أثار المعاصي و الكسل

[غير مسجل]

السلام عليكم و رحمة الله و بركاته
جزاكم الله كل خير على مجهودكم و حرصكم لمساعدة الناس اولا انا و الله ربنا يعلم انا بحبه اوي و نفسي معملش حاجة تغضبه مني و بجد حبي ليه اكتر من خوفي منه عز و جل بس انا وحشة من جوايا انا كنت الاول بعمل حاجات غلط كتييير و كان صحابي الولاد اكتر من البنات و طول ما انا ماشية في الجامعة او في الشارع اسلم على دا و اقابل دا و كنت كمان ببوس قرايبي الولاد عادي و انا بسلم عليهم وكنت بشرب سجاير عادي كنت بجد بنت وحشة جدا , انا في بيت مش ملتزم خالص بس طول عمري نفسي ابقى احسن و الله و كنت واثقة ان ربنا هيهديني بفضله و رحمته و الحمد لله اتغيرت كتير بس لسه في اثار ذنوب يعني انا الحمد لله لبست النقاب وبحبه جدا وعارضت اهلي ودخلت في مشاكل عشان البسه بس مش بحترمه يعني لسة لو شفت ولد اعرفه ممكن اسلم عليه مش بقف معاه كتير ومش بقف مع ولاد لوحدي بس لو انا معدية مع صحبتي و ولد اعرفه معدي اسلم عليه كدا و اقوله ازيك عامل ايه و امشي و هما عارفيني حتى و انا لابسة النقاب من صحابي و لسة ممكن لو لقيت حد من البيت بيتفرج على فيلم او مسلسل اتفرج معاه و كمان احنا عندنا علطول التلفيزيون مفتوح و احنا بناكل و في كل وقت و انا كمان كنت مدمنة افلام اجنبي هو انا مش بيجيلي قلب اتفرج على افلام جديدة انا بس لو لقيت فيلم بحبه بقول انا هشوف الحتة دي و خلاص و كمان السجاير للأسف انا اخويا بيشرب سجاير لو لقيت سيجارة في اوضته ممكن اشربها و بقيت مبدخلش اوضته خالص عشان معملش كدا و قرايبي الولاد بسلم عليهم و بهزر معاهم عادي بس غير الأول ,
و انا كمان اول واحدة التزم في اهلي و اصحابي طول الوقت مش ببقا عايزة ارخم عليهم عشان هما واخدين فكرة ان الملتزمين دول وحشيين وكل حاجة حرام وغلط و كمان خصوصا دلوقتي خوفهم من الاخوان و ان البلد بقى فيها ملتزمين كتيير فأنا مش عايزة ابقى متشددة زي مابيقولوا مع اني عارفة ان مفيش حاجة اسمها متشددة بس انا مش عايزة اكرهم في الالتزام و لو شفت حد بيعمل حاجة غلط نادرا لما بقوله كدا حرام مثلا صحابي كلهم بيعملوا الحاجات اللي كنت بعملها زمان ممكن انصحهم كدا مرة و بس بقول هما احرار و انا كنت زيهم كدا في يوم و بدعيلهم ربنا يهديهم و بس لكن مش عارفة ابعد عنهم مش عارفة ابعد عن الناس اللي حواليا و انا بقالي كتير ملتزمة و الالتزام من وجهة نظري اني لما بعمل الحاجة بندم اني عملتها الاول مكنتش كدا لكن لسة بعمل حاجات حرام و قبل ما اعمل بدعي ربنا كتير اني معملش كدا لكن بعمل بردو بس الحاجات اللي بعملها مش حرام اوي يعني مش زي زمان عشان كدا بقول انا مهما كان بردو احسن من الاول
و كمان انا كسلانة جدا يعني كل خطوة بعملها كل فين و فين و لسة لغاية دلوقتي مش بحفظ قرأن بحجة ان انا عايزة اخلص قراية تفسير القرأن الاول هو انا اه بقيت اصلي النوافل كلها الحمد لله و بقيت اصوم و كمان بقرأ قرأن كتير و بقيت اعمل حاجات كتير مكنتش بعملها لكن في حاجات اكتر مفروض اعملها حاسة اني كسلانة من نحيتها اوي و كمان انا بحب البيت جدا مش بحب انزل يعني مفروض اصلي صلاة الجمعة او في التراويح ان شاء الله في رمضان انزل اصلي لكن انا مش عايزة , بقول هصليه في البيت و لما ببص للأخوات بلاقيهم ماشاء الله زي النحلة و يروحوا دروس و ينزلوا يصلوا على طول و الكلام دا لكن انا بكسل جدا و بقول حجة ان انا كدا احسن لأن البنت احسنلها متنزلش كتير و كمان الصور انا بصور نفسي كتير اوي طول ما انا قاعدة بصور نفسي من غير حاجة كدا و بمسح الصور تاني هوا كدا حرام ؟ وكمان انا ابويا و امي علطول بيتكلموا علي بعض قدامي كلام مش حلو امي تقول دا بابا عمل و عمل و ابويا نفس الكلام و انا مش بقدر اقول حاجة و لو نصحتهم ان كدا حرام بيزعلوا مش عارفة اعمل معاهم ايه و ارضيهم ازاي امي عايزاني اكره ابويا و ابويا عايزني اكره امي و علطول بحاول افهمهم لكن هما عصبيين جدا ساعات ببقا نفسي يتطلقوا عشان ارتاح من وجع الدماغ ده

انا طولت عليكم اوي بس انا كنت محتاجة افضفض و نفسي ادخل رمضان بقلب سليم و ابقى كويسة بس انا عندي مشاكل لا حصر لها بس الحمد لله طبعا انا احسن من غيري من ناحية المشاكل و ربنا كريم معايا جدا و انا نفسي ابقى صالحة و ربنا يرضى عني عشان انا بحبه اوي لكن مش عارفة , و بقيت من اقل حاجة بعيط و انا بصلي و انا بقرأ قرأن و قلبي فيه خشوع بس زعلانة من نفسي بردو عايزة اقرب اكتر من كدا عايزة دماغي متفكرش غير في ربنا بس هوا ينفع ؟ عايزة ابقى زي ما ربنا خلقني صافية و قلبي نضيف ادعولي يا ريت اي حد يقرا موضوعي يدعيلي ربنا يكرمكم و يصلح حالكم جميعا

[فريق استشارات سرك فى بير(الأخوات)]

رد: أثار المعاصي و الكسل

وعليكم السلام ورحمة الله وبركاته

ابنتنا الفاضلة
بصدق أنا أحييك وأسأل الله أن يثبتك ويرقيك

وذلك لأمرين
أنك لم تكابرى بل اعترفت بكل أخطائك
وأنك تريدين أن تكونى افضل

فمن الناس من لا يحب الاعتراف بخطؤه ومنهم من يظن أنه على خير ولا حاجة له فى الصلاح

ابنتى
يقول شيخنا ابن القيم - رحمه الله - ( ولا يذوق العبد حلاوة الإيمان وطعم الصدق واليقين حتى تخرج الجاهلية كلها من قلبه )

فكما قرأت ابنتنا الكريمة
إذا اردت القلب الصافى والنفس المطمئنة فالطريق إلى ذلك هو التخلص من كل الرواسب التى كانت قبل التزامنا

وهذا - بصدق - لا يأتى بين يوم وليلة
وأنما هو طريق طويل يحتاج منك لأمرين

المجاهدة والصبر

سنظل نجاهد أنفسنا الأمارة بالسوء ونحسن منها ونزكيها ونصبر على التزكية
حتى نلقى الله - عز وجل -

فبداية اعقدى العزم على التغيير فأنت لو لم تكونى معتقدة بخطأ ما تفعلين ما استشرت غيرك لأجل التخلص منه

فابدأى بنيتى صفحة جديدة مع الله وابدأى بالبعد عن كل ما يغضب الله
اندمى على ما مضى واعزمى عزما صادقا أكيدا على عدم العودة

ولا تستحى من الناس فتفعلى المعاصى لأجلهم
فأولى أحد بالحياء منه هو الله سبحانه وتعالى

ألا ترين منه كثرة نعمه وجزيل كرمه وحلمه علينا
ألا نستحى منه فنفعل كل ما أمر ونترك كل ما نهى عنه وألا نستحى أن نقدم أحد عليه

فوالله الذى لا إله غيره لن ينفعنا سواه
ولن نُكرم ولن نُعز فى الدنيا وفى الآخرة إلا بدينه

فاعتزى بدينك ابنتى واعزمى على تطبيق كل صغيرة وكبيرة منه

وجاهدى نفسك وكل يوم - مع استعانتك بالله - ستجدين انك تتخلصين من معصية وترتقين فى طاعة بإذن الله

ولكن عليك
1 - بدوام الاستعانة بالله وسؤاله المدد والعون والتضرع له سبحانه وسؤاله الهداية

2 - الحرص الشديد على تزكية نفسك بالطاعات والثبات عليها
بالمحافظة على وردك من القرآن وسماع الدروس والمواعظ

3 - بتعلم أمور دينك لتعرفى المعاصى فتقلعى عنها والطاعات فتواظبى عليها

وبالنسبة ابنتى للصلاة فى المسجد
فإليك فتوى مشايخنا فى هذا الأمر
هنا

لكن هناك أمور لابد لها من الخروج من المنزل مثل تلقى العلم الشرعى وحضور الدروس فى المساجد حيث الصحبة الصالحة

فانصحك بنية بالاستعاذة بالله من العجز والكسل وأن تجاهدى نفسك لتخرجى من دائرة الكسل وبالمداومة على المجاهدة ستصلى بإذن الله لكل ما تريدين

يقول أحد الصالحين ( كابدت قيام الليل عشرين سنة ثم استمتعت به عشرين اخرى )
فقد كابد وهو من الصالحين القيام أى أخذ يجاهد فى نفسه ويرغمها على فعل الطاعة حتى استجابت له فى النهاية وأصبحت لذتها ومتعتها فى الطاعة

وهذه هى طبيعة الحياة فالجنة حُفت بالمكاره
فكل ما تكرهه النفس هو سبيل الجنة
فداومى على الاستعاذة بالله من شر نفسك وجاهديها لتنجى برحمة الله

أسأل الله لنا ولك أرضى ما يرضيه عنا