[حصري] نهاية لا بد منها - الدكتور / حازم شومان - رمضان قرب يلا نقرب 3

[أم إسلام]

نهاية لا بد منها -الدكتور/ حازم شومان - رمضان قرب يلا نقرب 3

الواحد بيقف قُدّام آيات اليوم الآخر وهو مذهول. من الآيات اللي بتبهر قلب الواحد قول الله -سبحانه وتعالى-: "يَوْمَ يَفِرُّ ٱلْمَرْءُ مِنْ أَخِيهِ * وَأُمِّهِ وَأَبِيه" عبس35:34،
أقول: يا رب ازاي؟! ده أنا لو في بلد غربة وحاسس بالوحشة، ولقيت أمي أو أبويا أو أخويا، هاخدهم بالحضن من الوَحشة اللي أنا فيها،
الإنسان في الغربة بيجري على اللي يعرفهم مش بيهرب من اللي يعرفهم. إيه الأهوال اللي يومها اللي هتخلّي الإنسان يشوف أحب الناس إليه ويهرب منهم؟!

هو إيه اليوم الآخر ده؟ اليوم الآخر يا جماعة مش شعبة من شعب الإيمان بس، ده ركن من أركان الإيمان؛
لإن الإيمان باليوم الآخر ده بيفجّر طاقة جبارة جوا قلبَك وقلبِك، بيخليك إنسان جديد تمامًا، إنسان تاني تمامًا، ويخليك تاخد قرارات،
ويُخرج منك عزيمة عُمرِك ما تخيلتي إنِك تبقي الإنسانة دي. علشان كده حلقة النهاردة. مشاهد مذهلة، مشاهد مبهرة.





رابط اليوتيوب
https://www.youtube.com/watch?v=n0J6dECCSQs


رابط المادة على الموقع
http://way2allah.com/khotab-item-132454.htm
رابط الجودة العالية
http://way2allah.com/khotab-mirror-132454-209274.htm

رابط الجودة المتوسطة
http://way2allah.com/khotab-download-132454.htm



رابط صوتي جودة عالية
http://way2allah.com/khotab-mirror-132454-209275.htm
رابط ساوند كلاود
https://soundcloud.com/way2allahcom/nehaya





ملف تفريغ pdf
http://way2allah.com/khotab-pdf-132454.htm
ملف تفريغ word
https://archive.org/download/nehaya_201705/nehaya.doc




فهرس حملة رمضان قرب 1
فهرس حملة رمضان قرب 2
فهرس رمضان قرب يلا نقرب 3

[أم إسلام]

رد: نهاية لا بد منها - الدكتور / حازم شومان - رمضان قرب يلا نقرب 3

السلام عليكم ورحمة الله وبركاته، شبابنا وبناتنا، إخواني وأخواتي، كل سنة وإنتم طيبين، وكل رمضان وإنتم بخير.
النهاردة مع شعبة جديدة من شعب الإيمان العظيمة، ومع سبب من أسباب النجاة من الخلود في جهنم، ومع سبب من أسباب جوار الله في الفردوس الأعلى. النهاردة مع شعبة الإيمان بالدار الآخرة، والإيمان باليوم الآخر، والبعث، والنشور، والجنة، والنار.

مشاهد مذهلة ومبهرة

معنى جبار يا جماعة، معنى جبار، الواحد بيقف قُدّام آيات اليوم الآخر وهو مذهول. من الآيات اللي بتبهر قلب الواحد قول الله -سبحانه وتعالى-: "يَوْمَ يَفِرُّ ٱلْمَرْءُ مِنْ أَخِيهِ * وَأُمِّهِ وَأَبِيه" عبس35:34، أقول: يا رب ازاي؟! ده أنا لو في بلد غربة وحاسس بالوحشة، ولقيت أمي أو أبويا أو أخويا، هاخدهم بالحضن من الوَحشة اللي أنا فيها، الإنسان في الغربة بيجري على اللي يعرفهم مش بيهرب من اللي يعرفهم. إيه الأهوال اللي يومها اللي هتخلّي الإنسان يشوف أحب الناس إليه ويهرب منهم؟!

هو إيه اليوم الآخر ده؟ اليوم الآخر يا جماعة مش شعبة من شعب الإيمان بس، ده ركن من أركان الإيمان؛ لإن الإيمان باليوم الآخر ده بيفجّر طاقة جبارة جوا قلبَك وقلبِك، بيخليك إنسان جديد تمامًا، إنسان تاني تمامًا، ويخليك تاخد قرارات، ويُخرج منك عزيمة عُمرِك ما تخيلتي إنِك تبقي الإنسانة دي. علشان كده حلقة النهاردة. مشاهد مذهلة، مشاهد مبهرة.


أثر الإيمان بمشاهد الدار الآخرة
كل إنسان آمن بجزء من جزئيات الدار الآخرة عملت في حياته إيه؟ وغيّرت في حياته إيه؟
- أثر الإيمان بنعيم وعذاب القبر
لما جه الإيمان بنعيم وعذاب القبر في قلب سيدنا عثمان بن عفان -رَضي الله عنه- كان يقف يبكي قُدّام القبر، يقولوا له: "إذا ذكرنا القيامة لا تبكي وإذا ذكرنا القبر تبكي؟" ثلاث أيام يبكي لما يقف قُدَّام قبر، فكان يقول: "إنَّ أمرًا هذا أوله لَحَرِيٌّ بأن يُستعَد له، وإن أمرًا هذا آخره لَحَرِيٌّ بأن يُزهد فيه".
- أثر الإيمان بحوض النبي
لَمَّا الإيمان بحوض النبي -صلَّى الله عليه وسلم- يوم القيامة جه في قلب إنسان عمل في حياته إيه؟ لما جه الإيمان بإنّ احنا هنقابل النبي –عليه الصلاة والسلام- على الحوض خَلَّى أبو مسلم الخولاني عزيمته تتغير في قيام الليل، فكان جايب كرباج كده بيجلد رجليه بيه في قيام الليل، لما بعد 3، 4 ساعات رجليه تمل وتتعب يقول: "قومي، فوالله لأزحفنَّ بكِ زحفًا، أيحسب أصحاب محمد أن لم يخلفوا وراءهم رجالًا؟! قومي، فوالله لنزاحمنهم إليه على الحوض حتى تعلمي أن الكلل منكِ لا مني"، إنتِ تعبانة إنما أنا مش هتعب، أنا لازم أتنافس على حوض النبي –عليه الصلاة والسلام-.
- أثر الإيمان بالصراط
لما الإيمان بالصراط جه في قلب إنسان عمل إيه؟ لما الإيمان بالصراط جه في قلب إنسان حصل إيه؟ لما جه في قلب سيدنا أبو طلحة. دخل في مشهد من المشاهد العجيبة على زوجته أم سُليْم، وحط رأسه على رجليها، وقعد يبكي، فبتقول لُّه: "ما يبكيك؟"فقال:"ذكرت قول الله -سبحانه وتعالى-: "وَإِنْ مِنْكُمْ إِلَّا وَارِدُهَا كَانَ عَلَى رَبِّكَ حَتْمًا مَقْضِيًّا * ثُمَّ نُنَجِّي الَّذِينَ اتَّقَوا وَّنَذَرُ الظَّالِمِينَ فِيهَا جِثِيًّا" مريم72:71، "وَإِنْ مِنْكُمْ إِلَّا وَارِدُهَا"لحظة العبور من على الصراط.
- أثر الإيمان بالعرض على الله
يعني ممكن لحظة واحدة من الدار الآخرة تغيّر حياة إنسان، زي بالظبط العرض على الله. لما فجر طاقات جبارة من جوه قلب سيدنا عبد الله بن جحش وهو داخل غزوة أُحد وقاعد بيدعي فبيقول: "اللهم ارزقني اليوم رجلًا كافرًا، شجاعًا، صنديدًا، يقتلني فيبقر بطني، ويقطع أُذني، ويجدع أنفي، فألقاك يا رب بدمي، فتقول: عبدي لِمَ فُعِلَ بك هذا؟ فأقول: فيكَ يا رب"، دا ده لحظة العرض على الله خلّته يضحي بعمره، خلّته يتقطع حتت في الجهاد في سبيل الله.


- أثر الإيمان بالجنة
لما الإيمان بالجنة جه في قلب إنسان فجّر من جواه طاقات أدّ إيه؟ بقولّكم يا إخواننا الكلمة دي مشاهد مذهلة، مشاهد لا تتخيل إنّ فيه إنسان ممكن تنبعث من جواه طاقة إنه يعمل كل ده، ويضحي كل التضحيات دي، ولكن الدار الآخرة كانت السبب في كل ده.
تتخيل لما واحد من المسلمين في معركة من معارك الجهاد في سبيل الله تُقطع دراعه، وهو يعني تِفضل جِلْدَة كده بين ذراعه وبين جسده، ومش عارف يقاتل بالسيف بإيده التانية، دراعه قاعد يطلع وينزل، فيضع يده اللي هي المقطوعة على الأرض ويضغط عليها بقدمه ويقطعها ويلقيها بيده الأخرى ويقول: "اسبقيني إلى الجنة"، إنتِ أول قطعة من جسمي هتدخلي الجنة؛ لإنك قُطِعْتِ في سبيل الله، ويكمل القتال في سبيل الله؛ ابتغاء الشهادة.
إيه ده؟ الجنة غيرت حياة ناس لهذه الدرجة؟ الجنة خلّت عمير بن الحِمَام في غزوة بدر قبلها بياكل مجموعة من التمرات، فالنبي –عليه الصلاة والسلام- قال: "..قوموا إلى جنةٍ عرضُها السماواتُ والأرضُ..."صحيح مسلم، بَصّ للتلات، أربع تمرات اللي في إيده وقال: "لإن عشت حتى آكل هذه التمرات، إنها لحياةٌ طويلة"، وألقى التمرات، وانطلق يقاتل في سبيل الله.
سيدنا أنس بن النضر لما شمّ ريحة الجنة في غزوة أحد والصحابة متقطعين ويُمثَّل بجثثهم انطلق وقال: "واهًا لريح الجنة، إني لأجد ريح الجنة دون أحد".
سعد بن خيْثمَة خارج لغزوة بدر، أبوه قال له: "آثرني"، خليني أنا اللي أخرج -وكان واحد بس راجل اللي يخرج من البيت- قال: "يا أبتِ، لو كان غير الجنة لآثرتك به"، دي الجنة، أنا في الجنة ما أعرفش أبويا، مش أنا في الفلوس ما أعرفش أبويا! أنا في الجنة ما أعرفش أبويا.


- أثر الإيمان بالنار
لما الإيمان بالنار جه في قلب إنسان فجر جواه طاقات أدّ إيه؟ معاذ بن عفراء كان كل ما يجيله فلوس يتصدق بيها، مراته لاقتهم فقراء، كلمت إخواتها يكلموه، إخواتها بيكلموه: مش كل حاجة تتصدق بيها، قالّهم كلمة جبارة يا جماعة، مشاهد مذهلة، قالّهم: "أبَتْ نفسي إلا أن أستتر بكل شيءٍ أجِدهُ من النار"، أنا هفدي نفسي من النار بكل حاجة.
لو عايز تغَيّر أي شيء في حياتك
الإيمان بالدار الآخرة بتغَيّر كل حاجة في حياتِك وفي حياتَك، علشان كده النبي –عليه الصلاة والسلام-يقول: "من كان يؤمنُ باللهِ واليومِ الآخرِ فليقُلْ خيرًا أو ليصمُتْ..." صحيح البخارى، بتغيّر أسلوب كلامِك أصلًا، واللايف ستايل بتاع لسانَك في الحياة، "من كان يؤمن بالله واليوم الآخر فليكرم ضيفه، ومن كان يؤمن بالله واليوم الآخر فليصل رحمه" صحيح البخارى، فبتغَيّر أخلاقِك، معاملاتِك، معاملاتَك، كلماتِك، ألفاظَك، بيغيّر كل حاجة الإيمان بالدار الآخرة.
نجاتك يحددها إيمانك
يا جماعة قضية الدار الآخرة قضية كبيرة جدًّا، وقضية خطيرة جدًّا، والإيمان هو اللي هينفعك يوم القيامة، علشان كده الإيمان مش هينفعِك غيره في القبر "يُثَبِّتُ اللَّهُ الَّذِينَ آمَنُوا بِالْقَوْلِ الثَّابِتِ فِي الْحَيَاةِ الدُّنْيَا وَفِي الْآخِرَةِ" إبراهيم:27، قالوا: في الآخرة في القبر تقولي: ربي الله، ديني الإسلام، نبيي محمد، الإيمان هو اللي ربنا بيثبِتك بسببه في القبر، الإيمان هو اللي بتعدي بسببه من على الصراط، "يَوْمَ تَرَى الْمُؤْمِنِينَ وَالْمُؤْمِنَاتِ يَسْعَىٰ نُورُهُمْ"الحديد:12، وهُمَّ بيعَدُّوا من على الصراط بسبب الإيمان بتاعهم.


لكل شيءٍ درجات .. ودرجتك تعتمد على إيمانك
"هُمْ دَرَجَاتٌ عِندَ اللَّهِ" آل عمران:163، الإيمان مراتب ودرجات "هُمْ دَرَجَاتٌ عِندَ اللَّهِ"؛ لإن الإيمان درجات فَكُل حاجة ربنا بيعامل العباد بيها درجات؛ ألم الموت درجات، من أول: "وَالنَّازِعَاتِ غَرْقًا"النازعات:1، الألم الرهيب في خروج الروح، لحد: "وَالنَّاشِطَاتِ نَشْطًا" النازعات:2، خروج الروح السهل بنشاط، الروح منطلقة للجنة، مش رايحة للساحل الشمالي! دي رايحة للجنة، ما بين دي وما بين دي درجات رهيبة، على حسب الإيمان يا جماعة.
نعيم وعذاب القبر درجات، علشان كده فيه ناس بيُفسَح ليها في القبر سبعين ميل (يعني مسافة معينة)، وفيه ناس بيُفسَح ليها في القبر مد البصر على حسب الإيمان.
حتى الجنة درجات: "فِيهِمَا مِنْ كُلِّ فَاكِهَةٍ زَوْجَانِ"الرحمن:52، دي جنة، و "فِيهِمَا فَاكِهَةٌ وَنَخْلٌ وَرُمَّانٌ" الرحمن:68، دي جنة تانية أقل منها، على حسب الإيمان،"هُمْ دَرَجَاتٌ عِندَ اللَّهِ". علشان كده الإيمان باليوم الآخر على حسبه بيكون معاملتَك من الله، ومعاملِتك من الله في كل حاجة دنيا وآخرة.


كيفية تحصيل الإيمان باليوم الآخر
طيب نحصّل الإيمان باليوم الآخر ازاي؟
1. السماع عن الدار الآخرة.
الصحابة حددوا منهجهم في صحيح مسلم اللي النبي-عليه الصلاة والسلام- رباهم عليه،
"نكونُ عندَ رسولِ اللهِ يذَكِّرُنا بالنارِ والجنَّةِ حتَّى كأنَّا رأيَ عينَ"
يوميًّا بيكونوا عند النبي –عليه الصلاة والسلام- يكلمهم عن الجنة والنار.
مش هقولِّك يوميًّا اسمعي درس عن الجنة والنار، مش هقولَّك كل يوم ولكن كل أسبوع، كل أسبوع اسمع درس عن الجنة والنار، اعمل ليك ورد كده مثلًا كل يوم خميس بالليل مثلًا، أو كل يوم سبت مثلًا بعد الفجر، أيًّا ما كان، هتقعد تسمع درس من سلسلة عن الجنة النار، لازم يا جماعة، دي أول حاجة لتقوية الإيمان بالدار الآخرة.
إخواننا الإيمان بالدار الآخرة دي أنا مش هقولَّك هتبقى هركليز، ولا هقولِّك هتطلَّعي الأفاتار، ولا هقولَّك هتبقى الرجل الأخضر وتتحول، إنما فعلًا هتبقى عملاق في الحياة، هينتهي الكسل والعجز من حياتِك، هتبقى إنسان عندك همة جبارة في الانطلاق الإيماني المستمر بلا توقف بإذن الله -سبحانه وتعالى- إلا ما كان من الفتور الطبيعي اللي لازم ييجي لكل إنسان.




2. زيارة المقابر
روحي زوري القبر اللي إنتِ لو موتِّي النهارده هتتدفني فيه، روح زور القبر اللي إنت لو مُتّ هتتدفن فيه، أو روح زور قبر مفتوح وادخل واقعد فيه شوية كده، وقول لو اتقفل علىَّ هندم على إيه؟ الكلام ده بيفجر الإيمان والعزيمة الإيمانية في القلب. أو اشترِ كفن وعينه في الدولاب بتاعَك، واكتب في وصيتك إنّ الكفن ده هو اللي هتتكفن فيه لو إنتَ مُتّ، وشوف بقى الكفن اللي إنت هتتكفن فيه لو إنت مت ده Real TV بقى، ده Real ، حاجة واقعية، ده الكفن اللي أنا هتكفن فيه لو أنا مت، كل ما تفتح الدولاب وتشوفه جنب هدومك التانية تفتكر إنّ ده لبسك لمدة كذا ألف سنة في يوم من الأيام إلى أن تقوم الساعة، يبقى ساعتها هتعمل حساب هذا الكفن اللي بلا جيوب.
3. الصحبة الصالحة

طيب إيه علاقة الصحبة الصالحة بالدار الآخرة؟ قال تعالى:"الْأَخِلَّاءُ يَوْمَئِذٍ" الزخرف:67، يومالقيامة "بَعْضُهُمْ لِبَعْضٍ عَدُوٌّ" الأخلاء: الأناتيم، الشلل اللي كانت قريبة من بعض، "إِلَّا الْمُتَّقِينَ" الصحبة الصالحة هي الوحيدة اللي هتنفعك يوم القيامة،"وَلَا صَدِيقٍ حَمِيمٍ" الشعراء:101،الصديق الحميم في الصحبة الصالحة هو الوحيد اللي هينفعك يوم القيامة.
علشان كده إنت بتدَّخر ليوم القيامة مع كل صاحب صالح بتتعرف عليه، نشِّن يا سيدي، ده الشاب بيرسم على البنت؛ علشان يتعرف عليها، ارسم يا عم على الصحبة الصالحة؛ علشان يبقى ليك شفعاء عند الله يوم القيامة، وسند يوم القيامة، "يَسْعَىٰ نُورُهُمْ بَيْنَ أَيْدِيهِمْ وَبِأَيْمَانِهِمْ"الحديد:12، وهمَّا بينوروا لبعض.
رمضان قرب يلا نقرب، رمضان الإيمان، الشعار بتاعنا واحنا بنستعد لرمضان السنة دي. ازاي يتفجر الإيمان في قلوبنا قبل رمضان؟ علشان يبقى رمضان العمر بجد، ندخل والإيمان المُخَضّرْ جوا قلوبنا في حالة يقظة، وينابيع الإيمان بتتفجر من قلوبنا، ندخل رمضان بعزيمة إيمانية جبارة،"وَأَيَّدَهُم بِرُوحٍ مِّنْهُ" المجادلة:22.
ربنا يفتح علينا فيه بإذن الله.
اللهم بلغنا رمضان واجعلنا فيه من الفائزين، اللهم بلغنا ليلة القدر واجعلنا فيها من الفائزين، اللهم ارزقنا الفردوس الأعلى، اللهم ارزقنا الفردوس الأعلى، اللهم ارزقنا الفردوس الأعلى، اللهم أدخلنا الجنة بلا حسابٍ ولا عذاب، اللهم آمين.

[muhammed _elamir]

رد: نهاية لا بد منها - الدكتور / حازم شومان - رمضان قرب يلا نقرب 3

جزاكم الله خيرا وبارك فيكم

[آمــال الأقصى]

رد: نهاية لا بد منها - الدكتور / حازم شومان - رمضان قرب يلا نقرب 3

وعليكم السلام ورحمة الله وبركاته
جزاكم الله خيرًا وبارك فيكم.
اللهم بلغنا رمضان وأعنا فيه على الصيام والقيام وتلاوة القرآن والأعمال الصالحة.

[محبة الحبيب محمد]

رد: نهاية لا بد منها - الدكتور / حازم شومان - رمضان قرب يلا نقرب 3

عليكم السلام ورحمة الله وبركاته

جزاكم الله خيرًا

اللهم بلغنا رمضان غير فاقدين ولا مفقودين

[منايارضاربى]

رد: نهاية لا بد منها - الدكتور / حازم شومان - رمضان قرب يلا نقرب 3

جزاكم الله خيرا
اللهم بلغنا رمضان وأعنا فيه على الصيام والقيام