Tweet
دى أول مرة أكتب فيها ويارب ينال إعجابكم وعنوان الموضوع هو
إزاى أخلى إبنى الصلاة قرة عينه
شوية أفكار جربت معظمها مع ولادي و جابت نتيجة هايلة بفضل الله..
عبارة عن أولا و ثانيا و ثالثا و رابعا... بس كدة
أولآ:صلاتك إنتى .............................
لازم تكوني بتصلي.. smile رمز تعبيري
بس كدة؟!! لااا... تكونى بتصلي زى ما نفسك تشوفي هيئة صلاته.. يعنى عاوزاه يقف بخشوع.. تقفى بخشوع..
عاوزاه ما ينقرش الأرض.. ما تنقريش الأرض
أيوة هو نظام متراقبين دة شئنا أم أبينا
و لازم تكون فعلا قرة عينك فى الصلاة عشان تعرفي تخليها قرة عينه بجد هو كمان..
ثانيآ:لما تيجو تستعدو علشان تصلو .................
اندهيله بجمل معينة كدة مش مجرد "قوم صلى يلا
هديكى نماذج تنوعي ما بينها كل مرة... و التكرار بيعلم الأبرار (مشوها الأبرار
يلا يا حبيبى نكلم ربنا*يلا يا حبيبي نرتاح شوية بين ايدين ربنا.. يلا ننزل ذنوبنا الأول فى الحوض بالمية عشان نبقى فل الفل قدام ملك الملوك... عارف يا حبيبي إن زماااان الواحد من السلف كان بيترعش و هو داخل على الصلاة، و يسألوه مالك بتترعش ليه كدة! يرد يقول "أتدرون بين يدى من سأقف الآن !؟"...
خد بالك بقا و ركز.. انت عارف إحنا داخلين فين دلوقتى؟ فى منطقة حرام... يعنى ممنوع فيها أكل و شرب و ضحك و أي كلام إلا الذكر.. هنقف بين ايدين ربنا... مجرد ما نقول "الله أكبر" و نزؤ الهوا بايدنا ورا ودانا تخيل نفسك بترمي الدنيا كووولها بإيدك ورا ضهرك... كووول الدنيا... ركز نظرك على مكان السجود يا حبيبي و بلاش تتلفت يمين و شمال عشان ربنا ما ينصرفش عنك*
... تخيل نفسك يا حبيبي قدام الكعبة مباشرة قبلة المسلمين، و ربنا ناظر إليك.. و الجنة على يمينك.. و انت واقف على الصراط الرفيع أوى دة .. و جهنم تحت الصراط دة مطرح ما انت واقف بالظبط.. وملك الموت وراك مستنيك تخلص صلاتك عشان يقبض روحك.. و الرسول صلى الله عليه و سلم بيتفرج على صللاتك... تخيل يا حبيبي إنها آخر صلاة ليك.. و لما تخلصها، خليك قلقان هى اتقبلت والا لأ أصلا!.. عارف يعنى إيه الله أكبر؟ يعنى مفيش أقوى منه و لا أرحم منه و لا ألطف منه و لا أعظم منه ولا أوسع منه ولا أجود منه و لا أقدس منه و لا أعز منه و لا أعلم منه و لا أحكم منه و لا أعدل منه و لا أعلى منه و لا أشد منه جبروتا و انتقاما و بطشا و قهرا و نفعا... إلخ كل شئ هو سبحانه الأكبر فيه... بلاش تفرك كتير فى الصلاة، عارف سيدنا عمر قال إيه عن اللى بيفرك كتير فى الصلاة؟ لو خشع قلبه لخشعت جوارحه... إلخ (دي مجرد أمثلة، و أبدعي انتي بقا من أحاديث الصلاة و أحوال السلف فيها )
لو متأخرين عن الصلاة بعد الأدان، ما تقوليلوش "يلا بسرعة نلللللحق العصر لحسن خلاص فاضل ربع ساعة عالمغرب"
.. لاااا... قوليله "يلا بسرعة اتأخرنا على النداء جدااا .. شايف عدى عالأدان أد إيه!! كدة ضيعنا اكتر عمل ربنا بيحبه! الصلاة على وقتها.. ".. يعني خليه يركز دايما فى "هو متأخر أد إيه"، مش يبقى هدفه دايما "لسة قدامه وقت و فرصة أد إيه"... (و طبعا لازم هتقولي بالمرة "عاوزين نستغفر كتير بقا أو نطلع صدقة كدة عشان نمسح التأخير دة بإذن الله")
اقفي قدام المراية و ظبطى اسدالك، و شميه قدامه، و خليه يشم هدومه و يتأكد من نضافتها بنفسه عشان يتعود.. و حطي عطر و حطيله هو كمان، (فواكه مثلا أو عود أو مسك.. أى حاجة تنفع للجنسين و ف إيدك السواك طبعا، و تعلميه يقشره كل يوم مرة.. ماتخافيش هيعرف.. أو قشريهوله بنفسك.. المهم يستاك لكل صلاة..
اطفوا أى دوشة و ابعدوا عن أى ملهيات.. هيئوا نفسكم للقاء الجبار الرحيم العظيم.. و فهميه كدة كل مرة..
قوليله عشان تعلميه تسوية الصف: "يلا نساوي الصف زى ما الملايكة بتعمل؟.. و اقفل الفتحات اللى بيننا كويس عشان الشياطين ماتعرفش تدخل توسوس و تسرق مننا"
فهميه إن أى شئ قلقان عليه و هو فى الصلاة و شايل همه هو أصلا بإيدين ربنا إللي بيصلي قدامه، فليتوكل عليه سبحانه و يخشع... و يفضي قلبه تمااااما من أي هم و لو بسيط: "الكرتون اللى خايف يفوتك يا حبيبي ربنا اللى اداهولك، ممكن تكروت الصلاة بسرعة ثم تلاقى النور قطع!.. التليفون اللى خايف يسكت و ما نلحقش نرد عليه ربنا اللى خلاه يرن، ممكن تكروت الصلاة بسرعة و برضو تيجى ترد تلاقيه قفل!.. اللعبة اللى خايف المحل حد يسبقك و يشتريها قبلك ربنا اللى هيحفظهالك لو هي رزقك"... ربنا قال عن الصلاة: "وَأْمُرْ أَهْلَكَ بِالصَّلَاةِ وَاصْطَبِرْ عَلَيْهَا ۖ لَا نَسْأَلُكَ رِزْقًا ۖ نَّحْنُ نَرْزُقُكَ ۗ وَالْعَاقِبَةُ لِلتَّقْوَىٰ ﴿١٣٢﴾"... ...الخ
فهميه إن وضع إيدنا دة كدة اليمين عالشمال دة أدب قدام ربنا...
فهميه معنى التشهد و أهميته عند النبي صلى الله عليه و سلم، و عرفيه إن النبي علمه لسيدنا ابن مسعود و هو ماسك كفه بين ايديه الشريفة صلى الله عليه و سلم ، و كان كإنه بيعلمه سورة من القرءان مش حاجة عادية.. و فرحيه إنه لما يقول "السلام علينا و على عباد الله الصالحين" إنه كدة سلم على كل العباد الصالحين فى الأرض.. هيفرح و يتحمس*4...
علميه قصة الفاتحة و إنها مقسومة نصين بيننا و بين ربنا، و إن ربنا بيرد على كل آية، فلينصت و ليتأدب.. و ليتخيل الحوار
. وفهميه معنى المغضوب عليهم ولا الضالين.. فهم المعانى بيساعد على الخشوع..
علميه يدعي بكل اللى نفسه فيه فى السجود.. و يستغفر في الركوع من كل غلطاته، مع التسبيح طبعا...
احكيله قصة "خنزب"، حرامى الصلاة الخبيث دة، و علميه يطرده بالخشوع عشان يرجعه مفلس ماعوش حاجة مسروقة من صلاته.
عرفيه إن من آخر الحاجات اللي حبيبه النبي وصى المسلمين عليها و هو بيموت، فى عز ما كان بيتصبب عرقا من أثر سكرات الموت صلى الله عليه و سلم، كانت الصلاة... معقولة تضيعها!.
ثالثآ تحسين الشعائر والتحميس لها ..........................
سهلي له الصلاة بالرخص وقت الرخص فيحبها أكتر.. و ما تشدديش عليه.. ربنا سبحانه يحب أن تؤتى رخصه.... الصلاة فى النعل مثلا، ما تمنعيهوش و تقولى لأ دي فى الشارع بس!.. المسح على الجورب مثلا، ما تمنعيهوش و تقولى لأ دة في البرد بس!.. لأ علميه شروطه و موانعه و تابعيه لحد ما يتعود على خمس مسحات فقط في غير السفر، مش 47 مسحة
كمان مفيش مانع من الوضوء بالماء الدافئ أحيانا (و ليس دائما، من باب الخشونة زي ما هنتكلم لاحقا إن شاء الله فى منشور العيال و الخشونة).
اسمحيله بالصلاة فى المكان اللى يحبه بلاش تحكمات بلا مبرر..
خليه ينقي معاكي سور يحب يسمعها منك فى الصلاة الجهرية (الصلاة معاكى فى البيت دي طبعا فى مرحلة ما قبل الصلاة فى المسجد، أو فى الأوقات اللى الوالد ما بيبقاش متواجد عشان ياخد الولاد المسجد، أو فيما يخص البنات).
شجعيه على صلاة الجماعة اللى فى البيت بإنك دايما تقوليله لما يكسل عنها: "يا خبر! بقا معقوووول حد عاقل يخيروه إن صلاته تتكتب مرة واحدة ولا 27 مرة، يقوم يختار بكامل إرادته إنها تتكتب مرة واحدة! ياااا راااجل يلا قوم استعيذ و تعالى جنبي يلا
و شجعيه على صلاة الجماعة اللى فى المسجد بإنك تقوليله "إوعى تفوت ضيافة الرحمن لحبايبه فى بيته عز و جل، مش هتلاقي أبدا يا حبيبي حد فى كرم ربنا سبحانه"، و فهميه الحقائق الشرعية، ما تدلسيش عليه عشان تتحكمي فيه.. فهميه إن حكم الصلاة فى المسجد فيه خلاف معتبر، لكن المسلم الحق متبع لكل السنن بغض النظر عن حكمها،
و دايما تقوليله "كفاية أوى للمسلم الحق إنه يعرف إن ترك الصلاة في المسجد شئ بيزعل النبي جداااا لدرجة إنه صلى الله عليه و سلم كان بيتمنى يجيب حد يقف مكانه فى صلاة الجماعة عشان يروح هو على الرجال اللى بيصلوا بلا عذر فى البيوت عشان يولع في بيوتهم نار و هما فيها .. وكفاية أوي للمسلم الحق إنه يعرف إن الناس كلها يوم القيامة خارج ظل عرش الرحمن -يوم تدنو الشمس من الرءوس- إلا سبع أصناف من البشر، من ضمنهم رجل قلبه معلق بالمساجد.. الكلمتين دول كفاية عند اللى بيحب ربنا بجد يا حبيبي" (تفهميه كدة).. .
رابعآ جوه الصلااة بقا..................
أتمي الحركات.. أتمى القيام.. اطمنى فى صلاتك.. "حتى تطمئن..."
فى الركوع تعمدي تعلى صوتك سنة صغيرة بالاستغفار والتسبيح و حققي الحروف ببطء و سكينة عشان يفهم معني الخشوع عمليا. (همس مسموع لا أكثر: "بين ذلك سبيلا"*6)..
و فى السجود برضو، بحيث يسمعك بتحققى حروف التسبيح بالراحة و يحس بالسكينة في حركاتك و كلماتك، و يسمعك بتدعى بدعوة حلوة و ياريت كل دعاويكي تكون أخروية فيتعلم منك حمل هم الآخرة على الدوام.. ومفيش مانع يسمعك بتدعيله دعوة حلوة ف مرة كدة "يارب أنا بحب ابنى فأحبه و أعطه ما يتمني"، مثلا يعني.. أو "يارب اهديه و خليه يحفظ القرءان"... بس طبعا لو سألك بعد الصلاة انه سمعك و انتي بتدعيله ردي ببراءة الحملان : "إيه دة! أنا صوتي وصل لك ؟.. معلش هوطيه بعد كدة عشان ما ينفعش أشوش على اللى بيصلى جنبي".. و تبقى مجرد فترة تعليمية مؤقتة فقط.. و طريقة تزودي بيها خشوعك أصلا إنتي كمان إن شاء الله..
اعملى هيئة الصلاة النبوية بالظبط.. صلوا كما رأيتموني أصلي... (اشتري كتيب محقق عن هيئة صلاة النبي، و اقرأوه سوا).خامسآ:بعد الصلاااااااااااااااااة............................ ....
ابتسمى ابتسامة رضا و فرحة كبيرة و انتي لسة قاعدة عالأرض و قولي: "الله عالراحة و الجمال.. قلبى فرحاااان.. له حق النبي صلى الله عليه و سلم يقول الصلاة دى حب حياته و قرة عينه.." هيتبرمج بالتكرار.. و انتى كمان
اقعدى شوية عالسجادة بعد الفريضة، ولو حتى فرض واحد فى اليوم فى وقت مش ذروة، وسبحي وادعي وهو يقول آمين.. ومرة هو يدعى وتقولى آمين.. (طبعا دة مرحلة ما قبل الصلاة فى المسجد يعنى)
صممي جدول أسبوعي بمواقيت الصلاة بالساعة بالظبط، و تحطي 5 خانات مثلا لكل فرض (1النضافة و الطهارة/2الصلاة على وقتها/3اتمام الحركات/4عدم الحركة كتير/5فعل سننها قبل وأثناء وبعد الصلاة)، و كل خانة فى الخمسة دول تاخد نجمة ستيكر بلون مختلف لو اتعملت.. لكل فرض بالترتيب..
وتعدوا النجوم آخر الأسبوع (نجوم الإنجاز مش نجوم الليل )، و يشوف أكتر لون متحقق فى الجدول وأكتر لون ناقص عنده (ارتباط ذهنى بالصورة مهم).. ويفضل الجدول القديم محطوط جنب الجدول الجديد عشان يبقى عنده حافز للتحسن..
وتؤكدي عليه دايما إن الجدول دة هيبقى فيه واحد زيه فى صحيفته اللى هيمسكها ف ايده يوم القيامة، (عشان يركز فى الإخلاص طبعا فى النجوم ).
فى حالة إنه صلى لوحده مثلا، و لقيتيه لكلك الصلاة، قعديه جنبك و قوليله بالراحة كدة: عارف النبي صلى الله عليه و سلم قال ايه على صلاتك دى بالظبط؟ قال دة نقر زي نقر الغراب للأرض (و اعملى بوشك ايموشن قرف). عارف النبي عمل إيه مع اللى صلى زيك كدة؟ خلاه يعيد الصلاة كذا مرة لحد ما صلى عدل.. يلا حبيبي ارجع فصل فإنك لم تصل... (بس حاولي ما تكرريش الموضوع دة كتير عشان كدة كدة دى مرحلة التعلم لا التكليف.. مش عاوزينه يزهق.. حاولى تغضى الطرف كتييير بعد التوجيه كإنك مش واخدة بالك، العبرة بالتكرار و الصبر و الدعاء فى الاول و الاخر)وأخيييييييييييييرآآآآآآآآآآآآآآآآآآآآآآآآآآ....... ...........
و بشكل حياتى متكرر، و بمناسبة و من غير مناسبة:
علميه إن أول حاجة هيتحاسب عليها الصلاة.. لو فسدت، يبقا باقى عمله الصالح فسد و دفتر أعماله الصالحة مش هيتبص فيه أصلا
وعلميه إن السنن الرواتب عشانه هو مش حد تاني، لإن اللى ناقص من صلاته ينجبر بالسنن*7.. و من منا صلاته كاملة!
علميه إنها عمود الخيمة.. و حطيله ملاية تحتها عصاية و شيلي العصاية عشان توريله إزاي البناء بينهار من غير العمود.. من أقامها فقد أقام الدين.. و من هدمها فقد هدم الدين.. و كل ما يوقع الصلاة، فكريه و قوليله "بتهد الخيمة كلها كدة على دماغك يا مؤمن " .. لازم يعرف إن ديننا خلا الصلاة حل لكل المشاكل: عندك خوف، فيه صلاة الخوف.. عندك حيرة، فيه صلاة الاستخارة.. عندك طلب، فيه صلاة الحاجة... عندنا كسوف للشمس مرعب، فيه صلاة للكسوف... عندك صدقات اد كدة لازم تؤدى حقها، فيه صلاة الضحى تتصدق بها عن كل مفصل فى جسمك يوميا... عندك جفاف فى البلد و المية شحيحة، فيه صلاة استسقاء لجلب الأمطار برحمة ربنا... عندك قلب تعبان، فيه صلاة قيام تروق البال و تصفى النفوس و تغسل القلوب... خليه يحس بالفخر من إن ديننا الدين الوحيد اللى المسلمين فيه بيتصلوا بخالقهم خمس مرات فى اليوم، و اللى يزود بسنن هو الكسبان.. و من يبخل فإنما يبخل عن نفسه...
و صدق من قال: عجبت لمن يبحث عن السعادة و عنده خمس صلوات فى اليوم و الليلة
تعليق