[منقول] نتيجة الثانوية العامة

[اسراء حفيدة الزهراء]

نتيجة الثانوية العامة


هي من أكثر اللحظات اللي بتخلي ملايين أسر مصرية مستنية و متفرغة و قلقانة و بتدعي كتير , هي لحظة نتيجة الثانوية العامة .
اللحظة اللي بتحدد مصير كل طالب مصري و بتنقله أكبر مسافة يقدر يوصلها في حياته .. هي المسافة اللي بتفصله عن الكلية اللي ربنا قدرها ليه بإذنه .
أغلب العقول المصرية من الأباء خاصة عندهم فكرة ثابتة و مقتنعين بيها ان الأفضل لأبنائهم هو دخول كليات معينة هي كليات القمة (طب,صيدلة ,هندسة ,, و غيرهم من كليات القمة ) و ان الألقاب هي السبب الرئيسي لاحترام غيرك ليك لو دخلت كلية تانية و اسمك مش هيبقى دكتور او باشمهندس يبقى كل ده ملوش لازمة و لا يعطيك أي احترام .
و للأسف الفكرة تناقلت تدريجيا إلى عقول الأبناء نفسهم بقى حلم كل طفل مصري يبقى صاحب مركز من المراكز دي و بس و لو طلعت نتيجته خارج نطاق الكليات دي هيحس بصدمة كبيرة لأن عقله مش مستوعب ان الفرص قد تكون الأفضل في مجال تاني لا يحمل نفس اللقب .
_____________________________________________
و كما يقال يوم النتيجة ده هو اللي بيحدد مستواك كطالب و بيقيس مدى مذاكرتك أو مجهودك.
مع ان مش شرط من وجهة نظري يكون مقياس حقيقي لمجهودك
أولًا الدراسة نسبة الحفظ فيها تفوق نسبة الفهم بمراحل و ده شئ بعيد عن تكوين العقول بشكل سليم ده غير انه بيعود الطالب على الحفظ و خلاص لمجرد انه بيثبت كام معلومة في دماغه و يتم التفريغ وقت الإمتحان .
ثانيا طلبة كتير بيصابوا بهلع من مسئولية الامتحانات و مش بيقدروا يركزوا أو يكتبوا الإجابات الصحيحة رغم ادراكهم ليها .
ثالثا : التكنولوجيا طول الوقت بتتطور بس التعليم بدل ما يستفيد بيها و يعود الطالب يستخدمها كوسيلة هادفة , بيتجاهل وجودها و ده بيخلي الطالب بيستخدمها كوسيلة ترفيهية من الدرحة الأولى .
و ده أصلا غير ان التعليم بيتطور في كل مكان و العلم بيكبر كل يوم في العالم بس المناهج إذا تغيرت فهو تغير لا يذكر من عشرات السنين و كل ما تعدي سنة و جيل جديد يكبر بيكون بينه و بينه العالم اللي بره فجوة علمية كبيرة .
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــ
لما النتيجة ظهرت مكنتش مستنية أشوف لنفسي كلية غير الكليات اللي بسمع اسمها على طول و اللي الناس بتفتخر أوي بأولادها انهم فيها , و لو أولادهم مش فيها بيخافوا يقولوا و كأنه شئ محرج مثلا .
كليتي كانت أبعد طموح ممكن أوصله بس من يوم ما اكتشفت ان ده مصيري المبدأي و اتكلمت مع غيري في حاجات تخص مستقبلها أدركت ساعتها ان أفضل شئ حصل ليا ان ربنا كتبلي الكلية دي الحمد لله .
كان فعلا أكبر درس ليا هو الثانوية العامة و كل حياتي اللي ترتبت عليها , مع كل لحظة بتأكد ان ده أفضل مكان ليا لأنه هو المكان اللي ربنا اختارني ليه .. بالرغم من كل مشاكل الكلية و بالرغم من كل الضغوطات النفسية اللي ممكن أنا أو غيري ممكن نكون اتعرضنا ليها من واقع صدمة تحطم الحلم القديم إلا إني متأكدة ان هيبقى ليا و لغيري دور في الكلية دي ان شاء الله بس لو حذفنا كل فكرة سلبية بتثبطنا عن حلمنا ,, لأن ببساطة كل شخص يقدر يكون مليون حلم متعلق بكليته أو بالمكان اللي ربنا اختاره ليه و يقدر يوصل ليهم و هو ده اللي خلاني استخدم جملة ( قد يمنع الله عنك شيئا تريده ليعطيك شيئا تحتاجه ) و دايما بفكر نفسي و غيري بيها لأن اكيد مفيش مكان أفضل من مكان ربنا اختاره ليك ^_^
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــ
في حياتي عامة أدركت ان مش شرط حلمي يتحقق لأنه ببساطة مكنش الخير ليا , و يمكن تقابلني أحلام أفضل بكتير منه و اللي أنا لازم الحقها بدل ما أنا لسه بدور على حلمي القديم اللي انعدم.
انت كمان لازم تتعلم لازم تشوف الجانب الايجابي , لازم تدرك ان أي مكان انت فيه سواء هيكون ليك لقب معين أو مش هيكون ليك اللقب اللي بتحلم بيه فهو ده مكانك الصح .. المكان اللي بايدك تقدر تشوفه أسوأ مكان على وجه الأرض , و ممكن يبقى أفضل مكان و لو رجع بيك الزمن هتختاره تاني .
كون لنفسك رؤية ارسم و خطط مستقبلك و علي طموحاتك و كبرها و كون لنفسك أكتر من هدف و طول ما انت موقن ان ربنا معاك أكيد هتقدر تحقق أهدافك و لو هدف متحققش يبقى الخير و بس هو اللي حصل .
قل الحمد لله :))


منقوول