![](http://islam-sister.com/uploadis/upfile/59.gif)
أوقات كتير بيبقى نفسنا نعمل حاجة لله ومش عارفين
مع أنها بتكون لله بس بنلاقي الموضوع صعب وفعلا مش عارفين نعمل الحاجة دي
سواء كانت الحاجة دي أنك عايز تتوب
أو عايز تحفظ قرآن
أو عايزة تغيري لبسك وتلبسي لبس يرضي ربنا
وفعلا بتحاولي تعملي كده بس بتلاقي حاجة تعقدلك الموضوع
واحد يقول طيب ده أناعايز أتوب..يعني دي حاجة لوجه الله أهي ..ليه بقى الموضوع متصعب أوي كده
أعرف واحد ملتزم من ساعة ماقررت أتوب مش لاقيه خالص
أدخل عالنت عشان أشوف أي حاجة تقربني من ربنا ألاقي النت فاصل
أنزل أشتري لبس جديد ألاقي كل اللبس اللي في المحلات باديهات وبنطلونات
(أنا خلاص أهو حاولت ومانفعش)
وممكن يجي في ظن ناس كتير (ربنا لا يريدني)
لكن اللي بيحصل ده كله مش بسبب كده
مش أن ربنا لايريدك
لكن السر في إيه؟
المفروض ربنا يجد منك أنك حريص بجد
يعني اللي عايز يحفظ قرآن ومالقيش مكان يحفظ فيه..ياترى بيستسلم؟ ولا بيحاول تاني مرة واتنين وعشرة؟
المفروض ماتيأسش
لو أنت فعلا صادق وحريص ونفسك في الحاجة دي أوي من جواك ربنا هيحققهالك
طيب ما أنت لازم تلاقي صعوبات في الأول ..بس أنت اللي رايح على ربنا ولا أنت مش فارقة معاك؟
مش بتبقى بقى ربنا يريدك أو لا
لكن بتبقى أنت فعلا عايز ربنا ولا لا؟
نفسك تقرب منه ولا لا؟
وممكن على فكرة تكون بتقول كده أيوة أنا عايز أقرب منه
لكن مش بجد
طيب ازاي يعني
أنت دلوقتي عايز تبطل أغاني..وفكرت تبدل الأغاني بأناشيد إسلامية حلوة تسمعها علشان ماتبقاش قطعت كده مرة واحدة يبقى في بديل الأول
تيجي تدور على أناشيد إسلامية ماتلاقيش
تسأل واحد مش معاك أناشيد عالموبايل يقولك لا مش عندي
فتزهق.. تيجي تلاقي أي مكان فيه أغاني تروح عادي
تشغل الموبايل على أغاني عادي
وتبقى حجتك أنك لسة مالقيتش البديل
مع أن المفروض ان انت اللي عايز ربنا وعايز تقرب منه
يعني انت اللي لازم تروح
وأنت اللي لازم تجاهد
مفيش حاجة هتجيلك لحد عندك
عارف الحاجات هتجيلك لحد عندك إمتى؟
لما تعدي مرحلة العقبات دي وتنجح فيها وتُري الله من نفسك خيرا وأنك فعلا محتاج لربنا
وتجاهد وتسيب كل حاجة كنت بتحبها وتضحي بحاجات كتير علشان ربنا بس
ساعتها ربنا هيكرمك كرم تندهش منه
هتلاقي واحد يقولك رايحين درس تيجي معانا؟
وتلاقي مكان تحفيظ فتح وربنا دلك عليه بسهولة
هتلاقي حاجات كتير بتجيلك
ياااااه..ده أنا كنت بدور عالحاجات دي ماكنتش بلاقيها
بس عشان انت نجحت في الاختبار وأثبت أنك فعلا عايزه ومحتاجه
فربنا كرمك أوي ..لأنه وجد أنك فعلا محتاجه وهتروحله بالرغم من أي عقبات أو صعوبات
ربنا يتوب علينا جميعا ويرضى عنا
اللهم آمين
تعليق