طب اعمل ايه ولا اروح فين ؟؟

[غير مسجل]

السلام عليكم ورحمة الله وبركاته

انا والله مش عارف اقول ايه ليكم ولا اقول ايه لنفسي .. نفسي اللي بتضيع من بين اديا وبتضيعني معاها

يااااما مشيت وراها وجريت وري شهوتها .. وارجع واجي لحد هنا واكتب نفس الكلام ... وحد يشجعني بكلمتين

وبالفعل ارجع واصبر علي كل الشهوات اللي حوليا واقاوم لحد ما بالفعل اقدر .. وفجأه احس كــأني عايش في كوكب اخر

والله العظيم كل حاجه حوليا بتتغير .. حتي اقرب الناس ليا بتتغير

اول ما بلتزم كل اللي حوليا بيتغيروا .. اخواتي وابويا وفي الشغل وفي الشارع .. انا بجد فيه حاجه غريبه بتحصلي

اول ما بلتزم وبواظب علي الصلاه ... انا عامتاً ليا اخ اكبر مني وابويا مش بيفوتوا فرض في الجامع وعلي طول وانا مش ملتزم بالصلاه بيروحوا يصلوا ويقرأوا قران واخويا يحفظ

قسم بالله اول ما بلتزم وبنوي اني اتغير الاقيهم كلهم اتغيروا ابقي نازل اصلي اقول لابويا انت جاي معايا يقولي لا انا تعبان روح انت ربنا يوفقك اخويا ما ينزلش الاقيه مقضيها اغاني ومش من عادته اني يسمع اغاني الاقيهم هما الاتنين بطلوا يقرأوا قران او مبقاش بالانتظام اللي انا كنت بشوفه

اول ما امشي في الشارع احس ان الناس اتغيرو والفتن ذادت اوي قدامي واشوف مناظر انا ما كنتش بشوفها .. ويحصل معايا في الشغل مواقف عمرها ما كانت بتحصلي واانا مش ملتزم ولو كنت مش ملتزم كنت ممكن اتصرف معاها تصرف تاني خالص

لكن بفضل الله بستحمل كل ده وبمشي مشوار كبير اوي في الالتزام من صلاه وصوم اتنين وخميس و13.14.15 وقراءه قران بانتظام والمشاركه هنا في المنتدي بشكل فعال جدا

لكن في الاخر بحس اني اللي انا صبرت عليه كل الفتره اللي فاتت دي عمره ما سابني وكان بيتحوش جوايا وانا قافل عليه

واول ما بفتحله الباب بيطلع بغباااء وبيطلع ومش بقدر اتحكم فيه ولا في نفسي

وللاسف برجع زي الاول واسوء كمااان من الاول

انا مش عارف اعمل ايه ؟؟ انا والله بقول الكلام ده ليكم وربنا يعلم انا حالتي عامله ازاي .. انا الكلام ده ما بقولوش لنفسي اصلا ,, لاني عارف انه هيتعبني

انا بعمل حاجات كتير وحشه في حق نفسي .. وعارف ان ده غلط .. لا عارف اللي مربوط في حاجه بتجري بسسسسرعه وسحباااه من قفاه وطالعه تجري وهو مش عارف يوقفها ومش عارف يفلت منها ؟؟؟ انا بقي الشخص ده

بجد تعبت اوي .. عارف لما ببقي في عز التزامي .. بحس بحاجات غريبه بلاقي جوايا اصوات كتييير واحد يقولي واخرت اللي انت فيه دا ايه ؟؟ والتاني يقولي وانت فاكر ان اللي انت بتعمله ده ليه لزمه اساسا ولا ربنا هيتقبله ؟؟ انت كل اللي انت بتعمله دا رياء ونفاق .. حتي وانا بكتب الكلام ده حاسس بكده دلوقتى ... لدرجة ان التفكير اللي جوايا بيوصلني وبيشككني في ديني كمان .. لدرجة اني اوقات ببعد عن الطريق ده وبرجع تاني عشان ارتااح من اللي انا فيه

مش عارف اورح من نفسي فين ؟؟ ومش عارف اروح من كل اللي جوايا دا فين .. لا مرتاح في حياتي الهباب اللي انا عايشها وانا بعيد عن ربنا دي .. ولا لاقي اللي يساعدني علي اني اتقي الله في دنيا مبقاش حد يهمه فيها اي حاجه

وان دورت علي صحبه صالحه .. اللي يقولي سلفي واللي يقولي اخواني واللي يقولي مش عارف ايه وانا مش عايز ابقي اي حد من دول ... انا عايز ابقي مسلم وبس .. ابقي مؤمن بالله وبرسوله وامشي علي نهج الاسلام اللي محمد صل الله عليه وسلم سابو لينا مش اكتر ...

بجد مش عارف اعمل ايه ؟؟

[فريق استشارات سرك فى بير(الأخوات)]

رد: طب اعمل ايه ولا اروح فين ؟؟

وعليكم السلام ورحمة الله وبركاته
مرحبا ابننا الفاضل واسمح لى أدخل فى الموضوع على طول

طيب ياابني وانت ليه تعيش تقلد غيرك ,,يعنى لو حد من أسرتك رمى نفسه فى النار ها تروح وراه بكل سهوله وتحرق نفسك ,,؟لاياابني أنا مش ها أقدر أقولك لاتؤذى نفسك لأنك بالتأكيد تخاف على نفسك أكثر منى ,انت عارف أخطائك ومع ذلك بتروح لها برجليك ,ليه أقلد ناس بتعصي ربنا ,,ليه أسيب نفسى لغيرى يشكلني ويتحكم فى سلوكياتي ,انت عارف ان الانسان اللى بيقرب من ربنا بيلاقى ستين ألف شيطان بيقفوله ,يبقى لازم نسد ابواب الشياطين الأول وأكيد انت عارف مصدرهم والفتحه اللى بيخرجولك منها ,

عارف اللي مربوط في حاجه بتجري بسسسسرعه وسحباااه من قفاه وطالعه تجري وهو مش عارف يوقفها ومش عارف يفلت منها ؟؟؟ انا بقي الشخص ده

طيب ماهو فى أيدك برضوه ياابني انك تقطع الحبل اللى بيشدك ده ليه ترضى لنفسك انك تكون تابع ,ليه تكون إمعة اذا أحسن الناس أحسنت واذا أساؤا أسئت ,,؟لالاياابني المسلم لازم يكون اقوى من كده لازم يقاوم الشهوات ويقاوم شيطانه ,لأنه هايكون لوحده فى قبره وماحدش ها يتحاسب معاه ,ارجع لصوابك ياابني وخليك ماشي فى طريق ربنا والله مش ها تندم بس انت إصبر شويه استعيذ بالله من الشيطان وخلى بالك انه يوم القيامه والله ها يتنصل منك شوف ها يقوللك ويقول لكل اللى غواهم ايه :(. وَقَالَ الشَّيْطَانُ لَمَّا قُضِيَ الْأَمْرُ إِنَّ اللَّـهَ وَعَدَكُمْ وَعْدَ الْحَقِّ وَوَعَدتُّكُمْ فَأَخْلَفْتُكُمْ وَمَا كَانَ لِيَ عَلَيْكُم مِّن سُلْطَانٍ إِلَّا أَن دَعَوْتُكُمْ فَاسْتَجَبْتُمْ لِي فَلَا تَلُومُونِي وَلُومُوا أَنفُسَكُم مَّا أَنَا بِمُصْرِخِكُمْ وَمَا أَنتُم بِمُصْرِخِيَّ إِنِّي كَفَرْتُ بِمَا أَشْرَكْتُمُونِ مِن قَبْلُ إِنَّ الظَّالِمِينَ لَهُمْ عَذَابٌ أَلِيمٌ ï´؟ابراهيم: ظ¢ظ¢ï´¾

ياااه صعب جدا المعنى ده ياابنى والله لو فكرت فيه قليلا ها تفوق ومش ها تلوم غير نفسك ,والله ياابنيى ماحد يتحاسب مكانك ولاوالدك ولاأخاك اللى انت بتقتدى بيهم ,خلي قدوتك سيدنا محمد عليه أفضل الصلاة وأزكى السلام ,سيبك من شباب اليومين دول اللى عايشين مغيبين ومقلدين للغرب فى كل شىء اللى قال عنهم رسولنا الكريم :عن أبي سعيد الخدري رضى الله عنه قال: قال رسول الله صلى الله عليه وسلم: "لتتبعن سنن من كان قبلكم حذو القذة بالقذة حتى لو دخلوا جحر ضب خرب لدخلتموه" - ومعنى (القذة بالقذة كناية عن شدة الموافقة لهم في المخالفات والمعاصي لا الكفر، والقذة بالضم هي ريش السهم وهو دال على كمال المتابعة. )وأكيد انت شايف الشباب فى ملابسهم وطريقة تفكيرهم والله أنا قلبي ينفطر حزنا على ما اراه من حال شبابنا وبناتنا اليوم ,وبقلب الأم ياابني أستحلفك بالله أن تلتفت الى دينك أكثر وتترك أى طريق يوصلك الى غضب الله ,وسيبك من الوساوس وتحصن بالمعوذتين وآية الكرسي ,ان شاء الله فيهم الشفاء والحمد لله انك حاسس ومستشعر ان حياتك فى البعد عن ربنا كما صورتها أنت

لا مرتاح في حياتي الهباب اللي انا عايشها وانا بعيد عن ربنا دي ..

وأبشرك والله ياابني فيك خير ان شاء الله مادمت تشعر بالحزن والكآبة فى بعدك عن مولاك ,ياابني ربك رحيم جدا ,قوله بس يارب احميني من شر نفسي ,قوله يارب أنا جايلك فلا تردنى من على بابك ,انا عارفة ياابني ان كلامي ليس كافيا بس بجد أنا حاسة بيك جدا وخايفه عليك كخوفى على ابني وحيدي الذى أنصحه كل يوم وأحذره من أصدقاء السوء ,,ومن أجل ذلك كتبت لك هذه الكلمات وبنفس طريقتك بالعامية علشان توصل بسرعة واسأل الله أن تفيدك ولو بجزء بسيط وتشيل الغشاوة اللى على قلبك ,وانتظر الشيخ ابو معاذ ان شاء الله يدخل ويتكلم معاك ,وأنتظر تطمئنا عنك ياابني ,,حفظك الله ورعاك ووفقك الى كل مايحبه ويرضاه .

[غير مسجل]

رد: طب اعمل ايه ولا اروح فين ؟؟

جزاكي الله خيرا يا امي الفاضلة

بس انا اللي قاتلني اني عارف الصح من الغلط وعارف ان كل اللي انا فيه دا غلط ... بس بجد الزمن اللي احنا فيه دا كا شباب حتي مش عارف يحقق نفسه لا في جواز ولا في عمل ولا في اي حاجه تعينه علي طاعة ربنا

بجد صعب اوي .. ممكن اه فيه ناس عرفت تعيش وعرفت تعمل نفسها وعرفت انها تستحمل وتصبر حتي لو ما عملوش حاجه من دي .. لكن لكل انسان منا طاقه وقدرة علي التحمل ... والواحد والله اتحمل كتير اوي وخلاص بقي مش قادر بجد

عارفه يا امي انا حاسس ان انا جوايا شخصين مش شخص واحد .. واحد ملتزم جدا ومحترم جدا ... واحد مش عارف اوصفهولك ازاي والله !!!

ولما ببقي مع الشخص الاول مفيش حد من الوسط اللي انا عايش فيه او اعرفه بيقدر يعمل اللي بعمله او يتحمل اللي بتحمله

وبالظبط لما بكون مع الشخص التاني .. ولكن لولا خوفي من الله وان ربنا بيبعدني من عنده كده عن الحرام لكنت وقعت فيه ..لكن الحمد لله

عارفه مشكلتي اني مش عارف اوزن بين حياتي وبين التزامي ... انا شاب ونفسي اعيش كأي شاب عادي يخرج ويبقي ليه اصحاب ومع ذلك ما يعصيش ربنا وما يبعدش عنه .. لكن انا مش بعرف اعمل كده

بلاقي نفسي اتحبست في البيت .. مليش اصدقاء لان اصدقائي اللي اعرفهم المفروض ما اخرجش معاهم .. وان خرجت معهم في يوم برجع وانا حزين اني نزلت معاهم اصلا

لكن بأذن الله هحاول ومش هزهق لان فعلا انا مليش الا ربنا .... ومليش غير طريقه وانا عارف كده كويس

ومتشكر جدا لحضرتك لانك حسيتي بيا ورديتي عليا .. وبرضوا انا في انتظار شيخنا الفاضل ابو معاذ

واسال الله ان يديم عليه صحته وعافيته ... ويباركلنا في حضرتك

جزاكم الله خيرا

[غير مسجل]

رد: طب اعمل ايه ولا اروح فين ؟؟

السلام عليكم

أنا زائر أردت نصيحتك

أخى فى الله حضرتك عندك نعمة من الله عظيمة جدا أرجو أن تستثمرها جيدا


وهى "الضميـــــر"

نفسك لوامة ماشاء الله

وداه دافع جميل جدا يحفزك على فعل الخير

وخلى بالك كويس جدا أرى والله اعلم ان ما يدور داخلك هو من الشيطان

استحالة الشيطان يجدم مقبل على الله ويتركك اكيد هيشغلك

الحل؟

الاستعانه بالله وفقط

ادعى ربنا كتير فى كل وقت اجابة ادعى ربنا قول له " يارب انا تعبان من نفسى اصلحها لى يارب ::يارب ارزقنى صحبة صالحه تعينى على الخير

ادعى بكل حاجه وفضفض لربنا بكل حاجه

والله هتجد العون والتوفيق من الله الرحيم

وابدأ أول خطوة صح واستعن بالله

مش ربنا قال فى الحديث القدسى "من تقرب الى شبرا تقربت الية زراع ومن اتانى يمشى اتيته هرولة

فا استحالة ربنا يتركك ابدا

فقط لا تسمع الى هاجس الشر او الخواطر التى تاتيك لانها من الشيطان

ودائما استعيذ بالله من الشيطان

انتى قوى

ايوة انت قوى

قوى بالله

قوى بالدعاء لله

قوى باتصالك بالله

فية قوة فى الارض دى اكبر من الله ؟

طبعا لا

اذا فخليك مع الله القوى

ققال تعالى:وإذا سألك عبادى عنى فإنى قريب أجيب دعوة الداع اذا داعن

يعنى ربنا قريب منك ادعيه وفضفض له واشكو اليه حالك

واعلم رحمك الله :

قال تعالى "ان كيد الشيطان كان ضعيفا

ضعيف امام الله

امام نفسك المتعلقة بالله

روحك المتصلة بالله بفعل الطاعات وترك المحرمات

ابدأ أول خطوة:
---------------

1/ واظب على الفروض بجد وبعزم واصرار على عدم تركها

40 يوم تصليهم فى المسجد تكتب لك براءة من النفاق

المسجد هيغيرك كتير

اقرأ عن فضل الصلاة والذهاب اليها "هتتشحن جدا وهتحبها " انا عاوزك تحب الصلاه

مش تاديها عشان هى فرض وبس لا عاوزك تحبها فا اقرأ على فضلها وفضل الذهاب الى المسجد

2/ الزم الدعاء

صباح مساء ليل نهار

3/ القرآن

ولو ربع يوميا ثبته يوميا

واقرأ عن فضله واسمعه كتير كل ما تبقى فاضى

4/ اذكار الصباح والمساء

فضلها عظيم وهى سنة عن النبى صلى الله عليه وسلم

وعشان تحميلك من الشيطان بامر الله

ابدأ ......أنطلق.....توكل على الله

اما عن الصحبة الصالحة:
---------------------------

هقولك حاجه جميلة جدا

ارمى نفسك فى وسط مجموعة تشعر انهم على المنهج السليم من كتاب الله وسنة رسولة

سيبك من الاسماء

المهم انهم على كتاب الله وسنة رسولة المهم انهم على طاعه المهم انهم بيتعاونوا على الخير

وماتخليش الشيطان يضحك عليك باى شكل من الاشكال عشان يخليك لواحدك

فانما يأكل الذئب من الغنم القاصية "

شوف حد مواظب على صلاة الفجر خليه يرنلك

حد مواظب على الصلاة فى المسجد خليه يعدى عليك او تتقابلوا فى المسجد

شوف درس اعرف ميعاده وروح هتلاقى الصحبة الصالحه هناك

ممكن حضرتك تقول من اى منطقة او بلد ونأتى لك بالدروس الموجوده فيها قدر استطعنا ان استطعنا لذلك سبيلا

وعندك النت الموقع هنا جميل جدا وفى استفاده عالية ودروس كمان للشيخ هانى والشيخ حازم شومان

اعتذر على الاطالة

وان اردت اى مساعده احاول قدر استطاعتى بعون الله

اجمد يابطل ^_^

انت حفيد رسول الله

اجمد عشان نقابلة فى الجنه على خير