عانس على الأبواب

[غير مسجل]

السلام عليكم

سؤال للأخوة والأخوات في الموقع....بارك الله فيكم.

هل إذا وصلت البنت لسن 29 مبرر لأن تقبل بأي حد وزمن الشروط ذهب وإنها تحمد ربنا وتقول يا رب يتم الموضوع.؟
وأيهما أفضل حياة تعيسة أم لقب عانس؟

[فريق استشارات سرك فى بير(الأخوات)]

رد: عانس على الأبواب

بسم الله الرحمن الرحيم

وعليكم السلام ورحمة الله وبركاته

حياكي الله أبنتي الفاضلة .

أبنتنا الكريمة .. لا تفكري بهذه الطريقة .. فإن الزواج رزق مُقدّر من الله سبحانه وتعالى

له وقت وله ميعاد محدد ... هناك من تزوجوا بعد سن الثلاثين ويعيشون حياة سعيدة هانئة .

ولتجعلي شرطكِ الوحيد فيمن تبتغينه زوجاً أن يكون صاحب الدين .

وإن تقدم أليكي أحد .. فعليكي بإستخارة الله عزوجل .. فإن فيها صلاح الأحوال .

وفقكي الله لما يحبه ويرضاه

[مراقبة فى المنتدى]

رد: عانس على الأبواب

جـــه ... ماجاش ... أديــنا قاعديــــــن !!


= هو مين ده اللي ...
جـــه ... ماجاش ... أديــنا قاعديــــــن !!
؟؟؟

- وهل يخفى القمر ؟

أكيد العريـــــــس هو القمر

قمر الليالي اللي بيسهرني بالليل
أحلم به
وبشكله
وبكلامـــــــــه
و بـــ.......

= خلااااص استووووب

- قمر الليالي اللي يصلي معايا قيام الليل ويعينني على الطاعة

= ما قلنا ستوووووب




فطرة وطبيعي جدا البنت في سن الزواج تفكر في الزواج ..
و إلا ما تبقاش طبيعية !!

XX بس اللي مش طبيعي >> التفكير الزيادة XX
اللي بيخلي البنت ماتتصورش السعادة إلا في الزواج
ما تتخيلش طعم الحياة ولا لذة الطاعة إلا لو كانت مع زوجها "المستقبلي"

وده طبعا أكبر سكينة بتحز بها قلبها بالبطئ !

وماتقولش لنفسها الموضوع ده تسالي .. دي مجرد أحلام يقظة مسيري أصحى منها

لكن الفكرة أنك بتضعفي طاقة قلبك لأنك بتحمليه فوق طاقته




روشتة العلاج في كلمتين:
الانشغال + الالتزام
هم اللي بيضبطوا موضوع التفكير الزيادة

الانشغال >>> معلوم أن وقت الفراغ اللي هتفكري فيه في موضوع الزواج ..هيتملي بالتفكير في الحاجات اللي مشغولة بها

الالتزام >>> هيخلي جواكي سكينة وطمأنينة أن الرزق هيجي في وقته بإذن الله ..
ربنا بيفتح عليه أبواب فضله
واللي بيطمع في ربنا .. ربنا بيرزقه من غير حساب

بس طبعا تكون النية الشغل لربنا مش لحاجة تانية



حاجة كمان نسيت أقولها .. الواحد مش ضامن عمره .. فلما يموت وهو في الطريق خير من أنه يموت وهو لسه واقف في مكانه

لأني بشوف ناس كتير بتعلق سبب فتورها عن الطاعة وكده بأنها منتظرة الزوج اللي يعينها عالطاعة و و و و

فبجد اللي بتفكر كده فعلا بتضيع عمرها لأنها ما اتخلقتش للزواج فقط .. ده جزء من رسالتها

وربنا اللي بايده مقاليد السماوات والأرض واللي قال سبحانه عن نفسه:
" أَلَا يَعْلَمُ مَنْ خَلَقَ وَهُوَ اللَّطِيفُ الْخَبِيرُ "

يعلم أن فلانة حالها هينصلح لو تزوجت

ويعلم أن علانة حالها هينتكس لو تزوجت


فالواحد فعلا يتوكل على ربنا ويسيب الأمر له وحده

هل أنتي تعرفي أنتي هينصلح حالك ولا هينتكس بالزواج ؟

هل تضمني أن زواجك يستمر أو يحصل تفاهم و ود بينك وبين زوجك أو العكس يحصل نفور ؟




ونصيحة لما تقعدي مع صحباتك اللي لسه غير متزوجات ماتتكلموش كتير أو خالص في موضوع الزواج

عارفة أنها نصيحة غريبة بس فعلا هتريح كتير

لأن الكلام ده لما بترجعي البيت وبتبقى لوحدك بتقعدي تفكري فيه تاني و أكتر

لأني كتير بشوف بنات مشغولة بموضوع الزواج جدا وكلهم أحسبهم على خير ملتزمات مش بتوع مصاحبة ولاد والكلام ده .. وعلى خلق وخير ربنا يبارك فيهم
لكن بلاقيها مثلا بتكتب رسايل لزوجها المستقبلي مع أنها لسه مش مخطوبة ولا متزوجة

بس شغل القلب والتفكير بالموضوع ده هيتعبها أوووي

لأنها على كل الأحوال هتبقى تعبانة

* لو لا قدر الله ما تزوجتش هتبقى حياتها كئيبة جدا
لأنها بانية سعادتها على شئ واحد >>> وهو الزواج
فلو الشئ ده ما اتحققش هتبقى حياتها ضلمة ومالهاش طعم
وده طبعا أكبر غلط

* ولو حتى اتخطبت .. معذرة في اللفظ "هتدلق زي الجردل" لأن قلبها هيبقى متعطش أوي لأي مشاعر .. وهيأثر جدا على اختياراتها للعريس .. هتتخيل كل كلمة كانت بتكتبهاله فيه حتى لو مش مقاسه ولا راكبة فيه

واللي بقوله من واقع تجارب شفتها ..
زي ما بيقولوا عندها فراغ عاطفي فهتشبعه في أي واحد يقع في وشها

حتى لو الظروف الظاهرة قدامها أنه مش مناسب لها هتوافق عليه

وهتفضل ولو حتى كان بيبص للأبجورة اللي جنبها هتقول ده عينه مازلتش من علي وهتبرر عيوبه و هتعيش نفسها في أوهام لحد ما تتقرص وتفوق

* ولو دخلت وخرجت في كذا تجربة خطوبة فاشلة .. قلبها مش هيتحمل الضغط وقلبها هيتهري بالتجارب دي
لأن استهلاك المشاعر بيستهلك قلبها معاه

وأنتي كده كده مش هتتزوجي إلا شخص واحد

ليه تقعد تهري وتهلك فيه بالشكل ده ؟



لكن لو الموضوع عندها من الاول في المستوى العادي المنضبط
zero state
أن كل شئ بقدر الله والمشاعر كلهاااااااااا كلهاااااااا وبأكد كلهااااا بتيجي بعد الزواج
والتفكير الكتير مش هيقدم ولا هيؤخر حاجة


مش هقول مش هتتأثر .. أكيد هتتأثر لكن هيبقى عندها صبر ويقين


اقفلي على قلبك لحد ما ربنا يأذن لك بصاحب النصيب

و صدقيني نصيبك و رزقك هو اللي بيجري وراكي.. مش أنتي اللي تجري وراه

اصبري واحتسبي صبرك ده عند ربنا

واستغلي فترة الصبر ده في اصلاح نفسك عشان تكوني زوجة صالحة بإذن الله
:)


افتكري الجملة اللي كنا واحنا صغيرين نقولها:

وعايزاكي تقوليها بأكبر ابتسامة

جـــه ... ماجاش ... أديــنا قاعديــــــن !!


بس قاعدين بنعبد ربنا .. مشغولين بطاعته

والله فعلا بعد الزواج الواحد بيتحسر على حاجات كتير كان نفسه يخلصها قبل الزواج

اشغلي نفسك بدراسة علم شرعي .. حفظ القرآن .. الاشتراك في جمعيات خيرية أو نشاطات تبع المسجد

بجد هتحسي أن حياتك لها معنى و هدف وهيقل التفكير كتير

وتيقني..
اللى بيشتغل لربنا بيفتح عليه ويرزقه من أوسع الأبواب

[غير مسجل]

رد: عانس على الأبواب

اريد ان اشكر الاخت صاحبة اسم مراقبة في المنتدى
كلام جميل ومؤثر وصحيح وهذا الي كان نفسي اقوله عشان الناس تفهم كنت لسة بفكر فيه ازاي ارد عليهم فاللهم زد وبارك الرد جميل جدا جزاكم الله خيرا كثيرا وجعله الله في موازين حسناتك يارب ولو تسمحي لي ان انقل الكلام الى صديقاتي فشكر الله لكي كثيرا
ومثل ماقالت الاخت ياريت كل اخت لم تتزوج ان تتزود بحفظ القران الكريم وطلب العلم لان للاسف بيجو لي ناس وتقولي بعد الزواج حاجة تاني ضعفت همتي في الدعوة الى الله والقران الكريم كنت بحفظ ودلوقتي ظروفي وحصل وحصل ...الخ

[فريق استشارات سرك فى بير(الأخوات)]

رد: عانس على الأبواب

يمكنكِ الاطلاع على هذا الموضوع ..
ياااااااارب ( تأخرت في الزواج ماذا أفعل ؟)
باختصار شديد أنتِ الآن في محنة وبلاء وليس معناها أن كل من تزوج صغيرا أفضل أو من تأخر به عيب ولكن هذا قدر فأري الله منكِ خيرا ..
ونحن لا نطلب منكِ الموافقة على أي رجل ممكن تتنازلين عن بعض المواصفات التي كنت تريدينها لكن لا تتنازلي عن الدين والأخلاق فهذا امر أساسي المهم يكون عنده أخلاق وملتزم أو محب للالتزام وعنده استعداد يتغير ,, لا تغلقي الباب واتركي لنفسك فرصة لمقابلة هذا وذاك حتى وإن قيل لكِ صفات أخرى لا تحبينها اعملي استخارة وقابليه وادعي ربنا كتيير وربنا ييسر لكِ الحال ويرزقكِ بزوج صالح عاجل غير آجل وكل بنات المسلمين ..