موضوع قلقنى

[غير مسجل]

السلام عليكم ورحمه الله وبركاته
انا كنت بشتغل وفى الشغل كنت مسئولة عن انى اخد كش هر مبلغ من المال من المدير لمصاريف البوفيه
وتوجد زميلتى مسئولة عن البوفيه كل فتره كل ما تحتاج لشئ فى البوفيه تيجى تقولى واديها وتروج تجيب وتيجى تحاسبنى
وفى اخر الشهر احسب الحسابات ولو فيه اى حاجه براجعه معاها علشان نفتكر مع بعض
فى اخر شهر قبل ما اسيب الشغل بيومين كنت بعمل حساباتى لقيت 7 جنيه تم صرفهم ولم يتم تقيدهم
سالتها وراجعنا مع بعض وماعرفناش نوصل لحاجه
قلت لها خلاص انا حدفعهم قالت لى طب ليه هما اكيد اتصرفوا فى حاجه واحنا مش عارفين نوصلها
صممت ادفعهم فرجعت قالت لى ان هى اكيد جابت بيهم ينسون او كركديه ونسينا نقيدهم
بس انا قلت حدفهم ولما سالتها تانى قالت لى ايوه انا جيبت بيهم ومع الشغل نسينا نكتبهم
وفعلا كتبتهم ينسون
فانا سيبت الشغل بقالى 3 شهور بس بجد عايزه اعرف ايه الصح وايه الغلط
البنت امينة جداااا وبتشتغل فى الشغل من قبلى واصحاب الشغل واثقين فيها والفلوس اكيد فعلا اتجاب بيها حاجه ونسينا نكتبهم
فياريت تفيدونى

[فريق استشارات سرك فى بير(الأخوات)]

رد: موضوع قلقنى

الحمد لله والصلاة والسلام على سيدنا محمد وعلى آله وصحبه أجمعين ,أما بعد.مرحبا ابنتى الفاضله ,,فى البدايه نشكر لكِ حرصك وامانتك على اتباع الشرع وتحرى الحلال واجتناب الحرام ,فهذا ان دل يدل على قوة ايمانك وأمانتك ونحسبك على خير ولانذكيكِ على الله فالأمانه من أفضل صفات المؤمنين

والأمانة الحرص على أداء واجب العمل ، وأداء الإحسان فيه ، وليس أكبر خيانة ولا أسوء عاقبة من المرء الذى يتولى أمور العامة فنام عنها حتى أضاعها .

ومن الأمانة ألا يستغل المرء مركزه لمنفعة شخصية له أو لأقربائه ، وقد قال "صلى الله عليه وسلم" :
منِ استعملْناه على عملٍ ، فرزقْناه رزقًا ، فما أخذ بعد ذلك فهو غُلولٌ
الراوي: بريدة بن الحصيب الأسلمي المحدث: الألباني - المصدر: صحيح الترغيب - الصفحة أو الرقم: 779
خلاصة حكم المحدث: صحيح

ومافعلتيه أفضل تصرف ,خشية أن يكون المبلغ المصروف ليس من حقك وبالفرض أنه من حقك الان وليس من حق عملك القديم ,فهذا أولى من أن يكون لهم عندك حقوق ولايعلموا بها فستكون طوقا فى عنقك الى يوم الدين ,وان كان هذا المبلغ أنتى فى حاجه اليه اطلبى من زميلتك أن تثبت مايفيد ذلك لكى يصرفوه لكِ وبالله التوفيق .

[غير مسجل]

رد: موضوع قلقنى

انا بعتذر تقريبا ما عرفتش اوصل المعلومه صح
انا لما سالتها وقالت لى انها جابت بيهم حاجه
انا صدقت كلامها لانها هى اللى بتشترى
ففعلا كتبتهم زى ما قالت لى يعنى كتبت 7 جنيه ينسون لانها اكدت اكتر من مرة انها جابت
وللاسف اوقات لما بنشترى من محلات مابيدوش فواتير وعلشان كده بتحصل اللغبطه اوقات
يعنى انا كده اتصرفت غلط ؟؟
يعنى انا مادفعتش المبلغ انا كتبته زى ما قالت لى انه اتصرف
ربنا يعلم انه مفيش اى نيه سيئة
انا لو كنت فى الشغل كنت دفعتهم وارتاحت
بس انا سيبته ومفيش اتصال كتير بينى وبين حد
بالله عليكم ريحونى ربنا يعلم حالى بعد اللى كتبتوه انا ايه كده وضعى؟

[غير مسجل]

رد: موضوع قلقنى

طب انا عندى فكرة
انا ممكن اتصل بزميلتى واقولها انها تجيب للبوفيه حاجه من مستلزماته يعنى اى حاجه بيحتاجها الشغل ينسون او كركديه
او اى حاجه بنفس المبلغ اللى عليه المشكله بيتهيالى ده حل لانه بكده حيبقى الشغل فعلا دخلته حاجه بالمبلغ ده
وابقى ما بينى وبين ربنا خلصت زمتى من الفلوس ديه
ده ممكن يكون حل لانى ما ينفعش اقولها تحط الفلوس علشان مش هى اللى بتمسك الحسابات وممكن بكده اسيببلها مشاكل
ايه رأيكم ؟

[فريق استشارات سرك فى بير(الأخوات)]

رد: موضوع قلقنى

حسناًَ ياابنتى ,,فإن ماوصلنا بالفعل انكِ قمتِ بدفع المبلغ
ولكن مادمتِ متأكده من كلامك نفذى فكرتك فهذا سيكون اضمن وأنفع ان شاء الله
بارك الله فيكِ وأكثر من أمثالك .