بالله عليكم ردوا عليا ضرووري ربنا يبارك فيكم ردوووووووووا انا محتاجة حد يريحني.....

[غير مسجل]

السلام عليكم ورجمة الله وبركاته



معلش الموضوع طويل لكن استحلفكم بالله تقرأوا للاخر وتجاوبوني لأني محتارة وعلى فكرة انا قبل ما باخد اي خطوة بصلي استخارة او حتى على الاقل بقول دعاء الاستخارة لكني قلقة برده وكل اللي طالباه تقراوا للأخر وتجاوبوا على سؤالي.....

بس بالله عليكم فكروا قبل ان تجاوبوا وياريت تفكروا في حديث الرسول عليه الصلاة والسلام اللي معناه انه يجب جمع المتحابين بالحلال اي الزواج ده معناه انا مش فاكرة الحديث





بسم الله ابدأ ولتعلموا اني اريد الحلاااااااااااال لذلك استشيركم





دلوقتي في شاب تقدم لأبي اكثر من مرة واخته معي في الجامعة صديقتي يعني وهو تقدم لابي مرة فرد ابي عليه الرد المعتاد وهو انني لسه فاضلي سنة لأني بدرس فجاءت اخته وقالت لي ذلك وقالت انه يريد ان يتقدم مرة اخرى فما رأيك قلت لها مايريده يفعله لو عايز يتقدم تاني يتقدم زي ما هو عايز ... قالتلي هو عايز يعرف انتي موافقة ولا لأ انا رديت عليها وقلتلها بصي انا مقدرش اقول رأيي قبل بابا قالتلي انه عايز يعرف رأيك عشان يتقدم وهو واثق انك موافقة بعد كلام كتير ولح منها قلتلها طيب بصي لو بابا وافق انا موافقة قالتلي يعني انتي موافقة قلتلها ايوة بس برده لو بابا رفض يبئى مش هيكون ف ايدي حاجة قالتلي خلاص هو هيطلب منه يقابله ويتكلم معاه اكتر قلتلها ماشي وربنا يعمل الخير وفعلا كلم بابا وبابا وافق يقابله واول مرة بابا يوافق يقابل حد وقابله في المسجد وبعدين بابا وعده انه هيرد عليه بعد اسبوع وبابا رجع كان مبسوط منه واعجب بتمسكه وبأخلاقه لكن ظهرت مشكلة وهي ان شهادته اقل من شهادتي ...

بصوا هو معاه دبلوم وانا تربية بس هو تغلب على الدبلوم بأنه اشتغل مدرس في الحكومة وكمان شغال موظف في شركة المياه وغير كده هو مرتاح ماديا جدا عنده شقة تمليك مساحتها واسعة اكبر من الشقة اللي انا عايشة فيها حاليا واخلاقه احسبها على خير من خلال كلامي مع اخته المهم بسبب هذا ابي رفض بعد ما قابله وكمان وصلني انه هزر معاه وكان مرتاح معاه جدا وغير كده جه اخد رأيي وانا قلتله اللي تشوفه زي ما اي بنت بتقول لكن ماما وضحتله اني موافقة واتفق معانا انه هيقوله يستنى سنة لكن بعد كده وصلني انه قاله (مفيش نصيب) ازاي انا مش عارفة وليه غير كلامه مش عارفة برده يلا خير رضيت وقلت ربنا هيعوضني خير لكن اخته جات قالتلي انه عايز يكلم باباكي تاني قلتلها زي ما يحب لكن انا مليش دعوة عشان ميتسببليش في مشكلة مع بابا المهم هو كان خايف يكلم بابا تاني ففكر يخلي والدته تكلم والدتي وبالفعل والدته كلمتني ع الموبايل عشان تاخد رقم ماما وكلمتها وهي الظاهر انها هتكون حمى طيبة جدا وباين انها بتحبني اوي وبالفعل كلمت ماما لكن ماما صدها برده وقالتلها خلاص مش ينفع ولما بابا عرف انها كلمت ماما اتعصب عليا جدا وقالي انا مش هدي بنتي لدبلوم صنايع ... بس انا شايفة مادام هو متمسك يبئى هيلبي جميع طلبات بابا وانه اكتر الناس اللي هتحافظ عليا فتعلقت بيه ودلوقتي انا على اتصال مع اخته وهي قالتلي انه هيتقدم تاني في الاجازة بعد العيد فقلتلها ماشي بس بشرط ناخد التلت شهور دول لحد ما يروح لبابا تاني دعاء وكل يوم صلاة ركعتين على الاقل وندعي فيهم ربنا يجمع بيننا وكل يوم ببعت رساله لأخته افكرهم بصلاة ركعتين

وقبل ما اعمل كده صليت استخارة اكتر من مرة



السؤال بئى انا كده بعمل حاجة غلط؟؟

كده ابئى بخون والدي؟؟

ولما اعرفه عن طريق اخته او والدته برده امتى يروح لبابا الوقت المناسب يعني

يبئى غلط؟؟

غلط اتصالي بأخته ووالدته ؟؟؟



وطلبي منكم الدعاء لنا بأن يجمع الله بيننا بحلاله

[فريق استشارات سرك فى بير(الأخوات)]

رد: بالله عليكم ردوا عليا ضرووري ربنا يبارك فيكم ردوووووووووا انا محتاجة حد يريحني.....

الحمد لله والصلاة والسلام على رسول الله صلى الله عليه وسلم ,واما بعد ,
مرحبا بكِ ابنتى الفاضله ,وبدايةًَ فإن المستوى الاجتماعي الذى يراد به النسب أو الغنى أو التعليم أو الحرفة والوظيفة ، وقد تراد جميعها .
ومن كان مرضي الدين والخلق ، فهو كفء للمرأة مهما كان مستواها الاجتماعي ، على الراجح كما سبق . هذا هو الأصل ، والحكم الشرعي ، لكن يبقى النظر في حال كل خاطب ، وهل يناسبه الزواج ممن تفوقه في هذا المستوى أم لا ؟
و إن كان التفاوت كبيرا فيما ذكرنا من النسب والغنى والتعليم والوظيفة ، فلا ينصح بالإقدام على هذا الزواج ؛ لأنه غالبا ما تحيط به المشاكل من جهة المرأة أو من جهة أهلها ، وقد يكون الاختلاف في أسلوب الحياة ، وطبيعة التعامل مع الأمور من أسباب النفرة بين الزوجين لاحقا .
أما إن كان التفاوت يسيرا ، أو كان النقص في جانب يعوضه كمال في جانب آخر ، فلا بأس حينئذ ، كأن يكون الرجل فقيرا ، لكنه حاصل على شهادات متميزة ، او العكس أو يؤهل لوظيفة مرموقة ، أو من عائلة ذات شرف ، ونحو ذلك .
وثمة حالات تكون فيها المرأة وأهلها من الصلاح والاستقامة ، ما يرفعهم عن النظر إلى الأمور المادية وقياس الناس بها ، وتكون رغبتهم في الزوج الفقير لعلمه أو لصلاحه ونحو ذلك ، وإن كان الأولى ـ في حق الزوج ـ أن يكون الرجحان في جانبه ، في الأمور التي تعتبر في الكفاءة .
وبكل حال ، فالنصح الدقيق في هذه المسألة يتوقف على معرفة الطرفين معرفة تامة ، ومعرفة ما يحيط بهما وبأسرتيهما ، والواضح من كلامك أن الخاطب ميسور الحال وستعيشين معه عيشه كريمه بإذن الله ومستواه التعليمى حتى وإن كان مستواه التعليمى اقل فيكفى أنه متعلم ومثقف ولايرتكن الى ماله ويعمل بالتدريس وبأكثر من وظيفه ورسولنا الكريم قال في الترمذي (1085) عنه صلى الله عليه وسلم : ( إذا جاءكم من ترضون دينه وخلقه فأنكحوه ، إلا تفعلوه ، تكن فتنة في الأرض وفساد كبير . قالوا : يا رسول الله ! وإن كان فيه ؟ فقال : إذا جاءكم من ترضون دينه وخلقه فأنكحوه ، ثلاث مرات ). [ حسنه الألباني ] ) فلعلك تسترشدى بنصح من تثقى فيه من أهل الخير والدراية في مجتمعك .وعن سؤالك فى التواصل مع أخته أو والدته فليس فى هذا حرج مادمتِ لاتواعديه سرا او تتحدثى معه فى الهاتف وكل علاقتك مع قريباته فقط فمن حقك أن تختارى ويكون لكِ رأى فى إختيار شريك حياتك فالشرع كفل للمرأه حرية الرأى فى إختيار من ترضاه زوجا لها فلا حرج عليكِ فى ذلك ولايعتبر خيانه لوالدك يابنيتى مادمتِ تتجنبى الإختلاط ومحافظه على كرامة والدك ,وحاولى أن تشركى والدتك فى الأمر حتى تساعدك فى إقناع الوالد

ونسأل الله لكِ التوفيق والسداد .
والله أعلم .

[غير مسجل]

رد: بالله عليكم ردوا عليا ضرووري ربنا يبارك فيكم ردوووووووووا انا محتاجة حد يريحني.....

"مادمتِ لاتواعديه سرا"

ممكن اعرف معناها ايه؟؟؟

[فريق استشارات سرك فى بير(الأخوات)]

رد: بالله عليكم ردوا عليا ضرووري ربنا يبارك فيكم ردوووووووووا انا محتاجة حد يريحني.....

لاتواعديه سرا معناها ياابنتى انكِ لاتتفقى معه فى السر على المقابله
فى غياب أسرتك ,فهذا لايجوز شرعا وسبب النهى حفاظا على كرامتك وكرامة عائلتك
وسوف تكبرين فى نظره ولن ينظر إليكِ نظرة دونيه فيما بعد أى بعد أن يكون زوجك ان شاء الله
فلا يعايرك بانكِ كنتِ تقابليه من وراء أهلك ,فنحن ننصحك كما ننصح بناتنا وأولادنا ,حفظكِ الله
وبارك فيكِ ويسر لكِ أمورك .

[غير مسجل]

رد: بالله عليكم ردوا عليا ضرووري ربنا يبارك فيكم ردوووووووووا انا محتاجة حد يريحني.....

جزاكم الله كل خير
مهو انا كما ذكرت بتواصل مع اخته ووالدته فقط واخته معايا في الكلية وده سبب تواصلنا
لكن لا نتفق انا واخته حتى اننا نتقابل خارج الجامعة