Tweet
السلام عليكم ورحمة الله وبركاته
أكيد سؤال بييجي في بال بنات كتير، أنتي تنفعي زوجة؟ ولا لا؟
أكيد البنت بتبقى نفسها تتجوز بقى وتلاقي الحد اللي يحبها ويعينها على الطاعة ويعيشوا مع بعض بقى حياة كلها جديد في جديد.
لكن، أي واحدة بتبقى عايزة تتجوز بتبقى عارفة يعني ايه جواز؟
ولا بتبقي متخيلة إنه حب وبس...
أكيد الجواز مش حب وبس ، لكن بردو مش مشاغل وهموم ومسئوليات وبس.
هكلمك النهاردة عن شوية حاجات أغلبها هيكون ليه علاقة بطريقة تفكيرك.. يعني مش بس شغل البيت والكلام ده..
أول حاجة: الطاعة
ودي قلتها أول حاجة لأنها أهم حاجة في الزواج.. أنا من رأيي أن أغلب البيوت الزوجية اللي بيكون فيها مشاكل بتكون بسبب عدم طاعة الزوجة لزوجها، ومش بس كده .. لا دي كمان بتبقى شايفة انها مش المفروض تطيعه وانها لازم يكون ليها حريتها و..و..إلخ.
ازاي تطيعي زوجك وفي ايه؟؟
تطيعيه في كل حاجة إلا في معصية الله عز وجل
اعملي كذا حاضر.. ماتعمليش كذا حاضر
بمنتهى الأدب والذوق والحب.. وهو ده اللي هيخلي زوجك يحبك أكتر لما يلاقيكي بتطيعيه في كل حاجة.
::ملحوظة::
زوجك هو شريك حياتك.. يعني شخص يشاركك حياتك..يعني مادام قبلتي بالزواج من الأول يبقى لازم تعرفي ان حياتك مش هتكون زي ماهي.. لازم يحصل فرق.. لأن في حد جه يشاركك حياتك.. هو ماجاش يشاركك حياتك غصب عنك.. لا انتي كنتي موافقة على كده..يبقى هتقسمي حياتك بينه وبينك..ولازم يكون في تنازلات وتضحيات.. ولازم تيجي وقت وتعدي حاجات وتصبري على حاجات.
تاني حاجة: الاهتمام
وده بينقسم لكذا حاجة:
*الاهتمام بنظافتك.
*الاهتمام بنظافة البيت.
*الاهتمام بالأكل والغسيل.
*الاهتمام بمظهرك وأناقتك وجمالك.
*الاهتمام بيه هو كشخص ودي هنتكلم فيها لوحدها ان شاء الله.
*الاهتمام بالأولاد لو كان في.
وعلى فكرة الاهتمام ده مهم جدا..ليه؟؟
لأن ممكن واحدة تكون بتعرف تعمل أكل مثلا لكن مش بتهتم أنها تعمل حاجات جديدة أو تبتكر في الأكل..بتعمل أي حاجة وخلاص علشان تخلص..
لكن ممكن تبقى واحدة تانية مش بتعرف تعمل أكل أصلا بس مهتمة.. فتمسك كتاب حتى تعمل منه.. وكل يوم تعمل حاجة مختلفة وتحط الأكل بطريقة شيك وجميلة..وده بيفرح الزوج أكتر من اللي بتعمل وخلاص.
::ملحوظة::
أنا مش مع أن البنت تتخطب وتفضل لحد ماتتزوج تكون مش بتعرف تعمل أكل..لازم تقفي في المطبخ من دلوقتي وتجربي وتعملي أي حاجة .. المهم ماتجربيش في زوجك.
تالت حاجة: النفسيات
يعني ايه النفسيات؟ يعني بتعرفي تراعي النفسيات.. ودي على فكرة مش حاجة بسيطة.. بالعكس دي مهمة جدا جدا جدا.
لأنها بتتطلب أنك تعمليها :
*مع زوجك.
*ومع أولادك.
طيب ازاي تراعي نفسية زوجك؟
-يعني مايبقاش جاي من الشغل متعصب ومخنوق وتشيليه أنتي هم أكتر.
-ماتبقيش مثلا طلبتي منه طلبات معينة وجه نسي حاجة منهم تزعلي وتقلبي الدنيا وتقوليله اتفضل انزل جيبهالي بسرعة.
-مايبقاش عنده مشكلة في الشغل وانتي عمالة تطلبي منه حاجات مش بيبقى هو ناقص أصلا.
- مايبقاش مضايق وانتي عايشة حياتك وعمالة تكلمي فلانة وعلانة وتضحكي وتهزري مع دي ومع دي عادي.
- مايبقاش فرحان هو ومبسوط وانتي تنكدي عليه لأي سبب مش مستاهل.
:: ملحوظة::
ماتفتكريش ان اللي انا بقوله ده أوفر أوي.. لأن السيدة خديجة لما مرض ابنها القاسم كانت مستعدة للصدمة لكن كانت خايفة على سيدنا محمد صلى الله عليه وسلم.. وده مش عدم اهتمام منها بابنها..بالعكس كانت بتحبه جدا.. بس من كتر حبها للنبي صلى الله عليه وسلم خايفة عليه أنه يزعل لوفاة ابنهم .. وفعلا توفي وفضلت تصبر في النبي عليه الصلاة والسلام وتقوله انه قضاء الله وقدره.
طيب قلنا انك تراعي نفسية جوزك.. وتراعي بقى نفسية أولادك ازاي.. طبعا دي مش هتتقال في سطور لكن هقول أمثلة بسيطة جدا
- لما يكون عندك كذا طفل أوعي أبداااا تقارنيهم ببعض لأن ده – ولو كان ممكن يكون مش واضح- لكن بيأثر في نفسية الأطفال جدا وبيخليهم يكرهوا بعض.
- لما يكون عندك الطفل الأول وخد دلع واهتمام جامد أوي منك ومن زوجك وبعدين بمنتهى السهولة ترزقي بطفل تاني ومش بيشغلك الأول ده نفسيته ممكن تتأثر ازاي.. وده لازم يتعالج بأنك تقعدي أوقات مع الطفل الأول لوحده أو مثلا زوجك ياخده يفسحه شوية لوحده.. أو تروحوا تتفسحوا وابنك الرضيع طبعا مش هيركب ألعاب ولا كده فتدي اهتمام كبير أوي للأول وتخليه يلعب ويتبسط .. لأن اهتمامكم بالتاني أكتر من الأول بيخلي الأول يكره الطفل اللي جه بعده.
- لو عندك واحد بيفهم في حاجة والتاني لا تبقي عارفة ان دي قدرات كل واحد.. ماتحسسيش واحد منهم انه أقل من أخوه لأنه أكيد هيبقى أحسن منه في حاجة تانية بس دي شطارتك بقى انك تعرفي كل واحد فيهم ايه ميوله واهتماماته وتعرّفيه كده علشان يثق في نفسه.
:: ملحوظة::
تربية الأبناء دي مش حاجة سهلة .. لازم تقرئي فيها كتب وتعرفي عنها حاجات من أول ماتحملي لأن في حاجات كمان بتبقى محتاجة انك تعمليها للطفل من وهو في بطنك.
رابع حاجة: الحب
ودي بقى لازم تديها أوي لجوزك وماتبقيش بتديله حب وحنان عشان يديكي..لأنك لو مشيتي بالمبدأ ده مش هترتاحي..اعملي كل حاجة لوجه الله وهتلاقي كرم من ربنا أوي.
لما ييجي من الشغل بيبقى جاي تعبان بيبقى نفسه يرتاااااح ..فأنتي دورك أنك تديه حب وحنان وهدوء وراحة.. عشان يعيش سعيد وانتي تعيشي سعيدة.
وأهم حاجة في كل ده أنك من الأول تختاري صح.. تختاري الملتزم وتستخيري علشان ربنا يوفقك للزوج الصالح.
وعايزة أذكركم بحديث الرسول (صلى الله عليه وسلم):
فيما معناه " ما من امرأة صلت فرضها وصامت شهرها وأحصنت فرجها وأطاعت بعلها دخلت من أي أبواب الجنة شاءت"
وربنا يرزق كل البنات بأزواج صالحين.. ويرزق كل زوجة السعادة مع زوجها والذرية الصالحة ..اللهم آمين
.
تعليق