Tweet
نسال الله ان نكون ممن أُعتِقَت رقابهم من نار جهنم وان نكون من المقبولين
عيد سعيد عليكم جميعا ويجعل ايامنا القادمه افضل من التي مضت ويصلح حال بلادنا
طبعا السؤالين اللي بيخطروا على بال كتير مننا بعد شهر رمضان وبعد العيد حاجتين الناس بتبقى قلقانه وبتسال عنها
اول سؤال ,, يا ترى ربنا قبل مننا شهر رمضان ولا لأ ؟ قبل مننا الصيام والقيام والاحسان والزكاه ولا لم يقبلها ؟؟ السؤال الثاني ,,ازاي بقى احنا نثبت بعد رمضان ؟؟؟؟؟يقول رسول الله صلى الله عليه وسلم(احب الاعمال الى الله ادومها وان قل )
وحتى العلماء اعطو مثال جميل جدا قالوا لو ان في مكان بينزل ميه نقطه نقطه فالنقطه نقطه نازله على صخره بعد مرور سنه هتعمل حفره فيها من تاثير سقوطها باستمرار عليها ، طيب لو جمعت كمية الميه اللي نزلت على الصخره ديت ودلقتهم على نفس الصخره دفعه واحده فلن تتاثر !
لذلك الاعمال ولو كانت قليلة فالمداومه عليها بتاثر في القلوب
الايمان دا زي الزرعه ان لم تسقها بالاعمال والطاعه والعباده البدنيه والقلبيه الزرعه دي ستذبل الى ان تصل الى الموت
وكمان النبي صلى الله عليه وسلم قال (ان الايمان ليخلق (يقدم) في قلب العبد كما يخلق الثوب ،فاسالوا الله ان يجدد الايمان في قلوبكم)
لو جيت لجمال القلب دا في شهر رمضان ومنعت عنه نفس السقيه دي هيذبل ويمووت
لذلك النبي كان دائما دعائه (اللهم يا مقلب القلوب ثبت قلوبنا على دينك)
وان كنا مش بنقول صلي مثل التراويح والتهجد لكن على قدر المستطاع فلا تمنع المنع القاطع ولا تزيد عن قدرتك فلا يكلف الله نفسا الا وسعها
دلوقتي اجابة السؤال الاول ~~
علامات القبول ,, عايزين نركز يا جماعه في النقطه دي في تلات حاجات ممكن نعرف بيها اذا كان ربنا قبل ولا لا في الدنيا
بقية الاشياء لا يمكن معرفة قبولها من عدمه الى قيام الساعه حتى يشاء المولى عز وجل واحنا علينا حسن الظن بالله
اولها الصيام خصوصا صيام الفريضه (صيام رمضان)نبص كدا ، اشوف حالي ، ايمانياتي قبل رمضان كانت ازاي ،اخلاقي ،سلوكياتي،اقبالي على القرآن ،اقبالي على اعمال الخير
فلو ربنا وفقك لنفس العبادات او اكثر بعد رمضان فقد قُبِل عملك
الحاجه التانيه الحج لو ذهب المرء الى الحج ورجع ما شاء الله كــــــــل مظاهر وايمانيات الحج لسه ماثره فيه يبقى بفضل الله قُبِل حجه
طب لو رجعت ريمه لعادتها القديمه ,, فنخشى ان تكون علامة رد
الحاجه التالته بر الوالدين من علامات القبول موتهم وهم راضين عنك والعكس بالعكساذا بالتلات اشياء دول نقدر نعرف اذا كان عملنا قُبِل فيهم ولا لا
طيب السؤال الاهم بقى ليه ناس كتير بتنتكس بعد رمضان ؟؟!!!
دا في ناس كمان بتنتكس من نصف رمضان مش اخره ,, طيب ليه بيحصل الفتور دا؟؟!!
نقدر نجملها في ثلاث اسباب وان كانت اسبابه كثييييره الا اننا سنجملها في اهم الاسباب ~~
اولا هذا الشخص لم يستعن بالله ولم يسال الله الثبات
اذا سالت فاسال الله واذا استعنت فاستعن بالله اصل العباده مش بمزاجك والثبات بردو مش بايدك .. يعني ايه؟؟
(إِنَّا هَدَيْنَاهُ السَّبِيلَ إِمَّا شَاكِرًا وَإِمَّا كَفُورًا)
(بَلِ الْأِنْسَانُ عَلَى نَفْسِهِ بَصِيرَةٌ وَلَوْ أَلْقَى مَعَاذِيرَهُ)
الشاهد ان في انسان بيعرف ان ربنا هو اللي قواه على هذا العمل ,, بمعنى ان ربنا اللي يسرلك تفتح النت وتدخل موضوع زي دا بفضل الله بيدعوك الى الله ورسوله ,,الا ان شخص تاني دخل النت بس فتح موضوع تاني يدعو الى الفاحشه والرزيله او غير ذلك
فربنا اقامك في المقام دا وفضلك على غيرك من كتييييير من البشر
فانت لو سالت ربنا انه يثبتك هيثبتك لكن انت اغتريت بعملك فنسيت ترفع اديك وتقول يارب اللهم يا مقلب القلوب ثبت قلبي على دينك
فالعبد المؤمن عارف بيقول ايه؟ (ربنا لا تزغ قلوبنا بعد اذ هديتنا وهب لنا من لدنك رحمة انك انت الوهاب)
ثانيا ان هو وثق في عبادته وامن مكر الشيطان ,, حضراتكم عارفين طبعا ان الشياطين مقيده طول شهر رمضان واول ما بينتهي الشهر بتنطلق وتنفك ,, يعني شوف لما شيطان عمال يغوي فيك طول السنه ويوسوس لك طوول السنه وبعدين اتربط شهر كامل وشافك ما شاء الله بقى صيام وقيام واخلاقيات بقى وهو في قمة الغيظ ودلوقتي نفسه يتفك ومش عارف فلما بيخرج هيحاول يوقعك في اييي حاجه صغيره كانت او كبيره ,, يوقعني !! معقول !! لالا مش معقول اهو اللحظه اللي بتثق فيها بنفسك دي بيتمكن هو فيها من قلبك
كعابد بني اسرائيل (براصيصا) اللي قصته لا تخفى على احد
ثالثا ان الاسلام مش هو قضيته الاولى والله لو كانت قضيته الاولى والاخيره هي الاسلام حتى لو نفسه راودته انه يعصي ربنا مش هيبقى عنده نفس
ولا حتى ضميره هيسيبه ولا هيبقى عنده وقت اساسا لانه يعصي لان الشاب الداعي الى الله وشااااغل نفسه بالله والدين لا يمكن يبقى عنده وقت يعصي فيه بيبقى وقته كله دعوه وصلة رحم وبر والدين واهتمام بالزوجه والاولاد و....الخ من اعمال البر
(وَلَا تَكُونُوا كَالَّتِي نَقَضَتْ غَزْلَهَا مِن بَعْدِ قُوَّةٍ أَنكَاثًا)
ايوه مش بعد ما غزلت ونسجت الشهر كله ضيعت كل دا وفكيته من اول يوم من شوال
(وَلَقَدْ صَدَّقَ عَلَيْهِمْ إِبْلِيسُ ظَنَّهُ) ايه الظن دا (ثُمَّ لَآَتِيَنَّهُمْ مِنْ بَيْنِ أَيْدِيهِمْ وَمِنْ خَلْفِهِمْ وَعَنْ أَيْمَانِهِمْ وَعَنْ شَمَائِلِهِمْ وَلَا تَجِدُ أَكْثَرَهُمْ شَاكِرِينَ )
فعلا توعد وهو دا ظنه فيك انك هتطيعه ومش هتشكر ربنا ابدا
(وَقَلِيلٌ مِنْ عِبَادِي الشَّكُورُ )
عمرنا والله يا اخواني غالي اوي فخلينا على الطريق المستقيم عشان لو تفرعنا هنرجع نندم ونقول ياريت اللي جرا ما كان
خد من تجارب اللي سبقوك
خد من تجارب العلماء فهم ورثة الانبياء
بلاش تجرب,, ممكن تجرب لو ضامن تعيش ، ولو عشت والعمر عدى هتقول ياريتني بدات بدري
(من خاف ادلج (يعني مش بدري ) ومن ادلج بلغ المنزل )
يلا من دلوقتي ارفع شعار (وما توفيقي الا بالله)
(وما بكم من نعمة فمن الله)
اسال المولى عز وجل ان يتقبل منكم ويثبتكم ويعينكم على كل ما يحب ويرضى
اسباب الثبات ..أناهيد سمير
اسباب الثبات بعد رمضان للشيخ محمد حسان
تعليق