شخبوطة بقلمي .. كان نفسي أشوفها أوي

[(أم فارس)]

كان نفسي أشوفها
شاء الله لي حين كنت في فترة الثانوية العامة أن اصاحب اخت معي بالمدرسة
كانت ذات طباع هادئة دائمًا ولا تطيل الكلام
ولما عرفتها وبقينا أصحاب بدأت تحكيلي عن واحدة صحبتها
كانت معها منذ الطفولة وكانوا البنات دول مش ملتزمين وكانوا عاديين خالص
المهم كانت صحبتها دي أفضلهم حالاً وأول واحدة فيهم ارتدت حجاب
وكانت بتحاول تكلمهم وتقنعهم بما يجوز فعله وكانوا بيسخروا منها وينفروا لكن مبطلتش تنصحهم
البنت دي كانت عادية خالص يمكن كتير ممن يقرأ كلامي الآن يكون على علم ويعرف حاجات كتير هي معرفتهاش
بس كانت بنت بسيطة وبتحاول تقرب من ربنا على قدها تسمع كلمة من هنا وكلمة من هنا
لكن كانت على الطريق بتحاول >> موقفتش أبدًا

حاولت كتير مع صحابها وكان أقربهم إليها صحبتي اللي هي بتحكيلي عنها كل دا
كانت صحبتي قريبة من البنت دي بس مفيش استجابة
يابنتي البسي حجاب اعملي لكن كانت مبتيأسش وبتحاول معاها
والحمدلله صحبتي دي كان فيها خير كبير بس مشفتهوش غير لما..
كانوا في المصيف كلهم يعني البنات متعودين هما وعائلتهم كانوا بيروحوا مصيف مع بعض
إلا البنت دي كانت بتسافر مع أهلها خارج مصر
المهم رجعوا من المصيف بيتصلوا بالبنت عشان ينظموا خروجة
آلو مين معايا؟؟
أنا والدة فلانة ..
امال فين فلانة ياطنط
مع بكاء مرير خارج من قلب أمها فلانة ماتت امبارح
ماتت
آه فلانة ماتت
وكل يوم حد نعرفه من قريب من بعيد صغير وبيموت
كانت صدمة جامدة وعبرة لصحبتي ولصحابها
صحبتي الحمدلله اهتدت ولبست حجاب وبتحاول زي صحبتها ماكانت بتحاول

انا مش كاتبة الموضوع بقا عشان أتكلم عن الموت ولو حتكلم عنه يبقى حنقول كتير
لكن أنا بحكي القصة في عجالة عشان أقولكم حاجة مهمة أوي دايمًا بفكر فيها،
سبحان الله أنا من يوم ما عرفت قصة البنت دي وتاريخ وفاتها وهو كان زي اليومين دول
وانا عمري مانسيته أبدًا
انا كنت كل سنة بفكر صحبتي دي لما ألاقيها ناسية تمامًا لان البنت دي ماتت بقالها 4 سنين
وخلاص الدنيا تلاهي
انا بفكرها كل سنة وأقولها ادعيلها طيب انتي لسة فكراها
طيب بتدعيلها كتير ولا لأ
بالرغم ان الموضوع بكون عارفة انه حيزعلها وحيضايقها لما أذكرها بيها
لكن ...
والآن صحبتي دي كل واحدة دخلت كلية وكل واحدة أصبحت الآن في مجال مختلف جدًا
وأصبحت مش بكلمها غير كل فين وفين ومبقناش صحاب زي الأول أبدًا
بس الانسانة دي أنا فكرااها دايمًا في دعائي يعني متعودة دائمًا بدعي لموتى المسلمين وأخص شخص قريب
بالدعاء وهذه الانسانة تتبعه دائمًا
شخصية من يوم ماسمعت عنها أحببتها في الله جدًا
وفعلاً كان نفسي أشوفها جدًا
أنا ليه كدا معاها
ليه بفتكرها وبنسى ناس تانية كتير في أوقات كتير
لازم كنت أطرح على نفسي ليه وأحاول أجيب أول الخيط
بس أول حاجة جاءت على بالي
"
:
"
:
الانسانة دي بجد كان حالها إيه مع الله؟؟
يعني سبحان الله بقعد مع نفسي وأقول
دا الموضوع كأن انا صاحبت صحبتي دي مش عشان أصاحبها هي وتفضل معايا دايمًا
لالالا ربنا له حكمة انا دلوقتي مبقتش أعرف حاجة عن صحبتي دي
دا انا مش بدعيلها زي مابدعي للبنت دي
وكأن مُقدر لي أنا اصاحبها فأعرف فلانة هذه فأظل أدعو لها دائمًا

أيوا إن الانسان يكون غالي عند ربنا وصادق وبسيط وميعرفش ناس كتير ممكن يفتكروه بعد مايموت
بس ربنا يسخر له حد عمره ماعرفه في حياته يدعيله بعد مماته
أيوا المفتاح اهو الصــدق
ماشي على قدي بس بحاول مسبتش الطريق عشان كل شوية بقع
كل ما بعرف أكتر وازداد علم في الدين أو في الحياة مش بنشغل بالنعمة عن المُنعم
صدق مع إخلاص ممكن ينقلوك نقلة جامدة جدًا
حيخلوك فعلاً انسان جديد
ياربي كم أنت كريم وودود

العبرة
ياريت كل واحد يدور في حياته
انت عندك حد يدعيلك بعد ماتموت ولا لأ؟؟
عندك وواثق فيه ولا لأ ؟؟ دا انت بتحوش وعامل جمعيات كتيييير عشان مستقبل عيالك
ولا عشان تجيب شقة ومتعتمدش على أهلك
بتجتهد نصف الاجتهاد دا في إنه يكون ليك صحبة صالحة
ياجماعة بلاش كل معرفتنا بالناس تبقى عشان المصالح وخد وهات
بلاش تبقى كل حاجة دنيا
والله حتخلص بسرعة
ووقتها حتقول ياريتني... ماانا كان قدامي صحبة صالحة
طيب حتى لو معندكش صحبة وصعب تلاقي
طيب انت ليك بصمة في الحياة تخلي الناس لما تشوفها تفتكرك؟؟
طيب في إنسان واحد انت أثرت فيه بجد وغيرت ولو حاجة بسيطة في حياته؟؟
طيب أهم سؤال وهو دا أهم حاجة
انت صادق مع ربنا بجد ولا ؟؟
انت بتحب ربنا بجد ولا لأ؟؟
طيب انت ظنك في ربنا شكله ايه ؟؟
طيب بتدعيه إنه يسخرلك حد يدعيلك بعد موتك ويتذكرك ولا لأ؟؟
اصدق مع ربنا بجد حيفتحلك أبواب خير كتيرة أوي
بس صدق بجد
وحاول تبص في قائمة أهدافك وشوف الجنة ورؤية الله عزوجل الهدف رقم كام
ولا انت أصلاً مش حاطط الهدف دا
دا لو عندك قايمة أهداف من الأساس !!!!!
حاول تغير من نفسك .. ومتزعلش حد منك.. غير أخلاقك .. وخلي قلبك دايمًا مش شايف غير رضا ربنا وبس
جسدك بين الناس لكن قلبك فوووووووووووووق عند رب الناس
وبجد متقولش أنا لسة صغير والله أصغر بكتير بيموتوا.. وانت مش محتاج نقعد نسرد في قصص
بس قلوبنا بقت بعيدة أوي ومحجوبة بقدر تعلقها بالشهوات والدنيا
بقا الموت عادي وبقينا عادي لما نشوف جنازة
راجع نفسك ولاتنسوا اختي هذه من الدعاء وسائر موتى المسلمين
وفي النهاية أنصح بسماع هذه المحاضرة تتحدث عن الصدق وفيها اختبار لمدى صدقك مع الله رائعة جدًا

http://www.youtube.com/watch?v=-tsK-nfOAsY

وأسأل الله لي ولكم السداد والصدق والإخلاص

.....................

م.ن

[محبة لقاء الله]

رد: شخبوطة بقلمي .. كان نفسي أشوفها أوي

وعليكم السلام ورحمه الله وبركاته
فعلا صدقتى اختنا
ياترى بعد موتنا فيه حد حيدعينا ولا لآ
يمكن الموضوع ده حسيت بيه مع اختنا هبه محمود رحمها الله
احسبها على خير
ربنا يغفر لها ويرحمها
جزاكِ الله خيرا
--------------------------------------
اللهم اغفر للمسلمين والمسلمات والمؤمنين والمؤمنات الاحياء منهم والاموات

["راحلة عما قريب"]

رد: شخبوطة بقلمي .. كان نفسي أشوفها أوي

جزاكم الله خيرا
سبحان الله العظيم
هناك أناس يقدر الله لهم أن يذكروا بعد موتهم
وأن يحبهم من لم يرهم وأن يدعو لهم
رب أعزنا

[(أم فارس)]

رد: شخبوطة بقلمي .. كان نفسي أشوفها أوي

جزاكم الله خيرا على مروركم العطر وتعقيبكم الطيب

[(أم فارس)]

رد: شخبوطة بقلمي .. كان نفسي أشوفها أوي

وجزاكم خيرا مثله
جزاكم الله خيرا ونفع بكم
...........
حال لا يعلم به إلا الله
الله المستعان
الحمد لله
نسألكم الدعاء