Tweet
♥♥ رســالــة إلــى أخــواتــى ♥♥
رسالة إلى أخواتى 
أنا نفسى أفهم ليه بعض المنتقبات أو المختمرات ذوى الحجاب الكامل بيكلموا المتبرجات على إنهم من أهل النار وإنهم من أهل الجنة
ليه المحجبة صح بتبص للمتبرجة بصة من فوق لتحت وبتكلمها بقرف واستحقار ويمكن لو شافتها على سلم العمارة أو فى الكليه متردش عليها السلام وتلوى بوزها فى وشها وتبص الناحية التانية
وإذا صادفت الأمور وكلمتها تلاقى كلامها ليها اتقى ربنا انتى إيه اللى عاملاه فى روحك ده انتى كده ملعونة والملايكة والناس بتلعن فيكى اتلمى فى بيتك أحسن ووووووووووو وقائمة بكلمات والله ما بتجيب غير نتيجة واحدة عِند وكره للمنتقبات أو الحجاب
بصى يا أختى انتى أولاً لايجوز إنك تحكمى على حد إنه هيروح النار لإن العبرة بالخواتيم ممكن اللى بتحتقريها دى ربنا يكرمها بميتة حسنة تدخلها أعالى الجنان
ممكن هى قافله باب الطاعة ده لكن فى بينها وبين ربنا عمار من أبواب تانيه وربنا رايد ليها الهداية
وبعدين دى أمور غيبية ولا أنا ولا انتى ولا أى بشر يقدر يحكم مين فى الجنة ومين فى النار
هى مذنبة صح ..اه طبعا مذنبة وغلطانة لكن عمره مايكون مبرر ليكِ إنك تكلميها باحتقار واستخاف واستحقار وإنك حتى مترديش عليها السلام ..هى صحيح مذنبة لكن فى الاخر مسلمة بتصلى وبتصوم زينا هى صحيح مذنبة لكن انتى برضه مش ملاك
ما انتى ممكن تكونى بتعملى ذنوب زيها ( جوزك غضبان عليكى أو مبتكلميش أختك من فترة أو بتأذى جاراتك وأصحابك فى الشغل بطريقتك المتعالية )
انتى تعرفى كمان إن ربك نهاكى عن هذه الغلظة فى التعامل قال تعالى :
{ وَلَوْ كُنْتَ فَظًّا غَلِيظَ الْقَلْبِ لانْفَضُّوا مِنْ حَوْلِكَ }
على فكرة ممكن اللى بتكلميها دى جواها خير كتير ونفسها تتغير ومحتاجة حد ياخد بايديها بس انتى للأسف أعنتى عليها شيطانها اللى قعد يقولها شفتى المحجبات إزاى خنقة وعقد ونكدييين وممكن كمان تكره الطاعة والإلتزام بسببك
هتيجى واحدة تقولى انتى بتقصدى إيه بكلامك ده إن هما صح يعنى
لا طبعاً هما مش صح خالص وعاملين ذنب كبير وربنا نهى عن التبرج والفتنة وتوعد بأشد الوعيد للمتبرجات وللكاسيات العاريات
بس أنا بتكلم هنا عن طريقة دعوتنا طريقة أمرنا بالمعروف
أحد التابعين قال : ليكن أمرك بالمعروف بمعروف ونهيك عن المنكر بغير منكر
يعنى جارتك دى مثلاً مينفعش فى مرة كده تروحى تزوريها لأى سبب واتكلمى واضحكى معاها وخليها تحبك وترتاحلك الأول انزلى معاها لطريقة تفكيرها يعنى لو بتحب الموضة واللبس افتحى المواضيع دى معاها واتكلمى وقوليللها إن انتى كمان بتحبى الحاجات دى بس فى بيتك لإنك محجبة وكلميها انتى إزاى لبستى الحجاب وإزاى ربنا فتح عليكى بعدها وإزاى الخير والبركة حلوا فى بيتك
ممكن كمان بطريقة لطيفة قولييلها الشيخ الفلانى على قناة كذا بيجى دلوقتى بعد إذنك افتحى التلفزيون وخليها تشوف مشهدين تلاته وبعدين اتكلموا فى الدين بس من غير متعملى عليها دور الأبلة بل بالعكس خليها هى تتكلم واثنى على كلامها والله هتلاقى جواها خير كتير مستخبى
ممكن كمان لو حبتك واتعلقت بيكِ قوليللها أنا بروح الدرس الفلانى فى المسجد الفلانى إيه رايك تيجى معايا وبالمرة واحنا ماشييين اخدك عايزة انقى حاجات ومحتاجة زوقك معايا ( إسلوب ترغيب )
ممكن كمان تشترى كتيبات خفيفة وصغيرة واسلوبها محبب وتهديها ليها
ممكن حاجة تانية الإهتمام بيها فى المواقف المختلفة زى مثلاً إنها مرضت أو حصلتللها ظروف ووقفتى جنبها أكيد هى كده هتحب الإلتزام والدين عن طريقك أو لو مثلاً عملتى حفلة أو أكلة حلوة وعزمتيها عليها
بس المهم مش معنى كده إنك تدهنيها أو تحسيسيها إنها على صواب يعنى متجيش تقولك أنا مش عجبانى طريقة لبسى تروحى تقوليللها لا عادى والله كلنا كنا كده أو مثلاً أومال لو شفتى فلانة هتقولى إيه
منتى متروحيش تكحليها فتعميها خلى عندك حكمة وفطنة بمعنى لما تكلمك فى حاجة زى كده قوليللها أيوة فعلاً إبدئى تغيرى من نفسك ...أو اتقربى لربنا أكتر وادعيه علشان يوفقك
فن الدعوة فن راقى ومحتاج صبر وحكمة وتلون وتغير حسب المواقف والأشخاص يعنى اللى نعمله مع زيد مينفعش مع عبيد فلو حاسة نفسك معندكيش موهبة الفن ده وانتى مطالبة بيه لان الامر بالامعروف فرض عين على كل مسلم يبقى تخيرى الإسلوب اللى يناسبك ويحقق النتيجة المطلوبة
منقوول
تعليق