Tweet
السلام عليكم ورحمة الله وبركاته
اخوانى بارك الله فيكم جميعا ، هل ممكن حد يساعدنى فى تفسير منامى هذا
من فترة كنت بتابع بشدة برامج الشيوخ كلهم فى كل القنوات الفضائية الدينية ، وسبحان الله كانت معظمها بيتكلم عن حياة الرسول وجهاده ووفاته ، فى الفترة دى لما كنت بتابع الحلقات والبرامج كنت ببكى بشدة وبصلى على الرسول كتير اوى لدرجة انى لما كنت بدعى فى صلاتى ماكنتش بدعى الا بدعاء واحد ( يارب اشوف الرسول فى منامى صلى الله عليه وسلم ) ، فضلت على كده حوالى اسبوعين وكام يوم وماكنتش بنام الا والسبحه فى ايدى بصلى بيها على الرسول اللهم صلى وسلم وبارك عليه ، وفى يوم سهرت لحد الصبح ونمت الساعة 10 الصبح يعنى قبل الظهر ما يأذن .
ولما نمت حلمت حلم غريب جدا ..... بدأ الحلم كالتالى :
" رايتنى انا واخويا بنتفرج على مسلسل اسمه حياة الرسول صلى الله عليه وسلم ولما بدأت الحلقة تشتغل بدأت من جوة بيت الرسول فقولت لاخويا فى الحلم ايه ده هو ده بيت الرسول انا اول مرة اشوفه لكن اخويا ما اتكلمش خالص انا بس اللى كنت بكلمه ، واثناء وانا بتفرج على الحلقة وانا مندهشه ومبسوطة فى نفس الوقت لقيت نفسى فجأة جوة بيت الرسول صلى الله عليه وسلم ، وشوفت واحده من زوجاته ، انا فى الحلم كنت عارفه انها السيدة سودة لكن كان وجهها حزين حزين جدا وكانت لابسه جلباب مشجر تقريبا او لونه غامق وكانت مسرحة شعرها وربطاه ببُكل الشعريعنى حاجه زى بنس الشعر كده، واثناء وانا جوة بيت الرسول صلى الله عليه وسلم ، كان فى حد بيخبط على باب البيت بشدة ، فراحت السيدة سودة تفتح الباب ووجدت الشخص اللى كان بيخبط هو عمرو بن العاص وكان بيقول انا الخليفة عمرو بن العاص 3 مرات بصوت قوى وهو بيخبط على الباب وكان وراه ناس او جيش بس مش كتير اوى ، فلما فتحت السيدة سودة الباب ووجدته عمرو بن العاص ابتمست رغم حزنها الشديد وقالت يا رسول الله انه الخليفة عمرو بن العاص 3 مرات بردو ، فى الوقت ده انا قولت فى بالى فى الحلم الله انا هشوف الرسول بعينى معقوله ؟، وفعلا طلع الرسول صلى الله عليه وسلم من الغرفة اللى كان فيها وكان خارج من الوضوء وشوفت الماء بينقط من وجهه الشريف وكان لابس جلباب لونه غامق بردو وكان ماسك طرف الجلباب من عند الرقبه بينشف وجهه بيها، انا فى الوقت ده ما شوفتش وجهه كاملا لكن شوفت جسده فقط وكان نحيف جدا ، ولما وصل الرسول عند الباب ووجده عمرو بن العاص استهل وجهه وابتسم رغم حزنه الشديد ايضا ولم يتكلم بينما اشار برأسه ان يدخل عمرو ومن معه وذهبت السيدة سودة لتكرم الضيوف ، وهنا رايت وجه الرسول صلى الله عليه وسلم ونظر لى ولكن كان مكتئبا جدا ورايته من دون لحيه وكان ينظر الي وهو حزين جدا ونظرت له فى ذهول "
وهنا اسيقظت من النوم و هذا هو الحلم كله
لكن فى حاجه زعلتنى انى لما صحيت من النوم صحيت على العصر وهو بيأذن يعنى كان الظهر اذن وفاتنى ولم اصله حاضرا ، ولما جريت بسرعه عشان اتوضى افتكرت الحلم لما شوفت الرسول وهو متوضى ، وانا دلوقتى حكيت لكم الحلم كله وكل الظروف اللى كانت حوليا لما حلمته ، معلش اطلت فى الحوار بس حبيت اوضحلكم كل حاجه بكل صراحه حتى اسهل عليكم تفسير منامى
حاجه اخيرة وقت ما حلمت الحلم ده كان تقريبا فى رمضان السنه القبل الماضيه قبل ضرب غزة بحوالى 3 اشهر ، فهل عمرو بن العاص فى الحلم كان يرمز لشهداء غزة ، وما معنى ان يقول انا الخليفه وعمرو بن العاص لم يكن خليفة مطلقا ، وهل حزن الرسول صلى الله عليه وسلم كان منى ام كان على ما حدث فى غزة ، طيب وما رمز السيدة سودة ولماذا كانت تربط شعرها بهذه الطريقة ، هل معناها الوحدة العربية او وحدة ابناء العرب على سبيل المثال ام ماذا ؟
الحقيقه انا لحد الوقتى مش قادرة احدد معنى الحلم ده رغم انى حلمته من سنتين لكن بردو بيراودنى كتير وعايزة اعرف معناه ، خصوصا وان الرسول اتانى من غير لحيه وهذا عجيب ، ولكن مجيئه بغير لحيه هل يعنى نقصان السُنة لدينا كعرب جميعا ام نقصان ايمانى وطاعتى لله .
ارجوكم يا جماعه اللى يقدر يساعدنى بجد فى تفسير الحلم ده ياريت ما يبخلش عليا
بس ارجوكم تكونوا متاكدين ، عشان انا تعبت جدا كل شوية حد يقولى ده كان اضغاث احلام واللى شوفتيه مكانش الرسول عشان كان من غير لحيه.
طب وهو معقوله الشيطان يجى فى هيئة الرسول وعمرو بن العاص والسيدة سودة معقوله ؟
فارجوكم ساعدونى
بارك الله فيكم
تعليق