[جديد] عايزة إبنك يحترم غيره ...........تعالى وأنا أقولك

[om yousif]

مين فينا مش بتعانى من مشكلة .إن ابنها مش بيحترم الناس
علشان كده... لازم حضرتك تعملى اللى هقولك عليه



لازم أكون انا اللى هحترمه؟؟
هنا باة المشكلة لان معاليك مش فاهمة يعنى ايه؟؟؟؟؟
ان انا أحترم ابنى قبل ماهو يحترمنى يقوم هو يحترمنى
حد فاهم حاجة؟؟؟.........طبعآ لأ

.

تعالى اعلمك ازاى تخلى ابنك يحترمك......
بالراحة علينا ...شوية كده واحدة واحدة .......... انا فهمكم؟؟؟

لازم نفهم ان الاحترام لازم يكون من الطرفين
عشان لما ابنك يكبر يعرف يحترم الناس وتخلى الناس تحترمه
اى شخص ف الدنيا انا وانت وابنى وجوزى وكله بنحب نحس بقيمتنا واحترام الناس لينا
ابنك باة بيحب يحس بكدة واكتر مما تتخيلى
بس فى كتير مننا مبتعرفش تخلى ابنها يحترمها بإيجابية
عارفة يحترمك بايجابية دى يعنى ايه؟؟؟؟؟
يعنى مايكونش مفروض عليه أنه يحترمك بالضرب ويسمع كلامك لما تبرقيلو
ولا يكتب الواجب لما تجرى وراه بالشبشب
بمناسبة الشبشب بيبقى شكلنا وحش اوى واحنا بنجرى وراهم
بحس ان العيال بتقول يالهوى اجرى ياوله ماما اتهبلت
اه والله


وعشان ابنك يحترمك صح.........مش بالشبشب إسمعى منى


1-..احترمى أبوه ادامه واحترمى جيرانك واحترمى اهلك
احترمى اهل جوزك ...لا ياختى مش صعبة ولا حاجة


2..حبى ابنك ولاعبيه ودلعيه بس دايما اعملى حد للعلاقة والهزار بينك وبينه
وخاصة لو بتهزرى مع ولادك بالشتيمة
اأه بالشتيمة لما تقوليله اشى ياكلبة ماهو هييجى يهزر معاكى هيقولك ايه امشى ياعصفورة


3..لماتطلبى طلب اطلبيه منه بصيغة الطلب مش بالأمر
يعنى مش قومى يابت هاتيلى اشرب لاء...هو احنا هنا ف مسلسل نحن لا نزرع الشوك
لاء قولى ممكن يا........تجيبلى اشرب


4..اوعى تتريقى على حد أدامه ما هو هيعمل زيك ويإما يتريق عليكى أو على اللى إنتى اتريقتى علية مانا نسيت أقولك انك انتى القدوة بتاعته


5..ماتعليش صوتك وتصوتى وتشتمى ويالهوى ربنا ياخدنى ومش عارفة إيه لأنه هيتعلق ف
دماغة إن دى لغة الحوار العادى
يقوم ايه يتعامل زيك كدة مع كل اللى حواليه


6..بينيله حبك وإهتمامك وإحترامك وخدى رأيه فى اى موضوع أو أى حاجة
مانا عارفة انه مش فاهم حاجة؟؟

بس كدة وكدة يعنى يقوم يحس بقيمة نفسه يقوم إيه يحترمك عشان إنتى احترمتيه


7..لازم توصلى معاة انة يحترمك مش يخاف منك وده الفرق بينهم كبير جدا


8..خليكى سره ومؤتمنة عليه لإنك لو أفشيتى سره وإستهترتى بكلمة قالها بينك وبينه أو فضحتيه بموقف عمله وانتى عديتيهوله مش لازم تحكيه لابوه لما ييجى ومامتك لما تتصل وأختك لما تزورك وجارتك وانتى مقابلاها ع السلم
فاهمة ولا لاء


9..لو غلطتى ادامه سواء فيه او ف باباه مثلا لازم يسمعك بتعتذرى عشان يتعلم السلوك ده
ويتعلم كمان يعتذر كدة انتى مابتقللليش من نفسك لاء اتنتى بتعلميه معنى أنا آسف


10..افهمى ابنك واديله مساحة لشخصيته واديله مساحة للاختيار والتفكير
يقوم ثقته ف نفسه وفيك تزيد


11..اتفاهمى معاه على اده بس مش تعملى اراجوز يعنى لاء اتكلمى معاه بكلام واضح وطريقة واضحة عشان
هى دى الطريقة اللى هيتكلم معاكى بيها


12..وانتى بتكلمية بصى ف عنيه وكلميه بكلام بسيط يفهمه
ماتعقديش كلامك ولا تتكلمى بسرعة


13...كافئية لما يعمل حاجة صح عشان تخلوا بينكم حاجة ايجابية تخليه بعد كدة يحترمك صح لانه
كدة فاهم انك ملاحظة مجهوده ومقدراه فيزود ده عشان يحس بقيمته عندك ولما هيحس بقيمته عندك
هيحترمك اكتر


14..لما يعمل غلط عاقبيه بس بطريقة ايجابية يعنى فهمى العواقب والاخطار والغلط اللى هو
عمله والنتيجة اللى ممكن الغلط ده يوصلنا ليها
وكونى حازمة معاه وخدى موقف منه شوية عشان يفهم ان غلطة بيزعلك وممكن يضيع الحاجة الحلوة اللى بتديهاله
مش الشيبسى ولا الشوكلاتة لاء الحنية والاحترام


15...خليكى صادقة معاه ولو وعدتيه بحاجة او خروجة ياتعمليها يا تعتذريله وتبينيله السبب
وحطى ف دماغك أنه فاهمك


اتمنى ياجماعة أكون وصلتلكم اللى أنا عاوزة أوصله
وأتمنى يكون أفادكم
وماتكونوش ضيعتوا وقت ف الهوا

[أبوالمعالـي]

رد: عايزة إبنك يحترم غيره ...........تعالى وأنا أقولك

وعليكم السلام ورحمة الله وبركاته
ما شاء الله
جزاكم الله كل خير ابنتنا الفاضلة
أسعدكم الله ووفقكم لكل خير

[om yousif]

رد: عايزة إبنك يحترم غيره ...........تعالى وأنا أقولك

وعليكم السلام ورحمة الله وبركاته
ما شاء الله
جزاكم الله كل خير ابنتنا الفاضلة
أسعدكم الله ووفقكم لكل خير

وجزاكم بالمثل والدى الفاضل
شكرآ لمروركم الطيب
وعذرآ لو أن الموضوع باللهجة العادية
ده علشان الفكرة توصل لأخواتى وإخوانى

[خديجة أحمد]

رد: عايزة إبنك يحترم غيره ...........تعالى وأنا أقولك

وعليكم السلام ورحمة الله وبركاته
اللهم بارك، نصائح قيمة
جزاك الله خيرا أختي

[sabreenabouomar]

رد: عايزة إبنك يحترم غيره ...........تعالى وأنا أقولك

جزاكى الله كل خير

[غصون الريحان]

رد: عايزة إبنك يحترم غيره ...........تعالى وأنا أقولك

وعليكم السلام ورحمة الله وبركاته

جزاكِ الله خيرا

نصائح قيمه اتمنى كل الامهات تقراها وتستفيد منها

[قدوتي أمهات المؤمنين]

رد: عايزة إبنك يحترم غيره ...........تعالى وأنا أقولك

ماشاء الله جزاكم الله خيرا أم يوسف

نصائح قيمة
نفعنا الله وإياكم بها

[ام احمد 2]

رد: عايزة إبنك يحترم غيره ...........تعالى وأنا أقولك

ما شاء الله كلام جميل ورائع واتمنى نقدر نطبقه

بارك الله فيك

[*تائبة إلى الله*]

رد: عايزة إبنك يحترم غيره ...........تعالى وأنا أقولك

رائع جدا
نفع الله بك اختي