Tweet
بيحبها ونفسه يقول لها، لكنه مش قادر يتقدم
لأنها حبيبة أقرب صاحب ليه، وهو مش قادر يخون
صاحبه...
بيحبها ونفسه يقول لها، لكنه مش قادر بسبب
الخلاف القديم بين العائلتين، وهو ألد أعداء أبوها
الغني جدًّا.
بيحبها ونفسه يقول لها، لكنه مش قادر يعترف لها
بحقيقة شغلته، اللي كلها مخدرات، وقتل، ونصب،
وسرقة.
رسمة جديدة بتترسم في كل بيت...
وطبعًا من ورائها هدف نبيل جدًّا، وهو
توضيح صورة أصيلة حقيقية ل حلم
كل بنت = الحب!! وكل ده من خلال
مسلسل أو فيلم بتتكرر فيه الرسالة
بنفس المضمون، لكن باختلاف
الأسلوب والأبطال... بحيث توصل
البنت للتالي:
أولًا: مفيش جواز من غير حب
لزوم الـ (Suspense)
ثانيًا: لازم الأهل يكونوا على خلاف دائم بالشخص
اللي هترتبطي بيه، أو يكون فيه لغز ما يمنع جوازك
بالشخص ده.
ثالثًا - وده الأهم -: إنه مش لازم جواز أصلًا، ونقضيها
حب في حب... وتبقى الحياة وردي كده من غير هم
ولا مشاكل.
ببساطة: لأن مفيش ولا مسلسل ولا حكاية من دول
وَضَّحِتْ للبنت إزاي هتكمل حياتها مع حبيب عمرها،
طيب هي تجيب التفاصيل الباقية منين
وتبدأ تسعى لها؟ كل الروايات بتاخدنا طول
الوقت حول المغامرات، وبتنتهي بجوزاهم
أو موت حد منهم!!
فالصورة الجديدة اللي بتترسم: إن البنت
تحب وبس، وطالما اللي يصبر لازم ينول،
يبقى أكيد اللي هتحبه لازم لازم في نهاية
القصة يتجوزها.
اللي مضايقني إنهم سابوا كل حاجه حلوة
في كل بلد، وشغلوا دماغنا ب
هل هيتجوزوا في آخر المسلسل؟
هل هتسامحه؟
أو: يا ترى بتجيب لبسها منين؟ ومحتاجة
أخِس كام كيلو عشان أكون زيها؟!
مع إن اللي بيتابع أخبار بلد مثلًا زي تركيا،
هيتعقد في عيشته بجد... مش بسبب
أبطال المسلسلات، ولكن إزاي البلد دي
وصلت للتطور ده؟ إزاي السوق بتاعهم
محقق نجاح ساحق بالشكل ده؟
إزاي بيصنعوا كل شيء، لدرجة إن أدوات
المطبخ اللي بتتباع دلوقتي في مصر بقت
تركي؟!
كالعاده اللي بيشغل باله بحاجة بينام ويصحى
وهو بيفكر فيها... والبنت اللي بتجهد نفسها في
تفاصيل قصة الحب اللي محتاجة تعيشها، ناسية
إنها محتاجه تتعلم حاجات كتير أوي علشان على
الأقل تحافظ على الحب ده أما يجي لها.
أعرف ناس كتيرة إتجوزت فعلًا ناس كانوا حب
حياتهم، وبسبب قلة علمهم وقلة البركة بسبب
المعاصي اللي وقعوا فيها، عاشوا مع بعض أتعس
سنين حياتهم.
البنت محتاجة تتعلم إزاي تختار بعقلها ولا بقلبها...
محتاجة تفهم شخصيتها اللي من خلالها هتعرف
تفهم نوعية الشخص اللي هيعيش معاها بقية
عمرها...
محتاجه تفهم الفروق اللي ممكن توجد بينهم
وتعدي، وإيه الفروق اللي مينفعش تعدي...
سواء فرق السن، المال، التعليم والمستوى
الاجتماعي...
وإزاي تبني بيت، وإزاي تحافظ عليه، وإزاي تُنشئ حوار
ناجح بينها وبين زوجها، وإزاي تِرَبِّي معاه أولادها...
وهكذا.
إنتي ممكن ربنا يديكي شاب صالح، وإنتي بقِلّة
علمك متعرفيش تحافظي عليه ولا تعيشي معاه
مبسوطة!!
والبركة بتيجي من طاعة الله، يعني البنت تشوف
اللي يرضي ربنا في كل حياتها وتعمله، وبعدين تسأله
وتدعيه بالزوج الصالح، وأكيد ربنا مش هيخيب
ظنها، وهيرزقها بالزوج الصالح اللي يعرف يفهم
شخصيتها، ويقدر مشاعرها، ويعرف إمتى وازاي يقدر
يسعدها.
الزوج الصالح اللي هيبقوا أصحاب بعد الجواز أكتر
من أي صاحبة هي قربت منها، وهيسمع لها وقت
ما تحتاجه بجد، ويلعب دور الأب وقت اللزوم،
ووقت الصاحب وقت اللزوم، ودور
الزوج المحب وقت اللزوم...
الزوج الصالح اللي فاهم
يعني إيه حمل وفترة اكتئاب
بتصيب كل بنت، وازاي يتعامل
معاها، وازاي الكلمة الحنينه
بتفرق، واللي بعد الولادة هيعينها
على التربية، حتى لو كان مشغول
ومعندوش وقت... بس كفاية إنه بيشجعها بكلام
يقويها ويعلي من عزيمتها.
واللي هي هتفهم إمتى تكون له صاحبة، وإمتى تبقى
له أخت، وإمتى تبقى له أم، وإمتى تبقى له زوجة
وحبيبة.
وكل ما تتقي ربنا فيه، هتلاقي البركة معاها في كل
تفاصيل حياتها، حتى لو الفلوس قليلة، حتى لو فيه
مشاكل بتحصل، بس هتلاقي ربنا مبارك في بيتهم،
وفي ولادهم. وكمان رَزَقَها باللي يُوَنِّس وحدتها.
علم وبركة... أحسن بكتير من مسلسل تركي.
تعليق