أنا خلاص كدة جبت اخرى

[روح تائهة]

السلام عليكم ورحمة الله وبركاته
انا بنت منتقبة وعندى 27 سنة
مشكلتى اللى مالية حياتى بالمنغصات ووجع القلب والعقد هو الشخص المفروض انه أبويا
اللى انا بنته الوحيدة على ولدين يعنى المفروض أبقى أقرب الناس ليه
مش هتكلم عن مدى ظلمه ليا
لكن هقول عند مدى الاذى النفسي اللى سببه فى حياتى
عندى كمية غضب ناحيته فظييييييييييييييييييييعة تراكمت على مدار السنين من الظلم والقهر
هو ممكن ميكونش بالبشاعة اللى بتكلم بيها عنه لكن المهم انه ساب لى ضرر بليغ فى قلبى ونفسيتى
كرهنى فى كل حاجة فى حياتى كرهنى فى العيشة معاه يعنى احنا لينا بيت تانى
فى مكان اخر بحب أهرب فيه على طول منه
والفترة اللى بنقضيها معاه فى البيت بكرهها
وكمان كرهنى فى الزواج بقيت لما يجيلى عريس اتقبض واحس ان دى نهاية حياتى
وانه دمرلى جزء والزوج هيدمرلى الجزء الثانى
حاسة لو تزوجت مش هبقى زوجة صالحة بسبب كمية الغضب اللى جوايا
يعنى حاسة ان لو زوجى قالى كلمة هطلع فيه غضب السنين المكبوت جوايا
لإن أبويا بيحاسبنى على أخطاء لم أرتكبها انا
يعنى اخر مشكلة كانت من يومين كنا بنكلمه فى حاجة انا وامى
وراح مزعق وشاتمنا وانت بتحملونى انا الغلط ليه
وأقسم بالله العظيم كنا بنعرض عليه حاجة مش بنقوله انت عملت اى حاجة والله العظيم ودة يمين هيحاسبنى عليه ربنا
وفتح نار الدفاع عن نفسه واحنا أصلا محلمناهوش أى حاجة
انا لما بتعصب ببعد عن المكان علشان منفرجش فيه وابقى أغضبت ربنا
ورغم كدة مبيسبنيش هو فى حالى
اعد بقى كمية ظلم وافترى عليا كل اللى كانوا قاعدين اخواتى وامى قالوا لى انى مأخطأتش
المهم بقى فى الحوار دة كله انه كمان عمل نفسه غضبان وقام نام بعد اتهامات ليا ولأمى ليس لها اساس من الصحة
تانى يوم بالليل صالح امى علشان حاجته منها الشرعية من أجل مصلحته فقط
وطبعا كرهنى فيما شرعه الله للأزواج بسبب أسلوبه الواضح
خلانى اكره اوى الزواج والحلال الطيب واكره كل حاجة تخص الزوج او الاب
عندى كلام كتير اوى ممكن ابقى اكمله فى وقت تانى
بس نفسي ارتاح وانا على فكرة مش بكرهه انا بكره اسلوبه معايا وافعاله وبكره الاثر النفسي اللى دمرنى بيه
انا واخواتى دفعنا سبب تدمير النفسي لينا كبير
لكن بقول أخواتى رجالة أصغرهم أكبر من 22 سنة يعنى كلنا كبار ولا يحترم اى اد فينا ولا امنا حتى
ولا حول ولاقوة الا بالله
ان كنت قلت اى كمة مفادها العقوق الرجاء حذفها بعد قراءتها
عفانا الله واياكم من كل سوء ومعصية

[غير مسجل]

رد: أنا خلاص كدة جبت اخرى

السلام عليكم
اسفة للفريق على الرد بس انا عايزة اقولك ان مفيش حد معندوش مشاكل في عيلته وانا حاسة بيكي جدا الله المستعان بس ادعيلوه ان ربنا يهديه عشان دا مهما كان باباكي مهما عمل و خلي عندك ثقة بالله ومتزعليش ولما تكوني متغاظة من اي موقف فرغي طاقتك في الصلاة او القرآن
طب هوا انتي حاولتي تكلميه براحة وتفهميه ان انا بحبك يا بابا و عمري مقصدت اني ازعلك والكلام دا ؟ حاولي معاه بردو دا مهما كان اب واي اب في الدنيا بيحب ابناؤه حتى لو مش مبين .... ربنا يعيينك

[فريق استشارات سرك فى بير(الأخوات)]

رد: أنا خلاص كدة جبت اخرى

السلام عليكم ورحمة الله وبركاته ..
أهلاً بك اختنا فى بيتك الثانى الطريق الى الله
بداية نسأل الله ان يهديك ويشرح صدرك وييسر امرك ويفرج كربك اللهم آمين
اختنا الكريمة حتى لا اطيل عليك انتى اكيد تعرفى فضل بر الوالدين حتى لو كانوا مشركين والعياذ بالله
بس فيه حل لأغلب مشاكلنا دائما بنتوه عنه
وحتكلم معاكى بتفصيل عشان تعرفى قصدى
أولاً اختنا الكريمة كل شيء فى ايد ربنا سبحانه وتعالى القلوب والارزاق كل شيء
حتى احنا كبشر لا نرمش حتى الا باذن الله عزوجل اولاً
الحل الوحيد لهذة المشكلة الدعاااااااااااااااااء
الشيء الأخر (كبرى دماغك اختنا الكريمة )
لا تتعجبى ايوة كبرى دماغك الانسان لو استمر انه يضع امامه مراية مظلمة وان شخصية معينة هى محور وكل حياته
وتأثيرها سلبى عليه حيفضل فى نكد وهم وغم مستمر الى مدى الحياة
وليه اختنا متقوليش ان هذا ابتلاء ومتحاوليش تدخلى مع والدك فى نقاش
سبحان الله اختنا ليه توقفى حياتك وزواجك عشان والدك يحمل صفات ربما تكون سيئة
وسنة الحياة عموما ناس بتربى وناس بتتزوج وناس بتموت
انتى اكيد نفسك يكون ليكى بيت وزوج صالح يعفك وابناء
اطردى الافكار السلبية هذة من رأسك ليس كل الرجال متشابهين
كلنااااااا فينا عيوب لكن بتتفاوت من شخص لأخر
لو كان الزواج هم وقرف زى ما انتى متصورة مكنش حد استمر فى الزواج
كانت الناس عملت اضراب
اختنا فووووووووووووووووووووقى بالله عليك انتى مازلت شابة والمستقبل امامك ان شاء الله
لما يأتى عريس عندكم اجلسى وتحدثى معه وأبدأى حياتك اختنا ومتخليش دائما والدك
امامك
لا لا استعيذى بالله من الشيطان وفكرى فى مستقبلك
الحياة كل يوم اختنا الكريمة فى تغير ناس بتتولدوناس بتموت وهكذا مفيش
شيء مستمر عشان كده لازم تغيرى طريقة تفكيرك هذة
ان شاء الله حتكونى زوجة صالحة وكمان محبة لزوجها ولبيتها
وانا شاهدت عن نفسى احد اقاربى فتاة كانت فى منتهى العصبية (محدش يقدر يتناقش معها )
كان الكل متوقع انها حتفشل فى حياتها الزوجية وسبحان الله
تعيش الان سعيدة مع زوجها ويحبها وتحبه ما شاء الله رغم انها ايضا كانت تعانى من سوء معاملة والدها
سألتها اخت فى يوم كيف وصلتى لكل تلك السعادة ؟قالت لها (لأنى كنت عندى حسن ظن بالله ان حياتى حتتغير ودائما كنت ادعى ربنا انه يخلصنى من همى والحمدلله عشان كنت متفائلة ربنا حقق ليا ما اتمنى )
شفتى اختنا عندها حسن ظن بالله فى اشد الظروف ان حياتها حتتغير وان الله سيحدث بعد ذلك أمراً

يبقى اللى عليك خطوات عملية الان تقومى فى الثلث الاخير من الليل وتدعى الله عزوجل من خير الدنيا والأخرة

تستغفرى كثيرا وايضا علاااااج قلبك التوكل على الله وحسن الظن به
وربنا يوفقك اللهم آمين