إعـــــــلان

**غير مسجل** · 18-03-2012, 06:14 PM

رد: اريد التوبة لله

http://www.youtube.com/watch?v=JZWBZqkzAuQ

18-03-2012, 07:03 PM

رد: اريد التوبة لله

أولا..
أهلا بكم اختنا الفاضلة في بيتكم الثاني الطريق الى الله ..

ثانيا ..
اول سؤال بيجي في ذهن اي انسان عصى ربنا هو :

هو ممكن ربنا يقبلني ؟؟

ده مش ممكن ..!!!
ده اكيييييييييييد ربنا هيقبلك لو تبتي ورجعتيله بصدق..
إوعي تسمعي للشيطان والنفس اللي بيقولوك إن ربنا مش هيقلبك ، إوعى يتسرب لقلبك ذرة يأس ! إوعى !!!
مهما عملتي من الذنوب والمعاصي .. إوعي تيأس أبداً.. حتى لو سرقتي وقتلتي وزنيتي وعملتي اللي محدش عمله، إوعي تيأسي أبداااااااااااااااا..
باب التوبة مفتوح وربنا رحمته فوق ما يتصور أي بشر..
إسمعي ربك بينادي عليكي ويقولك :
(قُلْ يَا عِبَادِيَ الَّذِينَ أَسْرَفُوا عَلَى أَنْفُسِهِمْ لا تَقْنَطُوا مِنْ رَحْمَةِ اللَّهِ إِنَّ اللَّهَ يَغْفِرُ الذُّنُوبَ جَمِيعًا إِنَّهُ هُوَ الْغَفُورُ الرَّحِيمُ) الزمر:53 ..

شوفتي ربنا بيقول إيه
(إِنَّ اللَّهَ يَغْفِرُ الذُّنُوبَ جَمِيعًا)
يعني لو عملتي كل الذنوب ، بس توبتي ورجعتي لربنا ؛ ربنا هيغفرهالك..
ده ربنا هو الغفور الرحيم ..
بس إنتي إرجعي وقول يارب .. وتأكدي مليون % إنك مجرد ما هتحاولي تهربي من المعاصي وتقربي من ربنا ..
هتلاقي الرحمن الرحيم بيقولك :
( وَهُوَ الَّذِي يَقْبَلُ التَّوْبَةَ عَنْ عِبَادِهِ وَيَعْفُو عَنِ السَّيِّئَاتِ وَيَعْلَمُ مَا تَفْعَلُونَ)
هتلاقي الملك الكريم بيقولك في الحديث القدسي :
(من جاء بالحسنة فله عشر أمثالها وأزيد ، ومن جاء بالسيئة فجزاء سيئة مثلها أو أغفر ، ومن تقرب مني شبراً تقربت منه ذراعاً ، ومن تقرب مني ذراعاً تقربت منه باعاً ، ومن أتاني يمشي أتيته هرولة) حديث صحيح
وفي حديث تاني ، قال الله :
( يا ابن آدم إنك ما دعوتني ورجوتني غفرت لك على ما كان منك ولا أبالي! يا ابن آدم لو بلغت ذنوبك عنان السماء ثم استغفرتني غفرت لك ولا أبالي ، يا ابن آدم لو أنك أتيتني بقراب الأرض خطايا ثم لقيتني لا تشرك بي شيئا لأتيتك بقرابها مغفرة)
يآآآآآآآآآآآآآآآآآآآآآآآآآآه ..
شوفتي رحمة أكتر من كده ؟؟
إوعي تيأسي أبداً ..
إنتي ممكن تكوني عملتي ذنووووب عظيييييمة ؛
بس الذنب الأعظم إنك تفتكري إنك لو تبتي ورجعتي إن ربنا مش هيغفرلك !
ده إنتي لو رجعتيله وبدأتي تعملي اعمال خير مش بس هيغفرلك ؛ ده سيئاتك كلها هتتبدل لحسنات !!
قال الله تعالى :
( إِلَّا مَنْ تَابَ وَآمَنَ وَعَمِلَ عَمَلًا صَالِحًا فَأُولَئِكَ يُبَدِّلُ اللَّهُ سَيِّئَاتِهِمْ حَسَنَاتٍ وَكَانَ اللَّهُ غَفُورًا رَحِيمًا ) الفرقان:70
يعني سجلاتك السودا وملفاتك كلها هتتمحي .. ويتحط بدلها أطهر وأحسن سجلات ....
مستنية إيه بقى ؟؟؟!!
أحسني الظن بالله يا أختي..
مين اللي وقف على باب الكريم وطرده ..؟؟!!!
مين اللي لجأ اليه واستعان بيه وضيعه؟! ميييييين ؟؟!!
ده ربنا أكرم مما نتصور وأرحم بينا من أي حد!
شوفي الحديث اللي يخلّي القلب ينخلع من مكانه،
قال رسول الله صلى الله عليه وسلم :
( لله أفرح بتوبة عبده المؤمن من رجل نزل في أرض دوية مهلكة معه راحلته عليها طعامه وشرابه، فوضع رأسه فنام ،فاستيقظ وقد ذهبت راحلته! فطلبها حتى إذا اشتد عليه الحر والعطش أو ما شاء الله ، قال أرجـع إلى مكاني الـذي كنت فيه فأنـام حتى أموت ! فوضع رأسه على ساعده ليموت ، فاستيقظ فإذا راحلته عنده عليها زاده وشرابه ! فالله أشد فرحا بتوبة العبد المؤمن من هذا براحلته ) حديث صحيح

الله أفرح بتوبة الواحد فينا من رجل كان معاه بعير ومعاه الزاد وماشي في الصحراء ، نام شوية وصحي لقى نفسه لوحده ،الزاد كله راح والبعير ضل، قعد يدور عليهم لحد ما كان هيموت من الجوع والعطش ، لحد ما خلاص أيقن بالهلاك قال أنام بقى لحد ما أموت ، فجأة بيفتح عينيه لقي الزاد قدامه والبعير قدامه،الرجل كان هيموت من الفرحة !!
العلماء بيقولوا لو كان فيه فرحة في الدنيا أكتر من دي كان النبي عبّر بيها عن فرح ربنا بيك لو رجعتله ..!
أنا مين وإنت مين علشان ربنا يفرح بيك كده ؟؟؟؟؟
إحنا مييييييين؟؟؟؟
ده إحنا عبيد منسواش حاجة ...!!
ولكن ربنا هو الملك الكريم..
مع إنه لا تنفعه الطاعة ولا تضره المعصية .. بس بيفرح بتوبتك ورجعولك ؛
لدرجة أحد الصحابة لما فهم الموضوع ده قال :
(لو خُيّرت أن يحاسبني أمي و أبي يوم القيامة وبين أن يحاسبني الله لأخترت الله)
لييييييييييه؟؟
أصل ربنا أرحم بيك من أمك وأبوك ..!!

حديث قاتل المائة نفس : الراجل ده مش سرق ، ده مش زنى ، ده قتل !! ومش قتل نفس؛ ده قتل 100 نفس ، واللي قتل 100 نفس ده مقتلهمش في يوم ، ده بالتأكيد قعد طول عمره يقتل ، الرجل ده متخيلين صحيفته شكلها إيه ؟؟
بس لما جاله وقاله عاوزك يارب وجاله بقلبه ، ربنا فتحله الأبواب كلها .. أهم شئ إنك ترجع وتبدأ من جديد .. أهم شئ إنك تاخد القرار ..
بس ده أنا مفيش عضو فيا معصيتش بيه ربنا !!
الأبواب كلها مفتوحة ..
بس ده أنا مفيش مكان معصيتش فيه ربنا ..!!
الأبواب كلها مفتوحة..
بس ده أنا مفيش معصية معملتهاش في حق ربنا!
الأبواب كلها مفتوحة..
تعالى بس وإنت عمرك ما هتندم..
الرجل ده قتل 99 واحد ، وبعدين راح لراهب من الرهبان يقوله أنا عايز اتوب ، الراهب قاله : ملكش توبة ! قام قتله وكمل بيه الـ100.. وبعدين راح لعالم من العلماء العالم قاله : ومن يحول بينك وبين التوبة؟
يعني مفيش حاجة تقدر تمنعك عن التوبة ، بس إنطلق للأرض الفلانية اللي فيها الصحبة الصالحة وسيب الارض بتاعة المعاصي اللي إنت عايش فيها ..
الرجل انطلق .. وهو ماشي في الطريق مات !!
نزلت ملائكة الرحمة وملائكة العذاب ...
مين اللي هياخده؟؟
فأوحي الله للأرض اللي بينه وبين أرض المعاصي أن تباعدي .. وللأرض اللي بينه وبين أرض الطاعة أن تقاربي .. وأخذته ملائكة الرحمة ..!
ربنا عمل للراجل ده المعجزة دي ليييييه ؟؟؟
لأنه رجعله ..
لأنه ساب بلده ووطنه وأهله وأحبابه وصرخ بأعلى صوت وقال راجعلك يارب ..
الرجل ده يا شباب لما قاسوا المسافة مابين جثته وبين أرض المعصية وأرض الطاعة ؛ وجدوه أقرب إلي أرض الطاعة بشبر ، فقبضته ملائكة الرحمة ..
شبر واحد !! خطوة ، كانت فرق بين ان تقبضه ملائكة العذاب أو الرحمة ..خطوة ، كانت فرق بين إن قبره يبقي روضة من رياض الجنة أو حفرة من حفر النار .. خطووووووووووة يا شباب ..!!
ممكن يكون بينك وبين عطاء ربنا وفتح ربنا وقبول ربنا ليك ....(( خطوة )) ....
خدها دلوقتي .. خدها محدش عارف هيموت امتى وموت الفجاة منتشر قد ايه في الزمن ده !!
خدها قبل ما ييجي اليوم اللي هيندم فيه الانسان ويوقل يارب رجعني الدنيا وانا هتوب ! ولكن بعد ايه ؟؟!!
خد القرار الشجاع ؛ قرار التوبة والرجوع ..

طيب شروط التوبة دي إيه؟؟

1-الإقلاع عن الذنب :
يعني تسيب ذنوبك،كفاية كده ! مثلاً؛لو كانت بنت تبطل تكلمها..مخدرات تبعد عنها..
أفلام إباحية تبطل تتفرج عليها .. وهكذا ..

2-الندم على الذنب :
يعنى متبقاش فرحان كل ما تفتكر الذنب ..وتقول كانت أيام عسل والله ..!!
لا..ده أنت المفروض قلبك يتعصر من الألم كل ما تفتكر الذنب..أنا إزاي كنت بعمل كده؟كان فين عقلي؟
يارب أنا بجد ندمااااااان..يارب إغفر لي وإقبل توبتي

3-النية على عدم العودة للذنب مرة أخرى :
يعنى مثلاً متقولش هتوب من المخدرات ، وإنت فى نفسك عارف إنك هتقعد مع فلان بكرة وهتشرب تانى..!!
لازم تقطع صلتك بالمعصية والحاجات اللي ممكن ترجعلك لها تاني وتوي انك بإذن الله مش هترجعلها وتأكد إن ربنا هيقويك ويعينك

4-رد المظالم لأصحابها :
لو كان الذنب يتعلق بحق من حقوق العباد .. زى السرقة وأكل الأموال بالباطل وهكذا ...

--------
طيب ممكن حد يقول :

هل فيه عقاب معين لازم اتعاقب به علشان ربنا يغفر لي ويكفر عني ذنبي ؟؟

لا مفيش عقاب ..
وطالما ربنا ستر على الانسان ده فلازم يستر نفسه ومفيش اي عقوبة عليه ..
وطالما بإذن الله هيحقق شروط التوبة اللي ذكرتها دي ربنا هيقبله ويغفرله بفضله وكرمه ورحمته زي ما وضحت في الكلام اللي فوق..

--------

طيب بالنسبة لسؤالك عن الارتباط بالشاب ده ..
فالحكم شرعاً .. انه يجوز الارتباط به اذا توبتي انتي وهو لله توبة نصوحا
ولكن زي ما حضرتك بتقولي ان المشكلة انه ليس لديه عمل ..
فما الحل ؟؟
الحل هو ان لو حضرتك ميسورين الحال وعارفة ومتيقنة ان اهلك لو عرفوا المكشلة دي ممكن يساعدوكي ويساعدوا هذه الشاب في الزواج حتى يتيسر له العمل فأبلغيهم بذلك ..
اما لو لم يتسير ذلك ..
فنصيحتنا لكي اختي ان تبتعدي عنه وتتركيه لله ..
حتى لا تقعا في هذه الجريمة مرة اخرى ..
وتأكدي كما اخبرنا النبي صلى الله عليه وسلم :
( من ترك شيئا لله عوضه الله خيرا منه )
واذا اردتي ان تنسيه فعليكي اولا واخيرا بالدعاء والتضرع لله عز وجل ..
فقلبك ليس بيدك .. قلبك وقلوب العباد اجمعين بيد الله ..
فأسألي الله ان يطهر قلبك وان ينسيك هذا الشخص ..
قومي الليل والناس نيام وصلي ولو ركعتين لله واسألي الله بصدق وابكي بين يديه
استغيثي بالله ..استغيثي بمعنى الكلمة ..
زي ما النبي صلى الله عليه وسلم كان بيدعي ويقول :
( يا حي يا قيوم برحمتك أستغيث أصلح لي شأني كله ولا تكلني إلى نفسي طرفة عين )
ادعي وتضرعي لربنا وخاصة في الثلث الاخير إنه يملا قلبك بنور الايمان ويرزقك حبه ..بس اهم شي تكوني على يقين من الاجابة وإن ربنا مستحيل يضيعك ..
احسني الظن بربك الكريم ..
النبي صلى الله عليه وسلم قال :
(استعن بالله ولا تعجز )
وقال : (ادعوا الله وأنتم موقنون بالإجابه )

وياريت تشغلي وقت فراغك قدر الامكان وتبعدي عن اي شئ ممكن يوقعك تاني في المعصية دي سواء صحبة او ايميلات وشات او موبايل او اي شئ ..

ولو احتجتي اي شئ هتلاقي بإذن الله هنا في المنتدى الصحبة الصالحة
فياريت تسجلي وتشتركي مع اخواتك
وايضا لو فى الجامعة حاولي تتعرفى على صحبة صالحة تاخذ بايدك وتعينك على التوبة في مسجد الجامعة عندكم

نسأل الله ان يثبتكم وان يهديكم ويوفقكم لكل ما يحب ويرضى ..
اللهم امين ..