( فكّر ، ركّز و خليك زيهم ) ..؟؟ مفاجأة رمضان الجديدة إن شاء الله

[خـادمـهـ لديـن الله]

رد: ( فكّر ، ركّز و خليك زيهم ) ..؟؟ مفاجأة رمضان الجديدة إن شاء الله

جزاكم الله خيراً
بس* أنتبه أنه يُمنع وضع الصور التعبيريه*
وموضوع متميز وإسلوبه سلس ومبسط
ونعم الحمدلله الذى بلغنا رمضان والذى أنعم علينا بنعمة الأسلام وكفى بها نعمه.

[ولائى لدينى]

رد: ( فكّر ، ركّز و خليك زيهم ) ..؟؟ مفاجأة رمضان الجديدة إن شاء الله

السلام عليكم ورحمة الله وبركاته
جزاكم الله خيرا وبارك الله فيكم موضوع رائع
ما شاء الله لا قوة إلا بالله اللهم بارك

[A_E_B]

رد: ( فكّر ، ركّز و خليك زيهم ) ..؟؟ مفاجأة رمضان الجديدة إن شاء الله

الحمد لله وحده والصلاة والسلام على من لا نبى بعده

نبدأ بحمد الله سلسلة

" فكّر ، ركّز و خليك زيهم"

وبدون مقدمات كثير ..

مع الحلقة الرابعة

________________________________________

1- فكّر

زي متفقنا حيكون شعارنا :

( سأكون أجود بالخير من الريح المرسلة )

اتكلمنا في الحلقات السابقة عن الصدقات .. في هذه الحلقة حيكون كلامنا على حاجه مهمه جدااااااا في رمضان

كلنا الحمد لله بنصوم في رمضان .. طيب بنصوم كم يوم ؟؟

30 يوم

طيب عايزين نفكّر ازاى ناخذ أجر صيام أكثر من 30 يوم ؟؟ ممكن كأننا صمنا 300 يوم وممكن اكثر وممكن اقل .. طيب ازاى ؟؟

في الحديث الذي صححه الشيخ الألباني : ( من فطّر صائما كان له مثل أجره ، غير أنه لا ينقص من أجر الصائم شيئا )ا


وللأمانه الحديث ضعّفه بعض أهل العلم

يعنى اللى يفطّر صائما يكون له مثل أجر الصائم اللى فطّره .. فلو فطّرت 10 يكون لك مثل أجر ال 10 لا ينقص من أجورهم شئ

طيب هل لازم أنى أفطّره يعنى يشبع من اللى بفطّره بيه ؟؟

موضوع الإشباع ده فيه خلاف بين العلماء منهم من قال انه الإفطار اللى يحصل بيه الأجر ده لازم الإشباع ومنهم من قال لا يلزم الإشباع .. والأمر واسع إن شاء الله

وقال الشيخ ابن عثيمين والشيخ ابن باز رحمهما الله انه لا يلزم الإشباع و قال الشيخ ابن عثيمين -رحمه الله - انه يحصل الأجر ولو فطره بتمره

فخلينا نبدأ في افطار الصائمين .. اللى يقدر يشترى تمر ويضعه في المسجد وقت الإفطار ليفطر عليه الصائمون .. يعمل كده

اللى يقدر يوزع بنفسه يوزع .. اللى يقدر يعمل وجبه أكبر من التمر يعمل .. خد جزء من الافطار وضعه في علبه واعطها لصائم يفطر عليها

و شئ سهل جدا ضع أموالا في صناديق افطار الصائمين بنية افطار الصائمين

وإن شاء الله تحصل على ثواب وأجر كل من تفطره

يلا نأخذ أجر صيام كثييير بفضل الله

مستنى العزومات بقه هاه .. مين حيفطّرني ؟؟

بس الشرط عندي الإشباااااااع

_____________________________________________


2- ركّز

طبعا لو قعدنا نحاول نعد نعم الله علينا مش حنقدر .. لأنه كما قال الله عزّ وجلّ : ( وَإِنْ تَعُدُّوا نِعْمَةَ اللَّهِ لَا تُحْصُوهَا )ا

امبارح اتكلمنا عن نعمة ان ربنا انعم عليك بانك بتصلى التراويح والقيام و عن شكرها

لكن عايزين نركّز في حاجه مهمه جدا في الصلاة عموما وفي صلاة التراويح

وانت بتصلى وراء الامام والامام بيقرأ القرآن .. بتسمع القرآن .. وبتفهم القرآن .. وبتتأثر بالقرآن

حد فينا ركّز قبل كده في ان كثييييييييير جدااااااا بل أغلب أهل الأرض لما يسمعوا القرآن في الصلاة مش حيفهموه .. عارف ليه ؟؟.

لأنك واحد من حوالى 350 مليون عربي من إجمالي حوالى 7 مليار إنسان على الأرض

يعنى انت واحد من 5 في المية فقط بيتكلموا عربي على كوكب الأرض !!

واحد من 5% بس ممكن يفهموا اللغة العربية ويفهموا القرآن لما يسمعوه من غير ميحتاجوا لنسخ مترجمة لكلمات القرآن

لو ركزّنا أكثر نلاقى ان عدد المسلمين مليار وشوية .. فالحمد لله أن الله جعلنا مسلمين وديه نعمة عظيمة

لكن فقط حوالى ربع المسلمين بيتكلموا عربي .. والباقى مبيتكلموش عربي وبيتعبوا جدا علشان يفهموا معاني القرآن ويفهموا أحاديث الرسول صلى الله عليه وسلم وأقوال الأئمة والعلماء

يعنى انك تبقى واحد من ربع المسلمين .. تبقى واحد من 5 % من سكان الأرض اللى يكونوا بيتكلموا بلغة القرآن وبيقرأوا العربية

يكونوا بيفهموا كلام الله وكلام رسوله بدون الحاجة لمترجم أو لكتب ترجمة .. بيقرأوا القرآن مش بيقرأوا ترجمته

بالله عليكم أليست نعمة تستحق الشكر ؟؟؟

والله نعمة عظيمة أن ربنا اختارك ورزقك فهم لغة القرآن وانك وانت بتصلى خلف الامام فاهم بيقول ايه و بتتأثر بيه وبتركّز فيه

طيب ازاى نشكر النعمة ديه ؟؟

بالقول : تشكر باللسان وتحمد لله وتشكره انه يسّر لك فهم لغة القرآن وفهم لغة العرب وأنه خلقك مسلما عربيا تفهم وتعقل كلامه وكلام رسوله صلى الله عليه وسلم وانك تستطيع أن تفتح المصحف فتقرأ منه بدون معاناه وانك تفهم ما يُتلى عليك في الصلاة وتتأثر به

بالفعل : أننا نقرأ القرآن ونجعل لنا وردا من القرآن ، نثبت على صلاة التراويح وصلوات الجماعه خلف الإمام .. نستمع للقرآن كثيرا .. نعمل بالقرآن .. نذكر الله بما تعلمناه من رسوله صلى الله عليه وسلم

نشكر نعمة اللغة العربية

ونحاول ألا نخجل منها و لا نستخدم لغات تانية بدلها ونحاول نقلل من استخدام الكلمات الإجنبيه في كلامنا

كما جاء في الأثر عن عمر بن الخطاب رضى الله عنه : ( لا تعلَّموا رطانة الأعاجم )ا

ده من شكر النعمة العظيمة ديه

يعنى لما ترد على الهاتف قول : السلام عليكم

مش ألو

______________________________________________

3- خليك زيهم

زي متكلمنا في النقطة الاولى عن اطعام الصائمين وافطارهم .. احنا ايه حالنا في الموضوع و ازاى كان حال السلف ؟؟

بس علشان منطولش .. حذكر مثالين :

الأول : يقول يونس بن يزيد: كان ابن شهاب إذا دخل رمضان فإنما هو تلاوة القرآن وإطعام الطعام

الثاني : كان حماد بن أبي سليمان يفطِّر في شهر رمضان خمس مائة إنسان

سبحان الله !!!!

كان يفطّر في رمضان 500 إنسان .. يعنى كانت همته أنه ياخد أجر 500 صائم بالإضافه لصيامه

ده لو الواحد فينا فطّر صائم واحد في رمضان كله بيبقى حاسس انه حاتم الطائي ومفيش كرم أكثر من كده

ولو واحد مننا فطّر كل يوم صائم واحد خلاااص بقه بيحس انه أكرم واحد على سطح الأرض وأنه بقه من السابقين

وسلفنا الصالح كانوا بيفطّروا بالمئات .. فاحنا فين همتنا في الموضوع ده ؟؟

بجد عايزين من دلوقتى نبدأ نطعم الطعام ونفطّر الصائمين

زي مقلنا في الجزء الاول ( نشترى تمر ونضعه في المسجد - النساء تحضر جزء من الطعام وتعطيه لأزواجهم أو لأبائهم أو اخواتهم يخرجوه للناس - نضع نقود في صناديق افطار الصائمين ..... )ا

من انهارده ان شاء الله نبدأ و نسأل الله القبول والاخلاص

وخليك زيهم

يعنى مفيش واحد قالى عازمك على الفطار بكره ؟!!؟

يا خسارة التعب

______________________________________________

بكده خلصت الحلقة الرابعة .. يارب متكونوش زهقتوا ..

وبكره إن شاء الله نلتقى في الحلقة الخامسة إن شاء الله

وجزاكم الله خيرا

ابسط ما تساهم به نشر الحلقات ولو بالايميل

______________________________________________

[ايمن بلاطه]

رد: ( فكّر ، ركّز و خليك زيهم ) ..؟؟ مفاجأة رمضان الجديدة إن شاء الله

جزاكم الله خيرا

[طالبة الجنان]

رد: ( فكّر ، ركّز و خليك زيهم ) ..؟؟ مفاجأة رمضان الجديدة إن شاء الله

جزاكم الله خيرا
يرجى عدم وضع وجوه تعبيرية في الموضوع بارك الله فيكم

[A_E_B]

رد: ( فكّر ، ركّز و خليك زيهم ) ..؟؟ مفاجأة رمضان الجديدة إن شاء الله

جزاكم الله خيرا
يرجى عدم وضع وجوه تعبيرية في الموضوع بارك الله فيكم

إن شاء الله أختنا الفاضلة ... وجزانا الله واياكم ...

[A_E_B]

رد: ( فكّر ، ركّز و خليك زيهم ) ..؟؟ مفاجأة رمضان الجديدة إن شاء الله

الحمد لله وحده والصلاة والسلام على من لا نبى بعده

نبدأ بحمد الله سلسلة

" فكّر ، ركّز و خليك زيهم"

وبدون مقدمات كثير ..

مع الحلقة الخامسة

________________________________________

1- فكّر

زي متفقنا حيكون شعارنا :

( سأكون أجود بالخير من الريح المرسلة )

الخير مش المال فقط .. يعنى مش الصدقات بس او اطعام الطعام بس

لأ .. الخير هنا اسم لكل انواع الخير .. لو فاكرين في اول حلقة اتكلمنا عن فرصة ان يغفر الله لك ما تقدم من ذنبك .. وكانت الفرصة هى الصيام ايمانا واحتسابا

لو فكّرنا في فرصة تانية لنيل نفس الجائزة .. ممكن تكون ايه ؟؟

زي مكانوا بيقولوا

كل ما تشتري أكثر فرصتك في الفوز تكبر

وطبعا كل متزوّد الأعمال اللى ليها نفس الثواب .. يبقى فرصك في الفوز بهذا الثواب أكثر

طيب ايه بقه الفرصة الثانية ؟؟ الأولى كانت صيام شهر رمضان بس بشرطين .. ايمانا واحتسابا

اليوم حديثنا عن القيام بس برضه بشرطين .. هما نفس الشرطين .. ايمانا واحتسابا

قال رسول الله صلى الله عليه وسلم :

"من قام رمضان إيمانا واحتسابا غفر له ما تقدم من ذنبه"

يبقى الأمر يحتاج لنية .. مش مجرد نروح نصلي تراويح علشان اتعودنا من صغرنا نروح .. وعلشان كل الناس بتروح ويعنى حقعد انا في البيت وصحابي وعيلتى رايحين .. يلا انا كمان بدل مقعد لوحدى ..

مش نروح نصلي التراويح والقيام علشان مبقاش الوحيد بين صحابي اللى مبروحش او علشان اروح اصلي مع صحابي وبعدها نخرج ..

لا قيام رمضان يحتاج لنية .. نية للتعبد .. مش مجرد عادة .. لازم نجدد النية واحنا رايحين نصلي .. رايحين نصلي عبادة لله خالصة لوجهه .. قيام علشان ربنا أراد منا قيام الشهر والرسول حثنا على قيامه .. طاعة لله واتباعا للنبي صلى الله عليه وسلم

احتسابا يعنى نحتسب الأجر ويكون الأجر ظاهر قدام عيننا نرجو اننا نحصل الأجر ده

صلي قيام واحرص عليه وافتكر دايما انه نوع من أنواع الخير

و شعارنا : سأكون أجود بالخير من الريح المرسلة

_________________________________

2- ركّز

في الجزء ده لينا كذا شعار .. منها سنكون من الشاكرين

كما قال الله عزّ وجلّ : ( بَلْ اللَّهَ فَاعْبُدْ وَكُنْ مِنْ الشَّاكِرِينَ )ا

أنا عارف انى بطوّل عليكم وبزهقكم في الحلقات ديه وانت بتقرأوا

ولما تفتحتوا الحلقة تلاقوها طويييييله كده .. تقولوا يوووووووه لسه حنقرأ ده كله .. لسه حنقرأ

بس احنا عايزين نركّز في نعمة كبيرة جداااا ..يمكن معظمنا مش واخد باله منها ويمكن مش حاسس بيها على انها نعمة

طيب نركّز في سؤال بسيط .. كم واحد في العالم العربي لو فتح نفس الحلقة ديه مش حيعرف يقرأ حاجه ؟؟

نسبة 40% من العرب لو فتحت قدامهم الحلقة .. مش حيعرف يقرأها

نسبة 40% من العرب لو فتحوا المصحف عايزين يقرأوا .. مش حيعرفوا يقرأوا

عرفتوا ايه النعمة اللى اقصدها ؟؟

نعمة أنك متعلم وتعرف تقرأ

نعمة أن الله رزقك أبوين أو من يرعاك علموك القراءة والكتابة من صغرك

طبعا مش المقصود قراءة الحلقة ديه .. المقصود القراءة عموما .. تقرأ القرآن .. 40% من العرب لو فتحوا المصحف ميعرفوش يقرأوا .. لو فتحوا كتاب ميعرفوش يقرأوا .. لو شافوا جرنان ميعرفوش يقرأوا .. لو مكتوب تحذير ميعرفوش يقرأوا وبيتعرضوا لخطر

نعمة أن الله علّمك ما لم تكن تعلم .. دائما وانت بتقرأ في القرءان .. او بتقرأ اى شئ فيه خير دنيوى او ديني

ركّز واعرف ان ديه نعمة كبيرة جداااا من الله عليك انك متعلم وتعرف تقرأ .. و افتكر ان فيه غيرك كثيييييير ميعرفوش يقرأوا ولا يكتبوا

طيب ازاى نشكر النعمة ديه ؟؟

بالقول : نحمد الله ونشكره أن يسر لنا من يرعانا من صغرنا وعلمونا لحد مبقينا متعلمين مش زي ناس كثير وصلوا لسن السبعين ولسه عمّالين يلفوا على فصول محو الأمية نفسهم يعرفوا يقرأوا كلمتين على بعض .. نفسه يكتب اسمه بس .. مبيعرفش

بالفعل : اكثر من اظهار النعمة عليك واكثر من قراءة القرآن وقراءة سنة النبي وقراءة الخير وتعليم الناس الخير وحاول تعلم الناس ما تتعلمه .. فده من شكر النعمة

فاشكر لله هذه النعمة .. نعمة القراءة

ولو انى عارف ان بقرائتكم للحلقات الطويلة ديه كثير منكم حيقول :

ياعم زهقتنا ياريتنا مكنا بنعرف نقرا

_______________________________________

3- خليك زيهم

بما اننا تكلمنا في الجزء الاول عن القيام .. احنا ايه اخبارنا في القيام ؟؟

تلاقي كثيييير مننا تقولوا تعالى نصلى التراويح في مسجد كذا .. قارئ كويس وبيقرأ بجزء أو أكثر

لااااااااااااااا ياعم جزء ميييييييييين .. هو انا مستغنى عن رجلى .. انا حصلي في مسجد جنبنا في شيخ نيتروز

بيخلص على ال 8 ركعات في ربع ساعه

لكن اجى اصلى عند واحد يقرألي بجزء وياخد ساعتين في التراويح واقضيها انا مسكنات للآلام

.....

طيب ده حيصلي في ساعتين وكثير مننا بيحس ان ده كثييير قوى

ده حال كثير مننا .. طيب ايه كان حال السلف ؟؟

وعن مالك عن عبد الله بن أبي بكر قال: سمعت أبي يقول: كنا ننصرف في رمضان من القيام فيستعجل الخدم بالطعام مخافة الفجر

كانوا بيخلصوا القيام فيجري الخدم بسرعه يحضروا السحور خايفين الفجر يطلع وهما ملحقوش يتسحروا .. يعنى بيخلصوا قبل الفجر بحاجه بسيطة جدااااااااااااااا

طوووووول الليل قيام ..

مش مجرد ساعتين وخلاص

عايزين نبدأ نطوّل شوية في القيام ونصلي على الأقل وراء امام بيصلي بجزء .. وياريت نصلى تراويح وتهجد او قيام مع امام بيطوّل وبيصلي وقت طويل

مش كثير على ربنا اننا نصلي وقت طويل من الليل

مش كثير على ربنا اننا نقف بين يديه في الصلاة ساعتين او اكثر

بلاش يبقى الفرجة على ماتش ساعتين الا ربع احسن عندنا واهم من الوقوف بين يدي الله ساعتين الا ربع

من دلوقتى اللى مبيصليش قيام يصلي .. اللى بيصلي مع امام 3000 سي سي .. يسيبه ويروح يصلي مع امام بيصلي بجزء او اكثر

نطوّل في قيام الليل زي السلف

وخليك زيهم

_____________________________

بكده خلصت الحلقة الخامسة .. شكلكوا زهقتوا ..

وبكره إن شاء الله نلتقى في الحلقة السادسة إن شاء الله

وجزاكم الله خيرا

ابسط ما تساهم به نشر الحلقات ولو بالايميل

______________________________________________

[A_E_B]

رد: ( فكّر ، ركّز و خليك زيهم ) ..؟؟ مفاجأة رمضان الجديدة إن شاء الله

الحمد لله وحده والصلاة والسلام على من لا نبى بعده

نبدأ بحمد الله سلسلة

" فكّر ، ركّز و خليك زيهم"

وبدون مقدمات كثير ..

مع الحلقة السادسة

________________________________________

1- فكّر

زي متفقنا حيكون شعارنا :

( سأكون أجود بالخير من الريح المرسلة )

في الحلقة السابقة اتكلمنا عن قيام الليل ايمانا واحتسابا وان ثمرته مغفرة ما تقدم من ذنبك

طيب فيه حاجه عايزين نفكّر فيها

ايه الأحسن نقوم جزء من الليل أم نقوم الليلة كلها ؟؟ .. يعنى انه يُكتب لينا اننا قمنا جزء من الليل ولا يُكتب لينا أننا قمنا الليل كله ؟؟

طبعا الأحسن ان تقوم الليلة كلها .. الأحسن أن يُكتب لك قيام الليلة كلها

طيب مين يقدر مننا يقوم الليلة كلها من بعد العشاء لحد قبل الفجر ؟؟

الموضوع صعب ؟؟

طيب عايزين نفكّر ايه الطريقة السهله اللى نأخذ بها أجر قيام الليلة كلها .. وده طبعا يكون أحسن علشام تبقى ممن قام رمضان ايمانا واحتسابا

قال رسول الله صلى الله عليه وسلم :

( إنه من قام مع الإمام حتى ينصرف كتب له قيام ليلة )

طيب ده معناه ايه ؟؟ انك لو رحت تصلي التراويح مثلا .. لو صليت مع الإمام لحد ما الإمام يخلص خاااالص ويمشي

يُكتب لك قيام الليلة

يعنى بقيامك مع الامام لحد ميخلص ساعتين يُكتب لك بيها قيام الليلة كلها

لكن الشرط .. انك تصلي لحد ما الامام .. يعنى متمشيش قبل ما الامام يخلص .. يعنى لما الإمام يصلي الوتر متمشيش كمل للأخر حتى لو عايز تبقى تصلي الوتر لوحدك صلي مع الامام ولما يسلم قوم انت كمل ركعة

متضيعش عليك أجر قيام الليلة

__________________________________________

2- ركّز

في الجزء ده عايزين نضع قدام عيننا آية مهمه جدا

قال الله عزّ وجلّ : ( وَاشْكُرُوا نِعْمَةَ اللَّهِ إِنْ كُنْتُمْ إِيَّاهُ تَعْبُدُونَ )ا

يعنى لازم نشكر نعمة الله علينا .. وديه عبادة اننا نشكر نعمه علينا .. ولو كنا بنعبد الله يبقى نشكر نعمه علينا

ايه رأيك في الكلام اللى مكتوب فوق ده ؟؟ شايفه كويس ؟؟ طيب شايف الماوس بتاع الكمبيوتر على الشاشه وانت بتحركه للحته اللى انت عايزها وتختار اللى انت عايزه ؟؟

شايف شاشة الكمبيوتر ؟؟ شايف ايدك ؟؟ شايف اباك وأمك ؟؟ شايف اخواتك ؟؟ شايف زوجتك ؟؟ شايف أولادك ؟؟

انت عارف ان فيه ناس كثيييييير جداا .. عمرهم مشافوا أبويهم ! عمرهم مشافوا اخواتهم !! عمرهم مشافوا زوجاتهم ولا أولادهم !!

عارف ان فه ناس كثير جداااا ميعرفوش شكل زوجاتهم ايه ولا شكل اولادهم ايه ولا شكل اباهم وامهاتهم ايه !ا

ميعرفوش شكل الدنيا ايه !! ميعرفوش ان فيه فرق بين النهار والليل .. ميعرفوش ان فيه قمر وفيه شمس .. ميعرفوش شكل الشارع .. ميعرفوش شكل الأكل اللى بياكلوه

ميعرفوش يمشوا لوحدهم في الشارع .. ميعرفوش يعدوا الطريق لوحدهم .. ميعرفوش يروحوا يصلوا لوحدهم

ميعرفوش شكل أنفسهم

ركّزتوا و عرفتوا النعمة العظيييييمة اللى بنتكلم عنها

نعمة البصر

ان لك عينين بتشوف بيهم كل الكلام ده

البصر اللى محروم منه كثيييييير جدااااا من الناس وكل أملهم انهم يفتحوا دقيقه واحده بس

دقيقه واحده يشوفوا بيها ابويهم و زوجاتهم واولادهم

وانت رزقك الله نعمة البصر بتشوف كل حاجه في كل وقت .. ومع ذلك مش حاسس انها نعمة

مبنفكرش فيها انها نعمة .. وسايب بصرك ينظر لكل حرام .. النعمة اللى غيرك نفسه فيها دقيقه واحده .. احنا مضيعنها في اننا نبص للنساء العاريات .. نبص لكل ما يغضب الله

والله كفاية انك بتقدر تنزل من بيتك لوحدك مش متنى حد ياخد بايدك ويوصلك للحته اللى انت عايزها

من كم يوم كان في المسجد عدد كبير من الاخوه فاقدي نعمة البصر

والله حسيت قد ايه ان ديه نعمة عظيييييييييمه جداااااااااااا

طيب ازاى نشكر النعمة ديه ؟؟

بالقول : اشكر الله كثيرا جداا وقل يارب لك الحمد ولك الشكر على هذه النعمه .. وأسال الله ان يديمها عليك ويحفظها عليك وان يعافيك في بصرك

بالفعل : لا تنظر للحرام .. وافتكر ان ممكن في اى لحظه وانت بتبص لحاجه حرام .. ان يُخطف بصرك وتبقى أعمى .. اشكرها بأن تنظر في المصحف وتقرأ .. أشكرها بالبكاء من خشية الله .. بالبكاء في الصلاة

أسف انى طولت في الجزء ده بس ده لعظم النعمة ديه

ربنا يرزقنا شكر نعمه

____________________________________

3- خليك زيهم

لو رجعنا للحديث اللى في الجزء الاول ..واننا نصلي مع الامام لحد ميخلص علشان يتكتب لينا قيام الليلة .. وبرضه مننساش حلقة امبارح اننا نصلى مع امام بيصلي بجزء

طيب لو واحد فينا راح يصلي وهو حاطط في دماغه انه حيصلي بقه لحد ما الامام يخلص .. راح الامام مطوّل شوية ..

صاحبنا بقه عمّال يفكر اسيب الراجل ده وامشي ولا اعصر على نفسي لمونه واستنى علشان اجر الليلة ؟!! اصبر ولا امشي اصبر ولا امشي ؟!!؟

وتلاقيه ضيع ركعتين كاملين عمّال يفكر يمشي ولا يصبر

وفي الاخر تلاقيه مشي قبل الوتر مثلا

طيب ده حال كثير مننا .. طيب السلف كانوا بيفكروا كده ؟؟

عن السائب بن يزيد قال: أمر عمر بن الخطاب رضي الله عنه أبَي بن كعب وتميما الداري رضي الله عنهما أن يقوما للناس في رمضان، فكان القاريء يقرأ بالمئين، حتى كنا نعتمد على العصي من طول القيام، وما كنا ننصرف إلاَّ في فروع الفجر

سبحان الله الإمام كان بيطوّل ويقرأ بالمئات من الآيات وكانوا مش قادرين يقفوا ويتسندوا على العصى وبرضه ميمشوش الا لما الامام يخلص قبل الفجر على طول

يعنى بيصبروا لحد الفجر لكن ميموش قبل ما الامام يخلص .. حتى لو قعدوا يتسندوا على عصيان من كثر التعب

مش علشان الامام طوّل نصف ساعه خلاص عمالين نلعب باليه في مكاننا ونقف على مشط رجلينا ونعمل استريتشات واطاله وبتاع

اصبر

وخليك زيهم

______________________________________

بكده خلصت الحلقة السادسة .. شكلكوا زهقتوا ..

وبكره إن شاء الله نلتقى في الحلقة السابعة إن شاء الله

وجزاكم الله خيرا

ابسط ما تساهم به نشر الحلقات ولو بالايميل

______________________________________________

[مسلم & وافتخر]

رد: ( فكّر ، ركّز و خليك زيهم ) ..؟؟ مفاجأة رمضان الجديدة إن شاء الله

جزاك الله كل خير اخى الحبيب
فلتسير على بركة الله واسئل الله ان يجعلة فى موزين حسناتك
احبك فى الله

[خديجة أحمد]

رد: ( فكّر ، ركّز و خليك زيهم ) ..؟؟ مفاجأة رمضان الجديدة إن شاء الله

ما شاء الله موضوع غاية في الروعة
جزاكم الله خيرا و نفع بكم و جعله في موازين حسناتكم

[A_E_B]

رد: ( فكّر ، ركّز و خليك زيهم ) ..؟؟ مفاجأة رمضان الجديدة إن شاء الله

الحمد لله وحده والصلاة والسلام على من لا نبى بعده

نبدأ بحمد الله سلسلة

" فكّر ، ركّز و خليك زيهم"

وبدون مقدمات كثير ..

مع الحلقة السابعة

________________________________________

1- فكّر

زي متفقنا حيكون شعارنا :

( سأكون أجود بالخير من الريح المرسلة )

فيه حاجه مهمه جدااااا يمكن اتكلمنا عنها قبل كده .. لكن نتكلم عنها تانى بس لسبب تانى

كلنا الحمد لله بنصوم .. طيب قبل منبطل أكل وشرب قبل الفجر .. بنعمل ايه ؟؟

احنا اصلا بنبقى مبطلين اكل وشرب من قبل الفجر بكثير لاننا بنبقى نايمين اصلا وبنصحى على صلاة الفجر - ده إن صحيوا اصلا - ا

طيب والسحور ؟؟

سحور مين ياعم كل سنة وانت طيب احنا كده بناكل حاجه على الساعه 11 ولا الساعه 12 وندخل ننام .. تعبانييين يا سيدي وعندنا شغل !!ا

طيب ممكن حد يستغرب ويسأل هو اصلا علاقة السحور بموضوع الخير ونكون أجود بالخير من الريح المرسلة ؟؟

اقول لو فكرّنا ازاى نحافظ على السحور ونستحضر النيات في السحور .. حيبقى خير كبيييييير جدااااا

ايه ده ؟!! يعنى السحور شوية الاكل والشرب اللى قبل الفجر دول ممكن ناخد بيهم ثواب كبييير !!؟

نعم .. تاخد بيهم ثواب كبير جداااا بفضل الله .. طيب لو فكّرنا ازاى ناخد بالسحور ثواب كبير جدا ويبقى خير كبير علينا ؟؟

نحافظ على السحور كل يوم واستحضار النيات التالية :

1- المحافظه على السحور اتباعا لأمر الرسول صلى الله عليه وسلم ( تسحروا فإن في السحور بركة )ا

2- الحصول على البركة

3- تأخير السحور لقبل الفجر بحاجه بسيطة اتباع لسنة النبي صلى الله عليه وسلم

4- مخالفة اليهود والنصارى للحديث ( فصل ما بين صيامنا وصيام أهل الكتاب ، أكلة السحر )ا

5- التقوى على الصيام وعلى طاعة الله

6- السحور في حد ذاته نية للصيام .. لأنك لم تقم للسحور إلا لأنك تنوى الصيام

7- انوي بالسحور وتأخيره ادراك صلاة الفجر

8- لا تنسى التسمية قبل السحور وحمد الله بعده

لو استحضرت هذه النوايا وقمت بهذه الأعمال سيكون في السحور خير كبيييييير

فلا تبخل على نفسك بالثواب وغير الثواب حيخفف عنك تعب الصيام

فمفيش حد يكسّل يتسحر بعد كده

وابقوا شوفونى معاكوا باى حاجه

______________________________________________

2- ركّز

قال الله عزّ و جلّ : ( بَلْ اللَّهَ فَاعْبُدْ وَكُنْ مِنْ الشَّاكِرِينَ )ا

عايزين بجد نكون من الشاكرين .. وعايزين نشكر ربنا كثيرا وفي كل وقت

ومنكونش كمن قيل فيهم : ( قَلِيلًا مَا تَشْكُرُون )ا

سمعت الآيات ديه قبل كده في الصلاة ؟؟ والقرآن شغّال في شريط او على التلفزيون سمعت الآيات ديه ؟؟

اخر مره سمعت قرآن امتى ؟؟ احساسك ايه وانت سامع القرآن ؟؟ طيب اخر مره كلمت حد عزيز عندك كنت مبسوط وانت سامع صوته ؟؟

لما أباك أو أمك أو زوجتك أو ابناءك أو أصدقائك أو اخواتك بيتكلموا معاك بتبقى مبسوط انك سامع صوتهم ؟؟

عارف ان فيه ناس كثيييييير جداااااااا بيشوفوا حركة فم اللى قدامهم بس .. لكن مش عارفين هو بيقول ايه !! ناس عمرهم مسمعوا صوت حد !! عمرهم معرفوا صوت الناس بيبقى ازاى .. عمرهم مسمعوا صوت ابويهم او اخواتهم او زوجاتهم او اولادهم .. عمرهم مسمعوا آية واحده من القرآن

ميعرفوش صوت الاذان بيبقى ايه ولا تلاوة القرآن بتبقى ازاى

عمرهم مسمعوا اسمهم .. ميعرفوش اسمهم بيتقال ازاى !!ا

كل حياتهم بالاشاره

عرفتم النعمة العظيمة

نعمة السمع

انك تسمع بأذنيك .. سامع صوت والديك .. سامع صوت اخواتك .. صوت زوجتك او زوجك .. سامعين صوت اولادكم .. بتعرفوا تسمعوا قرآن

عارفين اسمكم بيتنطق ازاى

والله لما تقابل حد اتحرم من النعمة ديه حتحس قد ايه انها نعمة عظيييييييمة واللى قدامك مش قادر يسمع ولا كلمة من اللى انت بتقولها

طيب ازاى نشكر النعمة ديه ؟؟

بالقول :- نشكر باللسان .. ونحمد الله ونشكره على النعمة العظيمة ديه وندعو أن يحفظها الله ويعافيني في سمعنا

بالفعل :- حافظ على النعمة ديه .. متحولهاش الى نقمة .. لحسن تذهب منك في اى لحظه .. لا تسمع الحرام .. ابعد عن سماع الغيبه .. ابعد عن سماع الاغاني .. اشكر الله بأن تستمع لكلامه .. تستمع للقرآن .. تسمع الدروس والأحاديث

ربنا يرزقنا شكر نعمه

وسيبكم من الاغاني بقه

__________________________________________

3- خليك زيهم

الحمد لله بقينا بنصلي قيام الليل في رمضان .. بنصلي تراويح

بس عايزين نخلّي لينا برضه صلاة قيام ليل مع نفسك

مع نفسي !!! ياعم احنا بنصلى تراويح بالعافية .. تقولي مع نفسى .. لا انت اللى مع نفسك

مش حقولك صلّي كل يوم .. بس حاول لو مكانش كل يوم تخلّى ليك كل كم يوم كده صلاة مع نفسك ولو ركعتين حتى

اقرأ انت في الصلاة وامسك المصحف لو مش حافظ

بس حتحس فيها بمعنى تانى لو قرأت انت القرآن في الصلاة

بس مش عايزين كروته .. مش عايزين قراءة بسرعه جدااا

علشان نخلص اكبر قدر ونقول بعد الصلاة صليت بقه مع نفسي انما ايه بست أجزاء .. طيب قريت بسور ايه ؟؟

مش فاكر والله بس الحمد لله قريت 6 أجزاء

طيب لو احنا كثير منا بيعمل كده .. السلف كانوا بيعملوا ايه ؟؟

وكان بعض السلف الصالح يُحيي ليله بقراءة القرآن، فمرَّ عليه أحد تلاميذه، فسمعه يردد: {إِنَّ الَّذِينَ آمَنُوا وَعَمِلُوا الصَّالِحَاتِ سَيَجْعَلُ لَهُمُ الرَّحْمَنُ وُدًّا} [مريم: 96]. فأخذ يكرِّر الآية حتى طلع الفجر. فذهب إليه تلميذه بعد صلاة الفجر، وسأله عما رآه.. فقال له: استرْ عليَّ ما رأيت.

فقال: أستره عليك ما دمتَ حيًّا، ولكن أخبرني بخبرك.

فقال: عندما كنت أردِّدها، نازلَ قلبي الودُّ الذي بين العبد وربِّه، فأخذت أتلذَّذُ بذلك الوداد، وكلما كرَّرت الآية ازداد ذلك الودُّ في قلبي.

شوفوا فضل يردد الآية لحد مطلع الفجر .. لأنه حس بحلاوة الآية و تدبرها .. فخشع في الصلاة

وكمان شوفوا الاخلاص مش عايز الناس تعرف انه كان طول الليل عمّال يصلي

خلّى صلاتك مع نفسك ديه صلاة للتدبر والتلذذ بتلاوة القرآن في الصلاة

وحافظ برضه على صلاة التراويح

وخليك زيهم

_____________________________________________

بكده خلصت الحلقة السابعة .. شكلكوا زهقتوا :) ..

وبكره إن شاء الله نلتقى في الحلقة الثامنة إن شاء الله

وجزاكم الله خيرا

ابسط ما تساهم به نشر الحلقات ولو بالايميل

______________________________________________

[خنساء العصر الحديث]

رد: ( فكّر ، ركّز و خليك زيهم ) ..؟؟ مفاجأة رمضان الجديدة إن شاء الله

تعرف يا اخونا الموضوع فعلا محتاجينه فى رمضان علشان فى ناس كتير ناسيه فضل رمضان مجرد صلاه وختمه قران وجزاكم الله عنا كل الخير وان شاء الله ننتظر الحلقه القادم ان قدر لنا الله اللقاء والبقاء

[د/ مؤمن بالله القهار]

رد: ( فكّر ، ركّز و خليك زيهم ) ..؟؟ مفاجأة رمضان الجديدة إن شاء الله

جزاكم الله كل خير وجعلنا الله من المخلصين ان شاء الله

[د/ مؤمن بالله القهار]

رد: ( فكّر ، ركّز و خليك زيهم ) ..؟؟ مفاجأة رمضان الجديدة إن شاء الله

{ كُلُّ مَنْ عَلَيْهَا فَانٍ وَيَبْقَى وَجْهُ رَبِّكَ ذُو الْجَلَالِ وَالْإِكْرَامِ } ((((( يامن تهت فى بحر الشهوات والشبهات انقذ نفسك فها هو شهر الانقاذ جاء لك فلا تردة تب تب تب تب الى الله وان تبت اقول لك حمدا لله على سلامتك فى بحر الطاعة )))))

[A_E_B]

رد: ( فكّر ، ركّز و خليك زيهم ) ..؟؟ مفاجأة رمضان الجديدة إن شاء الله

الحمد لله وحده والصلاة والسلام على من لا نبى بعده

ومع الحلقة الثامنة

من سلسلة

" فكّر ، ركّز و خليك زيهم "

______________________________________________

1- فكّر

زي متفقنا حيكون شعارنا :

( سأكون أجود بالخير من الريح المرسلة )

الخير مش المال فقط .. يعنى مش الصدقات بس او اطعام الطعام بس

لأ .. الخير هنا اسم لكل انواع الخير .. ودلوقتى حيكون كلامنا عن عباده عظييييييييمه جدا .. وفيها خير كبييييير جدااااا

وللأسف كثير بنغفل عنها .. العباده او الخير اللى حنتكلم عنه

عبادة قال عنها الرسول صلى الله عليه وسلم :

( ألا أنبئكم بخير أعمالكم, وأزكاها عند مليككم, وأرفعها في درجاتكم, وخير لكم من إنفاق الذهب والورق وخير لكم من أن تلقوا عدوكم فتضربوا أعناقهم ويضربوا أعناقكم ؟ )

فكّرتم و عرفتم ما هو العمل ؟؟

تكملة الحديث : ( قالوا : بلى يا رسول, قال ذكر الله . )ا

ذكر الله

قال معاذ بن جبل رضى الله عنه : ( ما شيء أنجى من عذاب الله من ذكر الله )ا

خير أعمالنا وأزكاها عند الله وأرفعها في درجاتنا وخير من انفاق الذهب والنقود ومن قتال العدو !!! سبحان الله

وهى عبادة سهله وبسيطة .. ولكنها عظيمه جدا وقدرها كبير

لدرجة ان الرسول صلى الله عليه وسلم شبه اللى لا يذكر الله بالميت

في الحديث : ( مثل الذي يذكر ربه والذي لا يذكر ربه مثل الحي والميت )ا

طيب نبدأ بذكر بيتكرر معانا كل يوم 5 مرات .. بس ثمرته ان تُغفر لك ذنوبك ولو كانت مثل زبد البحر - زبد البحر الفقاعات اللى بتكون على البحر والموج -ا

فكّرتم ايه هو الذكر ؟؟

قال صلى الله عليه وسلم : ( من سبح الله في دبر - بعد - كل صلاة ثلاثا وثلاثين . وحمد الله ثلاثا وثلاثين . وكبر الله ثلاثا وثلاثين . فتلك تسعة وتسعون . وقال ، تمام المائة : لا إله إلا الله وحده لا شريك له . له الملك وله الحمد وهو على كل شيء قدير - غفرت خطاياه وإن كانت مثل زبد البحر )ا

حاجه بسييييطة جداااا .. بيها يُغفر لك ذنوبك ولوكانت كثيره جدااااااااا مثل زبد البحر

ومش بس كده .. ده الذكر ده ليه فضل كبير جدااااااا .. شوفوا الحديث الثاني لما جاء للرسول عليه الصلاة والسلام الفقراء يقولوا ان الاغنياء سبقوهم لأن الاغنياء بيصلوا كما يصلوا ويصوموا كما يصوموا ولكن الاغنياء بيتصدقوا والفقراء مش لاقيين

فقال صلى الله عليه وسلم : ( فلا أعلمكم شيئا تدركون به من سبقكم وتسبقون به من بعدكم ؟ ولا يكون أحد أفضل منكم إلا من صنع مثل ما صنعتم " قالوا : بلى : يا رسول الله ! قال " تسبحون وتكبرون وتحمدون ، دبر كل صلاة ، ثلاثا وثلاثين مرة )

يبقى بعد كل صلاة تقول سبحان الله 33 مره ثم الحمد لله 33 مره ثم الله أكبر 33 مره ثم لا إله إلا الله وحده لا شريك له . له الملك وله الحمد وهو على كل شيء قدير مره واحده

مش حتاخد منك الا حوالى ثلاث دقايق تقعدهم بعد كل صلاة .. بس الثواب عظيييييييم

وبلاش كسل

____________________________________________ __

2- ركّز

في الحلقتين اللى فاتوا .. اتكلمنا عن نعمتين عظيمتين

البصر والسمع

شكرنا الله على النعم ديه ولا لأ ؟؟ شكر بالقول وبالفعل ؟؟

قال الله عزّ وجلّ : ( وَجَعَلَ لَكُمْ السَّمْعَ وَالْأَبْصَارَ وَالْأَفْئِدَةَ قَلِيلًا مَا تَشْكُرُونَ )ا

خلونا نشكر ربنا كثيرااا .. وكل ما نيجي نستخدم نعمة ربنا في معصية نفتكر ان من شكر النعمة اننا لا نعصى بها .. نفتكر ان فيه غيرنا كثييييير محرومين من النعمة ديه .. وممكن نتحرم منها احنا كمان بالمعاصي

قول الحمد لله والشكر لله

قلت ؟؟ عرفت تقول الحمد لله والشكر لله ؟؟

عرفت تقول الذكر اللى مكتوب في الجزء الأول ؟؟ .. عرفت تقرأ قرآن ؟؟ .. لو عايز حد يعملك حاجه بتعرف تنادي عليه ؟؟ لو عندك مشكلة بتعرف تتكلم ؟؟

بتعرف تقول أبي وأمي ؟؟ بتعرف تقول اسماء اخواتك ؟؟ بتعرف تتكلم مع زوجتك ؟؟ بتعرف تنادي على اولادك ؟؟ بتعرف ترد على التليفون ؟؟

بتعرف لما تبقى في مشكلة تفضفض وتتكلم وتشرح اللى حاسس بيها ؟؟

انت عارف ان فيه ناس كثييييييير جداااااا ميعرفوش ينادوا على حد !! لو وقعوا في مشكلة ميعرفوش يطلبوا النجدة !! ميعرفوش يقولوا أبي أو أمي !! ميعرفوش يتكلموا مع زوجاتهم أو أزواجهم !! ميعرفوش يختاروا اسم لأولادهم !! ميعرفوش ينادوا على أولادهم

لو عندهم مشاكل ميعرفوش يفضفضوا ولا يتكلموا

لو أتسألوا عن اسمهم

ميعرفوش يقولوه

عرفتوا النعمة اللى بنتكلم عليها ؟؟

نعمة اللسان

نعمة انك بتعرف تتكلم .. انك مش أخرس

انك تعرف تكلم اى حد في اى وقت وتنادى على ابويك وعلى اخواتك وتكلم زوجتك وتسمّى أولادك .. انك بتعرف تذكر ربنا وتقرأ القرآن .. بتعرف تسأل غيرك وتفضفض وتتكلم وتشرح

عارف لو قابلت حد أخرس .. حتعرف قد اييييييه انت في نعمة كبيرة جدا وانت شايفه تعبان من كثر مبيحاول يفهمك هو عايز بايه او حاسس بايه

طيب لو ركّزنا ازاى نشكر النعمة العظيمة ديه ؟؟

بالقول : وهنا حتستخدم النعمة ديه نفسها في شكرها .. لأنك بيها حتشكر ربنا عليها .. اشكر ربنا واحمده على انه وهبك لسانا .. انه مخلقكش اخرس مبتعرفش تتكلم .. وادعى ربنا يديم عليك النعمة ديه

بالفعل :- اشغل لسانك بالذكر .. فلا يزال لسانك رطبا بذكر الله .. اذكر الله في كل مكان .. حافظ على الأذكار .. انصح الناس .. قل خيرا .. متكذبش .. متغتابش .. متشتمش .. اللسان العضو الوحيد اللى مبيتعمش من كثر العمل .. فاشغله دايما بالخير وابعد عن الشر

وكما قال عليه الصلاة والسلام : ( من كان يؤمن بالله واليوم الآخر فليقل خيرا أو ليصمت )ا

واول حاجه تشكروا بيها النعمة

انكم تمسكوا لسانكم و متشتمونيش انى طولت عليكم

______________________________________________ _________

3- خليك زيهم

علشان مطولش عليكم .. حسيتوا قد ايه ربنا أنعم علينا نعم عظيمة جداااا وكثيره جداااا

طيب احنا حاسيين بالنعم ديه وحاسيين بقيمتها وبنتفكر فيها وبنشكر ربنا عليها .. ولا كثير جدااا بنغفل وننسى ؟؟

كثير جداااا بنغفل وننسي شكر نعم الله .. ومبنفتكرش منها كثير .. طيب ازاى كان حال السلف ؟؟

حناخد مثال واحد هو أبو قلابه الجرمي

روي ابن حبان في كتاب الثقات بسنده عن الأوزاعي ، عن عبد الله بن محمد قال:

خرجت إلى ساحل البحر فلما انتهيت إلى الساحل فإذا أنا بِبُطَيْحة، وفي البُطيْحة خيمة، فيها رجل قد ذهب يداه ورجلاه وثقل سمعه وبصره - يعنى ايده ورجليه مقطوعين مش موجودين و بقه سمعه ثقيل جدا وبصره ضعيف جداا لدرجة العمي - ، وماله من جارحة تنفعه إلا لسانه - الحاجه الوحيده اللى ممكن تنفعه لسانه - ، وهو يقول:

" اللهم أوزعني أن أحمدك حمدًا، أكافئ به شكر نعمتك التي أنعمت بها عليَّ، وفضلتني على كثير ممن خلقت تفضيلا ".

قلت: والله لآتينَّ هذا الرجل، ولأسألنَّه أنَّى له هذا الكلام !!! ، فهمٌ أم علمٌ أم إلهامٌ أُلهمه؟ - عايز يفهم بيقول كده على اساس ايه !! فضله الله على كثير ممن خلق تفضيلا ازاى يعنى !! -

فأتيتُ الرجل فسلمت عليه، فقلت: سمعتك وأنت تقول: "اللهم..... تفضيلا" فأي نعمة من نعم الله عليك تحمده عليها ؟ ، وأي فضيلة تفضل بها عليك تشكره عليها ؟.

قال: وما ترى ما صنع ربي؟والله لو أرسل السماء على نارًا فأحرقتني، وأمر الجبال فدمرتني، وأمر البحار فأغرقتني، وأمر الأرض فبلعتني، ما ازددت لربي إلا شكرًا، لما أنعم علي من لساني هذا "

سبحان الله

والله قصة عجيبه

رجل فقد ايديه ورجليه وسمعه ثقيل وبصره رايح .. مبيتحركش من مكانه ولا بيشوف وسمعه ثقيل .. الحاجه الوحيده اللى شغاله اللسان ومع ذلك مش سخط على ربنا

لا ده عمّال طول الوقت يشكر ربنا على نعمة اللسان !! لأنه استخدمه في الذكر و قراءة القرآن وغيره من أعمال الخير

ويقول مهما يبتليني ربنا لا ازداد الا شكرا على نعمة اللسان .. لانها الوحيده اللى فاضله وعمال يشكر ربنا عليها

فاحنا اللى الحمد لله والشكر له كل النعم عندنا وكل الحواس شغاله

هل من شكر لله ؟؟

هل من تذكر لنعم الله علينا ؟؟ هل من توبة من استخدام النعم فيما لا يرضي الله ؟؟

الله المستعان .. والحمد لله والشكر لله

_____________________________________________

بكده خلصت الحلقة الثامنة .. اسف جدااا على الإطاله

وبكره إن شاء الله نلتقى في الحلقة التاسعه إن شاء الله

وجزاكم الله خيرا

ابسط ما تساهم به نشر الحلقات ولو بالايميل

______________________________________________