Tweet
السلام عليكم ورحمة الله وبركاته
زى ما هو واضح بالعنوان
Made in china
صنع فى الصين
دى جملة الواحد لما بيشوفها أحيانا بيهرب منها
يعنى ايه يعنى لما بنلاقى حاجة صينى مبنحبش نشتريها
وخصوصاً لما تكون مثلا جهاز كهربائي أو اى حاجة مهمة بنشتريها
لإن الصينى بيبقى أى كلام والحاجة بتبوظ بسرعة
يعنى اللى بيجي يشتري سيارة بيفضل يشتريها ألمانية الصنع
اشمعنى !!!
لإن ألمانيا مشهورة بتصنيع أنضف أنواع السيارات فى العالم
ولما الواحدة بتحب تشتري جهازها بتدور على أنضف الماركات علشان بتبقى عاوزة حاجة تعيش وتبقى قوية وما تبوظشي على طول
يعنى لما هتشتري الخلاط هتتحري إنك تجيبيه ماركة كويسة وصناعة يابانى مثلاً
ليه !!
لإن اليابانى حاجته نضيفة واليابان مشهورة بجودة الاجهزة الالكترونية
المهم اننا بندور على حاجة غير الصينى
وخصوصاً لما تكون حاجة مهمة وغالية
تعالوا بقى أقولكم ليه المقدمة دى
هل تحبي توبتك تبقى Made in china
توبة صينى يعنى توبة مش قوية ومش صادقة
يعنى بتتوبي وترجعى على طول للذنوب
وكإنك معملتيش حاجة
ولا تحبي تبقى توبتك تبقى توبة يابانى او ألماني
يعنى توبة صادقة نصوح
{يَا أَيُّهَا الَّذِينَ آمَنُوا تُوبُوا إِلَى اللَّهِ تَوْبَةً نَّصُوحًا عَسَى رَبُّكُمْ أَن يُكَفِّرَ عَنكُمْ سَيِّئَاتِكُمْ وَيُدْخِلَكُمْ جَنَّاتٍ تَجْرِي مِن تَحْتِهَا الْأَنْهَارُ يَوْمَ لَا يُخْزِي اللَّهُ النَّبِيَّ وَالَّذِينَ آمَنُوا مَعَهُ نُورُهُمْ يَسْعَى بَيْنَ أَيْدِيهِمْ وَبِأَيْمَانِهِمْ يَقُولُونَ رَبَّنَا أَتْمِمْ لَنَا نُورَنَا وَاغْفِرْ لَنَا إِنَّكَ عَلَى كُلِّ شَيْءٍ قَدِيرٌ}
اه شفتى بقى فين المشكلة
اللى بتخيلنا نرجع تانى بسرعة
انها مكنتش توبة قوية لو كانت قوية بجد وصادقة
مكنتيش هترجعى ولو رجعتى لإننا كلنا مذنبين
مش هترجعى بسرعة زى إذا لو توبتى توبة ضعيفة
رجوعك هيبقى أسرع مما تتخيلي
طيب نعلم ايه فى الموضوع دة
التوبة محلها فين ؟؟
القلب
النية محلها برضوا القلب
الصدق والاخلاص محلهم القلب
الحب والعطاء محلهم القلب
الخشوع لله والتذلل ليه محلهم القلب
ربنا يريد أنك تسجدي بإيه قبل ما تسجدي بجسمك
برضوا القلب
اكثر دعاء الرسول عليه الصلاة والسلام كان إيه
يا مقلب القلوب ثبت قلبي على دينك
يعنى أهم حاجة تشتغلي عليها لما تحبي تلتزمى او لما تحبي تتوبي إلى الله
أو لما تحبي تغيري من نفسك من كل النواحي
يعنى لو فيكى صفات وحشة وعاوزة تغيريها علشان تبقى قدوة حسنة للإسلام اللى انت بتمثليه
محل كل الحاااااااااااااااااااااااااااجات دى
القلب
بصي ياغالية علينا أولاً الاستعانة الله
ودى تحتها خطوط كتير لأهميتها
لإن انت ياغلبانة مش هتعرفي تتوبي ولا تعملي اى حاجة الا بالاستعانة بالله أولاً
ثم حسن التوكل عليه والثقة واليقين بأن الله لن يتركك
ثم بإصرارك على التغيير
إنك تصلحي قلبك وحالك كله مع الله
وتصدقي نيتك ربنا هيصلح لك قلبك
وبلاش الحياة الروتينية اللى انت عايشاها دى
ادينى بقوم من النوم اصلى اللى عليا
وبعدين اعد عالكمبيوتر وألف فى المنتدى شوية
واهزر مع البنات شوية وخلص اليوم على كدة
يوم وراح منك غاليتي ومش هيرجع تانى
يوم القيامة هتندمي عليه وتقولي
{رَبِّ ارْجِعُونِ، لَعَلِّي أَعْمَلُ صالِحاً فِيما تَرَكْتُ}
ووقتها خلاص انتهى كل شيء ولا رجعة ولن ينفع الندم
طيب نعمل ايه بقى
هقولك نعمل ايه
فيه سلسلة من أروع ما يكون
اسمها " قصة القلوب "
وأول درس فيها يكون أول درس من تحت ويسمى بصغو القلوب
وستتفاجئين بمعنى كلمة صغو
السلسلة للشيخ محمد حسين يعقوب
ما شاء الله سلسلة رائعة
وشيخنا الجليل متخصص فى مجال القلوب دة
وعارف إزاى بيشتغل عليها ما شاء الله ربنا يبارك له
أنصحك أختى الحبيبة الغالية بسماعها
لعل الله يرى صدقك فيرزقك ما خلقتي من أجله وهو أن تحسني العبادة لله
هذا التذكرة لى قبل أن تكون ليكى غاليتى
نسأل الله الاخلاص فى الأقوال والأعمال والأحوال
وأن يتوفنا مسلمين و يلحقنا بالصالحين
الله أعنا على ذكرك وشكرك وحسن عبادتك
تعليق