كيف كان طريقك الى الله؟؟؟؟؟؟؟

[آلاء الله]

بسم الله الرحمن الرحيم
قال تعالى :انك لاتهدى من أحببت ولكن الله يهدى من يشاء:
وقال تعالى:الله ولى الذين آمنوا يخرجهم من الظلمات الى النور:
وقال تعالى:ومن لم يجعل الله له نورا فما له من نور:
وقال تعالى :قل ان هدى الله هو الهدى :

أخواتى فى الله
والذى فلق الحبة وبرأ النسمة إنى احبكم فى الله

اكيد يا اخواتى كل واحدة فينا كا فى سبب فى التزامها ...........
آية سمعتها فهزت كيانها
درس حضرته فأثر فيها
شخصية كانت سبب فى تغيير حياتها
او موقف كان هوا طريقها للهداية...............

والكلام فى هذا الموضوع كتير ............
والقصص لاتنتهى ......................................

فكيف كان طريقك الى الله ؟؟؟؟؟؟؟؟؟؟؟
ومن كان قدوتك فى ذلك؟؟؟؟؟؟؟؟؟؟؟؟؟؟؟؟؟؟
وما هو سر التزامك؟؟؟؟؟؟؟؟؟؟؟؟؟؟
والمشاكل التى واجهتك عند الالتزام..............

وجزاكم الله خيرا

[mero]

السلام عليكم ورحمه الله وبركاته

اولا احبكى الذى احببتينى فيه

ثانيا ساقص لكى لعل كلامى يكون به فائدة ، باسم الله :

انا يا ستى كنت فى 3 ثانوى كنت بروح دروس ن وكان فى درس رياضات بعده على طول العشاء بتاذن فا كنت بروح اصلى فى المسجد اللى جنب الدرس ، فا كان فى هناك بنات بيحفظو قران ودرس تجويد على يد استاذه فى المسجد ، قعدت معاهم وقررت احفظ اللى عليهم ، المهم روحت وحفظت الصفحه اللى اخدوها وكانت اول مره احفظ بالتجويد ، فى هذا الاسبوع لقيت أخواتى بيتكلمو عن الشيخ حازم وانو شيخ كويس ( دمه خفيف ) فا غيرت معاد الدرس بتاعى وسيبت القران ورحت معاهم الشيخ حازم ، اخدت معايا ابن خالتى وهو أصغر منى بسنه كان بيحكيلى على مشاكله وكده ، اقنعته انوة يجى معانا الدرس ، والحمد لله ذهبنا .

هنا بقى كانت المفاجئة الكبرى فعلا ، كانت المحاضره عن " النار" ، سبحان ربى انا تقريبا تلت تربع المحاضره قضيتها بكاء ، وفكرت فى ابن خالتى اللى قعدت اقنع فيه يجى نص ساعه انو يجى معانا واقوله الشيخ حازم دمه خفيف وبيهزر فى المحاضره وبتاع ، بس سيبحان ربى ما هى الا دقائق ولقيت الشيخ بيقول ويا جماعه اللى جاى اول مره ما يزعلش ممنا لو كنا شدينا فى الكلام او كده ، بعد الدرس ذهبنا لزياره خاله لينا ، وثانى خبطه تفوقنا كانت مشغله على قناه فضائيه عمرو خالد واكانت الحلقه عن التوبه وشروطها .

بس بقى من هنا بدئت قررت خلاص الاغانى انساها ، شات مع ولاد أمسح كل الايميلات اللى عندى ، بس باقى شىء انى لبسى كان شوية ضيق على راى الشيخ حازم ( حجاب امريكانى ) ، بس انا كان فى حاجات كتير قبل الالتزام كانت فطرتى فيها سليمه الحمد لله دا من فضل ربنا عليا .

خلصت الثانويه العامه بحلوها ومرها ،وفى الاجازه بدات تانى حفظ قرآن بس فى السلاب ، وكان فى بنت منتقبه بتحفظ معانا انا كنت بحبها جدا و ما عنديش الجراة انى اقولها وكنت من اشد المعجبات بصوتها فى التلاوه ، عموما انا كنت بحب المنتقبات جدا وكنت بتمنى انى البس نقاب ، وما هى الا ايام قليله وسيبت الحفظ تانى ، عشان اختبارات الكليات وكده ، سبحان ربى هما كام يوم كده ونزلت انا وصديقه ليا ( بنتفسح ) فا عدينا على صن مول ا وروحنا مكتبه يلا شباب جبنا من هناك شويه شرايط على كام كتيب ، المهم اسبوع كده ولقيت ان ربنا مسهلى وبروح دروس الاخوات ، تعرفت على بعض الاخوات ، وكانو لسه مش صحابى اوى ، المهم اخر الاسبوع ده روحت انا وصديقتى تانى مكتبه يلا شباب وكنت فى نيه اجيب اسدال ، واشتريته والحمد لله وطلعت بره المحل فا صحبتى قالتلى ايه انتى مش هتجيبى النقاب سبحان ربى دخلنا تانى وجبت النقاب ، وكل اللى فى المحل باركولى كنت سعيده جدا جدا جدا ، طبعا اول لما روحت لبست الاسدال والنقاب وقعدت شويه اتفرج على نفسى فى المرايه واخواتى يتريقو عليا ، المهم كان الموضوع مقبول فى البيت وان كان غريب فى العائله ، وليس الاسرة .

المهم طبعا اتعملى جلسه اتهام من بعض خالاتى والحمد لله ما زدت الا يقينا على يقينى بانى ماشيه فى الطريق الصح ، وبعدى باسبوع بفضل ربنا وكرمه علينا اختى لبست زيى السواد ، وما هى الا ايام قليله وعرفنا بنات فى منتهى الجمال خلقا وخلقا ،وسبحان ربى سبحان ربى لقيت اخت ليا فى الله بتقدمنى لواحده تانيه بتقولها دى فلانه ويا فلانه دى فلانه والله كدت ان يغشى على تخيلى كانت الاخت اللى حفظت معايا قران وكان نفسى اكلمها ، الحمد لله ربنا كريم اوى ، بقى ليا اخوات كتير فى الله ، بقينا بنروح نعمل حاجات خيريه مع بعض و نتقابل فى الدروس ، واجمل من كل اعتكافنا مع بعض ، يا إالهى كانت ايام فى منتهى الروعه جنة جنة وربى جنة ، وبفضل ربنا رجعت تانى من وقت قريب احفظ قران على يد اخت ليا فى الله .

بس يا ستى من بعد الاعتكاف وانا علاقتى باخواتى فى الله شديدة جدا بقيت وربى بحبهم زى اختى اللى من امى وابويا وسعات اكتر وربى .

انا اسفه لو كنت طولت عليكى ، وعاوزه اسمع قصتك انتى مع الالتزام .

السلام عليكم ورحمه الله وبركاته

[ana_moslema]

السلام عليكم ورحمة الله وبركاته

موضوع جميل يا ألاء زى ما عودتينا

انا رجعت ليكم تانى بعد بعد لفترة طويلة

بس اكتشفت فى النهاية لما ابقى وسط اصحابى اللى اعرفهم ويعرفونى ده احسن بكتير

انا بقى ياستى حكايتى حكاية ولو فضلت اكتبها بالتفصيل هتملوا جداااااااااا

انا التزمت وانا فى تانى سنة ليا فى الجامعة يعنى اولى صيدلة

كنت عادى جدا لبس وميكب واصحاب وخروج معاهم ونتفسح خلا طلعت من الثانوية العامية اللى فضلت محبوسة سنتين كاملتين فى البيت وكمان ابى توفى فى الفترة دى

المهم برده انا مكنتش سعيدة مع انى تقريبا انا وصحابى مكناش بنفترق نقوم نروح الجامعة نيجى من الجامعة يدوب ننام شويه ونقوم نكلم بعض تانى

المهم عدت عليا سنتين فى الجامعة وفى نهاية العام الثانى حاسة باكتئاب فظيع ومش عارفة اعمل ايه وكانت بنت خالتى عندى بتذاكر معايا وكان يوم جمعة فقالت لى انا همشى بقى على المغرب علشان اروح درس دكتور حازم فقالت لى تيجى معايا انا مترددتش قولتلها طيب هاجى رحت الجامع وكان الدرس او درس فى سلسلة كان الدرس بعنوان حب الله وكان درس فى منتهى الروعة وانا فى الدرس دخل قلبى معانى حلوة قوى وعزمت على التغيير والقرب من الله

تانى يوم نزلت الجامعة من غير ميكب وكان عندى طرح طويلة فبدات البسها احنا كنا فى الفترة اللى قبل الامتحان المهم انتهت الامتحانت ولبست الاسدال علطول ولبست بعديه بأسبوعين النقاب وبعديه بشهر لبست الملحفة السوداء ومن سعتها والحمد لله وانا لابسها انا تقريبا بقالى سنتين ملتزمة ادعو لى بالثبات ده كان بداية الطريق

الحمد لله ربنا فتح على دلوقتى فى حاجات تانية اللهم ارزقنا الصدق
وانا كنت مع ميرو فى الاعتكاف السنة دى كان فعلا رمضان رائع اللهم اعده علينا مرات عديدة

كفاية بقى طولت عليكم .....................

[الله ناظرى]

جميلة الفكرة دى يا آلاء


أنا قررت أحكى قصتى
وبصراحة مش عارفة أنا بحكيها علشان يمكن تساعد حد
ولا بحكيها علشان يمكن حد يساعدنى


البداية كانت من سنتين .. بالظبط بعد عيد الفطر .. وأنا كنت فى 3 ثانوى
كان د. حازم لسة فى بداياته.. لأنى فاكرة أول ما رحت كان عددنا قليل

المهم أنا كنت قاعدة فى أول يوم بعد العيد لا بيه ولا عليا .. وكنت زهقانه
المهم بنت عمتى ( الله يكرمها ) كانت عارفة درس د. حازم
قالتلى تيجى معايا الدرس .. فقلت درس ايه ؟؟ وفين ؟؟
قالتلى د. حازم .. على المشاية

قلت كويس أوى .. أنا أصلا كنت راحة المشاية علشان اجيب شرايط جديدة (لعمرو دياب و لاتنين كمان بس نسيت دلوقتى) وكنت واخدة معايا 50 جنيه .. علشان كنت بجيب شرايط أصلى .. شوفى أنا نازلة بنية ايه .. سبحان الله !!

وقلت أما أشوف الراجل اللى بتقول عليه بنت عمتى ... وأشوف مين اللى غير تفكيرها كده مرة واحدة ... مكنتش محجبة واتحجبت (حجاب أمريكانى أه ) بس كان تقدم كبيييييييير أوى بالنسبة لها ( الحمد لله هى منتقبة دلوقتى)

رحت الدرس .. وكان د. حازم بيتكلم عن الجنة يومها
كان درس جميل أو بمعنى أصح ربنا فتح قلبى لكلامه

وكان أول قرار خدته من أول درس
أنى بدل ما كنت هشترى شرايط أغانى اشريت شرايط د.حازم للدروس ... والدرس اللى بعده ... رجعت قطعت شرايط الأغانى اللى عندى كلها
وبعدين بدأت أغير فى حجابى ( أنا كنت محجبة .. بس حجاب ما يعلم بيه إلا ربنا)
وبدأت ألبس جيبات واسعة .. وشوية وبدأت أشترى عبايات وطرح كبيرة
وشوية وجت لحظة كانت صعبة عليا أوى
اشتريت إسدال .. بس لبسته يوم واحد وبعد كده حصل مشاكل مع والدى ووالدتى
وحاليا أنا لابسة عباية وطرحة برده

يعنى فى حاجات كتير اتغيرت .. وبدأت أعمل حاجات مكنتش بعملها ..زى
( صلاة الفجر _ قيام الليل _ القرآن (قراءة وحفظ)_ أسمع عن السيرة بشغف _ أحب أسمع كلام المشايخ جدا ( مع أنى مكنتش بسمع لهم ولا كلمة قبل كده ومكنتش بحبهم أصلا ) _ .....)

يعنى الحمد لله

بس لسة أدامى كتييييييييييييير أوى


اللهم اهدنا واهدى بنا واجعلنا سببا لمن اهتدى
اللهم يا مقلب القلوب ثبت قلوبنا على دينك
آمين

[أم حمزه]

موضووع راااااائع يا بناات والله .. جزاكي الله خيرا يا آلاء ..

الاول انتوا وحشتوني جدا وانا اسفه اذا كنت قصرت معاكم ف المنتدى في فترة الاجازة ولكن لظروف لا يعلمها الا الله ..

هحكيلكوا بقى قصتي ..

انا البدايه كانت وانا ف اولى جامعه .. كان لبسي عادي خالص " حجاب كده وكده يعني " .. وماكنش في مشكله بالنسبه للاغاني .. وكان اصحابي زي .. فمرة كان يوم جمعه اتفقت بالنهار مع واحده صاحبتي اننا هننزل نشتري لبس المهم خرجنا الساعه 4 قضينا مشاورينا وقولنا نروح النادي .. صاحبتي لما دخلنا النادي قاتلي ايه ده انا لسه ماصلتش العصر .. المهم مسجد النادي كان لسه تحت الانشاء .. ف قولتلها خلاص نروح السلاب تطلعي تصلي واستناكي تحت .. روحنا وهي طلعت فعلا.. لكن غابت عليا اوىىى.. اتاااااااارى بقىى اييييييييييه؟؟؟:(ضحك): درس دكتور حازم شومان جــــــــــــزاه الله عنا كل خير كان شغال .. والدرس اللي كان شغال هودرس" اهل الاعراف" .. المهم هي نزلت ولاقيتها جايه وشها متغير ومش على طبيعتها ف لاقيتها بتقولي حصليني بسرعه ده فيه شيخ فوق بيقول كلام تحفه .. ف فررحت اوى وقولتلها خلااص ماشي هطلع " كنا برضو الحمدلله جوانا جزء كويس يعني مفيش مانع لو سمعنا درس ف شريط و بنحاول اننا نغير من نفسنا بس .. للأسف .. كنا بنزق ف حيطه مايله لان الاصحاب كلهم زينا ومفيش صحبه صالحه .. وكنا بنضحك على نفسنا وماشين تحت الشعار الشهير" انا كده كويسه " واحنا بنصلي وزي الفل الحمدلله ايه بقى اكتر من كده هنعمله .. لكن كنا برضو بنحس انه دايما في حاجه ناقصه وفي حاجه غلط ف حياتنا".. ف المهم طلعت رواها وقالتلي اسمعي بقى .. المهم الدرس سمعناه وطوول الدرس نبص لبعض وحاسيين اننا بنتحسر على نفسنا .. المهم فضلنا طبعا قاعدين لحد ما الدرس خلص ونسينا النادي ونسينا اصحابنا والدنيا اللي بره دي خالص .. بعد ما روحت قعدت اقول لنفسي ايييييييييييييييه اللي ناا فيه ده .وايه الهيافه اللي انا فيها دي .. ومالى فرحاانه بنفسي اوى كده ليه.. وايه الدنيا اللي ناا فرحااااااانه بيها اوى دي ومتمسكه بيها اوى كده ليه .. وهتسااوي ايه قدام زله من زلات الصراط .. بجد حسيت ان درس اهل الاعراف ده كان زي قلم فوقنيىىىىى .. ومن بعدها من فضل ربنا عليا ماقطعتش لا انا ولا صاحبتي الدرس وبقينا نشجع بعض على قيام الليل والصيام وعلى حفظ القرآن والحمدلله جبنا عدد كبير معانا من اصحابنا بتوع الجامعه والنادي المره اللي بعدها .. طبعا ف ناس بفضل الله استمروا وفي ناس شويه كده وشويه كده .. وبعدها بدانا نغير ف لبسنا بس بالتدريج ما اخدنهاش قفش..يعني عبايات .. بعدها كبرنا الطرحه شويه ع العبايه .. بعدها بقينا نغمق شويه ف الالوان .. والحمدلله دلوقتي الاغلبيه من اصحابي بقى لبسهم اسدال او ملحفه او نقاب وبقى عدد قليل يمكن اتنين او تلاته من اصحابنا اللي لسه وبنحاول معاهم .. والله المستعان ..

والحمــــــــــــــــد لله الذي هدانا لهذا وما كنا لنهتدي لولا ان هدانا الله ..



انا طووووولت عليكم اوى يا بنات معلش بقى.. بحبكم في الله :(ضحك):

[rehab_2]

كنت فتاة غافلة


نعمة انعهما الله على ان اكون معكم هنا اعجبني الموضوع جدا اختي في الله جزاك الله عنه كل خير
واليكم قصة التزامي
كنت فتاة غافله لا يشغلها سوى المذاكرة والترتيب والوصول للقمه والاغاني والضحك والهزار وروايات رجل المستحيل وعبير وغيرها نعم هذه كانت حياتي في ثانوي نعم كنت احافظ علي الصلوات في وقتها بقدر الامكان وكنت حافظه لكتاب الله تعالى حيث انني اتممت حفظه في الصف الخامس الابتدائي ولكن كانت هناك غشاوة علي عيني
خلصت ثانويه عامه بمجموع كبييييييييييير والتحقت بالكليه اللي اتمنيتها طول عمري بس كنت لسه في غفله بس والله رغم هذا كله كنت من الكليه للبيت ومن البيت للكليه المحاضرات والسكاشن وبس ومفيش غير كده عدت سنه اولي طب بتقدير كويس وبعدين بقيت في تانيه وبرده لسه زى ماانا
وفي يوم راحه الكليه لقيت نعي مكتوب ببص عليه لقيت بنت في خامسه ماتت ومش كملت امتحانتها انا مش كنت اعرفها بس زعلت جدا وقلت ياااااااااااااه بعد ماوصلت لخامسه ماتت طيب هي خدت ايه من دا كله طيب هي لما ماتت كانت ملتزمه ولا كانت عاديه وبدأت اخاف بس كان الشيطان وقتها اقوى مني لسه خلاني انسى بسرعه لحد قبل امتحانات الترم باسبوعين كنا في العشر الاوائل من ذي الحجه ولقيت نعى تاني ان ولد برده في خامسه بعد صلاة العصر وكان صايم دخل نام فوالدته بتصحيه لقته مات هنا بقي كانت الوقفه بجد حسيت اني انا اللي علي الدور خفت المره دي بجد وقررت يومها اني ارتدي الحجاب الشرعي بس كانت مشكله هالبس ايه هالبس خمار لا انا مش بحبه طيب البس طرحه طويله علي عبايه لسه هاستني علي ماعمل عبايات ويمكن بعد كده الطرحه تقصر تاني وارجع اسوء من الاول كمان مش كنت شايفه ان دا الحجاب الشرعي المهم وقتها كان الاسدال بدأ ينتشر عجبني اوي خلصت امتحانات ونزلت اشتريت اسدال ولبسته في يومها حسيت فعلا يومها اني بنت مش عارفه اوصفلكم احساسي بجد المهم وقتها بدات انزل دروس دكتور حازم وكمان كان في بنات كتير ساعدوني وحاولوا يثبتوني ربنا يجزيهم عني كل خير بعدها بدات اتطلع لشئ اسمى( النقااااااب ) طبعا لقيت مشاكل مالهاش حد مع والدي وفضلت علي كده سنه لحد مالبسته دلوقت الحمد الله
بجد انا بحمد ربنا على نعمة التزام دي وادعولي ان ربنا يثبتني
واني اقدر احصل علم شرعي

[يمامة المسجد]

آمين ياقطرة آمين

[Muslima_Mwa7eda]

السلام عليكم
فى الحقيقة دى فكرة كويسة ان كل واحدة تكتب قصة التزامها ووالله الذى خلق كل شئ انا كنت بفكر فى كدة امبارح عايزة احكى على قصة التزامى
انا اتولدت فى اسرة عادية زى كل الناس بنصلى ونصوم ولبست الحجاب لكن للاسف كنت بعمل كل دة زى ما الناس بتعمل مش حاسة بحاجة لحد ما جيت فى يوم ولقيت نفسى اتمردت على كل حاجة بطلت صلاة وقلعت الحجاب او الطرحة الصغيرة اللى كنت بلبسها وعصيت ربنا فى حاجات كتير عارفين لية لانى ما كنتش حاسة بالطاعة او الصلاة او لية لازم نصلى ولية لازم نلبس الحجاب
لحد ما اتخرجت من الجامعة وبدات اشتغل وفى الشغل تلاقى اللى يساعدك على انك تبقى اوحش مش احسن يغنى الاهتمام باللبس والمظاهر والمكياج والشعر وحبيت انسان معايا فى الشغل بردة كان انسان عادى مش ملتزم بس بيحب ربنا وبيصلى بس متقطع المهم هو سافر يشتغل فى دولة عربية وعدت سنة وفى السنة دى كنا بنتخانق كتير لدرجة غير عادية ودة لاننا كنا بنعصى ربنا فى حاجات كتير لدرجة اننا كنا حننفصل عن بعض وربنا اكرمنا ورجع من السفر علشان نحل الخناقات واتصالحنا وكتبنا الكتاب وسافر تانى وبعدها بدات اشوف ناس كتير بتموت حولية وبدات اسال نفسى لو انا اللى مت حقول لربنا اية مابصليش لية ومش لابسة الحجاب لية وحاجات كتير اوى بدات اسمع الشيوخ فى قناة الناس وافهم انا لية المفروض اصلى والبس الحاجاب وحاجات كتير اوى ماكنتش فاهماها او بمعنى اصح ماكنتش حاساها وبدات احس بقلى يتغير وبحياتى بعد ماكنت فى حياة تعيسة وهمى الدنيا بدات احس براحة كبيرة اوى وانى مش عايزة حاجة من الدنيا وبدات اوصل لزوجى كل الاحاسيس دى وطبعا فى البداية كان بيضايق لما يقولى مثلا اسمعى الاغنية الفلانية واقولة بطلت اسمع اغانى وبدات ادعيلة ووالله العظيم مش حتصدقوا انة بقى بيتصل بية كل يوم دولى يصحينى علشان اصلى القيام وافضل اقرا قرءان لحد الفجر ودة فضل من عند ربنا
المهم المغزى من دة كل هو القلب يعنى الحمدلله انا وزوجى اتولدلنا قلب جديد همة طاعة ربنا ورضاه ويحب كل ما يقربنا الى الله من قول او فعل
ادعولنا يا اخواتى ربنا يثبتنا ويجدد الايمان فى قلوبنا والمسلمين جميعا
وتانى حقولكم القلب ...... القلب.............. اهم حاجة يكون فى قلب فاهم وحاسس اللى بنعملة علشان نرضى ربنا وبكدة ان شاء الله مش حيحصلنا فتور او رجوع
يارب تجدد ايمانا وتسرع خطانا ليك يارب

[يمامة المسجد]

ماشي الله حبيبتي رن

ربنا يكملها عليكم نعمة ، ونعوذ بها من الزوال ، ويخيلكوا وتخلفوا للإسلام ولاد وبنات ينفعوا الإسلام

[مُسلمة]

السلام عليكم ورحمة الله وبركاته
ما شاء الله لا قوة الا بالله
والله دمعت عيني من قصصكم الطيبة
اما قصتي فهي طويلة جدا
سنوات طويلة عانيتها مع نفسي لابدا طريق الالتزام
تقريبا 6 سنوات اتخبط وابدأ خطوة وارجع خطوات
سأحكي لكم قصتي اليوم إن شاء الله

[الله ناظرى]

منتظرين حكايتك يا طريق القرآن

[مُسلمة]

السلام عليكن ورحمة الله وبركاته
بدايةً إني أحبكن في الله
وأتمنى أن أتعرف عليكن عن قرب
حكايتي مع الألتزام طويــــــــلة
تعثرت خلالها كثيراً كثيراً
منذ طفولتي وأنا أرتدي حجاب ( طرحة ) على خلاف أختاي ( بنتين أصغر سناً مني )
دراستي كانت بالأزهر وليس تعليم عام
والأزهر له مميزات وعيوب
ولكن في رأيي أن عيوبه أكثر
المهم من المرحلة الاعدادية والدراسة ليست مختلطة ولله الحمد
كنت أستمع للأغاني بشدة بل أحفظها ولا أذاكر إلا على مزمار الشيطان
والحمد لله الذي هدانا لهذا وما كنا لنهتدي لولا أن هدانا الله
في الصف الأول الثاني كان يدرس لنا الانجليزي مدرس قمة في الاخلاق والاحترام
ولكن للاسف كان يلقى استهتار كبير من الطالبات
بين وقت وآخر كان يعطيني وصديقة لي شرائط أناشيد وكتيبات وورق أذكار
استمر هذا الحال 4 سنوات ثانوي
أستمع لشريط أو أقرأ كتيب أقرر وقتها أني لن أعود للغناء
تأتي الاجازة أرجع كما كنت وهكذا طيلة أربع سنوات
حتى آخر سنة في المرحلة الثانوية كان يدرس لنا مدرس أحياء بارك الله له وجزاه عنا خيراً ( كان يدرس لنا في بيتنا)
تغيرت بسببه أشياء كثيرة بداخلي
أحياناً كان يترك الدرس ليقرأ لنا بعض آيات ويفسرها
وكان أول ما قرأ ( قل يا عبادي الذين أسرفوا على أنفسهم لا تقنطوا من رحمة الله )
وقتها انهرت بالبكاء وظل حالي هكذا أيام
وانتهى العام الدراسي وللأسف بدأت أرجع خطوات كثيرة للخلف وكنت ارتيدت الخمار في 2 ثانوي
وبدخولي الجامعة في القاهرة انكمش الخمار إلى طرحة كبيرة
سكنت في المدينة الجامعية ولله الفضل والمنة كانت أهم سبب في التزامي
أرى فتاة تكبرني بعام لا تترك المصحف من يدها
تذاكر 5 دقائق ثم تقرأ في المصحف
ظللت أتابعها كثيراً وأحاول التقرب لها
حتى منّ الله عليّ بذلك
كانت خير صديقة لم أعرف مثلها بعدها
أخذت بيدي وبدأنا سوياً
ولكن الغريب أن بدايتنا كانت مع الاخوان المسلمين
وفي السنة التالية اتسعت مداركنا وفهمنا أكثر وأكثر
ارتدينا النقاب تقريباً في يوم واحد
خرجنا لدروس العلم معاً , تعلمنا كثيراًَ بفضل الله
وعلّمنا ما تعلمناه في دروس كثيرة بالمدينة الجامعية وخارجها
وصديقتي هذه أدين لها بكل خير تعلمته
جزاها الله خيرا وبارك لها فيما علمها
......
أعتذر للإطالة
وتبقى مشكلات ما زالت في طريقي سأطرحها لكم في موضوع الفضفضة لعلكم تساعدوني في حلها

[الله ناظرى]

ربنا يبارك فيكى يا مسلمة
ويثبتك ويثبتنا جميعا

بس ليا ملاحظة بس فى كلامك ..
الجملة دى

"ولكن الغريب أن بدايتنا كانت مع الاخوان المسلمين"

مش عارفة تقصدى بيها ايه
بس ياريت منتكلمش عنهم بشكل مش مناسب


على فكرة أنا مش من الإخوان ولا تبع أى حد يعنى
بس أنا بخاف من الكلام اللى ممكن يفرقنا بدل ما يجمعنا

وجزاك الله خيرا

[مُسلمة]

ربنا يبارك فيكى يا مسلمة
ويثبتك ويثبتنا جميعا

بس ليا ملاحظة بس فى كلامك ..
الجملة دى

"ولكن الغريب أن بدايتنا كانت مع الاخوان المسلمين"

مش عارفة تقصدى بيها ايه
بس ياريت منتكلمش عنهم بشكل مش مناسب


على فكرة أنا مش من الإخوان ولا تبع أى حد يعنى
بس أنا بخاف من الكلام اللى ممكن يفرقنا بدل ما يجمعنا

وجزاك الله خيرا

جزاكِ الله كل خير أختي الفاضلة
يشهد الله أني لم أقصد بهذه الجملة انتقاص لهم أو خطأ في حقهم
ولكني أقصد أن هذا منهج وطريق وذاك آخر وربما اختلف الطريقان في أشياء كثيرة
وما ذكرتُ الجملة إلا لأوضح أني بدأت التزامي في طريق ثم تركته لآخر

[الله ناظرى]

جزاكِ الله كل خير أختي الفاضلة
يشهد الله أني لم أقصد بهذه الجملة انتقاص لهم أو خطأ في حقهم
ولكني أقصد أن هذا منهج وطريق وذاك آخر وربما اختلف الطريقان في أشياء كثيرة
وما ذكرتُ الجملة إلا لأوضح أني بدأت التزامي في طريق ثم تركته لآخر

ربنا يبارك فيكى

وأنا والله مقصدش حاجة من كلامى إلا زى ما قلتلك

:(ضحك):