Tweet
كوكى كان بيبى صغنون لسه مولود وكان عسول ماما جابت لكوكى قطه بيبى لسه مولوده عشان تبقى صاحبه كوكى و تكبر معاه وكانت بتقلد كوكى فى كل حركاته و كان اسمها لوسى
وكانت بتحب اوى تلعب معاه
وكوكى كان بيشربها اللبن بتاعه من الببرونه كمان
ولما ماما تنيم كوكى فى سريره لوسى تجرى تنام فى حضن كوكى عشان تدفيه
بس لوسى كبرت بسرعه قبل كوكى عشان القطط بتكبر اسرع من الانسان و بقت كبييييره و ضخمه اووووووى
ومبقتش تلعب مع كوكى كتير زى الاول وكوكى سال ماما قالها هى لوسى مبتلعبش معايا ليه؟
ماما قالتله عشان هى كبرت و شايله فى بطنها قطط صغننه كتير بكره تولدهم و تملى علينا البيت قطط كتير جميله زى لوسى
فرح كوكى و كل يوم يستنى لوسى تولد القطط الصغننه عشان يلعب معاهم فضل مستنى مستنى حوالى شهرين
وفعلا لوسى فى يوم كوكى سمعها بتنو نو كتير اوى و قعد يدور عليها كوكى لقاها ولدت القطط الصغننه الجميله وكانوا بيرضعوا من لوسى مامتهم
فرح بيهم كوكى خالص و قعد يسقف و يضحك وكان بيحبهم اووى و بياخد باله منهم
لحد ما كبروا و بقوا يلعبوا معاه و ينططوا فى البيت
وتوته توته فرغت الحدوته
ايه بقى ايلى اتعلمناه من القصه
اكيد اتعلمنا اننا نعامل الحيوانات برفق عشان هى ضعيفه و مش بتعرف تدافع عن نفسها
واننا لو هنربى حيوان اليف فى بيتنا زى القطه او الكلب اننا لازم نهتم بيه و ناكله و نشربه و ابدا ابدا عمرنا ما نضربه و لا نشد ديله عشان حرااام
وفى حديث للرسول صلى الله عليه وسلم بيقول: ((عذبت امرأة في هرة سجنتها حتى ماتت ، فدخلت فيها النار ، لا هي أطعمتها ولا سقتها إذ حبستها ، ولا هي تركتها تأكل من خشاش الأرض))
الراوي: عبدالله بن عمر المحدث:البخاري - المصدر: صحيح البخاري - الصفحة أو الرقم: 3482
خلاصة حكم المحدث: [صحيح]
معنى الحديث ان فيه واحده ست ربنا عذبها عشان حبست قطه فى بيتها لا كانت بتاكلها و تشربها و لا سابتها تخرج تاكل الفضلات من الشوارع
واسيبكم فى رعايه الله
تعليق