Tweet
مشاكل مهمه جدا مناقشتها مع كل أم
أنا هبدأ بصراحه ليكي كأم
دوري كأخصائية بالاساس ودور كل دكتور نفسية وعصبية اغلب الحالات اللي بتوصل لينا سواء بمكان العمل او الانترنيت بنلاقي فيها بعض المشاكل من الأم والأب
بمعني عايزة اقول لكل أم ابنتك وابنك احيانا وغالبا بيتمثلوا بيكم كقدوة
تكوني مثاليه قدامهم بالشكل الائق في اخلاقك وتعاملك واسلوبك بداخل وخارج المنزل
بينك وبين زوجك مشكلة حليها معاه من فضلك بعيد عن الاولاد بلاش تعقديهم بسبب امور غالبا بسيطه او كادت تكبر الفجوه بسببها
اولادك بيخرجوا متأزمين نفسيا وصحيا بسبب أزمتك مع والدهم
طيب مش مشكلتنا مين اللي بيغلط مش كلتنا اننا نراعي مشاعرهم شويا وبلاش كل متحصل مشكلة اعلي صوتي قدام اولادي عارفه بيترتب علي كده ايه بالظبط هقولك انا
البنت والولد احيانا بيصادفوا المرض النفسي والصحي بسبب الاوضاع فالبيت بيتاثروا فيها بنسبة كبيرة بتاثر في شخصيتهم واهتزازهم وترددهم وكل ماله علاقه بالشخصية والسلوك
بعد كده بتتحول المشكلة فان البيت اللي المفروض يتناسوا فيه مشكلتهم بحبهم الاسري تحول الي كارثة الولد طول الوقت مع صحابه والبنت طول الوقت مع صحباتها مع صديقها مع اي شئ يبعدها عن ملل البيت
المشكلة الاولي
طيب ليه نعمل المشاكل ونرجع نقول الحقوا ولادنا مش عارفين نتعامل معاهم دي قضية تانيه نتكلم فيها بعدين لا هتعرفي تتعاملي معاهم لو تعلمتي الاسلوب اللي تحترمي ذاتك فيه والمثل اللي تربيتي عليها بشكل صحيح وتجيدي فن التعامل مع اولادك لان الوقت الحالي غير زمنا وزمن اجدادنا فالبتالي بتتعاملي مع اولاد عقلهم متفتح ومتطور بفضل التكنولوجيا اللي اثرت ايجابا وسلبا في اولادنا
علمتي ابنك وبنتك الخوف منك شكرا تناولي بعد كده المزيد من القضايا في مشكلتهم طيب معني كده ان اولادي مش هعلمهم الخوف مني لا علميهم الاحترام قبل الخوف علشان يعتبروكي أم وصديقة
اذا احترموكي غير مايخافوا منك هتلاقي التعامل اختلف
المشكلة التانيه انفصال الأم والأب
عارفه لما تنفصلي وتعيش اولادك بعقدة الذنب أذا غلطوا أه انتي أو انت شبه ابوك في تصرفاته بلاش الكلمه دي
ربما الولد او البنت متأزمين من تصرفات الوالد او الوالده فبلاش غيريها قولي انا عايزاك افضل مني ومن والدك
المشكلة التالته
الاهتمام الزائد او الامبالاه
يعني في أم تهتم جدا باولادها لدرجه انها تخنقهم وده غلط
وفي أم لا تهتم بالمره لتصرفات اولادها وده بردوا غلط
طيب اعمل ايه هقولك تعملي ايه
شدي شويا واجذبيهم ليكي شويا فالتعامل العادي وراقبيهم بعينك وبقلبك بدون متحسسيهم انك عينك عليهم اهتمي يوم وغيري يوم طريقة الاهتمام بلاش تكوني مستهترة ولابمالاه في تصرفاتك مع اولادك لانك أم قدوة ومثالية وبتتمني الخير لاولادك
اهتمي يوم وافرغي عنهم يوم
المشكلة الرابعه الحرية الشخصية
معظم اولادنا مش فاهمين معني الحرية الشخصية
الحرية هي ان اعمل التصرف الائق لي وللمجتمع هما فاهمين الجزء الاول ومش فاهمين الجزء التاني
لا فهميهم واقنعيهم بهدوء وبلاش تسيبي الحرية الزائده اوي كده لا عينك عليهم وتعاملي معاهم باللين والشده في آن واحد اذا لزم الأمر احنا في وقت صعب لازم عنينا عليهم وعلي افكارهم وعلي سلوكهم
المشكلة الخامسة
في بعض الاحيان بتوصل مشاكل عدم الثقة بالنفس والتردد والحيرة ومشاكل من هذا النوع بتوصلني طيب احلها ازاي
فالاول بقول للأم تحلها انتي السبب الرئيسي فتكوين شخصية ابنك وبنتك
ياهتربي اولادك واثقين من نفسهم ومن نشاطهم ومن تفكيرهم وقادرين علي التحكم في رد الفعل والتحكم في الانفعال وكيفية اخذ القرار
او انك هتربي ابنك وبنتك علي شخصيات مهزوزة وتستدعي علاج نفسي
المشكة السادسة
العنف الاسري بلاش منه
اذا عودتيهم علي الضرب والعنف والاسلوب ده مش هتتحملي نتيجته بعدين ابنك وبنتك هيأخدوا منك صفتين الاولي الخوف والمرض النفسي والتانيه هيفسدوا اجيال بعدها بسبب تطبيقهم للفعل ذاته مع اولادهم او العكس
هيضطروا ميتعاملوش مع اولادهم بالعنف وممكن يعاملومهم بمثاليه زائده تكاد تضيعهم ايضا
المشاكل مش بس لأمهات الطريق الى الله لا ولكل زائرة هتشوف مشاكلنا بتوصلنا ل فين
المشكلة السابعة
طريقة الثواب والعقاب
يعني احيانا لما ابنك مش عايز يذاكر شجعيه حفزيه مش عيب بس اوعديه ونفذي يعني وعدتيه تجبيله شئ تنفذيه فعلا وقت ما يلبي طلبك لأنه هيتشجع من جواه حتي لو عاند معاكي بس هيفكر مره علي مره هيتغير ويذاكر ويسمع كلامك
لكن اوعي توعديه ومتنفذيش لسببن الاول
السبب الاول
أن رجلا من موالي عبد الله بن عامر حدثه عن عبد الله بن عامر أنه قال : دعتني أمي يوما ورسول الله صلى الله عليه وسلم قاعد في بيتنا ، فقالت : ها تعال أعطيك ، فقال لها رسول الله صلى الله عليه وسلم : وما أردت أن تعطيه ؟ قالت : تمرا ، فقال لها رسول الله صلى الله عليه وسلم : أما إنك لو لم تعطه شيئا كتبت عليك كذبة .
الراوي: عبدالله بن عامر بن ربيعة المحدث:الألباني - المصدر: السلسلة الصحيحة
والسبب التاني هتعدمي ثقته فيكي وهتكسري جواه الحافز اللي شاغل تفكيره قبل ماينفذ وهتكسري فيه مشاكل كتيرة وأولهم الاستهتار
طيب العقاب لو ابني غلط في طرق كتير جدا للعقاب
يعني الحرمان اللي الكل بيستخدمه انا بقولك ده اخر نوع تستخدميه عاقبته مفيدة ومضره في بعض الاحيان
طيب اعمل ايه هانعاقب بأسلوب علي حسب المشكلة واذا فرغتي منهم بلا حل ابتدي عاقبي بالحرمان بس متبدأيش بيه
عارفه لو علمتي اولادك الثقة والاحترام هتستفيدي كتير جدا مثال علي ذلك
ابنك او بنتك غلطوا غلطه كبيرة وانا اتعاملت معاهم بكل طرق العقاب
طيب مش هذلهم زي مابشوف امهات كتيرة بتعمل كده لا هديهم فرصة واتنين وتلاته واقول لهم تحذير حلو
انا مش هغير معاملتي معاك الا لما تثبتلي انك تغيرت وجدير بثقتي انا والدك فيك هنا تخلي البنت والولد يحاولوا ارضائكم بأي وسيلة
حتي لو بيكذبوا مره واتنين فالأخر هيثبتوا
متنسيش ان من مشاكل الكذب عند الاولاد الخوف اللي ربيتيهم عليه
المشكلة الثامنه
اهم مشكلة
لما ابنك او بنتك بتجيب درجات قليله في المدرسة او مش بيذاكروا بلاش تقولي يافاشل شوف ابن الجيران شوف اخوك شوف ابنك خالتك ليه تعقديه اديلة فرصه شويا يفهم اقفي جانبه وساعديه وعلميه بالراحه ان ده مستقبله ونفسك تشوفيه افضل انسان مش عيب نحفزهم ونشجعهم ونهتم بهوايتهم بلاش انت فاشل وانت مش هتتغير ممنوع غيريه بأفضل من كده واعملي فكر وسلوك حضاري لابنك
طيب واذا ابنك وبنتك عندهم هوايه انتي مش حباها طالما هوايتهم ترضي الله بلاش تضايقيهم وتقللي من شأنهم شجعيهم حتي لو هوايه بجانب الدراسة بالعكس بتعمل ذكاء عالي للابناء وسلوك افضل ليهم
وبتمني بلاش نغصب علي اولادنا اختيار نوع الدراسة لان ده مستقبلهم بلاش انت هتدخل علمي لا ادبي لا اعرفي ميولهم الاول ايه وممكن يكون هو عارف قدراته حتي في اختيار نوع الجامعه ساعديهم لاختيار قدراتهم ربما ابنك عارف قدرته وربما لا فساعديه فانه يعرف هو عايز ايه
المشاكل الأخري وغيرها كتييييييييييير صعب اتذكرهم أو ارصدهم حاليا لكن إن شاء الله هنتكلم فيهم هنحلهم
أعملي ساعه صفا بينك وبين اولادك فاليوم احكوا الشئ اللي فرحكم وافرحي معاهم فالبيت او فالمدرسة او فالعمل
م/ن
تعليق