جزاكم الله خيرا

[غير مسجل]

السلام عليكم و رحمة الله و بركاته
يا فريق الاستشارات
ازاي ممكن ارضي ربنا ؟ و ازاي أعرف انه راضي عني و قبل توبتي ؟
ازاي ممكن اتوب توبة نصوح بجد و يكون فيها ندم من القلب فعلا ؟
و لو القلب مات ازاي ممكن نحييه ثاني ؟
أتمنى تجاوبوني
و اعتذر منكم على كثرة الاسئلة
جزاكم الله خيرا

[فريق استشارات سرك فى بير(الأخوات)]

رد: جزاكم الله خيرا

قالوا الاعتراف بالمشكلة هو نصف الحل ...

فمشاكل الذنوب ممكن تتحل لو القلب اتغير و قرب من ربنا ....لأن كل المشاكل دي تعتبر أعراض
و أنت لما بتاخد علاج بتاخده للمرض نفسه مش للأعراض

قال رسول الله صلى الله عليه وسلم
ألا وإن في الجسد مضغة : إذا صلحت صلح الجسد كله ، وإذا فسدت فسد الجسد كله ، ألا وهي القلب .
الراوي: النعمان بن بشير المحدث: البخاري - المصدر: صحيح البخاري - الصفحة أو الرقم: 52
خلاصة حكم المحدث:: [صحيح]


يعني أنت عاوز تتغير و تقرب من ربنا و لكن مش عارف وبترجع تاني

الصراع ده طبيعي لأننا كلنا جوانا الخير و الشر لكن المهم مين أقوى جواك؟؟
و إزاي أقوي جانب الخير عشان أقدر أتغير؟؟

هقولك مثال بسيط جدا
لو عندك زرعتين واحدة بتسقيها باستمرار و واحدة لأ ..الطبيعي اللي بتسقيها هتبقى أقوى و الثانية هتضعف ....
نفس الحكاية لو احنا عاوزين نقوي جانب الخير أو علاقتنا مع ربنا

وهنقول كلام عملي , أنت بتدخل لقلبك إيه طول اليوم ؟؟؟؟؟

ببساطة كده هسألك عن أربع حاجات إنت بتسمع إيه و بتشوف إيه و بتتكلم عن إيه و بتفكر في إيه؟؟؟؟؟

و بسأل عن الأربعة دول لأن دول الطريق لقلبك
هنلاقى إن أغلب يومنا بيدور عن الكلام عن الدنيا و الكلية و المذاكرة و مشاكلنا مع أهلنا و آخر الأخبار ........ إلى آخره

الحل العملي البسيط جدا و الفعال جدا كمان إن شاء الله

خلي ليك وقت يومي تسمع عن ربنا و تتكلم عن ربنا و تفكر في حالك معاه و تنظر في كتابه و احنا ممكن نساعدك هنا في المنتدى , تعالى قسم الحب فى الله و تعرف على أخوه لك هتشجعوا بعض و هتحس إنك بتتغير إن شاء الله
لأن عدم وجود الوسط و الصحبة سبب مهم جدا من أسباب عدم الثبات

اسمع { إِنَّ اللَّهَ لَا يُغَيِّرُ مَا بِقَوْمٍ حَتَّى يُغَيِّرُوا مَا بِأَنْفُسِهِمْ } [الرعد : 11]

يعني لو حياتك فضلت زي ماهي و اهتماماتك زي ما هي و أسلوب حياتك زي ما هو تفتكر التغير هييجي منين ؟؟

عشان نعمل أى شئ في الدنيا لازم يبقى عندنا دوافع عشان نقدر نعمله..

فإن قويت الدوافع فعلنا الشئ بكل سهولة و يسر ..
وإن ضعفت كان الشئ ثقيل علينا و تكاسلنا عنه ..
هذه قاعدة عامة فى كل أمور الحياة

ومن أقوى الدوافع :
1) الحب
2)الاحتياج

فالطالب لو عنده رحلة مدرسية هيصحى بدرى حتى لو مش نايم وقت كافي لأنه بيحب الخروج و ممكن نفس الطالب يكون بيصحى بصعوبة شديدة جدا في يوم دراسي عادي لأنه معندوش دافع و مش بيحب الدراسة

فلماذا يقوم الطالب مبكراً في يوم الرحلة المدرسية حتى و لو لم ينم وقتاً كافياً ، لأنه يحب الذهاب للعب و المرح وربما نفس الطالب يعاني أشد المعاناة في الذهاب ليوم دراسي عادي لأنه لا يحب المدرسة بسبب استثقاله للعلوم المدرسية

وكذلك الاحتياج
فالموظف قد لا يحب عمله و لكنه لا يتغيب عنه أبداً ..لأنه يحتاج للمرتب و يعلم أن غياب يوم واحد سيتسبب له في مشكلة كبيرة .

فعشان يحصل تغير لازم نزود حب ربنا في القلب و نزود فهمنا بمدى احتياجنا للدين و أهميته

يعنى البداية هتبقى بمعرفة ربنا
و معرفة ثواب الأعمال و عقوبتها مع وجود صحبة صالحة

و احنا هنسهل عليك الموضوع بإذن الله
كل ما عليك إنك تسجل بأى اسم في المنتدى
و اعمل موضوع في قسم
التواصل الإيماني

وإن شاء الله هنتابع معاك خطوة خطوة من البداية

هننتظرك قريبا
فلا تتأخر
قال تعالى :

{وَسَارِعُوا إِلَى مَغْفِرَةٍ مِنْ رَبِّكُمْ وَجَنَّةٍ عَرْضُهَا السَّمَاوَاتُ وَالْأَرْضُ أُعِدَّتْ لِلْمُتَّقِينَ} [آل عمران : 133]

نسأل الله أن ييسر لك أمرك كله