تعبت من المعاصى انا بحب ربنا اوى

[غير مسجل]

السلام عليكم ورحمة الله وبركاته

مش عارفة ابدء منين او اقول ايه بجد انا مخنووووووووووووقة جدا

انا فى معصية مصرة عليها انا بتوب وبرجع بصلى الحمد لله بقالى شهرين مواظبه بس رجعت تانى الفترة دى للمعصية دى

وبردو بصلى بس حاسة انه ربنا غضبان عليا انا بجد ناوية التوبة تانى ودعيت ربنا بس بقيت احس ان جوايا شيطان مش عاوز يشوفنى كويسة ابدا اواظب على الصلاة مفيش فايدة باجى باليل اشوف حاجات ملهاش لازمة ومبتعملش حاجة غير انها تحرك المعاصى جوايا ساعات اجمد وافضل اقول لنفسى حرام وابعدى ازاى هتقابلى ربنا افرضى متى دلوقتى
وساعات تانية بيكون نفس الصوت جوايا ولا كانى سمعاه انا بحس كده انى بخون خطيبى هو مسافر بحس انى بخون ثقته فيا وبعد اقول لنفسى ازاى هكون ام صالحة لو اولادى عملوا كده همنعهم وهكون مضايقة ازاى انا اشوف الحاجات دى واستجيب للى بتحركه فيا بس بجد تعبت والله انا بحب ربنا اوى دايما ادعى لنفسى بالهداية وانا بصلى ليه برجع ايه اللى جوايا نفسى بجد اكون عندى ارادة وايمان جوايا واكتر شئ بيحزنى انه الناس فاكرانى ملاك مبغلطش بيبحونى وبيمدحوا فيا وده بيعذبنى اكتر واكتر
بحس وقتها انى منافقة بظهر للناس الكويس وبسيب لربنا الوحش انا ليه بعمل كده انا بجد مش عارفة يااااااااارب اهدينى وعفنى واستر عرضى ياااااااااارب وسامحنى ارجوكم محتاجكم اوى

[فريق استشارات سرك فى بير(الأخوات)]

رد: تعبت من المعاصى انا بحب ربنا اوى

وعليكم السلام ورحمة الله وبركاتة

أهلا بكى أختنا الكريمه فى المنتدى

قالوا الاعتراف بالمشكله هو نصف الحل ...
جميل إنكِ ترى نعم الله عليكِ وتشعرى بتقصيرك وهذا ان دل فانه يدل على فطرتك السليمه وده واضح من كلامك انكى عاوزة ترجعى لربنا

والان لو قلتلك حاولى ممكن تقولى حاولت ....وبرجع تاااااااانى ...طيب عارفة ليه ؟؟

تعالى نتكلم ببساطه شديده إنتى جواكِ صراع بين ان انتى عارفه الصح وعاوزه تطيعى ربنا وبين انكِ مش قادره تاخدى قرار بالعودة لربنا وتقربى منه

طيب الصراع ده طبيعى لاننا كلنا جوانا الخير والشر لكن المهم مين أقوى جواكى؟؟

وازاى اقوى جانب الخير عشان أقدر أتغير؟؟

هقولك مثال بسيط جدا لو عندك زرعتين واحده بتسقيها باستمرار وواحده لأ ..الطبيعى اللى بتسقيها هتبقى أقوى والثانيه هتضعف ....نفس الحكايه لو أحنا عاوزين نقوى جانب الخير او علاقتنا مع ربنا

وهنقول كلام عملى أنتى بتدخلى لقلبك أيه طول اليوم؟؟؟؟؟

ببساطه كده هسألك عن اربع حاجات :

انتى بتسمعى أيه ؟؟؟

وبتشوفى أيه ؟؟؟

وبتتكلمى عن أيه ؟؟؟؟

وبتفكرى فى أيه؟؟؟؟؟

وبسأل عن الاربعه دول لان دول الطريق لقلبك

هنلاقى ان اغلب يومنا بيدور عن الكلام عن اللبس والكليه والمذاكره ومشاكلنا مع اهلنا واخر الاخبار ........ الى اخره

الحل العملى البسيط جدا والفعال جدا كمان ان شاء الله

خلى ليكى وقت يومى تسمعى عن ربنا ...وتتكلمى عن ربنا ... وتفكرى فى حالك معاه ...

وتبصى فى كتابه ...

وأحنا ممكن نساعدك هنا فى المنتدى تعالى قسم الاخوات

واتعرفى على اخوات هتشجعوا بعض وهتحسى انك بتتغيرى ان شاء الله

اسمعى الايه دى :
{لَهُ مُعَقِّبَاتٌ مِنْ بَيْنِ يَدَيْهِ وَمِنْ خَلْفِهِ يَحْفَظُونَهُ مِنْ أَمْرِ اللَّهِ إِنَّ اللَّهَ لَا يُغَيِّرُ مَا بِقَوْمٍ حَتَّى يُغَيِّرُوا مَا بِأَنْفُسِهِمْ وَإِذَا أَرَادَ اللَّهُ بِقَوْمٍ سُوءًا فَلَا مَرَدَّ لَهُ وَمَا لَهُمْ مِنْ دُونِهِ مِنْ وَالٍ} [الرعد : 11]

يعنى لو حياتك فضلت زى ماهى واهتماماتك زى ما هى واسلوب حياتك زى ما هو تفتكرى التغير هيجى منين ؟؟

يعنى دلوقتى المطلوب منك حاجتين :

1_ الدعاء : تدعى ربنا كثيييييييييييييييييير انه يهديكى ويساعدك

2 _ الصحبة الصالحة التى تعينك على طاعة ربنا

ابنتى الفاضلة

ديه كانت المقدمة

ممكن تركزى شويه معاى ....

بدايه هنتكلم عن الفتور كمشكله بشكل عام وبعدين عن حالتك بشكل خاص


الأول لا زم تبقى عارفه إن:

1) الكل معرض للفتور

**( كُلُّ ابْنِ آدَمَ خَطَّاءٌ ، وَخَيْرُ الْخَطَّائِينَ التَّوَّابُونَ )

** سمى القلب من التقلب

يقول النبي صلى الله عليه وسلم :( إِنَّمَا سُمِّيَ الْقَلْبُ مِنْ تَقَلُّبِهِ ؛ إِنَّمَا مَثَلُ الْقَلْبِ كَمَثَلِ رِيشَةٍ مُعَلَّقَةٍ فِي أَصْلِ شَجَرَةٍ يُقَلِّبُهَا الرِّيحُ ظَهْرًا لِبَطْنٍ )

ويقول ( لقلب ابن آدم أسرع تقلبًا من القدر إذا استجمعت غليانًا )

**الإيمان يزيد وينقص

يزيد بالطاعه وينقص بالمعصيه

{ إِنَّمَا الْمُؤْمِنُونَ الَّذِينَ إِذَا ذُكِرَ اللَّهُ وَجِلَتْ قُلُوبُهُمْ وَإِذَا تُلِيَتْ عَلَيْهِمْ آياتُهُ زَادَتْهُمْ إِيمَانًَا وَعَلَى رَبِّهِمْ يَتَوَكَّلُونَ }

بل إنه من الصعب جدا ألا نتعرض للفتور

فعندما ذهب سيدنا حنظله ليشتكى لرسول الله صلى الله عليه وسلم وقال :

نَافَقَ حَنْظَلَةُ يَا رَسُولَ اللَّهِ، فَقَالَ رَسُولُ اللَّهِ صلى الله عليه وسلم : وَمَا ذَاكَ ؟ قُلْتُ : يَا رَسُولَ اللَّهِ ، نَكُونُ عِنْدَكَ تُذَكِّرُنَا بِالنَّارِ وَالْجَنَّةِ حَتَّى كَأَنَّا رَأْيُ عَيْنٍ ، فَإِذَا خَرَجْنَا مِنْ عِنْدِكَ ، عَافَسْنَا الْأَزْوَاجَ وَالْأَوْلَادَ وَالضَّيْعَاتِ نَسِينَا كَثِيرًا ، فَقَالَ رَسُولُ اللَّهِ صلى الله عليه وسلم : وَالَّذِي نَفْسِي بِيَدِهِ إِنْ لَوْ تَدُومُونَ عَلَى مَا تَكُونُونَ عِنْدِي وَفِي الذِّكْرِ ، لَصَافَحَتْكُمُ الْمَلَائِكَةُ عَلَى فُرُشِكُمْ وَفِي طُرُقِكُمْ ، وَلَكِنْ يَا حَنْظَلَةُ ، سَاعَةً وَسَاعَةً ، ثَلَاثَ مَرَّاتٍ ) .

بل لعله من الحكمه التعرض للفتور من وقت لأخر

وده مش معناه الاستسلام لهذه الحاله
لأن الله خلقنا للعباده وليس لنفتر ونغفل

وله من في السماوات والأرض ومن عنده لا يستكبرون عن عبادته ولا يستحسرون ( 19 ) يسبحون الليل والنهار لا يفترون ( 20 )

بل معناه انه طالما اننا معرضون لها وجب علينا معرفه اسبابها وطرق علاجها حتى نخرج منها سريعا فلا نستسلم ويستولى علينا اليأس والاحباط والحيره

أسباب وعلاج الفتور

للفتور أسباب كثيره وعلاجه يكون بتجنب أسبابهومن أهم هذه الأسباب :

1**عدم تعهد العبد إيمانه من حينٍ لآخر ، من حيث الزيادة أو النقص

فإن نفسك أن لم تشغلها بالحق شغلتك بالباطل
والإيمان إن لم نعمل على زيادته نقص ولابد

يقول أبو الدرداء رضي الله عنه : ( من فقه العبد أن يتعاهد إيمانه وما نقص منه ، ومن فقه العبد أن يعلم : أيزداد هو أم ينتقِص ؟ ) .
وكان عمر رضي الله عنه يقول لأصحابه : ( هلموا نزدد إيمانًا ، فيذكرون الله عز وجل )

فالحل : أن يتعود الانسان على محاسبه نفسه باستمرار ولا يترك نفسه حتى تتكالب عليه أسباب الفتور ويطول عليه الأمد

2*عدم وجود صحبه صالحه أو الأسوء وجود صحبه سيئه تشغله عن الحق وتزين له الباطل

: { وَيَوْمَ يَعَضُّ الظَّالِمُ عَلَى يَدَيْهِ يَقُولُ يَا لَيْتَنِي اتَّخَذْتُ مَعَ الرَّسُولِ سَبِيلًا(27)يَا وَيْلَتَى لَيْتَنِي لَمْ أَتَّخِذْ فُلَانًا خَلِيلًا(28)لَقَدْ أَضَلَّنِي عَنْ الذِّكْرِ بَعْدَ إِذْ جَاءَنِي وَكَانَ الشَّيْطَانُ لِلْإِنسَانِ خَذُولًا }

فالحل : بلزوم الصحبه الصالحه

{ وَاصْبِرْ نَفْسَكَ مَعَ الَّذِينَ يَدْعُونَ رَبَّهُمْ بِالْغَدَاةِ أتعشي يُرِيدُونَ وَجْهَهُ وَلَا تَعْدُ عَيْنَاكَ عَنْهُمْ تُرِيدُ زِينَةَ الْحَيَاةِ الدُّنْيَا } .

3*عدم معرفه الله حق معرفته فكلما زاد تعظيم الله فى القلب زادت همه العبد وأقباله على ربه

فالحل : القراءه وسماع الرقائق التى تتحدث عن حب الله ومعرفه الله
وكذلك الخوف من الله وعقوبته وما أعد للعاصين من العذاب
والرجاء وحسن الظن بالله وما أعد الله للمحسنين من الثواب

لنجمع بين الحب والرجاء والخوف

، يقول عمر بن الخطاب رضي الله عنه : ( لو نادى مناد من السماء : أيها الناس إنكم داخلون الجنة كلكم أجمعون إلا رجلاً واحدًا ، لخفت أن أكون هو ، ولو نادى مناد : أيها الناس إنكم داخلون النار إلا رجلاً واحدًا ، لرجوت أن أكون هو )


4** استحقار صغائر الذنوب ، والاستهانة بعقوبتها

عَنْ عَبْدِ اللَّهِ بْنِ مَسْعُودٍ رضي الله عنه أَنَّ رَسُولَ اللَّهِ صلى الله عليه وسلم قَالَ : إِيَّاكُمْ وَمُحَقَّرَاتِ الذُّنُوبِ ، فَإِنَّهُنَّ يَجْتَمِعْنَ عَلَى الرَّجُلِ حَتَّى يُهْلِكْنَهُ ، وَإِنَّ رَسُولَ اللَّهِ صلى الله عليه وسلم ضَرَبَ لَهُنَّ مَثَلًا كَمَثَلِ قَوْمٍ نَزَلُوا أَرْضَ فَلَاةٍ ، فَحَضَرَ صَنِيعُ الْقَوْمِ ، فَجَعَلَ الرَّجُلُ يَنْطَلِقُ فَيَجِيءُ بِالْعُودِ ، وَالرَّجُلُ يَجِيءُ بِالْعُودِ ، حَتَّى جَمَعُوا سَوَادًا ، فَأَجَّجُوا نَارًا ، وَأَنْضَجُوا مَا قَذَفُوا فِيهَا )

فالذنب على الذنب يقسى القلب ويسبب الفتور
قال تعالى ( كلا بل ران على قلوبهم ما كانوا يكسبون )

الحل : دوام الاستغفار والتوبه من جميع الذنوب صغيرها وكبيرها
والاكثار من دعاء النبي صلى الله عليه وسلم : ( اللهم مصرف القلوب صرف قلوبنا على طاعتك)

طيب ممكن المشكله تبقى فى حاجتين :

1) أحيانا بنبقى مستعجلين التغير ...يعنى عاوزين نخرج من حاله الفتور دى بسرعه
وده كويس لكن أحيانا بنفذه غلط فنبالغ فى الجدول
يعنى تبقى عارفه انك بتقومى تصلى الفجر بالعافيه ومع كده الجدول فى قيام طويل وجلسه الضحى وورد قرآن 5 أجزاء ...فطبيعى جدا انه يوم وتقعى من جديد

فالحل :
** اعملى جدول مناسب وزودى عليه بالتدريج

((فخير الأعمال أدومها وإن قل ))

** راعى فى الجدول حال قلبك ..

يعنى متخليش الجدول عبادات كثير وتنسى الرقائق
فالقلب محتاج يخرج من غفلته عشان يبدأ ينشط فى العباده

فحاولى تسمعى سلسله عن الدار الأخره أو الجنه أو النار كل يوم درس
وممكن تستمعى لدعاء مؤثر لأحد الشيوخ

2) تانى مشكلة هى اننا بيتسرب لنا شعور خفى بانه مفيش فايده
يعنى نحس انه مافيش فايدة....ما ياما دعيت...ياما صليت...أقول لربي إيه تانى؟؟....خلاص قولت كل اللى عندى.....ما انا كل مره برجع تانى
انا هحط الجدول بس عارفه انى مش هستمر

((وكأن الشيطان رمى فى قلوبنا نوع من انواع القنوط الخفى ...فبنرجع لربنا وأحنا مش واثقين اننا هنتغير بل اغلب ظننا اننا هنرجع تانى ))

والحل
قول الرسول صلى الله عليه وسلم

(استعن بالله ولا تعجز )
(ادعوا الله وأنتم موقنون بالإجابه )

وقوله تعالى فى الحديث القدسى

(أنا عند ظن عبدى بى فليظن بى ما شاء )

فاحسنى التطهر وصلى ركعتين لله فى جوف الليل

اطلبى توبته من كل الذنوب ما علمتى منها ومالم تعلمى
(فالسلف قلت ذنوبهم فعلموا من أين يأتون ونحن كثرت ذنوبنا فطبيعى الا نعلم من أين نؤتى )
اشتكى له ضعفك وانعدام حيلتك وتخبطك

فبأذن الله لو استمرتى فى سماع سلسله رقائق من جهه
ومجاهده نفسك للالتزام بجدول معقول من جهه
والاستعانه بالله بكل قوه واحسان الظن به ستجدى إن الأمور بدأت تتحسن


وان أحتجتى أى شىء يسعدنا التواصل معنا فى اقسام الاخوات

ونحن نتشرف ان تكونى من اعضاء منتدانا وسوف تجدى هنا الصحبة الصالحة النافعة ان شاء الله وان كان ليكى اى استفسار ممكن تكتبيه فى موضوع جديد هنا اوفى قسم الاخوات بعد تسجيلك
وان شاء الله قريبا جدا تشعرى انك راضيه عن نفسك وسعيده بطاعه ربك

أسأل الله ان يغفر لك ويرحمك ويهدى قلبك وييسر عليكى كل أمر عسير وينير بصيرتك ويرزقك السعاده فى الدنيا والاخره ويحبب اليكى الايمان ويكره اليك الفسوق والعصيان وان يرزقك الصحبه المعينه على طاعته فى الدنيا ويجمعكم معا فى الجنه
امين امين امين
والسلام عليكم ورحمه الله وبركاته

[غير مسجل]

رد: تعبت من المعاصى انا بحب ربنا اوى

شكر الله لكم ليست صاحبة الموضوع ولكن اعجبني الرد فجزاكم الله خيرا وجعله الله في موازين حسناتكم وجعله خالصا لوجهه الكريم