Tweet
انا ليه مش زى زمان ؟؟
السلام عليكم ورحمة الله وبركاته
مشكلة ناس كتير جدا الايام دى وهى : ليه انا مش بقيت زى زمان ؟؟
صحيح ليه بيجي علينا وقت ونتغير ونفتر في العبادة ؟؟
ليه الملتزم الجديد بيشعر بلذه جميلة وحلوة جدا في قربه من ربنا ؟؟ لكن لما يتقدم شوية في مشوار الالتزام
بيدأ يفتر ويمل ويهمل العبادات ويجي يشتكى انا ليه بقيت كده ؟؟؟
التدين له 3 مراحل زى الانسان بالظبط :
الطفولة:ودى بتكون في البدايات لما بيكون ملتزم جديد والدنيا جديدة عليه وبيكتشفها
الشباب :مرحلة القوة والانطلاق ودى بتحصل لما الشخص بيدوق حلاوة العبادة
الشيخوخة : ودى مرحلة متاخرة من مراحل الالتزام بنفتر فيها وبننسي كتير
يبقي لازم ندور علي الاسباب اللى تخلينا علي طول في مرحلة الشباب وننطلق في العبادة
اسباب علو الهمة في الدين :
1- ان تكون عبد ربانى : ان تنظر الي ما يحبه الله لا ما تحبه انت ، يعنى لو حصل ايه والصلاة جات قوم صلي
دايما استشعر فضل ونعمة الله عليك ان هداك بعد ان كنت عاصي خليكى متيقظة دايما لمراقبة الله واعرفى
حق الله وما يبغضه وما يريد لا ما تريدى انتى ..
2- ان تشعر بالدنو : مش عشان انك بتصلي يبقي خلاص بقيت ولي معصوم لالالا، لازم تفتكر انك كنت عاصي
ولولا ربنا هداك كان زمانك فين دلوقتى ؟؟ متقولش انا احسن من غيري .. وخاف من عذاب الله والموت بغته
3- الاستمتاع بالطاعة :من اكتر الحاجات اللي بتضعف الهمة الاستعجال في عمل الطاعة ، الصلاة تخطفها
في 5 دقايق والاذكار في 3 دقايق ومتعرفش انت بتقول ايه ؟؟ ده بيفقدك طعم الطاعة وتبقي تقيلة علي قلبك
لازم تبقي حاضر الذهن ومركز في عمل الطاعة عشان تستمتع بيها وتحبها وتقبل كمان .
4- الصحبة المعينة : مينفعش يبقي صحابك او اهلك كل حياتهم افلام واغانى ودنيا وانت عايز تنطلق في العبادة
صدقنى هيأثروا عليك جداَ لازم يكون ليك صحبة ايمانية تشحن قلبك وتساعدك علي الطاعة ..
5-الخوف من العودة للمعاصي تانى : لازم تخاف انك ترجع تانى وتنتكس وتموت ع الذنب او تفتكر عشان ما صليت
شوية تبقي خلاص بقيت معصوم من انك ترجع تانى .. لالالا خاف من العودة للذنب
ناس كتير انتكسوا بعد عبادة سنين .. الحل هو التمسك بحبل وطلب رضاه والاستغفار ..
6- وضوح الامراض : امراض القلوب - الشرك الخفي - احذر من الرياء والعجب بالعمل ، والرياء مرض
اعراضه غير واضحة فلازم نجدد النية لكل عمل ونحذر من محبطات الاعمال ...
7- حرارة البداية : دايما الملتزم الجديد بيكون سخن ونشيط في العبادة وعنده همه عالية والسبب هو معونة الله له
لكن لما بتيجى مرحلة الاختبار لمعرفة مقدار صدق العبد وثباته علي الطاعة هنا بيظهر اللي عايز يوصل بجد
لله من اللي مش قد مشوار السير الي الله وهنا لازم المسلم يصبر ويحتسب اجره عند الله ..
8 - وجود مربي وقدوة حسنة تعين المسلم علي الاستمرار : ممكن يكون شيخ او اخ / اخت ملتزمة اى حد يكون مرجع
ثقة ترجعله لما تقف قدامك عقبة صعبة ...
وفي النهاية لازم تستحضر مراقبة الله لك وتفتكر انك طالب رضا الله وسائر اليه
فمينفعش تفتر او تمل او ترجع ...
جزاكم الله خيرا 
تعليق