Tweet
السلام عليكم ورحمه الله وبركاته
في البدايه عاوزة ارحب بكل الاخوات في المنتدي الجميل ده .. انا بقالي فتره مكتبتش حاجه بعد اول موضوع ليا لاني بصراحه مكنتش عارفه اكتب ايه كنت دايما بدخل بقرأ المواضيع الي في المنتدي وخصوصا الخاصه بالحجاب والنقاب وعيني تدمع واقفل المنتدي
بس النهارده قررت اكتب وافضفض لاخواتي في الله بكل الي جوايا ومتاكده اني هلاقي النصيحه منكم وانكم هتساعدوني وتخففوا عليا الي انا فيه
اكيد اخواتي في الله فهمتوا من كلامي اني عاوزة البس النقاب بس مش لاقيه الي يقنعني بيه صح ؟
المشكله اني مقتنعه بيه جدا رغم وساوس الشيطان الي مالهاش اخر معايا من حوالي سنه .. كل ما الشيطان يوسوسلي بحاجه الاقي نفسي برد عليه وياما دخلت ع مواقع وشفت فيديوهات لشيوخ كتير زي الدكتور حازم شومان الي بيتكلموا فيها عن الحجاب الساتر وافضليه النقاب عن مجرد ارتداء الجلباب
ربنا يشهد اني مقتنعه جدا بكل ده بس مش قادره اخد قرار مش قادره حتا اصمم علي الموضوع ده مع اهلي لاني انا اصلا ماعنديش الجرأه الكافيه اني ارتديه
هتقوليلي يبقي الشيطان ماثر عليكي هاقولكوا ايوه وانا عارفه بس في نفس الوقت نفسي الاقي حد يساعدني بجد اخد قرار من اهم قرارات حياتي الي هايترتب عليها حجات كتير اوى لان النقاب هو طريق البدايه لحياه جديده جميله كلها لله تعالي
مش هاخبي عليكوا وهحكيلكوا ايه الي جوايا .. اولا انا حاسه ان لما هتنقب هايجيلي حاله اكتئاب لاني هنعزل عن حجات كتير كنت بعملها وهابطل حجات كتير زي التلفزيون مثلا وكمان انا بطبيعتي بحب اللبس جدا واني اكون جميله ( عارفه ان ده حرام ) بس للاسف دي حاجه جوايا .. ثانيا انا لما جربت النقاب في مره في البيت حسيت بضيق رهيب في النفس مكنتش عارفه اتنفس كويس لاني اصلا عندي حساسيه وضيق تنفس فخفت من الحكايه دي وكمان انا لسه بدرس خفت وانا بمتحن مثلا اني مش هاعرف اجاوب او احل كويس
حاجه كمان بالنسبه لموضوع العريس وكده انا عارفه ان ده نصيب والي مكتوبلي هاشوفه بس كتير بضعف لما بسمع كتير عن ان العريس مابيحبش المنقبه دي بيقول عنها معقده وخنقه ومالهاش في الفسح ولا المصايف والخروجات وان العريس يحبها محجبه حجاب واسع وكل حاجه بس مش لدرجه التشدد وانها تغطي وشها ده غير بقي الي بيقولو ان النقاب مش فرض وكل ده .. الكلام ده برضه بيجي في بالي
كلكوا هاتقولوا دلوقتي هي بتتحجج والشيطان هو الي بيقولها كده ومعاكوا حق بس انا مش عارفه اعمل ايه
انا مقتنعه بكل حاجه بس ناقصني اهم حاجه هي التنفيذ والجراه علي اتخاذ القرار بتمني من ربنا انه يقدرني ويعينني ويرزقني زوج صالح يساعدني علي طاعه ربنا وعبادته حسن العباده .. انا علي طول ببكي وحزينه مش قادره اركذ في اي حاجه حتا وانا بصلي حاسه اني منافقه وربنا مش راضي عني ولا عن صلاتي لاني مش محجبه صح ولاحتا بلبس اسدال .. مش بلبسه غير في الصلاه بس .. نفسي اتحجب حجاب صح من اول مره .. نفسي ييجي اليوم الي اقولكوا فيه باركولي انا اتنقبت .. ادعولي بالله عليكوا وساعدوني اخد قرار
وسبقوني
تعليق