Tweet
قصة موضوعنا انهاردة ..هي إن أحد الشباب من زمايلنا كان على علاقة حب مع بنت من سنة أولى كلية ..
ووصلوا لمرحلة إن الناس بقت تقول عليهم روميو وجوليت !
وخلاص الكل بقى يقول دول مخلوقين لبعض ،
وهيتجوزوا ويعيشوا أسعد حياة ..
ولكن بعد ما خلصوا الكلية على طول ..
الشاب راح يكلم أهله في الموضوع فرفضوا رفض حازم وقالوا مستحيل هتتجوز البنت دي ..!!
والشاب طبعاً سمع كلام أهله علشان ميزعلوش..
وإتصل بالبنت وقالها :
يا بنت الناس أنا من طريق وإنتي من طريق علشان مظلمكيش معايا ، وياريت متكلمنيش تاني ..
وقفل السكة وغير رقم موبايله !
كل ده مش مشكلة ؛ المشكلة إنه بعدها بكام يوم لقى رقم غريب بيتصل عليه ...وبمجرد ما فتح ؛ لقى بنت بتبكي بكاء هستييري ، وطلعت إن هي البنت اللي كان بيحبها ، مش مهم جابت رقمه إزاي ، المهم هو الكلام اللي قالتهوله ..
وده هو اللي انا عمال الموضوع علشانه ..
قالتله البنت وهي مش قادرة تبطل عياط :
وقدرت تبعد ؟؟؟
انا مش مصدقة ؟؟؟
انا عمري ما كنت اتخيل انك ممكن تعيش يوم من غيري ؟؟
ازاي هان عليك كل اللي كان بينا ؟؟؟
فين كل الكلام والمشاعر اللي كانت بينا ؟؟؟
فين كل الوعود ..فين وعدك ان مفيش شئ هيفرقنا غير الموت ؟؟؟
هو ممكن الحب يموت بالسهولة دي ؟؟
ممكن وعوود السنيين تضيع في لحظة ؟؟؟
الشاب بيقولي : انا قولتلها عادي .. وياريت تنسي الموضوع ده ومتتصليش بيا تاني ..
وكلمتها بشدة علشان متقرفنيش كل شوية ..
ولكن كل يوم تتصل ..ومجرد ما فتح تقعد تعيط ومتتكلمش !!
الشاهد من الموضوع ..
هو رسالة بسيطة ولكنها في غاية الاهمية عايز أوجهها لكل بنت ..
متبقيش ساذجة ..
إنتي ممكن تكوني صغيرة في السن ..بس لازم عقلك يكون أكبر وأنضج من كده ..
خصوصاً لما تبقي شايفة الواقع من حواليكي وعارفة كويس نهاية القصة إييييييييييييه !
ليه عايشة الوهم وفاكرة إن قصة الحب بتاعتك شئ تاني ..غير أي قصة حب ؟؟!!
ليه فاكرة إن الولد اللي بتحبيه ده غير أي حد .. وإنه فعلا بيحبك وهيتجوزك..؟؟!
حد يبني حياته ومستقبله على شوية كلام ووعود ؟؟؟؟
إيه اللي يضمنلك إنه صادق ..؟؟؟؟؟
هتقولي انك واثقة فيه ثقة عمياء ..وانه وعدك انه مجرد ما يخلص كلية او يشتغل هيتقدم ..
هقولك يبقى انتي لسه عايشة الوهم !!!!!
ده حتى لو اتقدملك وخطبك ..ايه اللي يضمنلك انه ميسيبكيش في اي لحظة ؟؟؟
هو ايه الشئ اللي بيربطه بيكي اصلا ..؟؟!
مفيش اي شي ..شوية كلام ..
ولو كان خاطب ..شوية دهب ممكن يستغنى عنهم وخلص الموضوع ..
خلص الموضوع بالنسبة ليه ..انما بالنسبة ليكي فالمآساة لسه بتبدي..!!!!
لسه هتبتدي قصة الندم على كل دقيقة ضيعيتها من عمرك معاه !!
لسه هتندمي على مشاعرك وأحساسيك اللي فرطتي فيها معاه !!
لسه هتدوري على حد يسد خانة الفراغ العاطفي اللي خلاص بقت موجودة في حياتك ولازم تتملي !!!
لسه هتقعدي تسألي نفسك هو العيب في مين ؟؟ فيه ولا فيا ولا في الحب ؟؟؟
يا اختي أي شاب في الدنيا معندوش اي مشكلة انه يسيب اي بنت في اي لحظة ..
ده ان مكنش عاقد النية من قبل ما يكلمها أصلاً انه هيسيبها ..
أصله مش خسران حاجة ..
بالعكس ..هو شايف ان اي بنت فرطت في مشاعرها وعواطفها متنفعش تبقى زوجة المستقبل اللي هيأتمنها على بيته بعد كده !
وحتى لو افترضنا ان الموضوع مشي وكمل وتم الزواج ..
والله العظيم عمرك ما هتلاقي ( الزوج الصالح ) من قصة حب !!!
خلي بالك من الكلام الل بين القوسين ..
مفيش واحد ملتزم هيقعد يحب واحدة قبل الجواز علشان يتجوزها جواز مبني عل حب !!!
الحب في الاسلام بيجي بعد الجواز مش قبله !!!
صوني نفسك يا اختي ..
واحتفظي بمشاعرك لزوجك ..
واعرفي ان اللي بيقولك مقدرش أعيش من غيرك وانت روحي وانتي عمري والكلام ده كله ممكن يبيعك في اي وقت ..
وهترجعي تقوليله :
وقدرت تبعد ؟؟؟!!
هيقولك :
آآآآآآآآآآآه !!!!
=========
ربنا يرزق بنات المسلمين اجمعين بالازواج الصالحين ويعفهم ويسترهم ويحفظهم من كل سوء..اللهم امين..
أخوكي ..هنعيشها صح ..
المصدر :منتدى أحلى حياه فى طاعه الله
تعليق