Tweet
الأمراض المزمنة اللى بتصيب الإنسان وبتصاحبه لفترة طويلة ( زى السكر ) بل ممكن مدى الحياة بتتميز بحاجتين
1- إنها أخف وطأة وشدة من الأمراض الحادة وتاثيرها على المريض بيحصل على المدى البعيد ( مش بتقتل فى وقتها )
2- إن علاجها بيستمر لفترة طويلة وبيكون بغرض الوقاية من المضاعفات مش للشفاء النهائى من المرض
والكلام ده طبعا زى أى قاعدة له شواذ
خلونا نشبه المجموعة دى من الأمراض اللى بتصيب الجسم بمجموعة تانية من الأمراض اللى بتصيب القلب
ذنوب ممكن تكون صغيرة وبسيطة بتصاحبنا باستمرار ومش عارفين نتخلص منها رغم إننا حاولنا كتير من غير فايدة
ولأن الذنوب دى مزمنة وتأثيرها بيحصل على المدى البعيد فمش بتقتل فى وقتها والواحد بيقنع نفسه إنه كويس وتمام وزى الفل
ممكن تكون بتجيله رسايل وتنبيهات بالخطر ووجود المرض
بيحس بأثر الذنوب دى فى حياته لكن برده بيقنع نفسه إن حالته مستقرة , وإنه حاول يعالج نفسه ومنفعش فهو كده عمل اللى عليه
إلى أن يتدهور ويتدهور ويختم له بسوء عياذا بالله
ومن عاش على شئ مات عليه
طب يا ترى ايه العلاج ؟
العلاج إننا نفهم المرض المزمن صح
لازم ناخد بالنا إن العلاج بيستمر فترة طويلة .. يعنى العلاج هوا التانى لازم يكون مزمن
مش هينفع ندخل وحدة الطوارئ يومين وأخرج أقول أنا كده تمام
مينفعش نعلى همتنا فى طاعة الله سبحانه وتعالى ونعيش فى الطاعة يومين وبعدين نوهم نفسنا إننا خفينا خلاص ونبطل العلاج أو نقلل الجرعة
طبيعى بعد كده نلاقى نفسنا رجعنا تانى زى ما كنا أو أسوأ
فعلشان نحل مشكلة الذنوب المزمنة لازم تعيش فى وسط إيمانى يبعدك عن الذنوب دى لمدة طويلة وتجتهد فى العبادة ( جرعات مكثفة ) تجتهد فى قراءة القرءان والقيام والدعاء
وتخلى قلبك مشحون باستمرار
وكل ما رصيدك فى الطاعات يزيد .. مناعتك ضد الذنوب برده بتزيد
نسأل الله تعالى أن يتوب علينا لنتوب
تعليق