[هام] أختى ... لماذا إنتكستى ؟؟؟! ««الإنتكاســـة ،،، أسبــــاب ،،،، وعــــلاج««

[فقيرة إلى الله]

السلام عليكم ورحمة الله وبركاته
الحمد لله والصلاة والسلام على رسول الله صلى الله عليه وسلم

ربنا اغفر وراحم ،واعفو عما تعلم ، واهدنا وتكرّم
سبحانك الأعز الأكرم
يامقلب القلوب والأبصار ثبت قلوبنا على طاعتك
ربنا آتنا فى الدنيا حسنة وفى الأخرة حسنة وقنا عذاب النار


أختى .... حين تُسألى هذه الأسئلة ... ماذا تقولى لنفسك !!

* هل تحرصين على الصلاة فى أول الوقت ؟!
* هل تخشعين فى صلاتك ؟؟!
* هل تأسفين على فوات أورادك ؟؟!
* هل أنتى ممن يحافظ على ركعتى الضحى ؟؟!
* هل تحافظين على القيام والوتر فإنه شرف المؤمن ؟؟
* متى كانت أخر دمعة نزلت من عينيكِ خشية لله جل وعلا ؟؟!
* ماذا حفظتِ من آيات جديدة خلال هذا الشهر بل خلال هذا العام ؟؟!
* هل راجعتى شيء من التفسير لتقفى على مراد الله جل وعلا ؟؟!
* هل تصومين النوافل ؟؟!
* هل تحرصين على الصدقة والإنفاق فى سبيل الله فى وجوه الخير ؟؟!
* ما حالك فى الأمر بالمعروف والنهى عن المنكر ؟؟!


سُئل حذيفة بن اليمان رضى الله عنه عن ميّت الأحياء فقال : (( الذى لا ينكر المنكر لا بيده ولا بلسانه ولا بقلبه ))

* أين حق الدعوة إلى الله ؟؟
* هل تتحمسين وتجتهدين لهداية الخلق ؟؟!
* هل شعارك "قل هذه سبيلى ادعو إلى الله على بصيرة " ؟؟!


لما تحسى إن حماسك بيفتر ووهج الإيمان فى القلب يخبو

لما يبقى الإيمان هو أخر الإهتمامات وأول المهملات

إذا كان هذا هو الحال ... فهذا خبر المنتكسين الذين أخلوا إلى الأرض وهم لا يشعرون !

يتبع الموضوع بإذن الله ......

[لا تسأل الناس]

رد: أختى ... لماذا إنتكستى ؟؟؟! ««الإنتكاســـة ،،، أسبــــاب ،،،، وعــــلاج««

الله المستعان جزاك الله خيرا

[فقيرة إلى الله]

رد: أختى ... لماذا إنتكستى ؟؟؟! ««الإنتكاســـة ،،، أسبــــاب ،،،، وعــــلاج««

قال تعالى

"وَاتْلُ عَلَيْهِمْ نَبَأَ الَّذِيَ آتَيْنَاهُ آيَاتِنَا فَانسَلَخَ مِنْهَا فَأَتْبَعَهُ الشَّيْطَانُ فَكَانَ مِنَ الْغَاوِينَ{175} وَلَوْ شِئْنَا لَرَفَعْنَاهُ بِهَا وَلَـكِنَّهُ أَخْلَدَ إِلَى الأَرْضِ وَاتَّبَعَ هَوَاهُ فَمَثَلُهُ كَمَثَلِ الْكَلْبِ إِن تَحْمِلْ عَلَيْهِ يَلْهَثْ أَوْ تَتْرُكْهُ يَلْهَث ذَّلِكَ مَثَلُ الْقَوْمِ الَّذِينَ كَذَّبُواْ بِآيَاتِنَا فَاقْصُصِ الْقَصَصَ لَعَلَّهُمْ يَتَفَكَّرُونَ{176} "سورة الأعراف

قصة تروى وهى على سبيل الإستئناس وليس الإحتجاج
قصة بلعام
(( بلعام كان حبر من أحبار بنء إسرائيل تلقى العلم على يد نبي الله موسى حتى إنه كان يقال أن مجلسه كان فيه 12 ألف تلميذ !!!
هذا الحبر نفسه هو الذى صنّف كتاب ((ليس للعالم صانع )) !!!
أى ليس له موجد وخالق !!!

لمّا واحد كان مجاب الدعوة وقالوا عنه إنه كان يعرف اسم الله الأعظم ويقولون إن نبى الله موسى بعثه غلى قوم مدين ليدعوهم إلى التوحيد الخالص
فلما ذهب إليهم وعاهم عرضوا عليه المال وأغروه وعرضوا عليه أجمل النساء

فلما رأى بلعام بريق المال وجمال النساء !!!
سال لعابه وفكر وقدر ثم قتل كيف قدّرثم نظر ثم عبس وبصر فقال :
أأله أم الشيطان !!
موسى أم المال !!
الدنيا أم الآخرة !!

وظل وذله هواه إلى إختيار المال والشيطان فهوى بعد أن اتبع الهدى وأصبح فى الأرض حيران كالذى استهوته الشياطين وتمرّغ فى وحل المعصية!!! )))

ليه الأخت اللى ذاقت حلاوة الإيمان
اللى استشعرت يعنى إيه طريق الهداية
اللى ربنا أكرمها واصطفاها بطريق الإستقامة

ليه بعد ما كانت عندها نشاط فترت !!
ليه انتكست !!
ليه بعد ما عرفت تركت طريق المعرفة وانحرفت عنه !!

حديث عن النبى عليه الصلاة والسلام بيقول فيه (( إن مما اتخوف عليكم رجل حفظ القرآن حتى إذا رؤيت عليه بهجته وكان عليه رداء الإسلام ثم انسلخ منه ونبذه وراء ظهره وسعى على جاره بالسيف وإدعى عليه بالشرك
قال قلت يارسول الله أيهماأولى بالشرك المرمى أم الرامى ؟ قال بل الرامى ))

أخت يبقى ظهر عليها حسن وسمت الإيمان ... تشوفيها تقولى ما شاء الله عليها آثرت السواد على لبس المتبرجات ،آثرت أن تكون هكذا أستر ما يكون
ثم تترك كل هذا وتنسلخ وتنبذه وراء ظهرها !!!

وَاتْلُ عَلَيْهِمْ نَبَأَ الَّذِيَ آتَيْنَاهُ آيَاتِنَا 

يعنى السكة كانت واضحة مفيهاش أى غموض
كنت عارفه سكتك كويس ... كنتى عارفه اللى يرضى ربنا كويس

فَانسَلَخَ مِنْهَا
كأن القرآن والإيمان ده كان ملتصق بكِ أوى ... زى إلتصاق الجلد باللحم
فينسلخ
الجلد فى جانب ... واللحم فى جانب
======
أول ما قلبه زاغ ... أول ما قلبه انحرف
أول ما إنتى آثرتِ هواكِ على ربك

فَأَتْبَعَهُ الشَّيْطَانُ

الشيطان يجرى وراه ويسعى إليهفكان من الغاوين الهالكين .

======
ربنا مثّل حال المنتكس والمنتكسه مثال صعب أوى

وَلَوْ شِئْنَا لَرَفَعْنَاهُ بِهَا وَلَـكِنَّهُ أَخْلَدَ إِلَى الأَرْضِ وَاتَّبَعَ هَوَاهُ فَمَثَلُهُ كَمَثَلِ الْكَلْبِ إِن تَحْمِلْ عَلَيْهِ يَلْهَثْ أَوْ تَتْرُكْهُ يَلْهَث

ابن القيم بيقول :.
(( شبه من تعرف _اللى عرف وبعد كده ابتعد وتنكر ... اللى ذاق وبعد كده فتر وانتكس وترك العمل وآثر هواه وآثر سخط ربه على رضاه ... وآثر الدنيا على الأخرة ... وآثر المخلوق على الخالق _ شبّه بأخس وأوضع الحيوانات ،بالكلب الذى لا يقف إلا على القذر ))


اللى وصل حاله كما ذكره الله من اتباعه لهواه إنما كان لشدة لهفه على الدنيا ودا أول سبب وأخطر سبب ....

تابعونااااا

يتبع بأمر الله ....

[اسيرة الاماكن]

رد: أختى ... لماذا إنتكستى ؟؟؟! ««الإنتكاســـة ،،، أسبــــاب ،،،، وعــــلاج««

جزاااااااااااااااك ربي الجنه

نحتاااااااااااااج مثل هذه المواضيع لنهوض بنفحات الايمان بيننا

ننتظر دوما جديد اطلاعك وفكرك الراقي اخيه

[*تائبة إلى الله*]

رد: أختى ... لماذا إنتكستى ؟؟؟! ««الإنتكاســـة ،،، أسبــــاب ،،،، وعــــلاج««

جزاك الله خيرا اختي محبة و جعله في ميزان حسناتك
متابعة ان شاء الله

[فقيرة إلى الله]

رد: أختى ... لماذا إنتكستى ؟؟؟! ««الإنتكاســـة ،،، أسبــــاب ،،،، وعــــلاج««

أختى
دورى على الدنيا فى قلبك وشوفى الدنيا أدّ إيه فى قلبك
وإنتى هتعرفى إنتى على الطريق
ولاّ
منتكسه إنتكاسة معنوية (يعنى جواكِ واقع خالص والقلب خراب
وإن كان الظاهر قدام الناس إن حالك ماشى
ولاّ
منتكسة إنتكاسة حقيقية (أصبحتى بتضيّعى الصلوات والأوراد وكل اللى كنتى بتحافظى عليه )

وكل الضياع ده من اللهف على الدنيا وإنقطاع القلب عن الله والدار الأخرة

ياترى الدنيا فى قلبك أدّ إيه ؟!!

قال رسول الله صلى الله عليه وسلم(( من كانت الدنيا همه فرق الله عليه أمره وجعل فقره بين عينيه ولم يأته من الدنيا إلا ما كتب له ومن كانت الآخرة نيته جمع الله له أمره وجعل غناه في قلبه وأتته الدنيا وهي راغمة ))

السبب الأول
هو
اللهف على الدنيا والإخلاد إلى الأرض

يبقى شغلك الشاغل الدنيا
لو ربنا أعطاكِ ترضى وإذ لم يعطيكِ سبحانه تسخطى !!!

رقم 1 على بالك إيه ؟!!!
إيه اللى شاغل بالك ؟!!!

هل الجنة ونعيم الجنة وطاعة الله والصبر على الطاعة
أم ... الدنيا بمتاعها كالأولاد والزواج والمال و.... !!!

إذا كــــانت الدنيا هى أكبر همك

فمن هنا جاء الخطب
ومن هنا ابتليتِ وأنتِ لا تدرى

اقرأى بقلبك الأثر ده

(( قدِم ابن عم لمحمد بن واسع فقال له من أين أتيت ؟!
قال من طلب الدنيا
فقال محمد بن واسع : وهل أدركتها ؟؟!
قال : لا
قال محمد بن واسع : ياسبحان الله أنت تطلب شيء ولم تدركه فكيف تدرك شيئا لم تطلبه ! ))

بمنتهى الصراحة والوضوحومن غير ما نعيش الوهم ونقول إن إحنا مش كده ،وإن الدنيا مش كبيره فى قلبنا قوى كده

طيب قولى لى بصراحة
الدنيا لا تساوى عندك شيء خالص

يعنى رقم 1 عندك ربنا أم الدنيا
بتؤثرى ربنا وما يحبه أم بتؤثرى الدنيا وما تحبيه !!!

لا نريد أكثر من الصدق عشان نقدر ناخد قرار

بلاش نعمّر البيوت من الخارج وقلبنا هو الخراب

دا كان أول سبب للإنتكاسة
حب الدنيـــــــا

طيب إيه الحل ؟؟؟!

دا اللى هنعرفه فى المشاركة اللى جاية

فكونا معنا ...

[فقيرة إلى الله]

رد: أختى ... لماذا إنتكستى ؟؟؟! ««الإنتكاســـة ،،، أسبــــاب ،،،، وعــــلاج««

الواجب العملى فى التخلص من حب الدنيا



1. الدعاء بلهج وبكثرة بقول "يامقلب القلوب والأبصار ثبت قلوبنا على دينك "

عايزين نزود فى الدعاء ياأخواتى وإن استطعنا فى كل سجدة فعلنا وأن نسأله سبحانه " اللهم لا تجعل الدنيا أكبر همنا ولا مبلغ علمنا ولا غلى النار مصيرنا "

عايزين الدنيا تبقى فى إيدينا مش فى قلبنا حتى لا تكون أكبر همنا .

2. لازم تشغلى قلبك بما يرضى الله وكمان لازم تشغلى نفسك بالحق الذى يرضى الله لإنك إن لم تشغليه بالحق حتما سيشغلك بالباطل

لازم قلبك ميبأش فاضى علشان لما أشيل الدنيا أحط محلها حب الله والتعلق بالأخرة

عايزاكِ تعيشى بخيالك مش فى المتع الدنيوية
لأ فى سكة تانية خااالص
علطول اسألى الله تعالى الجنة .. اسألى ربنا ينعم عليكِ بلذة الطاعة والأنس به سبحانه

اشغلى نفسك بأمور الأخرة

إنتى عارفه ياغالية المفروض إن كل واحد ياخد رصيد من الدنيا بس تكون الحاجات الأساسية من غير إسراف ولا مخيله حتى لا يؤدى إلى الكبر
واللى يزيد عن كده ينقص من الرصيد فى الأخرة !!!

3. تطردى حب الدنيا بالخوف الزاجر

يعنى إيه ؟؟
شوفى مثلا قسم الحروق فى اى مستشفى من المستشفيات أو حد حصل له حرق عافانا الله وإياكن

شوفى دى نار الدنيا ولفح نار الدنيا ... شوفى أثرت أد إيه !!!
فما بالك بلفح جهنم !!!
فما بالك بنار الأخرة التى فُضّلت على نار الدنيا 69 جزء !!!

والله إحنا محتاجين بجد وقفة حقيقية مع أنفسنا علشان نتغير بجد

كفااااااااااية غفلة

وحب للدنيا الزائلة

مستنيه إيه !!!

أختى
نهايتك متر * متر
أخرتها هذا المكان المظلم الموحش

مستنيه إيه

ليه ميكنش الدور عليكِ
محدش يعرف أخرته إمتى

لكن نعرف اللى بيعيش على حاجه بيموت عليها

فشوفى ... عايزه تموتى وتبعثى على إيه !!!

الحقى بركب السفينة قبل أن تغرق

أختى ...
هذا الدين قوى ولا يقوم على أكتاف المتكاسلين
والأسود لا تأكل البايت
والصقور لا تقع على الجيف
والكرام لا يرضون بغير المكارم

دى بعض الأسباب اللى لو اخدنا بيها وصدقنا مع الله
سيصدقنا الله بإذنه وسينزع من قلوبنا حب الدنيا لتحل محلها حب الأخرة
وما أهنئ العيش إلا العيش مع الله

اللهم لا تحرمنا لذة الأنس بك ولذة مناجاتك
إنك على كل شيء قدير ...

[فقيرة إلى الله]

رد: أختى ... لماذا إنتكستى ؟؟؟! ««الإنتكاســـة ،،، أسبــــاب ،،،، وعــــلاج««

أعتذر أخواتى على الإطالة فكنت أريد أن أكتب الأسباب والعلاج فقط
لكن فعلا أنا استفدت بكل كلمة من الدرس ده
فأردت أن أكتبه عسى أن ينتفع به أحد

ولذلك سأكتب ما استفدته
لكن تابعوا



وإن شاء الله أحاول أكتب قدر أكبر مما أكتب حتى لا أطيل
وستستفيدوا الكثير بإذن الله
ولكن
هذا لمن أراد فعلا أن يعود إلى الله ويعود إلى ما كان هداه الله إليه ...

[فقيرة إلى الله]

رد: أختى ... لماذا إنتكستى ؟؟؟! ««الإنتكاســـة ،،، أسبــــاب ،،،، وعــــلاج««

السبب الثانى من أسباب الإنتكاسة

عدم التضحية من أجل الدنيا

عارفه ليه الناس بتقع فى الإنتكاسه ؟؟
لإنهم لم يبذلوا شيء حقيقى لله
ابن الجوزى بيقول (( أول قدم فى الطريق بذل الروح ... هذه الجادّة فأين السالك ؟؟! ))

عشان تعرفى إنتى على الطريق وبدأتى فعلا فى الطريق

ولا لسه جرى فى المحلولسه لم تخطى خطوة لربنا
شوفى إنتى ضحيتى بإيه لله
حاجه غالية عليكِ تركتيها لله

ابن القيم بيقول ((هذا الطريق تعب فيه آدم ، وناح لأجله نوح ، ورّمى فى النار الخليل ، ووضع للذبح إسماعيل ، وبيع يوسف بثمن بخس ولبس فى السجن بضع سنين ، وذهبت من البكاء عين يعقوب ، ونُشر بالمنشار زكريا ، وذُبح الحصور يحي ، وضنا بالبلاء أيوب ، وزاد على المقدار بكاء داود ، وتنغص فى الملك عيش سليمان ، وعالج الفقر وأنواع الأذى محمد صلى الله عليه وسلم)))

فماذا بذلتى ؟؟!!!!!!

الملتزمة الحقيقية علشان تدلل على إلتزامها وما تنتكسش
لازم تدخر عمل فذّ لله، تضحى فيه بالغالى والثمين

قال تعالى {لَن تَنَالُواْ الْبِرَّ حَتَّى تُنفِقُواْ مِمَّا تُحِبُّونَ وَمَا تُنفِقُواْ مِن شَيْءٍ فَإِنَّ اللّهَ بِهِ عَلِيمٌ }آل عمران92

إحنا بننفق لكن هل مما نحب ؟!!

ضحى بأى شيء عشان دينك لحمك ودمك
اللى هو أعظم عندك من الدنيا واللى فيها

علشان كده اللى مش بتضحى وبتؤثر الدنيا

بتقع فى وحل الإنتكاس

لو إنتى ضحيتى بشيء لربنا ربنا لن يتركها لكِ

ضحى بوقت تدرسى فيه وتنصرى نبيك
ضحى بساعة نوم قومى فيها بين يدى الله
وهكذا ....



أسأل الله أن يوقظنا لتدارك ما فات من أعمارنا وأن يقبضنا إليه وهو راض عنا غير غضبان

يُتبع بأمر الله ...

[فقيرة إلى الله]

رد: أختى ... لماذا إنتكستى ؟؟؟! ««الإنتكاســـة ،،، أسبــــاب ،،،، وعــــلاج««

الحمد لله والصلاة والسلام على رسول الله صلى الله عليه وسلم

السبب الثالث من أسباب الإنتكاسة
عدم التزود الإيمانى بإستمرار

لازم يبقى لك خلوة كل فترة ... لما تحسى إنك مش حاسه بالطاعة لإن لسه فى رواسب من ذنوب ومعاصى

عايزين نخلص القلب من المعاصى لإن فى القلب جزء مظلم بسبب المعاصى وجزء مضيء من الطاعة فعايزين نملأ القلب بالطاعة تبقى حياتنا كلها طاعة ولو فعلنا ذنب أردفناه بطاعة فإن الحسنات يذهبن السيئات

فى ذنوب مش واخدين بالنا منها زى (( عدم تجديد التوبة ... دا ذنب مش ربنا بيقول "وَمَن لَّمْ يَتُبْ فَأُوْلَئِكَ هُمُ الظَّالِمُونَ " الحجرات11 ))
(( عدم شكر النعمة ... دا ذنب مش ربنا بيقول " وَاشْكُرُواْ لِي وَلاَ تَكْفُرُونِ " البقرة152 ))

لازم لكِ شحنة كل فترة بخلوة تجددى فيها نواياكِ وتوبتك

وفى حاجات كتير تنشطك للطاعة
مثل
الخوف من الله
الحياء منه سبحانه
الإحساس بقصر العمر
...

السلف كانوا بيقولوا الناس على ثلاثة أنواع
* رجل يومه أفضل من أمسه (هذا هو المرحوم )
* رجل يومه كأمسه (هذا هو المغبون ... الخسران )
* رجل يومه أسوء من أمسه (هذا هو الملعون )

إنتى ياغالية عايزه تبقى أى نوع ؟!!!

الإيمان يزيد وينقص
يزيد بالطاعة وينقص بالمعصية
لازم تزودى إيمانك وتخدى خطوة لقدّام
حال السلف مع الطاعة والتزود منها :.

كان أحد السلف اسمه صفوان
يقولون عنه
((لو قيل له إن يوم القيامة غدا ما كان عنده مزيد على ما هو عليه من العبادة !))

وقيل لو قيل لحمّاد بن سلمه
إنك ستموت غدا ما قدر أن يزيد من العمل شيئا

وقال سفيان لو رأيت منصور بن المعتمر
لقلت يموت الساعة من شدة إجتهاده فى الطاعة

هو ده
وإنتى متكونيش كده ليه !!
إيه اللى معطلك !!!

{يَا أَيُّهَا الَّذِينَ آمَنُواْ مَا لَكُمْ إِذَا قِيلَ لَكُمُ انفِرُواْ فِي سَبِيلِ اللّهِ اثَّاقَلْتُمْ إِلَى الأَرْضِ أَرَضِيتُم بِالْحَيَاةِ الدُّنْيَا مِنَ الآخِرَةِ فَمَا مَتَاعُ الْحَيَاةِ الدُّنْيَا فِي الآخِرَةِ إِلاَّ قَلِيلٌ }التوبة38

ياأختاه
لابد من الزيادة عشان تخدى أكتر من خطوة فى الطريق فلما تيجى ترجعى مترجعيش لنقطة الصفر

والعلاج علشان تزودى من الطاعة
هو إنك تستعينى بالله سبحانه
وتجتهدى فى العبادة
وتفعلى من الخير ما استطعتى إلى ذلك سبيلا
....

[فقيرة إلى الله]

رد: أختى ... لماذا إنتكستى ؟؟؟! ««الإنتكاســـة ،،، أسبــــاب ،،،، وعــــلاج««

السبب الرابع

ودا أخطر الأسباب

رؤية الذات

شايفه نفسك وحاسه إن فيه كبر فى قلبك ؟!!!
حاسه إنك أكثر تميزا عن غيرك شوية
حاسه إنك لو قلتى إن كلامك هو اللى صح ولازم الناس تطيعك لإن وجهة نظرك هى الأفضل

أحذرى ياأختاه
فقد يحبط العمل برؤية النفس

المؤمنة لا ترى لنفسها شيء ،لا تنسب الأمر لنفسها بل هو محض فضل الله عليها

لا تزكى نفسك أبداا حتى لا تقعى فى المحذور فربنا سبحانه وتعالى نهانا على أن نزكى أنفسنا قال تعالى
(( فَلَا تُزَكُّوا أَنفُسَكُمْ هُوَ أَعْلَمُ بِمَنِ اتَّقَى ))


لما تستشعرى إن ربنا منّ عليكِ بأورادك أو جدولك اللى حطاه لنفسك فى اليوم مشيتى عليه صح ومفوتيش منه حاجه

بصى كده إحساسك من جواكِ إيه ؟؟؟
هل هتحسى وتقولى فى نفسك إنك بقيتى
يعنى تقولى أنا بقيت كويسه ومشيت صح
وبكده تبقى عظّمتى نفسك

ولا
حاسه بالنعمة فمكسوفة أصلا إن رحمة ربنا بتتنزل عليكِ وإنتى ما تستحقيش

لو فعلا عندك شعور إنك مقصرة وما تستحقيش الرحمة دى والنعم دى


إسألى نفسك كده حالك يبقى شكله إيه ؟؟

هل شوفتى نفسك وحسيتى إنك عملتى حاجه
ولاّ
إنتى حاسه إنك مهما عملتى ما وفّتيش ولا نعمة واحدة حتى من نعم ربنا عليكِ



هل شكرتى الله حق شكره
يعنى لسان حالك
عاجزه عن شكر ربنا ومش عارفه تشكرى ربنا إزاى

أم
لسان حالك وإنتى بتعملى أى طاعة
كأنك بتقولى لربنا عايز إيه منى يارب ... أنا عملت اللى أمرتنى به
إن كنتِ الثانية فما شكرتى الله حق شكره


لازم من تقليل الذات
ودا بيحتاج مجاهدة

بصى ياغالية لما يجى إحساس عندك بتعظيم الذات وفرحانه بطاعتك طول اليوم وإنك عملتى وعملتى

لما يكون عندك الإحساس ده


لازم تقفى مع نفسك وقفه وليكن قولك مع نفسك
(( ياااااااه أنا جايه فرحانه النهارده بكذا وكذا وعلشان عملت كذا وكذا
أُمّال الذنوب القديمة دى ربنا يتوب على ويقبل توبتى

والأيام اللى كنتى مضيّعه الصلاة فيها والحجاب وكذا وكذا ....

دايما تحطى حاجه قُدّامك تكسرك
عشان ما تغتريش بعملك
ولا تعظّمى نفسك

وإن كنتِ لما بتفتكرى ذنوب الماضى بتحبطى وبتبقى مش عايزه تفتكرى لإنك بتيأسى

خلاص

ذكّرى نفسك بذنب وقعتى فيه وليكن الغيبة مثلا

فتحسى إنك معملتيش حاجه خالص
ومتقلليش من الذنب مهما صغر
ولا تحتقرى من المعروف شيئا كذلك

كانوا بيقولوا إن من تربية الرب سبحانه أنه يقهر العبد بذنب

يعنى أول ما تفرحى بنفسك شويه تلاقى نفسك وقعتى فى ذنب

يعنى كنتِ قمتى الليلة دى أدّ كده... متصليش الفجر حاضر ويروح عليكِ


فتقفى بينك وبين نفسك وتستغفرى ربنا وتنكسرى بين يديه سبحانه وتحسى إنك ولا حجه لولا فضل ربنا وكرمه عليكِ


محتاجين نتخلص من أفة العجب بالنفس والعمل

ودا يكون بالذل والإنكسار لله
ويكون بسجدة الفضفضة

تسجدى بين يدى الله سبحانه فى جوف الليل المظلم وتبكى وتقولى يارب أنا أهملت وقصرت .. يارب أجبر بخاطرى وارحمنى واعفو عنى

دايما أشكرى ربنا على النعم الكتيرة التى لا تعد ولا تحصى
ولما تشوفى نعم ربنا أكيد هتحسى بالتقصير والتفريط الشدييد



ياغالية

العلو فى الدنيا لا يعرف طريق الأخرة

{تِلْكَ الدَّارُ الْآخِرَةُ نَجْعَلُهَا لِلَّذِينَ لَا يُرِيدُونَ عُلُوّاً فِي الْأَرْضِ وَلَا فَسَاداً وَالْعَاقِبَةُ لِلْمُتَّقِينَ }القصص83

مش عايزه أحس إنى أنا فى وسط الأخوات أنا اللى متميزه
لأ
بالعكس
أنا عايزه محدش يحس بى خاااالص
أبقى التقية النقية الخفية

لسان حالك
كأنك بتقولى
أنا قاعده فى وسط الصالحات علشان همّا يزودونى مش أنا اللى أزودهم
يمكن الرحمة تصيبنى بسببهم فهم القوم لا يشقى بهم جليسهم

مش أقعد وأحس إن الرحمة هتتنزل علشان أنا قاعده فى المجلس !!!!

عايزين نتخلص من الأفة دى حتى يحسن إيماننا ...

[فقيرة إلى الله]

رد: أختى ... لماذا إنتكستى ؟؟؟! ««الإنتكاســـة ،،، أسبــــاب ،،،، وعــــلاج««

يارب نكون قدرنا نعرف بعض أسباب الإنتكاسة
وأكون قدرت أفيدكم ولو بالقليل

هذا ما يسره الله لى

هذا الكلام كله مقتبس من درس الشيخ هانى حلمى

بجد درس رااائع
أنصح كل من فترت أو تظن أنها فترت وليس الأمر كذلك بل انتكست
أن تسمع الدرس ده


لمـــــــاذا إنتكســــــتى ؟!!!


وياريت اللى استفادت منه أو رأت إنه مفيد تساهم فى نقله عسى أن ينفع الله به أحدا ...

وربنا يغفر لنا تقصيرنا ويجبر كسرنا ويرحم ضعفنا ويستر عيبنا ويرزقنا الهداية إنه ولى ذلك ومولاه
فى حفظ الرحمن ...

[فقيرة إلى الله]

رد: أختى ... لماذا إنتكستى ؟؟؟! ««الإنتكاســـة ،،، أسبــــاب ،،،، وعــــلاج««

اللهم طهر قلوبنا وردنا إليكِ يارب ردا جميلا

[فقيرة إلى الله]

رد: أختى ... لماذا إنتكستى ؟؟؟! ««الإنتكاســـة ،،، أسبــــاب ،،،، وعــــلاج««

اللهم خذ بإيدينا إليك أخذ الكرام عليك