بالله عليكم لاتبخلوا على بالنصيحة

[فاطمه محمد]

:LLL:

انا من مصر فى كليه هندسه اوالسنة الجايه اخر سنة بأذن الله وانا الحمد لله ربنا هدانى ولبست ادناء بفضل الله ولو انى اعترف بأنى مقصره ششويه لانى بلبس ايشاربات او حجابات ملونة وانا نفسى والله البس النقاب والحمد لله انا مقتنعة الحمد لله انه فرض وان شاء الله انا نويت انى البسه بس انا فى شىء من التردد مش تردد فى لبسه بس تردد فى التوقيت ال البسه فيه
لان اخر سنة فى الكليه بيكون فبها مشروع زى ما انتوا عارفين و المشروع لازم يكون فيه ولاد_لاسباب وقوانين بتلزمها الكلية ويطول شرحها_وانا مش عايزة ابقى لابسة نقاب وبكلم شباب فى الكلية -حتى وان كان للمشروع بس- دة غير انى مخطوبة ومش هينفع اكتب الكتاب دلوقتى خالص -لاسباب تانية بردو يطول شرحها- ومش عايزة بردو ابقى منتقبه مع الخطوبة دى العاديه من غير كتاب بما فيها من مخالفات _حتى لو كانت بسيطة وصغيرة _
انا نويت بأذن الله انى البسه الصيف الجاى واكون خلصت الكلية وكمان كتبت كتابى ان شاء الله
بس انا فى نفس الوقت خايفة لانى مش ضامنة عمرى ومش ضامنة اعيش دقبقة كمان فضلا عن الصيف الجاى
بالله عليكم لا تبخلوا عليا بالنصيحة
عايزة اسمع نصايحكم كلكم بالله عليكم
وياريت تقبلونى اخت ليكم فى الله
انا اسفة انى طولت عليكم

[صاحبة القلادة]

بسم الله والصلاة والسلام علي رسول الله
السلام عليكم ورحمت الله وبركاته
اهلا بكي اختي وحببتي في الله
ان ساء الله الموقع يكون باب خير ليكي
وانا اتمني انك تبعتيلي الاميل بتاعك
في الرسائل
واتمني اننا نكون اصحاب
اما بقي بالنسبه للنقاب
فلو انتي مقتنعه بأنه فرض
فأنا بنصحك
بالتعجيل وان شاء الله
انا اعرف اخوات كتير
كانو مترددين زيك كده
واول ما لبسوه وخرجوا بيه
حسو باحساس تاني خالص
بيقولو انو كان باب من ابواب الخير عليهم
وربنا يعينك علي نفسك والهوي والشيطان
وربنا يكرمك يارب
ومتنسناش بالدعاء انا وكل اخواتك
والسلام عليكم ورحمت الله وبركاته

[نسيبة بنت كعب]

أهلا بيكى أختى معنا فى منتدانا
ذكرتينى أختى بنفس مشكلتى أنا فعلا كانت عندى نفس المشكلة
لأنى راحة تانية ثانوى وأنتى عارفة تانية يعنى مدرسة ودروس
ومجهود كبير وكل الناس قالت لى انتظرى لما تخلصى الثانوية
بعدين انتظرت شوية لقيتهم بيقولوا انتظرى لما تروحى الكلية
عشان ما ليش كليات هنا كل الكليات فى القاهرة وانا من المنصورة
عشان أنا أزهر
لقيت الموضوع ما لهوش نهاية
والحمد لله الحمد لله الحمد لله
لربنا أعننى على كل ده
ولبستة الحمد وأنا الآن فى قمة السعادة بلبسه
رأيى إنك تلبسيه وتتوكلى على الله
وربنا هاييسر لكى بإذن الله تعالى
وكل حاجة هاتتحل
وربنا يوفقك ويعينك

[يمامة المسجد]

شفتي أختي كل الردود بتقولك البسيه

نشوف بأه سبب أنك متخازلة

لازم يكون فيه ولاد_لاسباب وقوانين بتلزمها الكلية ويطول شرحها

طيب ده بالعكس إنك لما تكلمي شاب وانتي منتقبة ، افضل من غيره

وَإِذَا سَأَلْتُمُوهُنَّ مَتَاعاً فَاسْأَلُوهُنَّ مِن وَرَاء حِجَابٍ

وهذا سيكون حجابك

وفي نفس الوقت لن يجرء أحد يتكلم عليكي لأنهم عارفين ان ده شغل الكلية وانتي بتعملي في حدود الشغل

بس لو تعرفي تنهي العلاقة دي يكون أفضل كثير ، والأخوات ممكن يحلوا المشكلة إن شاء الله

دة غير انى مخطوبة ومش هينفع اكتب الكتاب دلوقتى خالص -لاسباب تانية بردو يطول شرحها- ومش عايزة بردو ابقى منتقبه مع الخطوبة دى العاديه من غير كتاب بما فيها من مخالفات _حتى لو كانت بسيطة وصغيرة _

طيب خلاص فرصة نخلص من المخالفات دي

وتبدأي انتي وخطيبك صفحة جديدة مع بعض ومع الله

وبالعكس كلميه وفهميه الي نفسك فيه وانك نفسك تقربي لربنا وهو ده السبيل

وهو ان شاء الله هيساعدك ، ويمكن هو يشجع ويلتزم ، خاصة انكم بتكونوا قريبين من بعض جدا ً في فترة الخطوبة

يباه صدقيني الحاجات الي بتقولي انها مش مخلياكي تلبسيه

هي نفسها الحاجات الي المفروض تخليكي تقولي انا لازم ألبسه حالا ً

عارفة ولو فضلتي تأجلي وتأجلي ومأخدتيش القرار ، يمكن لا تعرفي تلبسيه بعد هذا

يلا خذي القرار واريد اسمع اخبار حلوة

[dr_karmen]

أخيتى بارك الله فيكى
أوافق كلام اختى سارة
انك ترتديه علطول ولا تنتظرى اكثر من هذا لأنك كما قلتى لا تضمنين عمرك
عارفة
انتى لو سوفتى طاعة عشان حاجة فى الدنيا ممكن متكملش او ربنا ينزع منها البركة
أعاذك الله من ذلك
ولكن يا أخية ممكن متعمليش خطوبة أساسا
فقط يكون الاشهار
وبعد العقد اعملى اللى انتى عيزاه على مايرضى الله ويوافق
لا توافقى على عمل خطوبة فيها مخافات ابدا
لأنها الزواج ده نعمة ووجب عليكى شكر هذه النعمة بعمل الطاعات
لا لمزيدا من الذنوب
فيا أخية
انتى لو عرفتى خطوات الاسلام فى الزواج
هتعرفى انه ممكن يكون فى خطأ كبير فى تأخير العقد
أسأل الله لك التيسير فى ذلك
وكمان فى حاجة لو انتى خايفة انك تكونى منتقبة وتكلمى ولاد فى المشروع
ممكن تقننى الكلام بقدر المستطاع
او تخلى كلامك دايما مش مع ولد لوحدكم فى وجود مجموعة او انتى مع صحباتك
او هو معاه اصحابه
وان شاء الله ربنا ييسر لك الخير

وأقل شئ يا أخيتى
لو انتى مش هتلبسى النقاب حاليا
على الأقل تضبطى الزى الشرعى
ميكونش فيه زينة أو بهرجة أو الوان تلفت النظر وتجعله لباس شهرة
بارك الله فيكى يا أخية ورزقك الله خير الاعمال

[مع الله]

اختى و حبيبتى فى الله

السلام عليكم ورحمة الله وبركاته

اريد ان اسالك سؤال

هل تثقين فى الله سبحانه و تعالى ؟

هل تثقين فى كلام رسوله الكريم صلى الله عليه وسلم ؟

اذا كانت الاجابة نعم - و هى كذلك ان شاء الله - فماذا لو علمتى ان النبى الكريم صلى الله عليه وسلم قال لنا انه
من ترك شئ فى سبيل الله عوضة الله بشئ افضل منه

ها

هتصدقى ولا لاء ؟!

هتصدقى و تنفذى و لا هتقولى كلية و مشروع ؟!

هتصدقى و تنفذى و لا هتقولى خطيبى و كتب كتابى ؟!


هقولك على حاجة حلوة و حصلتلى

انا منتقبة - الحمد لله - من شهرين تقريبا

كنت انتهيت من الامتحانات العملية و بدات فى الامتحانات النظرى

امتحنت اول مادة و كان باقى يومين على تانى مادة

حسيت انى عايزة البس النقاب دلوقتى

فى الوقت دة و فى اللحظة دى

قولت لنفسى انا هفضل استنى لحد امتى ؟!

انا ضامنة عمرى ؟!

اللى حوليا استغربوا جدا قالولى طب على الاقل خالص استنى بعد الامتحانات النظرى !!!

حسيت انه لا ... دلوقتى يعنى دلوقتى


فى حديث بصراحة مش فاكراة دلوقتى

بس معناه انك لو نويتى تعملى خير

اوعى تاجلى

و اوعى تسوفى

و اوعى تقولى بكرة

لانك مش ضامنة النهاردة .. ما بالك ببكرة

و لانك مش ضامنه نفسك الامارة بالسوء و زن الشيطان على ودانك

المشكلة التانية اللى كانت بتواجهنى غير كلام صحابى و الامتحانات

انى بمتحن شفوى

و بيجيلى دكاترة من القاهرة و الاسكندرية .. و ما ادراكى ما القاهرة و الاسكندرية

مش اقصد اعيب فى حد بس من المعروف ان المنصورة _ و دى بلدى - شتان بينها و بين بلد زى القاهرة او الاسكندرية

و طبعا نوعية الدكاترة اللى بيجوا - الا من رحم ربى - بيهتموا البنت لابسة ايه و بتتكلم ازاى و بتضحك ولا لا !!!!!!!!!!!!!!!!!!!!!!

و انا لله و ان اليه راجعون

لدرجة ان مش الرجال بس اللى كدة لا المصيبة و الكارثة ان النساء كمان كدة

ربنا يهدى كل المسلمين يا رب

رغم كدة ما اهتمتش باى حاجة

كنت واثقة جدااااااااااااا انى لو تركت حاجة عشان ربنا ربنا هيعوضنى حاجة احسن منها بكتييييييييييييير

....

فى مادة كنت بحبها جدا و عايزة اقدر فيها باى شكل و قالولى استنى على الاقل لحد ما تمتحنى الشفوى بتاعها عشان محدش يستقصدك

قلت لا هلبسة يعنى هلبسة

و دعيت و قلت يا رب .. انا عايزة فعلا اقدر فيها و عملت كدة عشان خاطرك يا رب .. انا تعبت فيها اوى و نفسى اجيب اللى انا عايزاه

تصورى سبحان الله مش عايزة اقولك ان اسهل مادة امتحنتها للشفوى كانت هى .... و رغم انى كنت خلاص راضية باللى ربنا كاتبة قاسمة ليا

و رغم انى داخله للدكتور متاخر و كان مضايق جدا منى جداااا
و كل اللى خرجين من عنده مضايقين منه و من اسئلته

و رغم والله والله والله كان بيسالنى حاجات غريبة و مش فى المنهج و معرفش كنت بجاوب عليها ازاى

و اخر ما زهق قالى خلاص هقولك ايه اكتر من كدة


يا بنتى والله بجد سيبك من الناس و سييبك من الدنيا

يمكن انتى شايفة ان الموضوع صعب و عايزة تقررى عشان تكونى اد قرارك

انا معاكى حاسة بيكى

بس والله ربنا هيعوضك عن كل حاجة هتضيع منك بسبب النقاب

يا بنتى انتى بترضى ربنا

والرسول عليه الصلاة و السلام قال:

من اسخط الله ليرضى الناس سخط الله عليه و اسخط عليه الناس و من اسخط الناس ليرضى الله رضى الله عنه و ارضى عنه الناس

خليكى مع الملك و ما تهتميش بالعبيد.. هتلاقى نفسك كسبانة كلللللللل حاجة ان شاء الله

و اسفة انى طولت عليكى

بس بجد والله اتمنى فعلا ان تقدمى على الخطوة دى و صدقينى مش هتندمى

و السلام عليكم ورحمة الله وبركاته

[فاطمه محمد]

جزاكم الله عنى كل خير يابنات وان شاء الله تسمعوا منى اخبار حلوة قريب
ولا تنسونى بصالح دعائكم

[نسيبة بنت كعب]

يارب إن شاء نسمع كل خير
وتيجى المرة إن شاء نبارك لكى على النقاب

[صاحبة القلادة]

بسم الله والصلاة والسلام علي رسول الله
عليه الصلاة والسلام
ان شاء الله يا حببتي نسمع اخبار كويسه
ويا رب يوفقك لما يحب ويرض
وعلي فكره بقي عوزه اقولك حاجه
مبيلبس النقاب غير البنات الجميلة
علشان يدارو جمالهم
وطبعا كل بنات المسلمين حلويين
بس النقاب بيدي للوحده جمال تاني خالص
وادعلنا انتي بقي
علشان انا شيفة فيكي الامة الصالحة الي بتحب ربها
وان شاء الله ربنا يستجبلك ويهديني انا كمان
ولكل المسلمين والمسلمات
والمؤمنين والمؤمنات
الاحياء منهم والاموات
وربنا يهدينا كلنا
والسلام عليكم ورحمة الله وبركاته