بالله عليكم ساعدونى

[غير مسجل]

جزاكم الله كل خير
معلش ممكن تساعدونى؟؟
انا اتخنققققققققت من نفسى خلاص
ماعدتش قادرة استحمل
كرهت نفسى وكرهت حياتى

انا كنت انسانة كويسة احفظ القران ومن بيت ملتزم
وفى كلية من كليات القمة

من فترة تقريبا سنة اتعرفت على شاب على النت وكان نفس دراستى يكبرنى بسنتين
مانكرش انه انسان كويس
كان كل كلامنا نت بس وكله فى محيط الدراسة
وفعلا كان بيشجعنى
بس للاسف بدات اتعود على وجوده فى حياتى

وللاسف احنا الاتنين عارفين ان كلامنا مع بعض حرام
سبنا بعض كتير ورجعنا كتير
كنا بنسيب بعض فترات كبيرة ونرجع تانى
بنبقى عارفين ان اللى بنعمله حرام بس للاسف شوية ونرجع سواء من ناحيته او من ناحيتى

من فترة كبيرة قالى ماعدش ينفع نتكلم لظروف معينة
واكيد لو الظروف اتحسنت اكيد هنكون مع بعض

انا كنت مقتنعة جدا بالكلام
وفعلا من فترة مش بيكلمنى
بس للاسف انا اللى كل شوية ارن عليه لما اكون تحت ضغط
او فى مشكلة معينة مقابلانى او افتكر الايام اللى قبل كده وابقى نفسى اكلمه

هو ربنا يكرمه من اخر مرة قال مش هنتكلم وفعلا مش بيرد عليا
بس فعلا الموضوع دا تاعبنى
انا نفسى انساه
واوقات كتير بمسك نفسى ومش برن عليه
بس اوقات بوصل لدرجة انى مش قادرة استحمل

مع انى مقتنعة انه حرام بس بدات احس انى قلبى مات
مسحت رقمه وايميله بس للاسف حفظاهم

وسمعت دروس لشيوخ كتير فى الموضوع دا
وقرات مواضيع كتير
وبالذات فى المنتدى هنا ومنتديات اخرى
وعارفة انه حرام
وممكن ربنا يحرمنى الرزق بسبب الغلط اللى بعمله

والوقتى
الحمدلله ماعدش بينى وبين الشخص دا اى صلة
كنت معتقدة عشان بعيد مش هقدر احل فى الامتحانات
كانت فترة عصيبة جدا
ولله الحمد كانت افضل سنة جبت تقدير كويس جدا
بس للاسف مش قادرة انساه ولو للحظة واحدة
دايما فاكراه ودايما على بالى
كنت طلبت منه يغير رقمه او يعملى بلوك
وفعلا عمل كده وغير رقمه
بس برضه برن عليه مع انه مقفول بس كل ماافتكره ارن على امل انه يكون مفتوح
فاتحة نت24 ساعة على امل انه يكلمنى
حاولت اشغل نفسى
فى اول الاجازة بدأت اراجع قران استمريت فترة وبعدها توقفت
وصلت لدرجة انى نفسى اى حد اكلمه وخلاص
مش بقبل اضافى اى شباب عندى
بس لو اى حد بعتلى اضافة برفضها ولو بعتلى رسالة
ارد انه مش ينفع نتكلم وانه حرام
بس فى نفس الوقت ببقى منتظراه يرجع يكلمنى

نفسى ربنا يرزقنى بالزوج الصالح عشان ارتاح
بادعى ربنا كتير
بس للاسف انا بقى لى فترة علاقتى بربنا مدمرة
ممكن تكون تحت الصفر كمان
من فترة ممكن يجى وقت عليا مش بصلى
اصحابى بيرنوا عليا الفجر
وممكن اصحى ومااقومش اصلى
ممكن اى فرض تانى اكون سامعة الاذان ومااقومش اصلى
قبل ماانام ممكن افتكر انى ماصلتش ومااقومش اصلى
الوقتى بقيت احسن شوية

تقريبا مش بعمل حاجة مفيدة خالص
حاسة انى بقيت وحشة اوى

انا اخواتى متزوجين وانا مع امى وابى بس
انا وحشة مع امى جدا
باعاملها وحش وبكون عصبية جدا معاها
مع انها بتشوف منى اوقات صعبة بالذات ايام الامتحانات وبتكون مستحملانى
بس بعد ما تحصل المشكلة اقول ازاى انا عملت معاها كده
بجد بوصلها لوقت انها بتدعى عليا بس غصب عنى

نفسى ابقى احسن
نفسى ارجع زى ماكنت
حاسة ان فى عقاب شديد منتظرنى
حاسة انى انسانة تانية خالص
بعمل تصرفات عمرى ماكنت اتخيل انى اعمل
وممكن لو شفت حد يعمل كده انصحه
خلاص كرهت نفسى

و عندى مشكلة صعبة بجد
انا ممكن بقرأ الكلام ومقتنعة به جدا
وممكن اكون قرأته اكتر من مرة
بس بعدها برجع تانى كأنى ماقرأتش حاجة
مش عارفة فى ايه

انا مش بكلم اى شباب الوقتى خالص
بس كل شوية ببقى نفسى حد اتكلم معاه
كل ماشوف حد مخطوب او بيتكلم فى التليفون ببقى مخنوقة ونفسى ابقى زيه
عارفة ان كل شئ نصيب بس غصب عنى
ممكن لان مش لى اصدقاء مقربين لى اتكلم معاهم واحكيلهم
وفى كمان ناس اعرفهم والمفروض انهم ملتزمين بس على علاقة بشخص من اقاربها

غصب عنى لوشفت شخص ملتحى اوملتزم ببقى نفسى ربنا يرزقنى بشخص زيه
وممكن غصب عنى ابص له بس بعدها بحاول اشغل نفسى فى اى حاجة

مع العلم انى فى كلية عملية وبكون مشغولة من8ل6 معظم الايام يعنى مفيش عندى وقت فاضى اصلا
بدأت احس ان عندى مشكلة نفسة
بحاول بقدر الامكان احافظ على الصلاة فى وقتها وقراءة ولو ربع من القران يوميا

والوقتى بدأنا ندخل فى ضغط الدراسة
حاسة انى مخنووووووووقة جدا نفسى حد يكون جمبى
حد اشكيله همومى ويخفف عنى
بجد انا طول اليوم مش قادرة اذاكر حاجة ومش قادرة افكر فى اى حاجة غير انى عايزة حد اتكلم معاه

وكمان متضايقة من نفسى
كنت بحضر دروس ولقاءات دينية مع اصحابى والوقتى مش عايزة احضر حاجة وفى كل مرة احس انى تعبانة ومخنوقة ومش عايزة اروح واعتذرلهم وخلاص

مش راضية عن نفسى خااااااااااااااالص
اتخنقت بالله عليكم ساعدونى

[فريق استشارات سرك فى بير(الأخوات)]

رد: بالله عليكم ساعدونى

انتظرى الرد قريبا اختنا الكريمة

[فريق استشارات سرك فى بير(الأخوات)]

رد: بالله عليكم ساعدونى

السلام عليكم ورحمة الله وبركاته ..
أهلاً بكم اختنا الكريمة فى بيتكم الثانى الطريق الى الله
نسأل الله ان يشرح صدرك وييسر أمرك ويفرج كربك

قالوا الاعتراف بالمشكله هو نصف الحل ...
جميل إنكِ ترى نعم الله عليكِ وتشعرى بتقصيرك وهذا ان دل فانه يدل على فطرتك السليمه وده
طيب انتى قولتى إنك حاولتى كثير وفى كل مره بترجعى تانى ..........عارفه ليه؟؟
تعالى نتكلم ببساطه شديده إنتى جواكِ صراع بين ان انتى عارفه الصح وعاوزهتطيعى ربنا وبين انكِ مش قادره تاخدى قرار بالتغير
طيب الصراع ده طبيعى لاننا كلنا جوانا الخير والشر لكن المهم مين أقوى جواكى؟؟وازاى اقوى جانب الخير عشان أقدر أتغير؟؟

هقولك مثال بسيط جدا لو عندك زرعتين واحده بتسقيها باستمرار وواحده لأ ..الطبيعى الى بتسقيها هتبقى أقوى والثانيه هتضعف ....نفس الحكايه لو أحنا عاوزين نقوى جانب الخير او علاقتنا مع ربنا
وهنقول كلام عملى أنتى بتدخلى لقلبك أيه طول اليوم؟؟؟؟؟
ببساطه كده هسألك عن اربع حاجات انتى بتسمعى أيه وبتشوفى أيه وبتتكلمى عن أيه وبتفكرى فى أيه؟؟؟؟؟
وبسأل عن الاربعه دول لان دول الطريق لقلبك
هنلاقى ان اغلب يومنا بيدور عن الكلام عن اللبس والكليه والمذاكره ومشاكلنا مع اهلنا واخر الاخبار .........الى اخره
الحل العملى البسيط جدا والفعال جدا كمان ان شاء الله
خلى ليكى وقت يومى تسمعى عن ربنا وتتكلمى عن ربنا وتفكرى فى حالك معاه وتبصى فى كتابه وأحنا ممكن نساعدك هنا فى المنتدى تعالى قسم الأخوات واتعرفى على اخوات هتشجعوا بعض وهتحسى انك بتتغيرى ان شاء الله
اسمعى الايه دى :
{لَهُ مُعَقِّبَاتٌ مِنْ بَيْنِ يَدَيْهِ وَمِنْ خَلْفِهِ يَحْفَظُونَهُ مِنْ أَمْرِ اللَّهِ إِنَّ اللَّهَ لَا يُغَيِّرُ مَا بِقَوْمٍ حَتَّى يُغَيِّرُوا مَا بِأَنْفُسِهِمْ وَإِذَا أَرَادَ اللَّهُ بِقَوْمٍ سُوءًا فَلَا مَرَدَّ لَهُ وَمَا لَهُمْ مِنْ دُونِهِ مِنْ وَالٍ} [الرعد : 11]
يعنى لو حياتك فضلت زى ماهى واهتماماتك زى ما هى واسلوب حياتك زى ما هو تفتكرى التغير هيجى منين ؟؟
يعنى دلوقتى المطلوب منك حاجتين
: 1_ الدعاء : تدعى ربنا كثيييييييييييييييييير انه يهديكى ويساعدك
2_ انضمى معانا كعضوه وتابعيى معنا
هتبدأى تسمعى دروس او حتى مقاطع صغيره مدتها 5 :10 دقائق _تبدأى تقرى مواضيع دينيه تقربك من ربنا أكثر
هتلاقى أخوات كثير سنهم قريب منك وعندهم مشاكل زيك واخوات اكبر ممكن يساعدوكم ولو عندك أى مشكله هنساعدك ان شاء الله
_____________________________
وبالنسبه للنقطتين الى قلتى عليهم

1- الصلاة

اقتباس:

الصلاة عماد الدين من اقامها فقد اقام الدين بل انها من اركان الاسلام الخمس يعنى هى اساس الدين ،وربنا بيأمرنا بيها فى ايات كتيرة فى القرأن تجدى فى ايات كثيرة منها ((واقيموا الصلاة واتوا الزكوة وما تقدموا لانفسكم من خير تجدوه عند الله))
وبعيدا عن كل شئ مش اللى بيحب حد بيحب يلقاه ولله المثل الاعلى ،واحنا بنكلم ربنا فى الصلاة والله يرد علينا اسمعى معى:

عَنْ أَبِي هُرَيْرَةَ ، قَالَ : قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : " قَالَ اللَّهُ تَعَالَى : قَسَمْتُ الصَّلَاةَ بَيْنِي وَبَيْنَ عَبْدِي ، فَإِذَا قَالَ الْعَبْدُ : الْحَمْدُ لِلَّهِ رَبِّ الْعَالَمِينَ سورة الفاتحة آية 2 ، قَالَ اللَّهُ تَعَالَى : حَمِدَنِي عَبْدِي ، وَإِذَا قَالَ : الرَّحْمَنِ الرَّحِيمِ سورة الفاتحة آية 3 ، قَالَ : أَثْنَى عَلَيَّ عَبْدِي ، أَوْ : مَجَّدَنِي عَبْدِي ، وَإِذَا قَالَ الْعَبْدُ :مَالِكِ يَوْمِ الدِّينِ سورة الفاتحة آية 4 ، قَالَ : فَوَّضَ إِلَيَّ عَبْدِي ، وَإِذَا قَالَ : إِيَّاكَ نَعْبُدُ وَإِيَّاكَ نَسْتَعِينُ سورة الفاتحة آية 5 ، فَهَذِهِ بَيْنَ عَبْدِي ، وَلِعَبْدِي مَا سَأَلَ ، اهْدِنَا الصِّرَاطَ الْمُسْتَقِيمَ { 6 } صِرَاطَ الَّذِينَ أَنْعَمْتَ عَلَيْهِمْ غَيْرِ الْمَغْضُوبِ عَلَيْهِمْ وَلا الضَّالِّينَ سورة الفاتحة آية 6-7 ، فَهَذِهِ لِعَبْدِي وَلِعَبْدِي مَا سَأَلَ " .

والله فضل جميل انتى اكيد بتحبى ربنا وبالتالى هتحبى لقائه،استشعرى الحديث ده وانتى واقفه امام الله فى الصلاة هتفرق كتير جدا والله وتشعرى بخشوع فى الصلاة رهيب مجرد استشعارك انك واقفة امام الملك.
وعليكِ بالدعاء خاصة فى وقت السحر والناس نيام كلمى حبيبك الله ناجيه اطلبى منه الهدايه قولى له
اللهم انى ضاله فاهدنى اللهم انى مذنبه فتوب عليا يارب محتجالك ....
وقوليها كتييييييييير يارب محتجالك يارب اهدنى يارب ثبتنى
وعليك فى وقت السجود ب "اللهم يا مقلب القلوب ثبت قلبى على دينك"
وتأكدى انه مش هيسيبك والله العظيم

2)
ابعدى عن مواطن الفتن ،ا
وخلى رسولك وزوجاته قدوتك

بنسبة لموضوع التعلق بشاب ومحاولة ان تملىء هذا الفراغ مجدداً مع اى شخص

أختنا الكريمة هل ستكررين مرة أخرى الكرة مع شخص اخر

احنا عارفين إن الأمر بيكون صعب علي القلب
لكن

يجب أن يكون دافع التوبة و الرجوع إلى الله أكبر من ذلك بكثير

إذا قالت نفسك لك : لا أستطيع
قولي لها : بالله أستطيع كل شىء

وإذا قالت لك : ستتألمين
ذكري نفسك بأن عذاب الله أشد و أبقى
ولعل في هذا الألم تكفير لسيئاتك

و إذا قالت : سيضيع منك
فذكريها بحديث رسول الله صلى الله عليه وسلم (من أسخط الله في رضا الناس سخط الله عليه وأسخط عليه من أرضاه في سخطه ومن أرضى الله في سخط الناس رضي الله عنه وأرضى عنه من أسخطه في رضاه حتى يزينه ويزين قوله وعمله في عينيه)

صحيح الترغيب و الترهيب

و ذكريها أنك مهما فعلتي و مهما حاربتي لن تنالي إلا ما كتبه الله لكي

قصة نختم بها

رُوِي عن علي رضي الله عنه كان راكباً دابة فمر من باب المسجد وأحب أن يصلي ركعتين من النافلة فأعطى غلامًا دابته حتى يصلي ، فلما فرغ من صلاته أخرج دينارًا ليعطيه الغلام ، فوجده قد أخذ خطام الدابة وانصرف ، فأرسل رجلاً ليشتري له خطامًا بدينار ، فاشترى له الخطام، ثم أتى فلما رآه علي رضي الله عنه، قال سبحان الله! إنه خطام دابتي، فقال الرجل: اشتريته من غلام بدينار، فقال علي رضي الله عنه:

سبحان الله! أردت أن أعطه إياه حلالاً ، فأبى إلا أن يأخذه حراماً !.

قال الله

فاستعيني بالله و اتقي الله و اعلمي أن الأمر كله بيده

و لن تأخذي شيئاً إلا بمشيئته
"فما عند الله لا ينال إلا بطاعته"

{ وَمَنْ يَتَّقِ اللَّهَ يَجْعَلْ لَهُ مَخْرَجًا (2) وَيَرْزُقْهُ مِنْ حَيْثُ لَا يَحْتَسِبُ وَمَنْ يَتَوَكَّلْ عَلَى اللَّهِ فَهُوَ حَسْبُهُ إِنَّ اللَّهَ بَالِغُ أَمْرِهِ قَدْ جَعَلَ اللَّهُ لِكُلِّ شَيْءٍ قَدْرًا (3)} [الطلاق : 2 - 3]

مشكلة عقوق والدتك
اختنا مشكلة يجب اصلاحها
تابعى المشاركة القادمة

[فريق استشارات سرك فى بير(الأخوات)]

رد: بالله عليكم ساعدونى

الأم حقها كبير ولها منزلة عظيمة في الشرع وجعلها الله أولى الناس بحسن الصحبة ، كما في الحديث المعروف ، لما قال رَجُلٌ: يَا رَسُولَ اللَّهِ مَنْ أَحَقُّ النَّاسِ بِحُسْنِ الصُّحْبَةِ ؟

قَالَ : " أُمُّكَ ، ثُمَّ أُمُّكَ ، ثُمَّ أُمُّكَ ، ثُمَّ أَبُوكَ ، ثُمَّ أَدْنَاكَ أَدْنَاكَ " رواه مسلم


فمن حقها عليك حبها وتوقيرها في النفس والقلب ما استطعت لأنها أحق الناس بحسن صحبتك

ومن حقها الرعاية والقيام على شؤونها إن احتاجت إلى ذلك بل إن هذا ديْن في عنق ولدها . أليست قد رعته طفلاً صغيراً وسهرت عليه وكانت تصبر على أذاه .


و عن عبد الله بن عمرو بن العاص رضي الله عنهما قال : جاء رجل إلى النبي صلى الله عليه وسلم فاستأذنه في الجهاد فقال له رسول الله صلى الله عليه وسلم : " أحيٌّ والداك ؟ "
قال : نعم،
قال : " ففيهما فجاهد " رواه البخاري و مسلم

ينبغي عليك أن تراعي منزلتها وتوقيرها ومعاملتها الطيبة بالصحبة الحسنة حتى وإن ضيقت عليك فيما أباح الله لك ، فإنه أمرنا أن نصحب آباءنا بالصحبة الحسنة حتى ولو كانوا كفاراً يدعوننا إلى الشرك فكيف وهما لا يدعوننا إلا إلى شيء يظنان كل الظن أن الخير لنا فيه وإن كان في بعض ما يأمران به تضييق عليك في بعض ما يباح لك .

فالأحسن أن تطيعهما وأن تصنع ما يريدان وتنزل عند رغبتها وإن كان لا يجب عليك ولكن من باب التضحية والإيثارفإنهما أحق من يحسن إليهما وقد جعل الله تعالى طاعة الوالدين بعد عبادته مباشرة كما ذكر في كتابه وذلك بيانا لمنزلة بر الوالدين .
ونحن نتشرف ان تكونى من اعضاء منتدانا وسوف تجدى هنا الصحبة الصالحة النافعة ان شاء الله وان كان ليكى اى استفسار ممكن تكتبيه فى موضوع جديد هنا اوفى قسم الصحبه الصالحه بعد تسجيلك
وان شاء الله قريبا جدا تشعرى انك راضيه عن نفسك وسعيده بطاعه ربك
أسأل الله ان يغفر لك ويرحمك ويهدى قلبك وييسر عليكى كل أمر عسير وينير بصيرتك ويرزقك السعاده فى الدنيا والاخره ويحبب اليكى الايمان ويكره اليك الفسوق والعصيان وان يرزقك الصحبه المعينه على طاعته فى الدنيا ويجمعكم معا فى الجنه
امين امين امين