Tweet
أعوذ بالله السميع العليم من الشيطان الرجيم
بسم الله الرحمن الرحيم
يارب لا تجعل فى قلوبنا حباً إلا لك ولا تعلقاً إلا بك ، يارب داوى قلوبنا ، يارب اشفنا من كل آفة جوانا ببلسم الحب .
ياترى بلسم الحب كان بدأ يعنى تحسوا بأثره ويا ترى عُسّلتم بقيتوا زى العسل يعنى؟ إيه ده؟
ماهو الحديث النبي صلى الله عليه وسلم قال " إذا أحب الله عبداً عسله قيل وما عسله؟ قال يوفقه لعمل صالح بين يدى أجله "
إنه يوفق للأعمال الصالحة وبالذات كمان الكلام ده يأتى يارب عند الخواتيم " وإنما الأعمال بالخواتيم "
فإحنا عايزين نستشعر كده القلوب بتتحرك ويادوبك بدأنا نستشعر المعانى اللى احنا بنتكلم عليها فنسأل الله تبارك وتعالى أن يرزقنا بلسم الحب ويرزقنا العيش فى رياض حب الله تبارك وتعالى .
النهاردة أنا عايز اسألك سؤال مباشر ومحدد وعايز إجابة فى الحال أكتر حاجة وحشاك إيه؟ أكتر حاجة وحشاك ؟
لما دلوقتى كده خطر على بالك هه واحد فى غربة فهيقول واحشنى قوى أهلى وناسى ، واحد ليه صديق حميم قوى بقاله فترة طويلة جدا مشفوش فيقول يااااه فلان ده وحشنى موت .
أكتر حاجة وحشاك قوى إيه؟ ياترى فيه حد بالله دلوقتى حالاً وانا بنطق الكلام ده خطر على باله ربنا!!؟ خطر على باله صلى الله عليه وسلم !!؟
بجد وحشك ؟ بجد حاسس إن أنت اتحرمت من رفقته فى الدنيا فبتقول يارب لا تحرمنى رفقته يوم القيامة .
ياترى ربنا وحشك؟ بيجى عليك لحظة كده وتقول زى ما النبي صلى الله عليه وسلم ما اتمناها فى آخر عمره
" بل الرفيق الأعلى ، بل الرفيق الأعلى "
خلاص بقى كفاية دنيا ، خلاص بقى قلوبنا اتقطعت كفاية كده كفاية بقى هموم دنيا وكفاية تنغيصات الدنيا وكفاية العيش فى الدنيا عايزين بقى وجهه الكريم مش احنا بنقول محدش واخد باله لما بنيجى نتكلم ونقول " ابتغاء وجه الله " مش كده ؟
لما تيجى أنت بتعمل العمل ده ليه ؟ يقولك ابتغاء وجه الله يعنى إيه ابتغاء ؟
يعنى أقصد وجه الله عز وجل ماهو ده اللى إحنا عايزينه !
وجه الله تبارك وتعالى أعلى النعيم ، أعظم نعيم فى الجنة رؤية وجه الله الكريم يوم ماهتملى عنيك بالنظر إلى وجهه الكريم ، يوم ما هتملى عنيك وتراه سبحانه وتعالى.
كان بعض السلف يمشي فى الطرقات يقول
"وااااااشوقاااااااه إلى من يرانى ولا أراه"
إيه أكتر حاجة وحشاك ؟
ناس قالت بيت الله الحرام عارفين المرأة اللى قعدت طول السفر تسأل أين بيت ربى؟ أين بيت ربى؟ أين بيت ربى؟ فالناس يقولولها لسه لسه قدامنا مسافات اصبرى لسه ماوصلناش حتى قيل لها هذا بيت ربك هذا بيت الله الحرام فجرت والهه وجرت مسرعة حتى ألسقت خدها على جدارالكعبة فلما وضعت خدها على جدار الكعبة ماتت شوقاً !!!!
يااااااااااااه شوفوا الشوق لما الواحد يبقى جواه الحب ده فيه ناس قالت أكتر حاجة وحشانى بلدى وأهلى ، فيه ناس قالت أكتر حاجة وحشانى جو أسرى هادى ، فيه ناس قالت أكتر حاجة وحشانى الأنس ، وفيه ناس قالت أكتر حاجة وحشانى روح وريحان وجنة نعيم .
عايزين نستشعر معنى الشوق ده انهاردة وأنا بقى عايزك تاخد مني المعنى ده ونطبقة عملي أنت عارف إن ربنا سبحانه وتعالى بينزل فى الثلث الأخير من الليل وأنتي عارفة إن ربنا سبحانه وتعالى ينادى هل من داعٍ فأستجيب له؟ هل من مستغفر فأغفر له ؟ هل من تائب فأتوب عليه؟
أنا عايز انهاردة نغشش بعضينا الإجابة ربنا بيسأل هل؟ هل؟
أنا بقى عايزك وهو بيقول انت عايز حاجة؟ هل تريد شئ؟ نفسك فى حاجة؟
أنا عايزك ترفع إيديك فى الثلث الأخير من الليل الليلادى وتقول له "حاجتى أنت "
أنا مش عايز دنيا مش عايز زوجة ومش عايز أولاد ومش عايز فلوس ومش عايز منصب ومش عايز ومش عايز
لالالا ... كل الكلام ده هو أنا لوحصلت حبك وحصلت القرب منك كل ده ييجى . أعظم حاجة وأعظم أمنية " أنت " فلما يقولك هل من داعٍ تقوله يارب انت قريب ممن يدعوك فيا رب أنا أبتهل إليك وأدعوك أن تمن عليّا بالقرب منك وبلذة النظر إلى وجهك الكريم ، عايزك تقوله حاجتى أنت انت أعظم شئ أتمناه أتمنى رضاك ، أتمنى عفوك ، أتمنى حبك .
يا حبيب المحبين أين طلابك
يا أنيس المستوحشين أين طلابك
يارب يارب لا ترد دعوتنا هذه
يارب أجب دعوتنا فاجعل أعظم حاجة لنا هى القرب منك وحبك يا أكرم الأكرمين ويا أرحم الراحمين
أنا عايزك النهاردة تعيش معنى عالى قوى وعايزك تتأملى معايا المعنى الجميل ده معنى الشوق إلى النظر إلى وجهه الكريم لأن ده بيغرس المعانى اللى احنا بندندن حواليها لأنه لما الواحد يكون قلبه مقبل على ربنا سبحانه وتعالى هيحس بإنه مشتاق حاسس إنه فى سجن طول ماهو فى الدنيا عشان كده
" الدنيا سجن المؤمن "
الدنيا سجن المؤمن لأنه مسجون نفسه يقابل ربه يوم المزيد إن شاء الله فى الجنة اليوم اللى هنرى فيه وجه ربنا الكريم . شوفوا أثر الشوق وتعالوا شوفوا المعانى دى كيف تكلم عنها ربنا ونبينا "صلي الله عليه وسلم"
شوفوا النبي صلى الله عليه وسلم بيعلمنا الدعوة دى
وده الواجب العملى بتاع الحلقة دي
النبى صلي الله عليه وسلم كان يدعوا فيقول
" اللهم بعلمك الغيب وقدرتك على الخلق أحينى ماعلمت الحياة خيراً لى وتوفنى إذا علمت الوفاة خيراً لى اللهم وأسألك خشيتك فى الغيب والشهادة وأسألك كلمة الحق فى الرضا والغضب وأسألك القصد فى الفقر والغنى وأسألك نعيماً لا ينفد وأسألك قرة عين لا تنقطع وأسألك الرضا بعد القضاء وأسألك برد العيش بعد الموت وأسألك لذة النظر إلى وجهك والشوق إلى لقائك فى غير ضراء مضرة ولا فتنة مضلة اللهم زيّنا بزينة الإيمان واجعلنا هداةً مهتدين "
دعوات غالية قوى طبعاً محل الشاهد فيه قول النبي صلي الله عليه وسلم " وأسألك لذة النظر إلى وجهك الكريم والشوق إلى لقائك "
نفسى يارب قلبى يبقى مُقبل عليك كده ، نفسى يارب أملى عنيا بالنظر إلى وجهك يارب يبقى ده أعظم شئ أتمناه فى حياتى
شوفوا المعنى ده بقى عايزين نجسدوا من قلوب الأنبياء والصالحين تعالوا نشوفوا كانوا بيطبقوه إزاى ونبقى ناخد منهم العبرة وناخد منهم القدوة عشان نوصل لهذه الدرجة قالوا إن سيدنا آدم بكى بكاءً طويلاً وكان كلما خلى بكى حتى سالت دموعه فى الأرض من شدة شوقه إلى الجنة فالعلماء بيقولوا هو مكنش مشتاق للجنة
ما كان مشتاقاً للدار وإنما كان مشتاقاً لرب الدار
يُتبع بإذن الله
تعليق