حاسة اني هضيع زيهم خليكوا جمبي بالله عليكم

[غير مسجل]

لو سمحتم انا زعلانة اووووي بحس ان ربنا مش بيحبني: (
دلوقتي انا بتكسف جدااا ادعى لربنا
يعني مثلا لو صاحبتي قالت لي هجيب لخطيبي هدية في الفلانتين اسكت ولو قولت حرام
وهما انتقدوني مش بعرف ادافع خااالص عن وجهة نظري ويقعدوا يقوولا لي على كدة بقى يبقى عيد الميلاد حرام
وانا اهلي بيعملوا لي عيد ميلاد وتورتة فمش بعرف ارد: (
وكمان بحس ان شخصيتي ضعيفة اوووووووووي بالله عليكم ساعدوني
ازاي اافع عن وجهة نظري بقوة وكمان بيدايقوني ويقولوا لي يااخوانية ده انتي تبع حماس!!
علشان بلبس واسع ... مال الاخوان ومال لبسي ؟؟!!!
انا بتعب اووووي والله واهلى كلهم كدة بما فيهم امي وابويا واخواتي صغيرين
ساعدوني بالله عليكم واقفوا جمبي انا ماليش غيركم بعد ربنا سبحانه وتعالى
انا والله نفسي ابقى كويسة وماحسش اني كائن فضائي عايش جوة عيلتي
وساعات بحس اني هتفتن واحس اني غلللللللللط واغير رايي وابقى زيهم : (

انا كدة هضيع يارب

[فريق استشارات سرك فى بير(الأخوات)]

رد: حاسة اني هضيع زيهم خليكوا جمبي بالله عليكم

السلام عليكم ورحمة الله وبركاته



حياكِ الله أختي الكريمة .



شوفي يا أختنا الكريمة .أول شيء كسوفكِ أنكِ تدعي ربنا .. .اللي بيحصلكِ ده شيء طبيعي جدااا .. تعرفي ليه ؟
لأن الشيطان الرجيم مستحيل يسيبك تخرجي من تحت سلطانه بسهولة كدة .. لازم يحطلكِ عقبات في طريقكِ تصعّب عليكي طريق الألتزام .. ولو أول عقبة مش نفعت وأنتي توبتي إلى الله .. يدور لكِ على عقبة ثانية .. وذنب أخر يجعلكِ تفعليه عشان يوصلكِ لأنكِ تقولي أنك خجلانة من ربنا .. ويجعل خجلكِ يوصلك أنكِ متقدريش تصلي لربنا .. وتقولي أزاي أضع وجهي أمام وجهه الكريم في الصلاة وأنا بعصيه .. وبكدة يضمن الشيطان الرجيم أنكِ تتركي الصلاة .. اللي هي أعظم فرض وفيها صلاح كل الأمور .. وبيها تقدري تتغلبي على فعل المعاصي والذنوب .... ويجعل خجلكِ كمان يوصلك أنكِ متقدريش حتى تستغفري ربنا وتقولي في نفسك ( أزاي أطلب منه يغفرلي وأنا عصيته ) .. مع العلم يعني أن الغفران جعله الله للعصاة والمذنبين .. مش للناس اللي مش بتعصيه .. لانهم مش في حاجة للمغفرة أصلاً .
فأعلمي أن المغفرة والأستغفار نعمة وهبهم لكي الله تعالى فلا تفرطي في هذه النعمة أبداً وأستغليها طوال وجود هذه النعمة .. وأنتي عارفة طبعاً أن نعمة الغفران مش بتخلص من عند ربنا .. عشان كدة حتى لو ذنوبكِ مش خلصت فأعرفي أن في أمامها مغفرة بقدرها أو أكثر منها .. فأستمري في التوبة من الذنب وطلب المغفرة من ربنا .. ولا تخجلي من طلب المغفرة من الله .. لأنه لو لم يكن يريد أن يغفر لكي .. ما كان وهبكِ نعمة التوبة والأستغفار .. ولما ربنا يلهمكِ بالتوبة وطلب الغفران أعتبريه نداء من الله لكي لأنه يريد أن يغفر لكي ... فلا تخجلي منه ولبي النداء .
ولما بقى تتخطي عقبة خجلكِ من طلب المغفرة .. وتواظبي على الألتزام في الصلاة .
يقوم الشيطان الرجيم بوضع عقبة تانية في طريقكِ .
العقبة دي أنه يجعل لا تشعري بلذة أي هبة أو نعمة وهبكِ الله أياها .. وده عن طريق أنه بيزرع في تفكيركِ أنك متستهليش النعم دي من ربنا .. لان لما تتحرمي من لذة النعم دي .. مش هتقدّري قيمتها الحقيقية .. وبكدة هتبعدي عن ربنا ... وعن النعم اللي أعطاها لكي ربنا لانكِ شايفة أنكِ متستحقيهاش .. وطبعاً بُعدكِ عن النعم دي .. معناه بُعدكِ عن الاشياء اللي بتقربكِ أكثر لربنا .. وبتثبت إلتزامكِ أكثر .. وبكدة الشيطان يكون نجح أنه يستردكِ لصفه مرة أخرى والعياذ بالله .
وطبعاً أنتي عارفة قول الله تعالى ( وَلاَ تَتَّبِعُواْ خُطُوَاتِ الشَّيْطَانِ }البقرة168 ) .. ربنا ذكر كلمة خطوات .. عشان نعرف أن الشيطان الرجيم مش بييجي لنا مباشرة ويأمرنا بالمعصية .. لا .. ده بيتبع معانا خطوات بتظهر لنا في البداية أنها مفيهاش حاجة .. وبعدين بتوصلنا في الاخرة لنتيجة المعصية ...

زي مثلاً أنتقاد صديقاتكِ لتفكيرك وللبسكِ

الشيطان عاوز يضيق عليكِ الخناق من كل اللي حواليكِ عشان تكرهي ألتزامكِ وتتركيه .

وهو ده اللي بيتّبعه معاكِ الشيطان حالياً .
لكن طبعاً أنتِ أنسانة ناضجة وذكية .. والدليل على كدة أنكِ أخترتي الطريق لربنا بكامل إرادتكِ .. فطبعاً مش هتنخدعي بالمكائد اللي بيدبرها لكِ الشيطان أعاذنا الله وأياكِ منها .
فخليكِ مُصرّة على طريق الألتزام .. ومهما وقعتي في الطريق .. قومي وقفي تاني .. لحد ما توصلي .
قال الله تبارك وتعالى في الحديث القدسي : " يا ابن آدم إنك ما دعوتني ورجوتني غفرت لك على ما كان فيك ولا أبالي يا ابن آدم لو بلغت ذنوبك عنان السماء ثم استغفرتني غفرت لك ولا أبالي يا ابن آدم إنك لو أتيتني بقراب الأرض خطايا ثم لقيتني لا تشرك بي شيئا لأتيتك بقرابها مغفرة"
الراوي:أنس بن مالكالمحدث:الألباني - المصدر:صحيح الترمذي - الصفحة أو الرقم: 3540 .. خلاصة حكم المحدث:صحيح


وأثبتي أختنا

قال رسول الله ( صلى الله عليه وسلم ) .
يأتي على الناس زمان ، الصابر فيهم على دينه ، كالقابض على الجمر

الراوي: أنس بن مالك المحدث:الألباني - المصدر: صحيح الجامع - الصفحة أو الرقم: 8002
خلاصة حكم المحدث: صحيح

فأصبري أختنا وتمسكي بإلتزامكِ .. فلست غريبة ولا كائن فضائي .. فهناك الكثيرين مثلك وأكثر .. وكلما أزاد إيمانهم .. كلما أزداد أنتقادهم ..
يعني لما تلاقيهم أنتقدوكِ يا أختي .. أعرفي أنكِ ماشية صح .
قال بعض السلف رضوان الله عليهم " لا يغرنك في طريق الباطل كثرة الهالكين و لا يوحشنك في درب الحق قلة السالكين " .
وبعدين أنتي اللي يهمكِ هما ولا ربنا ؟؟
طلما بتعملي اللي يرضي ربنا .. سيبكِ من كل كلام يُقال .
وكلما زادت المشقة يا أختنا زاد الأجر .
فقط أثبتي .. ولا تُفرحي الشيطان الرجيم فيكِ .

ولا تجعليه ينجح في الإيقاع بكِ من فوق درب الطاعة .

وأبحثي عن صحبة صالحة تعينكِ على الطاعة .

حاولي تقللي شوية من تواجدكِ بين الأصدقاء اللي ممكن يضعِفوا من ألتزامكِ وعقيدتكِ .

وفي هنا في المنتدى قسم أسمه قررت أغير حياتي .. أدخليه هتلاقي صحبة صالحة بإذن الله تعالى تعينكِ عالطاعة .

ها هو الرابط .
https://forums.way2allah.com/forumdisplay.php?f=206

وكمان باقي أقسام الأخوات هنا .. هتلاقي كل الأخوات بإذن الله تعالى بتاخد بإديكِ وبتساعدكِ على الثبات .


أسأل الله تعالى لكِ الثبات يارب .
م.م

[غير مسجل]

رد: حاسة اني هضيع زيهم خليكوا جمبي بالله عليكم

جزاكِ الله خيرا اختي الحبيبة
كلامك ريحني كتيييييير بجد ........... انا هعمل بنصيحة حضرتك ان شاء الله
وهبدأ بالتوبة الصادقة بس بالله عليكِ ممكن لو فيه اي حاجة اكتب لحضرتك هنا وحضرتك اللي تردي عليا في الموضوع ده وجزاكِ الله خير الجزاء ............

[فريق استشارات سرك فى بير(الأخوات)]

رد: حاسة اني هضيع زيهم خليكوا جمبي بالله عليكم

إن شاء الله تعالى أنا معاكِ دائماً يا أختي .

وتحت أمركِ في أي شيء .

وهنتظركِ تطمنيني عليكِ بإذن الله تعالى .

أسأل الله تعالى أن يرزقكِ الثبات على الحق .

م.م