اسأل مجرب ولاتسأل طبيب

[ميرو777]

ياجماعه انا تعبت من كلام الدكاتره فى تربيه الاطفال
لانى بحس انهم بيقولو كلام غير واقعى وعاوزه من العضوات جميعا" يشاركوا بالتجربه العمليه
لأن مشاكل الأطفال متنتهيش خاصة انى معنديش خبره فى التعامل مع الأطفال
فعايزه نعمل سجل نقدر من خلاله نعالج اكبر كم من المشكلات اليى بتواجه الامهات الجدد
بس ارجوكم بلاش مواضيع منقوله من النت
عاوزه مشكله مرت بألأم فى تربيها لأبنائها وكيف تعاملت مع المشكله وكيف عالجتها
على سبيل المثال بعض المشاكل اليى بتواجهنى
1-تعليم الطفل قضاء الحاجه (ابنى عارف كل حاجه بس امام اى حد غيرى يعمل على نفسه)
2-يأخذ اى حاجه فى يد اخته
3-يعمل اى حاجه بألعياط مش عايزنى امنعهمن اى حاجه
4-ساعة الاكل بيحسسنى انى بعذبه
.................................................. ...............
حاجات كتييييييييييييييييييييييير
ارجوكم ساعدونى انا بدأت افقد اعصابى وبتهور واضربه
وعاوزاكم متساعدونيش انا بس لكن اى عضوه عندها تجربه مرت بيها مع ابنائها تقدر تفيد بيها العضوات الآخرين تعرضها وتفيد وجزاكم الله خيرا" وجعله الله فى ميزان حسناتكم

[ميرو777]

رد: اسأل مجرب ولاتسأل طبيب

شكلى انا اللى هشارك بأول تجربه عمليه
والمشكله كانت التهتهه لدى ابنى فكنت اشعر ان لسانه تقيل فى النطق لدرجة ان الجميع لفتو انتباهى للموضوع بصراحه انا مكنتش بتكلم معاه مكنتش اعرف انى المفروض اتكلم معاه
والحمد لله عالجت الموضوع ده بانى
1-بدأتاتكلم معاه كتير
2-بدأت انطق الكلمه واكررها اكتر من مره
3-بدأت اطلب منه طلبات بسيطه من خلال اللعب (هات الكوره- انا مين- انت مين - - - - -)
4-كمان منساش دور الحكايات اللى كلامها واضح بالصور
5-وكمان تكرر بعض الاغانى القصيره
6-وتعليمه اصوات الحيوانات بالصور
7-ولعبت معاه لعبه اصوات الحيواناتوالطيور
كل ده بفضل الله ساعد ابنى انه يبطل التهتهه تدريجيا" واصبح يتكلم بدون تهتهه الحمد لله
يلا ياجماعه اللى عندها اى تجربه تقدر تفيد بيها زمايلها متترددش فى نشرها وجزاكم الله خيرا"

[ميرو777]

رد: اسأل مجرب ولاتسأل طبيب

فى حاجه كمان تعبتنى أوى وكمان سألت دكاتره كتير عليها دى من الناحيه الطبيه
مشكله التهاب الحفاضه لدى الاطفال دى حاجه انا عانيت منها كتير جدا"
ومن اسبابها ترك الحفاضه فتره طويله للبيبي او عدم التشطيف الجيد او عدم التجفيف الجيد
وعانيت من الموضوع ده وكشفت عند اكتر من طبيب ولكن بلا جدوى
الى ان قالت لى احد اقاربى على فازلين للاطفال هو كان اسمه فازلين وكان علبه كبيره ب50 جنيه فى صيدلية العزبى بس كان له مفعول السحر باذن الله من مره واحده كان بيقضى على الالتهاب
طريقة استخدامه بسيطه جدا" بعد التشطيف بالصابون والتجفيف جيدا" يوضع طبقه رقيقه منه ويدك به منطقة الحفاضه ويلبس الحفاضه وان شاء الله تروح الالتهابات نهائيا"
يلا ياجماعه شاركو بخبرتكم سواء من ناحية التربيه او من ناحية العلاج او الوصفات بس تكون وصفه ناجحه متجربوش فينا وجزاكم الله خيرا"

[ميرو777]

رد: اسأل مجرب ولاتسأل طبيب

لو الطفل لا قدر الله وقع واتخبط فى أورطه علشان متورمش بسرعه حطى قطعه من الثلج فوقها لفتره هتقلل الورم والالم وكمان الثلج مفيد جدا" فى حالةالنزيف لا قدر الله
كمان فى مرهم جميل جدا" للكدمات ان شاء الله بمشى الورم والزرقان على طول اسمه (هيموكلار)
ربنا ما يحوجكم ليه ويعافى جميع ابنائننا من اى شر
انا عملت اللى عليا وكتبت اللى اعرفه ولو افتكرت حاجه كمان هكتبها انتو كمان قولو اللى عندكم من خبرات

[الدره العصماء]

رد: اسأل مجرب ولاتسأل طبيب

ماشاء الله ,,,فعلا كل أم محتاجه لتجارب
غيرها من الأمهات فى المشكلات اللى بتواجهها فى حياتها
خصوصا لما تكون أم لأول مره وطبعا أنا كنت متلخبطه جدا
مع أول مولود اول حاجه كنت بخاف منها جدا التغيير على السره
وبفضل الله ثم أمى اتجرأت واصبحت أغير بنفسى عليها ,,وعلمتها
لبناتى حاليا بأن قمت بالتغير على السره لحفيدتى مره واحده أمام
والدتها وبعد ذلك اتعلمت وبدأت تعمل زيى تمام ,,
على فكره عجبتنى قوى فكرة موضوعك ابنتى الفاضله ميرو
وتجاربك كمان مفيده جدا وممكن تستفادى أكثر من هذا الموضوع
https://forums.way2allah.com/showthread.php?t=115326 ها تستفادى جدا والذى تقدمه لكم أختكم يمامة المسجد وان شاء الله
فى موضوعك هذا ستجدى امهات كثيره يتجاوبوا معاكِ بتجاربهم ,,أهلا بكِ غاليتى نورتى القسم وجزاكِ الله خيرا .

[ميرو777]

رد: اسأل مجرب ولاتسأل طبيب

اشكر جزيلا" الدره العصماء على موضوع يمامه المسجد الذى قدمته لى
لكنى اريد من كل العضوات ان يشاركو بخبراتهم فى تربيه الاطفال خصوصا" فى الفتره منذ الولاده الى 3 سنين
لأن هى دى الفتره اللى معظم الامهات الجدد بيقعو فيها فى اخطاء كثيره
مثلى لأنى عملت خطأ كبير مع ابنى سببله مشكله كبيره بعد كده
الخطأ هو انه لما اتولد كان عنده قشره فى شعره مكنتش اعرف انى المفرود ملمسهاش
وقمت بتسريحه بفرشاه ناعمه ووجدت ان جزء منها يقع وفرحت وقولت هشيلها كلها
وبعد كده عملت افرازات صفراء والتهابات شديده تحولت بعد ذلك لقشره سميكه
واصبحت مشكله اعانى من علاجها لشهور طويله
كل هذا بسبب جهلى وعدم خبرتى
لذلك ارجو الخبره من العضوات سواء بخبرات تفيدنا او بأخطاء نتجنبها وجزاكم الله خيرا"

[يمامة المسجد]

رد: اسأل مجرب ولاتسأل طبيب

جزاكم الله خيرا ً غاليتي ميرو

لكن , ياريت ويفضل نسال الطبيب أولا ً

لأن فيه أدوية مثلا ً تنفعلي وأدوية ماتنفعش لغيري

وزي ما انت قلتي قشرة ابنك

المفروض اننا نسال قبل ما نعمل أي حاجة في أولادنا

[يمامة المسجد]

رد: اسأل مجرب ولاتسأل طبيب

عاوزه مشكله مرت بألأم فى تربيها لأبنائها وكيف تعاملت مع المشكله وكيف عالجتها
على سبيل المثال بعض المشاكل اليى بتواجهنى
1

-تعليم الطفل قضاء الحاجه (ابنى عارف كل حاجه بس امام اى حد غيرى يعمل على نفسه)

بصراحة انا لسة معلمتش ابني وحاسة بصعوبة جدا ً في الموضوع ده ومش لا يستجيب لي اطلاقا مع انه فاهمني ... بس بحاول أدخله اول ما احس انه بيعمل

2-يأخذ اى حاجه فى يد اخته
3-يعمل اى حاجه بألعياط مش عايزنى امنعهمن اى حاجه

دي بتيجي بالتعامل البسيط وأفهمه بالراحة وعلى أد عقله ... ان ماينفعش اعمل كدة ... عارفة صاحبي ابنك ... مش كانك ليكي سلطة عليه

صاحبيه وفهميه ووديه

4-ساعة الاكل بيحسسنى انى بعذبه

اعمليله حاجة حلوة يحبها مرتبطة بالاكل

زي مثلا ً أنا بقعد ابني على رخامة المطبخ وااكله

اعمليله العاب

اربطي الأكل بحاجة بيحبها

علميه ان ساعة الاكل تعدوا كلكوا عشان تاكلوا مش وهو بيجري ويلعب

[يمامة المسجد]

رد: اسأل مجرب ولاتسأل طبيب

بصي يا ميرو بالنسبة لالتهاب الحفاض

إن شاء الله أحطه في موضوع العيادة

عندك أنواع كتيرة من الإلتهاب

فيه التهاب أحمرار فقط ... دي اكزيما حساسية ... ممكن تحطلها كريم لعلاج الاتهاب

اي كريم مضاد لالتهاب الحفاض ده مضاد ليه زي ايفا زنك

وفيه كريم كنت بستخدمه رائع بس غالي ب 100 جنية علبة بتعد معاك 6 شهور اسمه سودو كريم

اما لو احمرار اوي ودخل في تسلخات حطي كوريتزون زي كريم اسمه لوكارتين او كينا كومب بس لوكارتين افضل ومرة او مرتين ومدة لا تتجاوز 3 ايام

لقيتي قشرة بيضا كدة والتهابات خاصات من الامام وفي البنات يعني اي حاجة بيضة في الاتهاب ده فطر حطي كريم ميكوناز وإن شاء الله يتحسن

وطبعا ً بوصي الأم بالنضافة النظافة

يعني بعد الحمام تغسلي ابنك كويس بماء وصابون وتنشفيه كويس

لو هو صغير اوي ممكن تبدلي الماء والصابون بمناديل مبلله خاصة بالأطفال لتنضيف مكان الحفاض

[خـادمـهـ لديـن الله]

رد: اسأل مجرب ولاتسأل طبيب

موضوع مهم أختنا ولكن كما ذكرت أختنا يمامه وجود رأى الطبيب هام
ولكن علينا حسن اختيار الطبيب
ولا ننكر ان بعض الأراء من بعض التجارب قد تفيد فعلاً فى التربيه
ونرجوا ان يوجد تفاعل من الأمهات فى ذلك
ويوجد العديد من الأفكار التى تساعد فى تربية الأولاد
ولعل هذا الموضوع يفيدك بإذن الله تبارك وتعالى..
أفكار × أفكار × أفكار ....لتربية ابنائنا

[يمامة المسجد]

رد: اسأل مجرب ولاتسأل طبيب

ياريت ميرو تقولي اسم الفازلين اللي ب 50 جنية اسمه ايه بالظبط

الي مكتوب عليه vasline اللي مكتوب عليه فازلين بالانجليزي ولونه أصفر ولا ايه

ياريت صورة ليه لو عندك ؟؟؟؟؟؟؟

[خـادمـهـ لديـن الله]

رد: اسأل مجرب ولاتسأل طبيب

أختنا هذا الموضوع إن شاء الله سيفيدك جداً
أرجوا أن تلاقى فيه بعض ماتريدى
طفلك عمره سنتين ومتعبك في تربيته >>> من هنا نتعلم

[ميرو777]

رد: اسأل مجرب ولاتسأل طبيب

اشكر يمامة المسجد وtear على اهتمامهم باموضوع واحب اوضح انى مش قصدى اننا نتبادل اسماء ادويه لعلاج امراض بس الفازلين ملهوش اى آثار جانبيه والثانى مرهم للكدمات معروف وتحت اشراف طبيب اما المثال بتاع القشره فأعرف انى اخطأت فى تقشيرها واعترفت بذلك لكنها كانت نصيحه بطريقه غير مباشره للامهات الجدد لكى لا يقعو فى مثل خطأىوجزاكم الله خيرا"

[ميرو777]

رد: اسأل مجرب ولاتسأل طبيب

ردا" على اختى يمامة المسجد
للاسف انا معنديش صوره للفازلين لانى آخر مره استعملته من سنه
بس هو كان مستورد امريكى لعلاج ال(ديبر راش)
وكان فى علبه كبيره غطاه لونه لبنى و كلمة فزلين لونها لبنى
عموما اتصلى بصيدلية العزبى هى الوحيده اللى كنت بلاقيه فيها وان شاء الله تلاقيه

[ميرو777]

رد: اسأل مجرب ولاتسأل طبيب

شكرا" اختى tears of heart فقد قرأت الموضوع الذى نصحتينى به وهو فعلا" موضوع جيد جدا"
جزاكى الله خيرا"