات - العبادات - تلاوة القرآن - الصلاة - القيام - النوافل - الذكر

كل ديه أنواع من أنواع الخير .. فكان الرسول صلى الله عليه وسلم أجود بها من الريح المرسلة في رمضان

نتكلم سريييييييعا على أول حاجه

الصدقة

عايزين في شهر رمضان نزوّد من الصدقات .. خلّي في جيبك أو في عربيتك فلوس فكه كثير .. نصف جنيه أو جنيه .. وحاول ألا ترد سائلا في شهر رمضان .. حاول تبقى أجود من الريح المرسلة .. يعنى لو معاك عشرة جنيه .. خليها معاك فكه نص جنيهات

و تصدق ومتفكرش كثير في شهر رمضان في الفلوس البسيطة ديه .. هل يستحق ام لا .. خليك أجود من الريح المرسلة

و نفّكر بس بحديث واحد :

( كل امرئ في ظل صدقته, حتى يفصل بين الناس أو قال يحكم بين الناس )

يعنى تصدق لعلها تُقبل فتكون في ظل صدقتك يوم القيامه

يلّا كلنا نبدأ نخلى معانا فلوس فكّه ونتصدق بها أو نضع منها في الصناديق في المساجد أو غيرها

____________________________________________ __________________

2- ركّز

ركّزنا في الحلقة السابقة في نعمة أن بلغنا الله رمضان .. وأننا نشكر ربنا على أنه بلغنا هذه النعمة بالقول ونشكره بالفعل أننا نُرى الله منا خيرا في الشهر ده شكرا لله أنه بلغنا الشهر

طيب دلوقتى أنت بتقرأ الكلام ده وبتقرأ أنك بلغت رمضان وان ديه من نعم ربنا وانك المفروض تشكر نعمة ربنا

لو ركّزنا شوية حنلاقى ان ديه في حد ذاتها نعمة احنا مش واخدين بالنا منها

نعمة :أنك تقرأ وتسمع عن الله ورسوله

أنك بتقرأ كلام يذكرك بالله ورسوله .. غيرك كثييييييييييير جدااااااا مشغولين دلوقتى في رمضان بمتابعة المسلسلات والأفلام والمسابقات والفوازير والأغاني والسهرات ومسمعوش ولا كلمة عن رمضان وعن فعل الخير و عن نعم الله وعن شكر الله ولا عملوا أى طاعه ولا صلوا تراويح ولا قرأوا قرآن

ديه والله في حد ذاتها نعمة كبيرة جدا أن الله اختارك من بين كل دول وسمح ليك أنك تقرأ عنه وأن تذكره وأن تطيعه .. نعمة كبيرة جدا أن الله هداك ويسر لك سبل الهدى

أن ربنا وفقك أنك تقرأ كلام تعرفه بيه وأنك تنشغل بيه عن الأشياء الثانية اللى زي المسلسلات والافلام وغيرها

ولو ركّزنا شوية في نفس النعمة ديه بس على نطاق أوسع ..

كام واحد في الدنيا ديه أنعم الله عليه بنعمة الإسلام ؟؟

شوف كم واحد في الدنيا ديه لسه بيعبد شئ غير الله .. بيعبد بقر أو بيعبد حجر أو بيعبد ميت أو بيعبد فأر أو بيعبد تمثال

فالحمد لله على نعمة الإسلام وكفى بها نعمة

فنركّز ونذكر نعمة الله علينا .. أنه جعلنا مسلمين .. وأننا دلوقتى ممن يسمع عنه سبحانه وتعالى وعن رسوله لإن غيرنا كثير حتى من المسلمين مسمعش الكلام ده ومشغول في حياته كلها بالشهوات وغيرها

طيب بعد أن عرفنا هذه النعمة وتذكرناها عايزين نركّز ازاى نشكرها ؟؟

نشكرها بالقول .. يعنى نقول يارب لك الحمد ولك الشكر أن جعلتنا نذكرك ونعبدك و نترك ما سواك

ونشكرها بالفعل : بعد أن أنعم الله علينا بمعرفته مينفعش اننا نساوى نفسنا باللى مسمعوش عن الله ورسوله

يعنى مينفعش بعد منعرف الكلام ده نروح نسيب الطاعات ونتساوى مع غيرنا في الانشغال بالشهوات والانشغال بالحاجات المحرمه ونترك الطاعات ونترك العبادات

وتذّكر قول الله عزّ وجلّ : ( لَئِنْ شَكَرْتُمْ لَأَزِيدَنَّكُمْ )ا

فلو عايز تزيد في الطاعه والقرب من الله والالتزام .. اشكره على نعمه بالقول والفعل

وسيبك من المسلسلاااات

______________________________________________ ______________________________

3- خليك زيهم

كان ابن عمر رضي لله عنهما يصوم ولا يفطر إلاَّ مع المساكين، فإذا منعهم أهله عنه لم يتعشَّ تلك الليلة، وكان إذا جاءه سائل وهو على طعامه أخذ نصيبه من الطعام وقام فأعطاه السائل فيرجع وقد أكل أهله ما بقي في الجِفْنَةِ، فيصبح صائماً ولم يأكل شيئاً.

سبحان الله

كان ابن عمر ميفطرش إلا مع المساكين .. وكان لو جاله سائل وهو بياكل مع اهله يأخذ نصيبه من الأكل ويروح يعطيه للسائل ويرجع ميلاقيش اكل .. فيبيت وهو لم يأكل شئ ويصبح صائم وهو مكالش حاجه اليوم اللى قبله

هو ده معنى أنك تكون أجود من الريح المرسلة

احنا فين من الكلام ده ؟؟ الواحد فينا لو جاله حد خبط على باب شقته وهو بيفطر .. يروح يتسحب ويبص من العين السحرية ولو لقاه حد يعرفه

يقول : يوووووووووه هو ده وقته الواحد كان عامل حسابه حيخلص على الثلاثة كيلو لحمه دول لوحده ويحلى بالصنيتين الكنافه والقطايف

وممكن تلاقيه بيقول للناس في البيت طفى الانوار واعملوا نفسكم ميتين لحد ميمشي .. ويفضل كاتم نفسه لحسن يسمعه اللى بره

ولو كان في عز كرمه يفتحله الباب ويروح مخبي اللحمة والكنافة والقطايف ويروح مطلع للضيف حتة جنبة قريش ولا مِشْ مدوده ويقوله اصلنا ناس زهّاد وده اكلنا .. والضيف يبقى حيموت من العطش والجوع يجيبله كوباية مياه بالعافية

لا .. مش هو ده حال سلفنا .. حال السلف انهم مكانوش بيفكروا في نفسهم .. كان يهمهم ان يكونوا اجود من الريح المرسلة

كان يهمهم الأجر والثواب .. فنحرص اننا نكرم الضيف ونعطى السائل حتى لو أثر على نصيبنا في الأكل

ايه يعنى !! كله اكل وفي الاخر كله بيروح

خليك زيهم

المهم الأجر والثواب

والأهم لو حد عامل لحمة يقولى

_____________________________________________

بكده خلصت الحلقة الثانية .. يارب متكونوش زهقتوا ..

وبكره إن شاء الله نلتقى في الحلقة الثالثة إن شاء الله

وجزاكم الله خيرا

ابسط ما تساهم به نشر الحلقات ولو بالايميل

_____________________________________________

إنتظرونا غدا بإذن الله مع الحلقة الثالثة ..

إنتظرونـــــــــــــــــــا ......

[أبو البراء الشامي]

رد: ( فكّر ، ركّز و خليك زيهم ) ..؟؟ مفاجأة رمضان الجديدة إن شاء الله

جزاكم الله خير الجزاء أخى الحبيب
وبارك الله فيكم ونفع بكم
واثابك الجنة

[A_E_B]

رد: ( فكّر ، ركّز و خليك زيهم ) ..؟؟ مفاجأة رمضان الجديدة إن شاء الله

السلام عليكم
جزاكم الله كل خير وجعله في ميزان حسناتكم

وعليكم سلام الله ورحمته وبركاته
جزانا الله وإياكم ..

جزاكم الله خيرا

موضوع رائع وهااااام جدا

جزاكم الله خيرا

جزاكم الله خيرا ..ننتظر باذن الله

جزانا الله وإياكم

جزاكم الله خير الجزاء أخى الحبيب
جزاك الله خيرا أخى الحبيب
وبارك الله فيكم ونفع بكم
وبارك فيك ربى
واثابك الجنة
أنا وإياك أخى الحبيب

[A_E_B]

رد: ( فكّر ، ركّز و خليك زيهم ) ..؟؟ مفاجأة رمضان الجديدة إن شاء الله

الحمد لله وحده والصلاة والسلام على من لا نبى بعده

نبدأ بحمد الله سلسلة

" فكّر ، ركّز و خليك زيهم"

وبدون مقدمات كثير ..

مع الحلقة الثالثة


________________________________________

1- فكّر

حنفكّر سريعا بالحديث اللى عايزين نحطه في دماغنا ونفكّر فيه كثير في رمضان

( كان رسول الله صلى الله عليه وسلم أجود الناس ، وكان أجود ما يكون في رمضان حين يلقاه جبريل ، وكان يلقاه في كل ليلة من رمضان فيدارسه القرآن ، فلرسول الله صلى الله عليه وسلم أجود بالخير من الريح المرسلة )

في الحلقة السابقة الكلام كان عن الصدقة عموما


في الحلقة ديه حنتكلم عن نوع معين من الصدقة

صدقة السر

الصدقة اللى تعملها من غير محد يشوفك .. الصدقة اللى تخفيها عن الناس ولا يعلمها إلى الله

قال رسول الله صلى الله عليه وسلم: ( سبعة يظلهم الله في ظله يوم لا ظل إلا ظله منهم : ورجل تصدق بصدقة فأخفاها حتى لا تعلم شماله ما تنفق يمينه )ا

يعنى سبحان الله ممكن صدقه واحده فقط تتصدق بها مره في حياتك تخفيها عن الناس وتخلص لله فيها وتبالغ في انك تخفيها ومحدش يشوفك غير الله .. تكون هى السبب في انك تكون في ظل عرش الرحمن يوم لا ظل إلا ظله

طيب ليه صدقة السر كان ليها فضل كبير ؟؟

لأنها يُظن فيها الاخلاص أكثر والبعد عن الرياء .. لانك بتتصدق بيها وانت بتخفيها عن كل الناس ومش عايز حد يشوفك وانت بتتصدق بيها لان تبتغى وجه الله فقط بها

علشان كده نلاقى قول الله عزّ وجلّ : ( إِنْ تُبْدُوا الصَّدَقَاتِ فَنِعِمَّا هِيَ وَإِنْ تُخْفُوهَا وَتُؤْتُوهَا الْفُقَرَاءَ فَهُوَ خَيْرٌ لَكُمْ )ا

فإن أخفيتها خير لك أنت .. خير لسلامة قلبك من الرياء .. وطبعا إن كانت المصلحة في العلانية كانت العلانية أفضل للفقير .. لكن الكلام عنك أنت كمتصدق .. أحرص ان يكون لك صدقة في السر لا يعملها إلا الله .. لعلك تكون بهذه الصدقة التى ربما كانت قيمتها قليلة جدا .. ممكن تكون جنيه واحد بس أخلصت فيه النية لله وكنت تبتغى وجه الله فقط فيها .. تكون هى سبب نجاتك من حر يوم القيامة وتكون من السبعة الذين يظلهم الله في ظله يوم القيامة

زي متفقنا احرص على انك تكون أجود بالخير من الريح المرسلة واحرص على صدقة في السر تخفيها تماما عن كل الناس

مش لازم لما تيجي تتصدق تجمّع كل صحابك وقرايبك وجيرانك وتصورها فيديو وتنزلها على اليو تيوب والفيس بوك وتعمل جروب ( ياجماعه على فكره انا بتصدددددق ) علشان الناس تعرف انك بتتصدق .. وفي الاخر تلاقيه مطلّع ربع جنيه مخروم وبيحدفه للفقير ..

اخفييييها أفضل لك

________________________________ __

2- ركّز

كان الكلام في الحلقة السابقة عن نعمة ان الله اختارك من بين الكثيرين انك تسمع عنه وتسمع أوامره وتسمع أحاديث رسوله

لكن في حاجه كثير اوى مبنركّزش فيها

صليت بالامس التراويح ؟؟ صليت القيام ؟؟

كنت فرحان بعد معملت كده وبعد مصليت التراويح وحسيت انك عملت حاجه كبيرة وكنت احسن من ناس كثير ؟؟

وانت رايح تصلي التراويح كان فيه ناس صحابك واقفين قدام الكشك او المحل بيشربوا سجاير وحاجه ساقعه وبيهرجوا

رحت صليت التراويح 8 ركعات ووتر ورجعت لقيتهم لسّه في نفس المكان ولسّه في نفس القعده

طيب حد فينا ركّز اشمعنى هو صام و صلى القيام وغيره لأ ؟؟

حد فينا ركّز اشمعنى هو ربنا اختاره من بين الناس ديه كلهم انه يصلي بين يديه ويقوم ليل رمضان ؟؟

طيب بالله عليكم مش ديه نعمة كبيرة جداااا من ربنا عليك

انه اختارك انت من بين كل الناس الغافله عنه وقرّبك منه ورزقك الفرصة ديه انك تبقى ممن قام رمضان ؟؟

الموضوع ده مش من نفسك علشان انت كويس عملت كده بس .. لأ .. ده توفيق من الله ونعمة كبيرة منه عليك انه اصطفاك انت من بين الناس ديه كلها ان تصوم وتقوم

مش ديه نعمة تستحق الشكر ؟؟

طبعا نعمة تستحق الشكر .. طيب عايزين نركّز ازاى نشكر النعمة ديه ؟؟!؟

بالقول : نشكر ربنا بالقول .. نشكره ونقول الحمد لله والشكر لله انك يارب وفقتنا واخترتنا وهديتنا اننا نصلى بين يديك ونسمع كلامك ونقوم رمضان وغيرنا بعيييد عنك ومصلاش ولا قام .. يارب لك الحمد ولك الشكر يارب أدم علينا هذه النعمة وارزقنا شكرها

وبالفعل : اننا نزيد من الطاعات وعلى القيام .. نثبت على صلاة التراويح وعلى القيام ومنكسلش ابدا عنها

ده يكون من شكر النعمة ديه .. ودايما تذكّر قول الله عزّ وجلّ :

( وَقَلِيلٌ مِنْ عِبَادِي الشَّكُورُ )

خليك من القليل دول

ــــــــــــــــــــــــــــــــــــــــــــــــــ ــــــــــــــــــــ

ــــــــ

3- خليك زيهم

احنا دلوقتى في رمضان .. وكلنا الحمد لله صايمين

بس المشكلة بقه .. ان في وقت الصيام .. كثييييير جدااا مننا بيعمل حاجه غريبه .. يقولك اصل اليوم طويل وانا بصراحه كده

حسلّى صيامي

حتسليه ازاى يعنى ؟؟! يقولك حشوف بقه اى حاجه اضيع بيها الوقت .. حلعب فيفا او اروح السيبر اقضيها ميدل اوف هونور او نروح نلعب كووره او اتفرج على فيلم اجنبي .. اى حاجه اضيع بيها الوقت

طيب ده حال كثير مننا بيضيع الوقت علشان نفسه الوقت يعدي بسرعه علشان اليوم يخلص .. طيب ايه كان حال السلف ؟؟ كانوا زينا كده برضه ؟؟

قال ابن مسعود - رضى الله عنه - : ( ما ندمت على شيء ندمي على يوم غربت شمسه نقص فيه أجلي ولم يزدد فيه عملي )ا

الله المستعان

شوفوا الفهم !! يندم أشد الندم على يوم مضى نقص فيه عمره .. عمره نقص يوم .. لوكان الواحد فينا عمره ستين سنة وحيموت وهو عنده ستين سنة .. فكل يوم بيعدي الستين سنة بينقصوا يوم

فهو - رضى الله عنه - بيندم اشد الندم على يوم يمر ينقص فيه عمره وميزيدش فيه عمله .. معملش فيه حاجه تزوّد عمله وتقربه من الله أكثر

فبدل منضيع الوقت في رمضان ونفسنا الوقت يعدّي ونضيعه في أى حاجه ملهاش أى فايده .. خلونا نستفيد من وقتنا .. بدل الفيفا خلينا نقرأ جزء من القرآن .. بدل السيبر انزل اتصدق .. بدل لعب الكوره انزل وزع شنط رمضان .. وزع كتيبات .. بدل متتفرج على فيلم أو مسلسل .. اتفرج على برنامج ديني تستفيد بيه في دنيتك وأخرتك

عايزين نحرص على وقتنا أكثر في رمضان

لسه امبارح بس كنت مع واحد بعد العصر بيقولى :

انا حروح اعمل اى حاجه اضيع بيها الوقت لحد الفطار .. طيب وبعد الفطار ؟؟

طبعا حيعمل اى حاجه يضيع بيها وقته لحد السحور

وخلاص اليوم كله بقه تضييع للوقت مستنيين الفطار ومستيين السحور .. بس كده

لا .. خلينا نحرص على وقتنا .. ونستفيد منه .. وكل يوم يعدّى يزيد عملنا

وخليك زيهم

بكده خلصت الحلقة الثالثة .. يارب متكونوش زهقتوا ..

وبكره إن شاء الله نلتقى في الحلقة الرابعة إن شاء الله

وجزاكم الله خيرا

ابسط ما تساهم به نشر الحلقات ولو بالايميل

______________________________________________

[فجر الهمة]

رد: ( فكّر ، ركّز و خليك زيهم ) ..؟؟ مفاجأة رمضان الجديدة إن شاء الله

جزاكم الله خيرا