لاتستخدم هذه الأدوية

[محبة السلف]

السـلام عليكم

◙ هناك الكثير من الأدوية الكثير يعرفها ويستخدمها رغم أن بعضها محظور دوليا وله آثار جانبية فظيعة والبعض له ضوابط في الاستعمال ( مش عمال على بطال ) ..

..:: سأسرد لكم بعض هذه الأدوية ::..

1- مجموعة البرد :
ودي زي ما بيقولوا أشهر من نار ع العلم ومحدش يعرف المصيبة اللي فيها :
المجموعة دي عبارة عن إيه كبسولة مضاد حيوي وده طبعا علميا مينفعش , أي مضاد حيوي بيتاخد كورس كامل مش كبسولة كده البكتريا بيحصل لها حاجة بيسميها الدكاترة resistance.
الحاجة التانية في المجموعة السحرية دي : ممكن تلاقي فلوستوب أو فلورست : ودول محظور استخدامهم هم وأي دواء به مادةphenylpropanolamine
وللأسف الكل بيشتري لأنها رخيصة ..
◄ده كلام لأحد الصيادلة عن المجموعة :
((( إمبارح كنت في صيدلية واحد من حبايبنا جه "زبون عايز مجموعة برد , فحبيبي ده قاله : اتفصل يا حبيبي المجموعة ب75 قرش
بعد الزبون ما مشى ببص على المجموعة ألاقي فيها إيه؟؟Tetracycline
وبعض الصيادلة بيحطوا إيه؟Chloramphenicol
طب بيحطوها ليه؟؟ من الآخر و من غير لف و لا دوران
لأنها رخيصة و لأنها مبتنطلبش كتير فبتتطلع Expired
و طبعا دي مصيبة ليه؟
لأن استخدام كبسولتين مضاد حيوي بس مش الكورس كله حيخلي البكتيريا عندها resistance و لأن المضادين الحيويين دول بالرغم من فعاليتهم فمشاكلهم كتير فTetracycline بيعمل Chelation للكالسيوم فمينفعش يتاخد مع أي أكل او Antacid فيه كالسيوم
كمان لو خدته ست حامل أو بترضع حتبقى مصيبة سودة لأنه بيؤدي لضعف في العظام للست و بيوصل لابنها عن طريق اللبن و بيضعف عظامه و بيعمله تغير دائم في لون الأسنان
أما Chloramphenical فبيعمل aplastic anemia تؤدي للوفاة في 1:25000 من الناس (ودي نسبة مش هينة)
. أ.هـ ))
-----------------------------------
ده آخر علمي باللي كان فيها معرفش اتعملها update ولا ايه ,, فياريت إخواننا الصيادلة اللي بيعملوا كده يتقوا الله في الناس دي ..
يتبع مع ما يعرف بـ المكمل الغذائي وشركات الأدوية ..
------------

..:: فهرس الموضوع ::..

1- مجموعة البرد

2-مكملات الغذاء :
3- الأدوية والأعشاب لزيادة لبن الأم :
4- بالنسبة للمضادات الحيوية
5- خوافض الحرارة
6- أدوية الكحة وألاعيب شركات الأدوية
7- أدوية الحساسية وضوابط استعمالها
8- نقط الأنف وضوابط استعمالها
يتبع إن شاء الله

[طريقي لربي]

رد: لاتستخدم هذه الأدوية

وعليكم السلام ورحمة الله وبركاته
ما شاء الله
موضوع مميز
بس صدقينى فى بعض الاحيان الناس بترفض النصيحة من الصيدلى
وبيمشوا اللى فى دماغهم

[اخلاقي قرآني]

رد: لاتستخدم هذه الأدوية

مشكورة على الافادة الرائعه
بارك الرحمن بك

[محبة السلف]

رد: لاتستخدم هذه الأدوية

2-مكملات الغذاء :

بعض شركات الأدوية - الله يهديهم - بيكتبوا على بعض أدويتهم إنها مكمل غذائي وهي مش كده ..
الكلام ده عرفته من أحد دكاترة ( في سنة الامتياز) بعد خروج أحد مندوبي الأدوية قعد يتكلم عنهم وإجرامهم في التسويق للادوية وإن فيه منها ملوش لازمة وبيضحكوا ع الناس فسألته عن دواء اسمه alveoline ألفيولين إنه مكتوب عليه مكمل غذائي وحكيتله لما المندوب لما جه يكلمنا عنه طلع للكحة فقال هقولكم القصة :
شركات الأدوية بتدفع فلوس كتير على كل منتج عندها بيختلف المبلغ حسب نوع الدواء والمكمل الغذائي أقلهم فبدل ما يدفع للدولة 100 ألف جنيه مثلا يدفع 10 الآف جنيه ..
طبعا كان عندي يومها عينة دواء من المندوب ولما جه بعض المحارم وشافوا كلمة مكمل غذائي ظنوا إنه فعلا مكمل غذائي وكانوا عايزينه لولادهم فوضحت الفكرة والله المستعان ..
دواء تاني نفس الحركة عملاها الشركة بتاعته وهو : فلوتيس بيستخدموه للرشح .
فيرجى من الجميع الانتباه لذلك مش كل دواء مكتوب عليه مكمل غذائي يبقى كده, إسأل دكتور الأول .

----------
يتبع مع أدوية الأعشاب اللي بتزود لبن الأم وكلام الدكاترة عنها ..

[محبة السلف]

رد: لاتستخدم هذه الأدوية

3- الأدوية والأعشاب لزيادة لبن الأم :
الكلام ده قالوه أحد الدكاترة في الأطفال لما جات له مندوبة بدواء عبارة عن أعشاب لزيادة لبن الأم ( مش متذكرة اسم الدواء الآن ) وهي تابعة لنفس الشركة التي تبيع دواء البيبي كالم (مع التنبيه زمايلنا جربوا البيبي كالم مع حالات وقالوا إنه كويس )كلامنا مش عن البيبي كالم لا عن الدواء اللي بيزود لبن الام لأنه لنفس الشركة ,, سألت الدكتور يومها بعد المندوبة ما مشت وكان متضايق جدا منهم وقال مفيش حاجة بتزود لبن الأم غير رضاعة الطفل وقوة مصهsuckling وكل ده اشتغالات ومكاسب للشركات ( أو كما قال ) , وبالتجربة أحد إخواتي جربت الأدوية ومعملتش معاها حاجة ..
----------------
يتبع مع المضادات الحيوية وضوابطها ..

[Dr.hala]

رد: لاتستخدم هذه الأدوية

ما شاء الله

روووووووووووعة بجد جزاكِ الله كل خير

اكملى متابعين بأمر الله

[جميلة بحجابى]

رد: لاتستخدم هذه الأدوية

جزاكِ الله خيراً وبارك فيكِ موضوع أكثر من رائع

[Dr.Sarah || ~]

رد: لاتستخدم هذه الأدوية

ما شااااااااااء الله

موضوع رااااااااااائع

**
متميزة كعادتك يا غالية

يستحق التقييم

[محبة السلف]

رد: لاتستخدم هذه الأدوية

وعليكم السلام ورحمة الله وبركاته

ما شاء الله
موضوع مميز
بس صدقينى فى بعض الاحيان الناس بترفض النصيحة من الصيدلى
وبيمشوا اللى فى دماغهم

بصي يا غالية إنتِ مش تقدري ترضي كل الناس فالواحد يعمل الصح ويتق الله في عمله ..
وربنا يهدي الناس ويحاولوا يفهموا , الواحد بيعاني من الكلام ده مع المرضى في الوحدة ..
-------------
نورتي الموضوع ومتحرمنيش من مشاركتك دوما ..

[محبة السلف]

رد: لاتستخدم هذه الأدوية

4- بالنسبة للمضادات الحيوية :-

◄◄عايزين ناخد بالنا من الحاجات دي أوي :
* الأمبسيلين ampicilline لو اتاخد بالفم مش حٌقن تأثيره ضعيف ومش effective وللأسف بيجي منه في الوحدات وممكن منلقيش غيره والمريض مصمم على المضاد الحيوي الموجود بالوحدة وطبعا مفيش فلوس يشتري من بره فأحيانا بنضطر نكتبه , كان بيبقى الواحد زهقان لما ميلقيش غيره في الوحدة والمريض عايزه وأفهمه إنه مش كويس لكن يصمم أكتبهوله ( بيفكروا إن دكاترة الوحدة بيحوشوه علشان المحسوبيات ) فأكتبهوله بعد أقول له وهو حر لأني وضحتله .
لكن الحمد لله من فترة جه غيره للوحدة فيرجى من وزارة الصحة الانتباه لهذا والله المستعان .

* في الأطفال منتشر جدا موضوع النزلة المعوية : وطبعا بتتعامل غالبا مع مريض فقير وحقن النزلة المعوية زي الـ cefotax مثلا علشان تديله كورس كامل لتعب إبنه ولا بنته يبقى بتطلب منه يصرف ع المضاد الحيوي بس حوالي 80 جنيه يا إما الأب يوقفه بعد حقنة من العلاج فكان البديل دواء رخيص جدا هو التابع لمجموعة أمينوجلايكوسيد زي الجنتاميسين gentamicinوالاميكين amikin وتأثيره رائع على النزلة المعوية لكن له مصيبتين هو إنه لو استخدمه الطفل أكتر من 5-7 أيام يأثر تأثير شديد على الكلية nephrotoxicity والأذن ototoxicity علشان كده لو جالك حالة وقال إنه استخدمه أكتر من 7 أيام لازم يتعمله رسم سمع ووظائف كلى .
فدي مصيبة والواحد بيخاف وقتها يكتبوه لأن الناس بيحبوا يستخدموا الادوية عمال على بطال فبنكون في مأزق وصعب تفهمي المريض لمستوى تعليمه وخصوصا في الأرياف , والله المستعان .
◄◄المضادات الحيوية مع الأطفال :
ودي نقطة مهمة أحيانا بيجيلنا أمهات يقولوا الواد أو البنت تعبت إمبارح وملقتش حاجة تديهاله راحت مريحة دماغها بعد بحث في البيت على أي دوا والسلام وبدون استشارة لحد إديت لابنها ولا بنتها حباية مضاد حيوي وطبعا لأنها أمية متعرفش اسمها فطبعا هي عملت مشكلتين الأولى إنها أدته حباية واحدة مش كورس والتانية إنها إدته جرعة كبيرة عليه ودواء للكبار مش للصغار أصلا فناخد بالنا من الكلام ده ربنا يكرمكم .
◙ أولا المضادات الحيوية سواء شراب أو حقن للأطفال بيتحسب بحسابات خاصة مش بالهيصة كده .
◙ ثانيا هناك مضادات حيوية ممنوعة مع الاطفال لحد سن معين زي :
* ممنوع tetracycline قبل 8 سنوات لأنه بيعمل permnant discoloration .
* ممنوع quinolones قبل 16 سنة يعني من الاخر ممنوع تستخدمه مع الأطفال لأنه بيعمل premature closure of epiphtsis
وللأسف دكتورة إمتياز في فترة الإمتياز كانت هتغلط وتكتبه لطفل والله المستعان .
* بلاش دواء الشرب اللي مادته الفعالة ( amoxicilline-clavulinic ) زي الهيبويتك hibiotic ( المجموعة دي جميلة جدا على فكرة ) قبل 9 شهور لأنه بيعمل اسهال محترم للطفل .
* بلاش chloramphenicol قبل 6 سنوات لأنه بيعمل B.M depression
----------------------------
نتابع مع خوافض الحرارة وخصوصا النوفالجين السحري ..

[محبة السلف]

رد: لاتستخدم هذه الأدوية

مشكورة على الافادة الرائعه


بارك الرحمن بك

آآآآآآآآمين وإياكِ يا غالية ..
يا هلا ومرحبا بكِ , متحرمنيش مشاركتك دوما ..

[محبة السلف]

رد: لاتستخدم هذه الأدوية

5- خوافض الحرارة :
مع الأطفال ناخد بالنا أوي في أدوية السخونية
*النوفالجين : واللي بيستخدمه الكبير قبل الصغير محظور عالميا ما عدا في مصر ( وعلى ما أذكر دولة كمان ) لآثاره الجانبية الكتيره زي agranulocytosis .
* ممنوع الادوية اللي فيها الـ ipbrufen زي megafen ( الدواء ده حلو وبيكتبه كتير من الدكاترة ) والبروفين اللي بيجي الوحدات ممنوع استخدامهم قبل 6 شهور .
* مجموعة الباراسيتامول ( زي شراب سيتال ) آمنة من أول يوم : ما عدا لبوس أبيمول ميتكتبش قبل 5-7 سنين .
* الاسبرين بما فيه اسبرين الأطفال ( أسبوسيد ) ميتاخدش عمال على بطال بل أحد الدكاترة قال ميستخدمش أصلا كخافض للأطفال ولا يستخدم إلا في حالات معينة زي rheumatic arthiritis واسبرين الكبار معروف طبعا بأنه بيعمل إلتهاب للمعدة مشهور في لاستة أسباب إلتهاب المعدة .
* مجموعة الدكلوفينال ( زي لبوس دولفين والفولتارين ) ممنوع قبل سنة وميتاخدش في حالات الربو الشعبي لأنه بيعمل spasm of bronchi
أنا بركز على الأطفال لأن الأم لما بتشوف طفلها سخن بتديله أي حاجة حتى ولو عنده كام شهر والكلام ده مش صح ..
---------------
نتابع إن شاء الله مع أدوية الكحة وتجارة شركات الأدوية ..

[طريقي لربي]

رد: لاتستخدم هذه الأدوية

جزاكِ الله خيراا
رائع الموضوع
بوركتِ

[جميلة بحجابى]

رد: لاتستخدم هذه الأدوية

[~باغية الجنان العلى~]

رد: لاتستخدم هذه الأدوية

حيا الله دكتورتنا
دخلتي في اختصاص الصيادلة
نخشى انه يزعلوا منا ,,,

باذن الله ما فيه زعل
من باب وتعاونوا على البر والتقوى

راااائع جدااا
سلمت يداكِ