Tweet
كل سنة وانتم طيبين وبخير
وربنا يجعله عيد سعيد عليكم وعلينا وعلى امة المسلمين اجمعين
ان شاء الله يا بنات كلكم بإذن الله صايمين يوم وقفة عرفة
وطبعا كلنا عارفين فضل صيام يوم عرفة يكفر السنة الماضية وسنة قادمة
ربنا يعيننا على صيامه على الوجه الذي يرضيه عنا
ايه بقى الفكرة الحلوة اللي هنعملها فجر يوم عرفة ؟؟؟؟
طبعا يوم عرفة ده هو يعتبر هو الحج
وطبعا كل الحجاج يوم عرفة كلهم بيكونوا واقفين بجبل عرفة
واكيد كلنا كان نفسنا نكون زيهم واقفين على جبل عرفة وبنحج بيت الله الحرام
لكن قدر الله ولم نستطيع الحج
ليه بقى لا نتشبه بالحجاج وناخد ثواب الحج زيهم
ايه اللي نقدر نعمله في اليوم ده علشان ناخد ثواب الحج زيهم ؟؟؟؟!!!
ثبت في سنن الترمذي بإسناد صحيح عن أنس رضي الله عنه أن النبي صلى الله عليه وسلم قال: من صلى الفجر في جماعة، ثم قعد يذكر الله تعالى حتى تطلع الشمس، ثم صلى ركعتين، كانت له كأجر حجة وعمرة تامة تامة تامة
فإيه رأيكم بقى اننا ان شاء الله ننوي اننا يوم عرفة نصلي الفجر جماعة ونقعد نذكر ربنا نختم الصلاة ونقرأ اذكار الصباح ونقعد نقرأ قرءان لغاية بعد الشروق بثلث ساعة وبعدين نقوم نصلي ركعتين لله وبكده ناخد ثواب العمرة والحج زي الحجاج بالظبط ونكون ما اتحرمناش من اجر الحج زي الحجاج بالظبط
إيه رأيكم ؟؟؟؟؟
و لو بقى بجوارك مسجد تنزلي تصلي فيه واكيد كلنا جنبنا مسجد لان تقريبا دلوقتي مفيش منطقة الا وفيها مسجد الحمد لله ياريت بقى لو صليناه في الجامع جماعة ونقعد في الجامع لغاية بعد الشروق ونصلي ركعتين ونروح بعد كده واكيد
لو انتي متزوجة اتفقي مع زوجك انك هتنزلي تصلي معاه الفجر حتى لو هو مش بيصلي في الجامع شجعيه وقولي له واتفقوا انكم تقعدوا لبعد الفجر ولو انتي بنت اتفقي مع والدك او اخوكي وقولي لهم انك هتنزلي تصلي معاهم الفجر وانكم تقعدوا لغاية الشروق علشان تاخدوا ثواب الحج زي الحجاج اللي واقفين بعرفات وخلي بقى والدك او زوجك او اخوكي يتفق مع امام المسجد قبلها في صلاة العشاء او قبلها بيوم انكم هتقعدوا لبعد الفجر وياريت كمان لو تتفقي انتي مع والدتك واخواتك وجيرانك وكلكم تنزلوا تصلوا الفجر في المسجد وتقعدوا لغاية الشروق في المسجد وتستحضروا نية طلب ثواب واجر الحج
ياااااااااه هتحسوا احساس جميل انكم في بلدكم وجنب بيتكم وبتاخدوا ثواب الحج زي الحجاج الواقفين بجبل عرفات
ولو مش جنبك مسجد قريب او عندك اولاد مش هتعرفي تنزلي الجامع وتسيبيهم اتفقي مثلا مع مامتك واخواتك البنات لو لسه بنت وصلوا الفجر جماعة مع بعض في البيت واقعدوا اذكروا الله واقروا قرءان كل واحدة لوحدها لغاية بعد الشروق او اتفقي مع جيران في العمارة لو مش هتقدري تنزلي المسجد واتفقوا تتجمعوا بعد لما ازواجكم ينزلوا المسجد انكم تتجمعوا في بيت واحدة منكم وواحدة منكم تكون قارئة جيدة للقرءان تأمكم وتصلي بيكم وتقعدوا تذكروا الله لغاية الشروق وتقولوا لازواجكم يقعدوا هم كمان في المسجد لغاية بعد الشروق
يعني حاولي متضيعيش الفرصة الذهبية دي فجر يوم عرفة يا اما تصلي جماعة في المسجد يا اما تتفقي مع اي اخوات وتصلوا مع بعض جماعة في البيت لو ظروفك لا تسمح بنزول الجامع
وربنا يتقبل منكم يارب ويعيننا على طاعته وحسن عبادته
وكل سنة وانتم طبيبن
وعيد مبارك عليكم
تعليق