Tweet
التصرف الصحيح عندما يتعرض طفلي للضرب من أطفال آخرين
لما طفلك يبدأ يدخل فى مجتمع كبير ويشوف أطفال غيره سواء فى مدرسة أو فى نادى ويحتك بيهم
لازم انك تعرفه ان ممكن يقابل أطفال غيره سلوكهم غلط ومش كويس
وتيجى خطوة مهمة بعد كدا انك تعلمه إزاى يتعامل مع الغلط
خصوصا لو حد من الاطفال ضربه أو أخد لعبته
وقتها الأحسن ان الأب والأم يتدخلوا هما..ولا يعرفوا الطفل يعمل إية ويسبوه هو يتصرف؟
الأفضل ان الطفل هو اللى يتصرف
لان مش في كل المواقف الأب والأم هيكونوا موجودين مع الطفل..وعشان لما يكبر يبقى عارف إزاى يتعامل مع الناس
فلازم أخليه هو اللى يتصرف
وده هيزود ثقته فى نفسه كتير خصوصا لو تصرفه جاب نتيجة وقدر يحمى نفسه ويفرض احترامه على اللي حواليه
ودور الأهل هنا يبقى متابعة..مش معنى ان الطفل هو اللى هيتصرف يبقى أنا ما أهتمش وما أظهرش إهتمامى للطفل
-----------------------------
(لو طفل ضرب إبنى فى النادى أو حديقة أو أى مكان عام)
"من سن 4 لـ 8 سنين"
اتكلم مع إبنك..قوله ماتخليش حد يضربك أبدا وانت كمان أوعى تضرب حد من زمايلك
وإلعبوا مع بعض وإشتركوا فى ألعابكم..وبعد ماتخلصوا لعب كل واحد ياخد اللعبة بتاعته
ماتخليش حد ياخد لعبتك منك ولا انت تاخد لعبة حد وتيجى تقولى لو حصل حاجة زى كدا..بس الأول قبل ماتيجى تقولى لازم تتصرف مع الولد اللى ضربك صح..يعنى:
1- لو حد من الاطفال ضربك قوله :"لو ضربتنى تاني هقول لباباك"
2- ولو رجع وضربك تانى قوله:"انا قولتلك لو ضربتنى هروح أقول لباباك ومامتك..وأنا دلوقتى رايح أقوله"
و روح وقتها لباباه وقوله بذوق: (فلان ابن حضرتك ضربنى ممكن حضرتك تيجى معايا وتقوله يبطل يضربنى..لو سمحت)
3- لو اتكرر تانى ونفس الطفل ده ضربك قوله: " على فكرة أنا ممكن اضربك بس الضرب ده سلوك مش حلو وأنا مش بحب أعمله ولو ضربتنى تاني هضربك ومش هلعب معاك تاني"
وبعدين روح عرف باباه انه رجع ضربك تاني وماسمعش الكلام وانك قولتله لو ضربك تاني مش هتلعب معاه ابدا
4- لو الطفل ضربك تاني..ساعتها اضربه زي ماضربك وبطل تلعب معاه تاني
بالنسبة لدور الأهل فى أول مرة (وبعد ما الطفل يتصرف من نفسه)..بيروح الأب يكلم الولد اللى بيضرب ويقوله:" انت ليه ضربت صاحبك فلان؟..لو عامل حاجة تضايقك ماتضربوش ممكن تيجي تشتكيني لان الضرب ده حاجة وحشة وسلوك مش كويس وانت شكلك ولد مؤدب والمؤدبيين مايعملوش كدا"
وفى تانى مرة يكلم والد الطفل ده ويقوله :"ابنى دايما بيشتكي ان ابن حضرك بيضربه..ياريت تتكلم معاه وتخليه يبطل يضرب إبني"
وطبعا فى كل مرة الطفل بيجي للأهل ويحكلهم اللي حصل ..لازم يشجعوا تصرفه الصح ويمدحوه لانه ما اتصرفش بسلوك عدواني لكنه عمل سلوك يحترم
* * * * *
وهنا الطفل فى البداية حذر الطفل اللى ضربه عشان يديله فرصة يحسن سلوكه وبعدين دخل والد الطفل اللى بيضرب فى الموضوع عشان يهذبوا سلوكه ويخلوه يتعامل كويس مع الناس
ولو مش حاسين بمشكلة عند طفلهم يبدأوا ياخدوا بالهم
وعرف الطفل التانى انه مش ضعيف وقادر يضربه هو كمان..
لان في أطفال بتفكر انهم لما يضربوا أطفال غيرهم وبيسكتوا مش بيردوا بيعتبروهم خايفين وجبنا..فلو ردوا على ضربهم بضرب مش بيكرروا ده تاني معاهم
والاهم من ده ابنك مش هيقولك فى يوم انتوا خالتوني ضعيف وزمايلي وبيقولوا عليا ضعيف وجبان ومش بعرف أدافع عن نفسي
وده ممكن يخليه يغضب بشده ويبقى عنيف بدرجة كبيرة عشان ينفي التهمة عنه
وفى الاخر خالص الطفل المضروب عاقب الطفل اللى بيضرب وكمان لفت نظر أهل الولد ده انه بسبب سلوك إبنه ممكن يخسر صحابه
يعنى التصرف ده كان مفيد للطفلين
بالاضافة لده ان الطفل لما يكبر هيكون أكتسب خبرات فى التعامل مع الناس وهيبقى فرض احترامه على اللى يتعامل معاه
ــــــــــــــــــــــــــــــــــــــــــــــــــ ــ
(لو طفل ضرب إبني فى المدرسة)
هعرف ابنى يقوم بنفس التصرف السابق:
1- يحذر زميله انه هيعرف المُدرسة
2- يقول للمُدرسة إن زميله ضربه
3- يقول لزميله "انا مش بحب الضرب بس لو ضربتني تاني هضربك ومش هكلمك تاني"
4- يضرب زميله ومايكلموش تاني
و هنا تصرف الأهل هيكون مختلف
(طبعا فى الأول بيشجعوا إبنهم على تصرفه مع زميله)
ولان فى المدرسة ممكن المُدرسة ماتهتمش بالموضوع وماتعاقبش الطفل الغلطان ولا حتى تفكر تهذب سلوكه!!
فلازم الأم تروح المدرسة وتقابل الطفل اللى بيضرب ابنها وتتكلم معاه وتنصحه مايعملش كدا تاني
وتعرف المُدرسة بالموضوع وان فى طفل بيضرب إبنها وتطلب منها الاهتمام
لو اتكرر موضوع الضرب تاني من نفس الطفل
الأم بتطلب رقم أهل الولد سواء من الولد نفسه أو من المدرسة
وتكلم والدة الطفل ده وتطلب منها تحاول تخلى ابنها يبطل يضرب زمايله
وده فى سن (4-8 سنين)
(1 ملحوظة):
عودى طفلك يحكيلك يومه فى المدرسة وإسمعيله بإهتمام
(ملحوظة 2):
لو الطفل سنه سنة ونص أو سنتين وبيعلب مع أطفال فى نفس سنه وحصل وطفل تاني ضربه أو أخد لعبته
هنا الطفل لسه سنه صغير على انه يتصرف من نفسه
اصلا هو فى السن ده مش هيكون لسه عرف يتكلم أو فهم الكلام المتوجه له
وقتها هنا ممكن الأم تدخل وبالراحة تبعد طفلها عن الولد اللي ضربه وتحاول تهدى الوضع وتخليهم يرجعوا يلعبوا مع بعض تاني
انما من سن (4سنين لـ8سنين) هيكون الطفل كبر وهيبقى قادر على انه يتصرف..ودورك انك تعرف ابنك ازاى يتعامل فى المواقف دى من نفسه..مع تدخل منك بعد تصرف الطفل
ومن سن (8سنين فأكبر) الطفل هيبقى أخد خبرة كبيرة فى التعامل مع الناس وهيبقى قادر على التصرف بشكل كبير من غير أي تدخل منك نهائي
ــــــــــــــــــــــــــــــــــــــــــــــــــ ــ
2- لو طفلك هو اللي بيضرب الأطفال التانيين
الحالة دى ليها أسباب كتير أهمها وأبرزها:
أولا: مشاهدة الطفل للعنف على التليفزيون
لازم تبقى فى رقابة على اللى الطفل بيشوفه..ماينفعش أدي للطفل الحرية الكاملة فى الفرجة على التليفزيون..خصوصا وهو لسه فى مرحلة التكوين وبيقلد اللى بيشوفه
غير كدا أفضل سن لمشاهدة التليفزيون هو على ""الأقل"" تلات سنين وبساعات محددة "ساعة أو اتنين"
فلازم مشاهد العنف اللى بيشوفها الطفل على التليفزيون تتمنع عشان أقلل من سلوكه العدواني
ثانيا: مشاهدة الطفل للعنف من أبوه أو أمه وتعرضه للضرب منهم وسماعه لجمل زى:
(هموتك من الضرب-هقطم رقابتك-هقطع جسمك من القرص....)
او إهانات وعنف لفظي بالسب والسخرية
كل ده يخلى الطفل يتعامل بعنف مع غيره لإنه ببساطة إتعود على الطريقة دي في التعامل مع الناس
فلازم اوقف إسلوبي العنيف مع طفلى وبعدين أهذب سلوكه للصح
(ملحوظة):
"صعب تطلب من طفلك يبطل سلوك انت بتعمله..لازم تبطله انت الاول"
ــــــــــــــــــــــــــــــــــــــــــــــــــ ــ
ثالثا: رغبة الطفل فى جذب الإنتباه له
يعنى لو كان فى تجمع مع أطفال غيره وحب يجذب انتباه أمه او حب يخلي كل العيون عليه ويفوز بإهتمام اللي حواليه فبيقوم يضرب في الاطفال التانية
فبيحس بكدا انه بطل الحفلة
وده التعامل معاه.. اني لما ألاقيه بيعمل التصرف ده مانتبهش ليه هو ولا حتى أروح أشيله وأبعده عن الاطفال..لا ده انا أروح أبعد الأطفال التانيين عنه وأطبطب عليه وأصالحهم وأسيبه
فيحس ان تصرفه جاب نتيجة عكسية
وبعدين أخده هو على جنب وأكلمه وأعرفه اني مش مبسوطة أبدا من تصرفه ده وزعلانة منه..وأقوله غلط تضرب أطفال غيرك..ولو اتكرر تاني هحرمك من كذا وهخاصمك كمان
ويبقى دورك انك تظهري إهتمامك وإنتباهك لطفلك لما يعمل سلوك حلو
يعنى لو بيلعب مع أطفال تانيين وشوفتي عليه سلوك حلو قوليله شاطر برافو عليك..او قومى بوسيه وقوليله انا مبسوطة انه بتلعب بهدوء ومؤدب
فيعرف ان السلوك الكويس هو اللى بيجذب الانتباه له
ــــــــــــــــــــــــــــــــــــــــــــــــــ ــ
- وأخيرا عصبية الطفل
واللى بيكون ناتج عن عصبية الأم أو الأب
والتعامل مع الطفل ده الأول بتقليل التوتر والعصبية حواليه ونحاول نوفرله جو هادي مافيهوش عصبية وزعيق ونرفزة ونعامله بالراحة وهدوء
هنا انتي بتراقبى طفلك لو لاقتيه ضرب طفل تاني أو عضه ..بتشيلي إبنك وتاخديه بعيد شوية لحد ما يهدأ وتكلميه وتقوليله ده تصرف مش حلو كدا صحابك هيبعدوا عنك ومش هيرضوا يلعبوا معاك
وممكن كمان يضربوك..انت تحب حد يضربك؟
حاول ماتضربش أصحابك تاني ولو لاقيت نفسك اتضايقت من حد روح إشتكيه لمامته أو إبعد عنه ماتكلموش
ــــــــــــــــــــــــــــــــــــــــــــــــــ ــ
لما إبنى يضرب حد اتصرف معاه ازاى؟
بعد التوقف عن الاسباب الرئيسية السابقة اللى بتخلى الطفل عدواني
بنيجي للتصرف الصحيح مع الطفل والعقاب السليم
(والعقاب بيجي بعد الحوار مع الطفل وإعطائه فرصة لتحسين سلوكه)
لما أشوف إبنى بيضرب حد أو أعرف انه ضرب حد
أسأله ليه عاملت كدا؟
لو السبب ان فى طفل أخد منه حاجة أو ضايقه أو شتمه
أعلمه إزاى يتصرف بشكل صحيح مع الموقف ده:
- يحذر الطفل اللى ضايفه ده انه هيعرف باباه عن سلوكه..لو ما إعتبارش بالتحذير
- يروح يقول لباباه (ابن حضرتك عامل كذا وكذا ولو سمحت خليه يبطل يضايقني)
- لو لسه بيضايقه يبقى يبطل يلعب معاه
انما مايستخدمش الضرب كأسلوب للتعامل مع الناس لانه غلط واني بزعل منه لما بشوفه بيضرب غيره
طب لو الطفل بيضرب زمايله وبيعضهم ومش عايز يبطل الأسلوب ده أو مافيش سبب مقنع من ضربه لزمايله..وقتها العقاب يبقى إزاى؟
بعد ما أتكلم معاه واعرفه غلطه وأبقى مفهه انه لو مابطلش السلوك ده هعاقبه ومش هقبل منه أي إعتذار
ببدأ معاه أول حاجة بالخصام
(الأب والأم الاتنين بيخاصموا الطفل لمدة يوم كامل ولو سنه كبير شوية ممكن فترة الخصام تزيد)
بعدها لو الطفل كرر نفس السلوك
اعرفه ان المرة الجاية العقاب هيبقى شديد وتديله فرصة يحسن سلوكه
لو كان لسه مستمر
يبقى أحرمه من الخروج فى الاجازات..
وأرجع تاني أديله فرصة يتحسن
لسه بيكرر السلوك
يبقى أخرجه لكن أمنعه من اللعب مع أصحابه ولفترة كبيرة تلات مرات مثلا..كل ما يخرج مايلعبش مع زمايله
تعليق