يارب اهدينى ياااااااااااارب(عاده سريه وأفلام إباحيه)

[غير مسجل]

السلام عليكم
انا النهاردة جاى فى موضوع تاعبنى نفسياً وإيمانياً
انا نفسى احب ربنا وقبل ما اقدم على المعصية افتكر ان احب ربنا فاقوم اترك المعصية من شدة حبى لله
بصراحه انا بقع فى ذنوب الخلوات ما بين فترات تتباعد وتتقارب
كل مره باتوب واندم فيها لحد ما يكاد قلبى يتمزق من كتر الندم
وبعد كده بفترة الاقى نفسى بقع فى المعصية تانى والمشكلة ان سلطان الشهوة يغلب داعى الايمان فى قلبى بقوة شديدة
فبقع اسير المعصية وانسى او اتناسى ان ربنا شايفنى ومطلع عليا وانه حيعذبنى بالذنب ده
انا بحاول وبقع وبقف واقع تانى
انا بقالى ست سنين نفسى ابطل المواقع الاباحية والعادة السرية وللاسف افضل فترة مبطلها
وارجعلها تانى
انا عارف ان ربنا حيعاقبنى بالذنب ده وعارف ان انا بدمر حياتى الزوجية اللى لسه معملتش اى حاجة عشانها
عارف ان ربنا حيعاقبنى ومش عتمتع بزوزجتى لان اشبعت نفسى بالحرام
فلن يشبعنى الله من الحلال
عارف ان ربنا حيخلى بينى وبين الناس وحشة بسبب معاصى السر
وفعلاً بحسها كتير
وبحس انى مضايق ومش عاوز اقابل حد
ولا عاوز اكلم حد
حتى كتير مش برضى ارد عالتليفون لو حد اتصل بيا من كتر خنقتى
بص يا شيخنا انا الحمد لله متدين وبقالى حوالى 5 سنين على طريق النجاة ( اللهم انى اسالك النجاة )
وبتعلم علم شرعى
ومش عزكى نفسى والله لو قلتلك انى بعيش ايمانيات عالية جداااااا
ومع ذلك بقع فى هذا الوحل القذر
انا مش فاهم ايه اللى انا فيه ده والله
ياترى انا منافق ولا ربنا بيخلينى احس انى متدين وبيستدرجنى وبقع فى المعاصى دى علشان انا سقطت من عينه
ياااااااااااااااارب انا والله لما بسح ان حد من الناس بيحتقرنى ببقى عتحرق ما بالك بربنا ؟؟؟!!!
النقطة دى رعبانى ومقلقانى ويمكن والله بتخلينى منامش
شيخنا الحبيب انا اتقبل اى اسلوب ولو كان شديد بس بالله ساعدنى ووضحلى وبينلى
انا تعبان انا بدمر نفسى وبقتلها .... وللاسف عارف ان كده غلط ومش عارف اجمد على نفسى وابعدها عن المعاصى
مع انى والله ماليش اصدقاء سوء خالص
ارجوا انك تعتبرنى ابنك اللى من دمك
وعشوف بقى ازاى عتنصح ابنك اللى عيشيل اسمك ويكون تربيتك قدام ربنا وفى المجتمع
انا على فكرة والدى متوفى ومن وانا عندى خمس سنوات
ومش بلاقى حد ينصحنى او يفهمنى او يوجهنى ... فياريت تساعدنى
ارجوا انك تدعيلى قبل ما تنصحنى بظهر الغيب لان ده دعاء مستجاب
اللهم اهدى عبدك الضعيف يرجوك ولكن تغلبه نفسه وشيطانه وهواه
منتظر ردك وجزاك الله كل خير

[فريق استشارات سرك فى بير(الأخوات)]

رد: يارب اهدينى ياااااااااااارب(عاده سريه وأفلام إباحيه)

و عليكم السلام و رحمة الله و بركاته

أهلا بك أخى الكريم على الطريق الى الله أسأل الله أن يصرف عنك السوء و يرزقك الخير كله

عايزين نتفق على حاجة في الأول

قال تعالى :

قُلْ يَا عِبَادِيَ الَّذِينَ أَسْرَفُوا عَلَىٰ أَنفُسِهِمْ لَا تَقْنَطُوا مِن رَّحْمَةِ اللَّـهِ إِنَّ اللَّـهَ يَغْفِرُ الذُّنُوبَ جَمِيعًا إِنَّهُ هُوَ الْغَفُورُ الرَّحِيمُ ﴿الزمر: ٥٣﴾


يغفر الله الذنوب جميعا

و سبحان الله يتوب علينا و يرزقنا التوبة

فإوعي تيأس أبدا من الرجوع و التوبة إلى الله تعالى

فالتوبة هي عبادة العمر

و مالناش غير اننا نستغفر و نتوب لأن أكيد سنرتكب الذنوب

فلو لم نذنب لأتي الله بقوم يذنبون فيستغفرون فيغفر الله لهم

فماتلتفتش أبدا لوسوسة الشيطان

و كلما غلبك الذنب استغفر و توب تجد الله غفارا رحيما

بص الحديث دا

قال رسول الله صلى الله عليه وسلم :

إن عبدا أصاب ذنبا ، وربما قال : أذنب ذنبا ، فقال : رب أذنبت ، وربما قال : أصبت ، فاغفر لي ، فقال ربه : أعلم عبدي أن له ربا يغفر الذنب ويأخذ به ؟ غفرت لعبدي ، ثم مكث ما شاء الله ثم أصاب ذنبا ، أو أذنب ذنبا ، فقال : رب أذنبت - أو أصبت - آخر فاغفره ؟ فقال : أعلم عبدي أن له ربا يغفر الذنب ويأخذ به ؟ غفرت لعبدي ، ثم مكث ما شاء الله ، ثم أذنب ذنبا ، وربما قال : أصاب ذنبا ، قال : قال : رب أصبت - أو قال : أذنبت - آخر فاغفره لي ، فقال : أعلم عبدي أن له ربا يغفر الذنب ويأخذ به ؟ غفرت لعبدي ، ثلاثا ، فليعمل ما شاء

صحيح البخاري

و طبعا دا لا يتنافى أبدا أبدا على المجاهدة في ترك الذنب و العزم عل ترك الذنب و دا من شروط التوبة

يعني ماينفعش أرتكب ذنب و أقول ربنا كدا كدا هيغفرلي !!

لازم أصر و أعزم و أنوي اني سأترك الذنب و أندم عليه

و لكن ان وقعت فيه أتيقن اني هتوب مرة أخرى و يتوب الله علي

طيب نقلع عن الذنب دا إزاي؟؟

تخيل هذا المشهد

إنك أثناء الذنب يأتي ملك الموت

هتحب تموت على الذنب دا ؟؟

و من مات على شيء بعث عليه

تقابل الملك يوم القيامة بالذنب دا ؟؟؟

و الا تحب تقابله ساجد ؟؟



أو بتذكر ؟؟؟ أو صايم ؟؟؟

دا مشهد و دا مشهد تحب تختار أي المشاهد ؟؟

و لازم يبقى عندك حلول عمليه لهجر الذنب تثبت صدقك لله تعالى

كيفية الثبات على الطاعة

علشان نمشي فى الطريق صح لازم نحدد هدف وهو رضا ربنا علينا

وعلشان ترضي ربنا عليك فيه حاجات ربنا بيحبها يبقى لازم نعملها

نضرب لك مثل ولله المثل الاعلي

لو فيه حد عزيز اوى عليك وبتحبه وتتمنى ان يرضى عليك

وبتستنا زيارته ومقابلته بفارغ الصبر

والحد ده لمابيطلب منك حاجة فورا بتنفذها

ليه بتنفذها؟

علشان بتحبه

ولله المثل الاعلى!..

كلنا بنقول بنحب ربنا

بس المحبة مش قول المحبة قول وفعل

يعنى اللى بيحب ربنا بيعمل كل عمل يرضى ربنا عليه

فالخطوات العملية اللى حضرتك تاخدها فورا علشان تثبت على الطاعة

وتبعد عن اى معصية او اى حاجة ممكن ترجعك زى الاول

اولا المحافظة على الصلاة ( الفرائض )

ثانيا المحافظة على سنن الصلاة

اللى هى 2قبل الفجر و4 قبل الظهر و2بعده و2بعد المغرب و2 بعد العشاء

فى الحديث القدسي

قال الله تعالى

من عادى لي ولياً فقد آذنته بحرب مني، وما تقرب لي عبدي بشيء أحب إلي مما افترضته عليه، ومازال عبدي يتقرب إلي بالنوافل حتى أحبه فإذا أحببته كنت سمعه الذي يسمع به وبصره الذي يبصر به ويده التي يبطش بها وقدمه التي يمشي بها وإذا سألني لأعطينه وإذا استغفرني لأغفرن له وإذا استعاذني أعذته

يبقى علشان تثبت لازم تعمل كل عمل يقربك من ربنا

وتحس بلذة الطاعة والايمان فى قلبك

ثالثا ودى مهمة جدا جدا جدا الصحبة الصالحة

انك تشوف حد عون لك على الطاعة ياخد بإيدك لطريق ربنا

دايما يكون حريص على انه يدلك على كل خير وطاعة

ودى من اهم عوامل الثبات على الطاعة

هاتقول مش لاقي فى الكلية هاقولك لا موجودين بفضل الله فى كل مكان وبفضل الله تعالي

الملتزمين فى ازدياد لاتجد بيت لايخلو من شاب ملتزم متسمك بالسنة

ومش شرط تكون عارفه علشان تكلمه

انت شاب فى الكلية ادخل مسجد الكلية عندك وشوف شاب تتوسم فيه الاستقامة والصلاح

واقعد اتعرف عليه وفضفض معاه واتصاحب عليه وتأكد انه هايقبلك وهايتصاحب عليك

بس اياك تتكسف انت بتدور على اى حاجة تقربك من ربنا متخليش الشيطان

يكسلك ويقولك ازاى هاتكلم واحد متعرفوش

استعن بالله واتعرف على شاب ملتزم وخليه اخ لك فى الله

ولو تعثر العثور على اخ فى الكلية

اذهب لاى مسجد فيه دروس علم وبفضل الله كل مساجد السنة فيها دروس

وهناك هاتلاقي جنة الدنيا فى دروس العلم

هاتلاقي شباب ربنا يبارك فى اعمارهم وجوههم كالقمر اول لما تدخل المسجد

هاتلاقي المسجد كله ملتزمين والجو العام هايغيرك جدا جدا

وبفضل الله المنتدى هنا فيه الصحبة الصالحة اللى بنقولك عليها

رابعا انك تدعي ربنا من كل قلبك وتبكى وتتذلل لله وتقول

يارب ثبتنى يارب انا بحبك ماليش غيرك

يارب لاحول ولاقوة لي الا بك

انا ضعيف وقلبي بيدك ثبت قلبي على طاعتك

والدعاء يكون فى احب الاوقات اللى هو فى الثلث الاخير من الليل

تقوم تصلى ركعتين قبل الفجر بنص ساعة

والله هاتلاقي الوضع تغير تماما تماما بعد الركعتين دول

خامسا انك تشغل وقتك دايما علشان مايكونش فيه فرصة للشيطان انه يفكرك بأى ذنب

يعنى مابين قراءة قرآن وصيام وذكر لله تعالي

تسمع كل يوم درس لشيخ انت بتحبه

وان شاء الله هاتلاقى يومك مليان وكله طاعة لله تعالي

وتاخد بالك من دراستك وتجتهد فيها وربنا يوفقك لكل خير


والان مع مشكلة

العاده السريه..!!!!

مشكلة عدم غض البصر وفتنة النساء ..!!!!

المواقع الإباحية ..!!!

مشاكل للأسف انتشرت عند كثير من الشباب

إلا من رحم ربي..


الرغبة فى التوبه وقولى انى عاوز ابعد

مش وسيلة علاج ولكنها تمهيد لبدء العلاج
فلا تتوقع أبدا أن تعيش حياتك بنفس الأسلوب ونفس الأصدقاء ونفس الطريقة ثم تجد إن مشاكلك انتهت وذنوبك اختفت !

فاعلم اخى انه ليس هناك حل واحد سحري للمشاكل
بل على الإنسان إتباع مجموعة من الوسائل للخروج من الأزمة أو التخلص من العقبة ، فليس الحل في قرص من الدواء يكون مفعولة سحري
يخلصك من إدمانك على العادة السرية

وليس الحل معرفة تدريب سلوكي واحد يخلصك من المشكلة ولكن أنت تقول أنك تمارس هذه العادة كتيرفليس من المعقول أن تأخذ قرص ينهى متاعبك


بداية

مفيش عصاة سحرية ولا في حبوب يأخذها الإنسان ليصبح بلا عيوب وبلا ذنوب !

فالشكوى وعدم الرضا عن النفس

{ إِنَّ اللَّهَ لَا يُغَيِّرُ مَا بِقَوْمٍ حَتَّى يُغَيِّرُوا مَا بِأَنْفُسِهِم} [الرعد : 11]


فالأمر كله استعانة بالله ومجاهدة وبإذن الله سنذكر حلول عملية


اول حاجة

1 -- أنت فعلا عاوز تتوب وعاوز تتوب ليه ؟؟؟

أحيانا النفس بتكتفى بالإعتراف بإنها سيئة وبس !!

يعنى بتبقى نوع من أنواع إراحة الضمير

أنا وحش ،، أنا سىء،،، أنا منافق

ثم

لاشىء ........

فأول شىء كن صادق في طلب التوبة

الي عاوز شىء بيجاهد عشان يحصل عليه

وعلى قدر رغبته فيه على قدر محاولاته عشان يوصل له .

وتانى حاجة

عاوز تتوب ليه ؟

عشان خايف حد يعرف ذنبك ؟

ولا عشان خايف من بعض الأضرار الصحية ؟

لازم تكون عاوز تتوب لله

عشان هو يرضى

عشان خايف منه وبتحبه

ودليل ده إنك تحاول تقرب له بأكثر من وسيلة

مش معقول يكون واحد جاى يشتكى من المواقع السيئة وعاوز يبطلها ومش فارق معاه إنه مبيصليش ومبيفكرش من الأساس إنه يصلي !!انا عارف انك مش كدة

أنت متأكد إنك كده عاوز تبطلها لله !!!

فصحح النية إنها لله

لإنها لو لله سيعينك الله

طب إزاي أزود رغبتي في التوبة وتكون خالصة لوجه الله ؟؟

1* تكره الذنب وتستشعر مدى قبحه

اعرف حجم المشكلة : المشكلة مش في ذنب بتعمله وتضايق بعدها وعادي ترجع تعمله تاني

المشكلة :

إن كل مرة بتعمل فيها الذنب قلبك بيظلم ..بيسود

كل مرة بتعمل فيها الذنب بتحرم نفسك رزق (فإنما يحرم العبد الرزق بالذنب يصيبه )

2* اعرف ربنا

اعرفه وحبه وخاف منه عشان تنجى في الدنيا والأخرة

2* إستعانة شديدة بالله مع يقين بالإجابة

مهما حاولت ومهما عملت أنت عبد ضعيف ليس لك حول ولا قوة ..لازم تعترف لنفسك بكده ..ولازم تقول يارب..قوينى وساعدنى مليش غيرك ..

ده سيدنا يوسف(عليه السلام) مع إنه نبى ولكنه استعان بالله علشان يبعد امرأة العزيز عنه..قال

(وَإِلَّا تَصْرِفْ عَنِّي كَيْدَهُنَّ أَصْبُ إِلَيْهِنَّ) فربنا استجابله ونجاه..

(فَاسْتَجَابَ لَهُ رَبُّهُ فَصَرَفَ عَنْهُ كَيْدَهُنَّ إِنَّهُ هُوَ السَّمِيعُ الْعَلِيمُ)

يبقى لازم تقول يارب وانت على يقين إنه سبحانه وتعالى شايفك وحاسس بيك ولو أنت عندك نيه صادقه فى التوبة هيقربك ويبعدك عن أى معصية ..لإنه خلقك وهو الوحيد سبحانه وتعالى اللى عالم بضعفك وعلشان كده لن يتركك وبإذن الله برحمته هينجيك من المشكله دى..بس أصدق مع الله ..!!

3 * لا تيأس ...ولا تسمع لوساوس الشيطان

فلا تيأس لو طال وقت العلاج

هناك من الأمراض ما تكفيه جرعة أو اثنين من الدواء

وهناك أمراض صعبة تحتاج علاج مدة طويلة

وقد لا يرى المريض نتيجتها في البداية ولكن هذا لا يعني إنها لا تعمل ولكنها فقط تحتاج إلى وقت

فالوقت جزء من العلاج

( الطاعة شفاء للقلب كالعلاج لا تظهر نتائجه من جرعة واحدة وإن كانت كبيرة أو حتى كبيرة جدا

و لكن بالمداومة ، وكلما كان المرض شديداً طال وقت العلاج)

وقد ورد عن أحد السلف مجاهدته لذنب 20 عام ! فلم ييأس وتاب الله عليه.

فسبحان الله أن تموت و أنت على الطريق لله والمجاهده

حتى و إن لم تصل إلى ما تريد أم أن تموت مصرا على المعصية قانطا من رحمة ربك ؟؟!!!!

وخد الهدية دية

مجموعة دروس قيمه تقربك من ربنا

هنـــــــا

الخطوات العملية

(قبل الوقوع في الذنب ، وعند الرغبة فيه ، وبعده)

●●●●●●●●●●●●●●●●

قبل الوقوع في الذنب

1)) أغلق كل أبواب المعصية

** أنت رقيب على نفسك فأى شىء يثير في نفسك الذنب ابعد عنه

**غض بصرك ،ابتعد عن الأغاني والإختلاط

**فى التليفزيون ..إلغى كل القنوات الغير إسلامية

**فى النت..

غير مكان جهاز الكمبيوتر وضع خلفية دينية عن مراقبة الله

1) الغى خاصية اظهار الصور ..

2) غير لشركة فيها خدمة حجب المواقع الإباحية

3) ضع برنامج مانع للمواقع الاباحيه..

ودة

برنامج جديد وفعال لحجب المواقع الاباحية والضارة - برمجة مصرية

2) حصن نفسك وطهر قلبك

حصن نفسك دائما بالذكر وأذكار الصباح والمساء

وطهر قلبك : فالمشكلة أساسا في القلب فإنه لو صلح لصلح الجسد كله ،

فطهر قلبك بــــ

بسماع القرآن والإستغفار وكثرة السجود والدعاء والصدقة

فالقرآن : شفاء لأمراض القلب

والإستغفار : يزيل الران والسواد الذي يتكون على القلب نتيجة الذنوب

والسجود والدعاء : وسيلة قربك من ربك

والصدقة : أمر هام جدا قد يغفل عنه الكثير فهى تطفأ الخطيئة وتطهر النفس

قال الله{خُذْ مِنْ أَمْوَالِهِمْ صَدَقَةً تُطَهِّرُهُمْ وَتُزَكِّيهِمْ بِهَا وَصَلِّ عَلَيْهِمْ إِنَّ صَلَاتَكَ سَكَنٌ لَهُمْ وَاللَّهُ سَمِيعٌ عَلِيمٌ} [التوبة : 103]

3) إلزم الصحبة الصالحة والمسجد

فصحبة السوء لن تأتي من وراءها إلا السوء

فاحرص على الصحبة الصالحة التي تذكرك بالله وتعينك على طاعته

عند الرغبة في الذنب

1) جاهد نفسك من البداية

فمجاهدة الخواطر أسهل من أن تتمادى فيها

فتتحول الخاطرة لحديث نفس ثم إراده ثم عزم ثم فعل

فمجاهدتها من البداية أيسر

2)- إياك أن تعتمد على حولك و قوتك

بسرعة ارفع نظرك إلى السماء و استغث بربك أن ينجيك من المعصية واستعذ به من شر نفسك والشيطان

3) تذكر قدرة الله عليك

و أنه قادر سبحانه أن يشل قدمك أو يعمي بصرك .. او يقبض روحك و أنت على هذا الذنب

( أَفَأَمِنَ الَّذِينَ مَكَرُوا السَّيِّئَاتِ أَنْ يَخْسِفَ اللَّهُ بِهِمُ الْأَرْضَ أَوْ يَأْتِيَهُمُ الْعَذَابُ مِنْ حَيْثُ لَا يَشْعُرُونَ (45) أَوْ يَأْخُذَهُمْ فِي تَقَلُّبِهِمْ فَمَا هُمْ بِمُعْجِزِينَ (46) أَوْ يَأْخُذَهُمْ عَلَى تَخَوُّفٍ فَإِنَّ رَبَّكُمْ لَرَءُوفٌ رَحِيمٌ (47)

و تذكر مراقبته عز و جل لك و أنه معك و يراك

4) قم فورا واشغل نفسك بطاعة

بعد الذنب

1) تب فورا و اتبع السيئة بالحسنة تمحوها أنت فى معركة وعدوك الشيطان فإن انتصر عليك في جوله فسارع بهزيمته ولا تجعله يرفع راية النصر

أذنبت اتبع هذا الذنب بطاعة قم فصلى مدة أو أقرأ جزءا من القرآن ، تصدق بصدقة كبيرة ، وحاول أن تزيد فى كل مرة فى الطاعة حتى تكسر الشيطان وتربي نفسك

(السر بالسر و العلن بالعلن)

يعني إذا عصيت الله في السر .. فافعل طاعة في السر

2) وعاقب نفسك وزود العقوبة

فنفسك كالطفل إن لم تعاقبه على أخطاؤه لم يتربى ولم يرتدع فاحرمها من شىء تحبه ولا تهمل محاسبتها

لو وقعت في الذنب مرة أخرى ارفع العقوبة و اجعلها أشد حتى لا تستهين بالذنب

ولا تنسى العقوبة النفسية

اسمع درس فورا عن

النار - الجنة - سوء الخاتمة - نعم الله

حتى تستغل لحظة ضعفك و ندمك في أن تكون دفعة قوية لتوبة نصوح

3) إياك ان تسئ الظن بالله و إياك و الإحباط
واخيرا

إزاى تعرف إن كنت ماشي فى طريق التوبة ولا لأ ؟؟؟

_حتى وإن تكرر الوقوع في الذنب (وهذا يشمل أى ذنب )_

●●●●●●●●●●●●●●●●

1) عدم الإصرار على الذنب :

وعلامة ذلك إنه لا يكون هناك ترتيب مسبق للذنب وأن يكون قطع كل الوسائل التي تؤدي للذنب وفعل كل وسائل التحصين

{وَالَّذِينَ إِذَا فَعَلُوا فَاحِشَةً أَوْ ظَلَمُوا أَنْفُسَهُمْ ذَكَرُوا اللَّهَ فَاسْتَغْفَرُوا لِذُنُوبِهِمْ وَمَنْ يَغْفِرُ الذُّنُوبَ إِلَّا اللَّهُ وَلَمْ يُصِرُّوا عَلَى مَا فَعَلُوا وَهُمْ يَعْلَمُونَ} [آل عمران : 135]

2) عدم الإستجابة في كل مرة للنفس الأمارة بالسوء بل يجاهدها مرات وربما ضعف مرة {وَالَّذِينَ جَاهَدُوا فِينَا لَنَهْدِيَنَّهُمْ سُبُلَنَا وَإِنَّ اللَّهَ لَمَعَ الْمُحْسِنِينَ} [العنكبوت : 69]

3) أن يفوق من غفلته سريعا فيتدراك أمره

{إِنَّ الَّذِينَ اتَّقَوْا إِذَا مَسَّهُمْ طَائِفٌ مِنَ الشَّيْطَانِ تَذَكَّرُوا فَإِذَا هُمْ مُبْصِرُونَ} [الأعراف : 201]

4) التوبة والإستغفار بعد الذنب وأن يتألم قلبه بشده بعد فعل الذنب

{وَالَّذِينَ إِذَا فَعَلُوا فَاحِشَةً أَوْ ظَلَمُوا أَنْفُسَهُمْ ذَكَرُوا اللَّهَ فَاسْتَغْفَرُوا لِذُنُوبِهِمْ وَمَنْ يَغْفِرُ الذُّنُوبَ إِلَّا اللَّهُ }

5) اتباع السيئة بالحسنة وعدم ترك الطاعة واليأس

فبعد كل ذنب يتوب ويفعل أعمال صالحة فلا ييأس أبدا ولا يترك طاعة يفعلها لفعله الذنب بل يزيد فى الطاعة لتمحوه

6) أن يكون بشكل عام يتقرب إلي الله ويتغير للأفضل

إن كان فى الطريق الصحيح فسيجد إنه يتغير في كثير من الأمور
ولكن قد يستصعب على الإنسان ذنب معين فيحتاج منه وقت أكثر ومجاهدة أكبر

فعنه صلى الله عليه وسلم ما من عبد مؤمن إلا و له ذنب

فالرسول لم ينفي عنه الإيمان وقال ذنب وليس ذنوب فالعبد قد يضعف أما م ذنب دون أخر ولكن يجاهد نفسه فيه حتى يمن الله عليه بالتوبة

فإن كنت كذلك فأنت في الطريق الصحيح فاصبر وجاهد نفسك وادعي الله كثيرا وسيمن الله عليك بالتوبة ولو بعد حين

وإن كنت غير ذلك فادعي ربك أن يرزقك الصدق في التوبة

وارجع لنفسك فانظر هل حققت أسس حل المشكلة من الإخلاص والاستعانة بالله وعدم اليأس ؟ وهل حققت الخطوات العملية ؟

هذا هو الشق الاول من العلاج

اما الشق الثاني المكمل لحالتك

هو العلاج بالتدريبات السلوكية

لأنك تحتاج التدريب على التحكم في سلوكك وتخفض من توترك وقلقك الذي يستمر معك ، وهناك مقولة شهيرة في العلوم النفسية أن التفكير في الجنس يستحضر الجنس ويزيد من الرغبة الجنسية ،

ومن خلال خبرتى مع حالات مثل حالتك لابد من التدريب على بعض المهارات السلوكية وأساليب الإلهاء المعرفية

لتغير نمط العادات السلوكية والفكرية لدى العميل وأنا أتوجه إليك ببعض من التدريبات وليس النصائح بل هي تدريبات سلوكية تحتاج منك أن تقوم بإتباعها لتساعدك في التخلص من العادات السلبية وتسيطر بها على سلوكياتك الجامحة منها : ممارسة أنشطة رياضية ولو رياضة المشي يوميا

الابتعاد نهائيا عن أي مثيرات تخلق لديك الرغبة في ممارسة العادة السرية مثل ( المواقع الإباحية - الصور المثيرة - الإعلانات والبرامج التي تستنهض الرغبة لديك وما شابه ذلك )

ممارسة تدريبات الاسترخاء العضلي يوميا

البحث عن تعلم أشياء جديدة لم تكن تعلم عنها شيء من قبل مثل لغة جديدة ، مهارة جديدة نشاط جديد ولو تطوعي

عدم مجالسة أصدقاء السوء الذين يشغلهم ويسيطر عليهم الفكر الجنسي في أغلب يومهم بدون عمل مفيد .

الابتعاد عن الاختلاء بنفسك في غرفة لوحدك أو داخل الحمام لفترة كبيرة حتى لا تطاردك الأفكار الجنسية .

لا تنام في غرفة والباب مغلق عليك .

حاول قبل النوم أن تمارس هواية القراءة في مواضيع جيدة أو ممارسة بعض التمارين الرياضية الخفيفة .

حاول أن تبدأ في تنظيم مواعيدك بحيث لا يكون عندك وقت فراغ بدون عمل مفيد

اهتم بنوعية غذائك وتنوعه وانتقى منه ما يفيدك ويعطى لك الراحة والشعور بالهدوء .

لا تسمح لنفسك بالدخول في صراع بين الرغبة في ممارسة العادة السرية واجتنابها بل فك الصراع بعمل يدوى في الحال مثال ترتيب دولاب ملابسي عمل طبق من الطعام اللذيذ، ترتيب مكتبتي وفهرست الكتب من جديد ..

الجلوس مع أسرتي قراءة القران أو الوضوء والصلاة والتقرب إلى الله بالدعاء .

حاول دائما أن تكون في حالة استرخاء ذهني وجسدي من خلال ممارسة تمارين الاسترخاء فهي مفيدة في مثل حالتك .

لا تقلق فالقلق يزيد من توترك ورغبتك في ممارسة العادة السرية فحاول أن تكون هادئ ومسترخي بقدر ما تستطيع .

وتذكر أن طريق الألف ميل يبدأ بخطوة أبدء أنت بالخطوة وسوف تجد الله سبحانه وتعالى بجانبك أرجو مراسلتنا لنطمئن عليك

واخيرا

عيش ما اجمل ما رأيت

عينك أمانة

ولأى إستفسار شاركنا في

مستشفى الطوارىء الايمانية

واخيرا نسأل الله لنا ولكم صلاح الحال والثبات

[غير مسجل]

رد: يارب اهدينى ياااااااااااارب(عاده سريه وأفلام إباحيه)

تفضل يا اخي هذا الموضع سيفيدك جداا
دلوقتي هتقدر تغمض عينيك (حملة لا للمواقع الإباحية)
https://forums.way2allah.com/showthread.php?t=181790