&& يوميـــــــــــــات في الصيدليـــــــــــــة &&

[خديجة أحمد]

رد: && يوميـــــــــــــات في الصيدليـــــــــــــة &&

معلومات جميلة
جزاك الله خيرا أخيتي

[Dr.Sarah || ~]

رد: && يوميـــــــــــــات في الصيدليـــــــــــــة &&

جميل ما شاء الله

[امه الله1]

رد: && يوميـــــــــــــات في الصيدليـــــــــــــة &&

Day17

نبدأ أولا بأماكن حقن الانسولين

اشهر أماكن هي :

اشمعني الاماكن دي بالذات ؟
ده بيرجع لعدة أسباب اهمها :

1- الاماكن دي فيها نسبة دهون كويسة و في نفس الوقت الامداد العصبي فيها اقل نسبيا من الاماكن الاخري و بالتالي الحقن فيها بيكون مريح و اقل ألما ..

2-سهل تحدد فيهم الطبقة اللي تحت الجلد مباشرة (subcutaneous) دون الدخول في الطبقات العضلية...(الهستولوجي طلع ليه لزمة اهو !!)

احسن مكان فيهم بيختلف من شخص للتاني... حسب طبيعة و تركيب كل جسم
مثلا..أغلب الناس بتفضل منطقة البطن لان الانسولين بيحصله absorbtion سريع فيها...
لكن لو المريض شخص نحيل أو طفل أو رياضي (مفتول العضلات)
صعب ياخدها في البطن لان طبقة الدهون هتبقي بسيطة فبيفضل انه ياخد الحقنة في الفخذ مثلا...

سؤال شاااااائع جدا و اتسأل كتير في الصيدلية غالبا من مرضي السكر الجداد نسبيا ...
بيقول: انا فخذي اتهري شكشكة اعمل ايه ؟؟
- انا فخذي ورم و مش عارف ايه السبب؟
........
اذا عرف السبب بطل العجب
*
*
احد الاعراض الجانبية لحقن الانسولين: تليف أماكن الحقن اذا تم في مكان واحد بصورة مستمرة
كمان اغلب المرضي بيستخدموا الحقنة اكتر من مرة
بعضهم بيستخدمها مرتين ... و ده أضعف الايمان
ناس تانية بيتستخدم الحقنة لحد ما تبدأ تؤلمهم اثناء الحقن
ناس تالتة بتشتغل بالحقنة لحد ما تبوش !!.. و ما اكثر هذه الفئة
.
.
المهم...
حضرتك هتنصحه 4 نصائح
1- يبتعد عن الحقن في المناطق الاكثر تعرقا في جسده..
2- لا يتهاون مع حتة التعقيم قبل الحقن
3- يستخدم الrotating technique .. بمعني ,, انه كل مرة هيحقن في مكان بحيث يوزع الحقن علي مناطق كتير و الشكشكة متتركزش علي مكان واحد بس...
4- (اهم واحدة بس قليل اللي بيسمع الكلام )
"غير الابرة علي قدر الامكان و ياريت تستخدم مرة واحدة فقط"
الاستخدام المتكرر و اللي زيادة عن اللزوم للابرة في منتهي الخطورة
و بيُعَد أكبر سبب لمشاكل التليف الناتج من حقن الانسولين
و ممكن - لا قدر الله - الابرة تتكسر جوه الجسم ..و تعمل مشاكل

دي صورة ابرة استُخدِمت مرة واحدة فقط ... مكبرة 370 مرة


دي نفس الصورة و لكن مكبرة 2000 مرة

تخيل ان دي استُخدِمت مرة واحدة... ما بالك اللي بتستخدم 30 -40 مرة هتبقي عاملة ازاي؟؟
اكيد هتسبب damage مش قليل ...

حاجة كمان مهمة عاوزة اقولها...
لو افترضنا ان في واحد جاي ياخد حقنة انسولين عند حضرتك في الصيدلية... ( هو امر مستبعد ولكن ممكن يحصل)
في نقطة يفضل ناخد بالنا منها...
الانسولين بيتأثر بسرعة بدرجة الحرارة
عشان كده... يفضل تدي الحقنة في نفس المكان اللي اتحضرت فيه .... !!؟؟!؟
هوضح حالا...
مثلا ... لو هتدي حقنة الانسولين لرجل و كانت الدنيا زحمة
قررت انك تدخل المخزن تحضر الحقنة في هدوء (طبعا المخزن حر نار )
و بعدين خرجت للمريض و اديته الحقنة في التكييف و طبعا عما ظبط هدومة و استعد نفسيا لاخذ الحقنة يعني فيها ما لا يقل عن 5-10 دقائق و دي كافية لتبريد الانسولين
اللي بيحصل ان الانسولين هينكمش ... و هيدخلك فقاعات هوائية مكان الانكماش اللي حصل..

تيجي نعكس الكلام بقي...
جاتلك أمرأة و الصيدلية كانت هادية و رايقة
حضرتك حضرت الحقنة في التكييف بروقان و بعدين اديتها للمريضة في المخزن عشان محدش يشوفها "طبعا"
الانسولين هيتمدد و بما ان حضرتك بتبقي محدد الجرعة بدقة.. هيحصل تسرب لبعض الانسولين من الابرة و مش هتدي الaccurate dose

عشان كده ...
منعا للاحراج... واريح للدماغ
ادي الحقنة في المكان اللي حضرتها فيه
يا رب تكون المعلومة وصلت.......

بالنسبة بقي للعلاجات...
عندنا حوالي 106 دواء لعلاج السكر ...لما شلت النواقص طلعوا 99 دواء
طبعا لو أعدت اكتبهم هزهق و هتزهقوا مني...
و انا قلت قبل كده ان هدفي مش حفظ اسامي علب الاودية وخلاص
لان الموضوع ده بييجي بالممارسة

تابعونا,,,,,

[خديجة أحمد]

رد: && يوميـــــــــــــات في الصيدليـــــــــــــة &&

في انتظارك أختي أمة
جزاك الله خيرا

[بنت الاقصي شرفي نقابي]

رد: && يوميـــــــــــــات في الصيدليـــــــــــــة &&

كان غايب عنى فين ده

تصدقى بالله انا رحت اتدرب فى صيدلية شهر كرهونى فى الصيدليات والطب كله"انا بيطرى على فكرة"
وخرجت

بس معلوماتك والله كتيرة وبتوصل بسرعة
اه لو الاقيك بجد فى صيدلية حتدربينى فى يومين بس:)

[Dr.Sarah || ~]

رد: && يوميـــــــــــــات في الصيدليـــــــــــــة &&

اكملي يا أمة

جايز أدخل صيدلة وادرب على ايدك

**
أختي بنت الأقصى أهلاً بكِ في الساحة

[رقية 2]

رد: && يوميـــــــــــــات في الصيدليـــــــــــــة &&

جزاكِ الله خيراً يا أمة

متابعين بإذن الله

[امه الله1]

رد: && يوميـــــــــــــات في الصيدليـــــــــــــة &&

Day18

هنخلص علي ما تبقي من مرض السكر ان شاء الله...(عافانا الله و اياكم من جميع امراض الجسد و القلب)

اول معلومة ...
في ناس بعد ما بتظبط جرعة الانسولين و تدخل الابرة في جسمها
بتسحب الاول و تشوف في دم دخل السيرنجة ولا لأ,,
عشان يتأكد انه مدخلش في وريد
بس ده ملوش لازمة في حقن الانسولين لانك بتحقن " تحت الجلد"
الحركة دي بنعملها في حقن العضل ...
خصوصا في الحقن اللي لزوجتها عالية اوي او مش بتمتزج بالدم
لانها لو دخلت وريد هتبقي خطر جدا جدا

اخر حاجة و نبقي خلصنا باذن الله
الفرق بين الclear insulin و الcloudy insulin
الفرق بينهم في حاجة واحدة بس ...سرعة المفعول
الclear insulin بيكون محلول رائق ... سهل الانتشار ..سريع المفعول و بيخلص بسرعة = short acting
و اشهر امثلة ليه :
Actrapid
و
Humulin R
اما بقي الcloudy insulin مش بيبقي محلول ... بيقي معلق و معكر ... ابطء في الانتشار و المفعول و بيخلص بعد فترة اطول = long acting
امثلة عليه:
Insulatard
و
Humulin N

احيانا بندي المريض حقنة عبارة عن خليط من الاتنين الclear والcloudy في سيرنجة واحدة
.... مش عارفة الحكمة من كده ايه
اللي فهمته اننا هندخل الاول هواء في الازازتين .. كل واحدة علي حسب الجرعة اللي هتتاخد منها
و بعدين ,,, هنسحب الclear الاول ... و بعدين نسحب الcloudy

و توتة توتة....خلصت الحدوتة !!

لا تنسوني من صالح دعائكم

سبحانك اللهم و بحمدك...أشهد ان لا اله الا انت ...أستغفرك و أتوب اليك

[امه الله1]

رد: && يوميـــــــــــــات في الصيدليـــــــــــــة &&

Day19

الاسبوع لم ينتهي بعد و لكن .... اليومين اللي فاتوا كانوا مليانين مواقف غريبة و مضحكة و أفلام هندي !!
اليكم هذه الباقة المتواضعة و نتمني لكم قراءة ممتعة

... مريض بــيكاكي...

اقدم لكم اغرب مريض قابلته في حياتي ...
.
.
.
.
.
.
.
.

دخل الصيدلية بنتين ... شكلهم في ابتدائي ... ده لو كانوا بيروحوا المدرسة يعني ...
المهم
طلب مني احداهما "برشام 500 "
فهمت ان قصدها مضاد حيوي...ده اول حاجة تخطر علي بالك لما يتذكر تركيز في اسم الدواء
(طبعا انا اتخنقت من حكاية قرص مضاد حيوي دي .. هنتكلم عن الموضوع ده باستفاضة بعدين)
فقلتلها .. قرص واحد مش هيعمل حاجة هو اللي تعبان بيشتكي من ايه؟
قالتلي
"البطة" دايخة و بتلف حوالين نفسها و شكلها عيانة
في الاول مفهمتش ... افتكرت واحدة بيدلعوها يقولولها بطة ولا حاجة
بس لاقيت مدربتي بتقولها .. لازم تودوها لطبيب بيطري
فهمت ساعتها انها ..... بطة = duck !
طلبت مني معلمتي اني اجيبلها قرص المضاد الحيوي
مقدرتش امسك نفسي طبعا و استغرقت في الضحك لدرجة انه قلب بنتيجة عكسية و سالت دموعي ..
الحمد لله ان مكانش في حد في الصيدلية ساعتها حتي صاحبها
ربنا يديم علينا نعمة الستر ..
قلتلها .. طب اجيب ايه بقي ان شاء الله
ماشاء الله احنا بنبيع مضاد حيوي للبط كمان؟؟
ضحكت ثم قالت : هاتي قرص ampicillin من اللي في الدرج
رحت جبته و اديته للبنتين
و قلتلها البطة دي مينفعش تنام في البيت ..لازم تودوها المستشفي...قبل ان اكمل كلامي.... لاقيتهم بيجروا ورا بعض و مشوا !!
انا متأكده ان حتي لو قلتلها ان ممكن يبقي عندها انفلونزا الطيور .. هتقول لي هاتيلي قرص Decongess و علبة مناديل بالمرة
---------
بعد نص ساعة لاقيت البنتين جايين تاني
" انا عاوزة برشامتين كيتوفان و واحد كمان من المضاد " الحنوي " ده "
راح مدربتي تجيبه ... فأنا استغليت فرصة لان المرة دي البنت مش هتهرب مني
سألتها ... انتوا بتدوا الاقراص دي للبطة ازاي ؟؟ بتزغطوها يعني؟
قالت لأ ..بندوبهالها في ماء الشرب
و بعدين اخدت الاقراص و طلعت تجري
كنت هروح وراها بس معلمتي اوقفتني
و قالت عادي متقلقيش اوي كده...
احنا بنربي فراخ في السطح و زي الفل
و في كتكوت سميته يوسف و بينام جنبي

ساعتها عرفت اني مهما قلت محدش هيقتنع ...فأغلقت فمي و التزمت الصمت...

...شَكَل للبيع ...
كانت دي المرة الاولي و الاخيرة اللي اقف فيها ع الكاشير اللي في اول الصيدلية
.....
دخل علينا رجلا ... ليس ضخما ابدا بل كان نحيل الجسد و لكنه كان غاضبا جدا جدا ...
طبعا ... انا اللي كنت عند الكاشير اللي في اول الصيدلية كما ذكرت
فهو اول ما دخل ..... نَشِّن عليا علي طول
انا كنت قاعدة ببحث في ادوية الحساسية علي الكومبيوتر في أمانة الله
فوجدت واحد قدامي بيصوت

تركت ما في يدي و وقفت و كلي آذان صاغية
(طبعا لم يخطر علي بالي انه هيعمل اللي عمله..انا قلت في حادث او مشكلة طارئة.... و هو جاي يستنجد بينا مثلا لاننا كنا يدوب لسه فاتحين من ربع ساعة)
.......
وجدته يصرخ في وجهي بصوت لم اتخيل انه قد يخرج من هذا الجسد ابدا ...
فين صاحب الصيدلية .... حسبي الله ونعم الوكيل
حسبي الله ونعم الوكيل
روحي اندهي لصاحب الصيدلية حالا
قلت بصوت خاااااافت من شدة الرعب
" لسه مجاش"
اشتد في الصراخ في وجهي ..
امبارح يا "ست الضكتورة" جيت بالليل و طلبت مخدر
و كان فيه باشا هنا قالي انه مش موجود
و انا اصلا مراتي عاملة عملية و و و و و ....
و جاي من بورسعيد مخصوص عشان عارف ان الدواء ده عندكم
و بعدين بعد ما لفيت البلد كلها
مراتي جت هنا و قالولها مش بيطلع من غير روشتة
طب مش تقولوا من الاول بدل البهدلة دي...بقي دي أخلاق مسلمين
حسبي الله ونعم الوكيل
و بعدين توقف عن الصراخ ليلتقط انفاسه ..
لم اجرؤ حتي علي ان انظر لوجه مدربتي اللي كانت في الجهة الاخري من الصيدلية
... ادار الرجل وجهه ثم عاد ينظر لي مرة اخري
عاملين فيها محترمين ... ده انتو بتبيعوا برشامة " الترامال " عيني عينك !!
و خرج من الصيدلية مندفعا و مازال يردد
حسبي الله و نعم الوكيل ....حسبي الله و نعم الوكيل !!
.
.
ركضت الي معلمتي و لكن لم انطق بكلمة
صدمني هذا الرجل بكلامه
و هي فهمت ما اريد
فذهبت ووقفت ناحية الكاشير اللي جنب الباب
ووقفت انا عند الكاشير التانية اللي في وش الصيدلية
و لم اجرؤ علي الاقتراب من الاخري مرة تانية ...
و لم اتحدث بهذا الامر مع احد حتي صاحب الصيدلية
...... ربنا يهدي الجميع .....
الايثار شئ جميل .. ولكن انا لا اسمح لاحد بأن يهينني بهذه الطريقة
و خاصة بأنني " لا ذنب لي" ولا أعلم حتي الرجل الذي قال له هذا الكلام
حتي انه لم يخبرني باسم المخدر

...خبير الادراج...

هذه المرة ... كنت واقفة بجانب معلمتي عند الكاشير الشهير " اللي في مقدمة الصيدلية "
كنا لسه فاتحين من دقائق ... و لم يحضر احد سوي نحن الاثنين

جاءنا رجلا ... ليس مريبا و لا يدعو للشك
ولكنه جاء بالامس و كان الصيدلي واقف معنا
و طلب منه calmepam ذو تركيز عالي ..
كان الدواء موجودا بالفعل و لكن الصيدلي قال انه ليس متوفر
و قال له " بكرة الصبح ان شاء الله ..."
الرجل كان مصمم علي اخذ الدواء
طلبه منا ولكن مدربتي قالت له انه مش موجود
قطب جبينه و ...سبحان مغير الاحوال
وجدناه يصرخ : اريد الدوااااااااااااء حالا
الدكتور محمد قال انه هيبقي هنا الصبح
قالت له مدربتي,,, ليس موجودا للاسف ..
و قلت له .. احنا لسه فاتحين و لسة الطلبية مجتش
...ثم وجدناه ينظر الي درج المخدرات

و اذا به ينحني علي الزجاج امامنا و يمد يديه ليفتح الدرج من بيني و بين معلمتي
في الاول ظننت انه سيضربنا فابتعدنا كـreflex action ..
ولكن استعدنا توازننا مرة اخري و الحمد لله لم يستطع ان يفتح الدرج ...لانه بلا مقبض ( هنا بقي فهمت هو ملوش مقبض ليه )
قال لنا: افتحوا الدرج يا عرايس و سموا بالله و ان شاء الله تلاقوا الدواء
لم تجد معلمتي حلا اخر...ففتحت الدرج و حرصت علي الا يستطيع الرجل ان يري ما بداخله
فقمت باحضار شريط بسرعة و لكن من التركيز الاقل و اغلقنا الدرج
...قلت له عفوا هذا هو الوحيد المتوفر الآن
فانتزع الشريط من يدي و رمي نقودا في وجهي و انصرف
....ولا حول ولا و قوة الا بالله العلي العظيم ...
حين جاء الصيدلي ...اخبرته بما حدث
فقال ان تصرفي كان خاطئا
و المفروض كنت مديهوش حاجة...
قالي كنتي قوليله : زعق من هنا للصبح محدش هيديك حاجة
و قال لازم ابقي اشجع من كده
ولكن كيف لي ان اقوم بذلك ....لا سني ولا حجمي ولا شخصيتي تساعدني علي ذلك ...
.............
يا رب اصرف عنا برحمتك شر ما قضيت

لا تنسوني من صالح دعائكم

سبحاااانك اللهم و بحمدك...أشهد ان لا اله الا انت ...أستغفرك و أتوب اليك

تابعونا,,,,,

[العائده الى مولاها]

رد: && يوميـــــــــــــات في الصيدليـــــــــــــة &&

جزاكى الله خيرا
ربنا يصرف عنا هذه البلايا
انا مقدره وفاهمه كل اللى قولتيه
انا برده هقولك موقف حصل معايا من يوميها حسيت ان مهنتنا بدها واحد يكون شجاع ومتدرب على مثل هذه المواقف
كانت واحده جايه تدى ابنها حقنه هو كان قولى سنتين او سنتين ونصف فانا كنت لسه فى الاول فكنت بتفرج بس فاللى كان واقف معانا انا والبنت التانيه هو اللى اداله الحقنه هو ليس صيدليا بس اول ما ادى الولد الحقنه الولد جسمه ازرق وراح فى غيبوبه على فكره هو كان غير مسلم وقعدت مامته تنادى مايكل .....مايكل .. مفيش مايكل انا ساعتها محستشى بنفسى وقعدت ارجع بظهرى لورا وانا واضعه ايدى على فمى وقلبى بيدق بسرعه غريبه لحد ما اصطدمت بالمكتب وده كله والعامل كان بيفوق فى الولد ويرفع رجليه لفوق لحد ما فاق الولد ساعتها خت نفسى
ربنا يسترنا ويجعلنا قد المسؤليه

[امه الله1]

رد: && يوميـــــــــــــات في الصيدليـــــــــــــة &&

جزاكى الله خيرا
ربنا يصرف عنا هذه البلايا
انا مقدره وفاهمه كل اللى قولتيه
انا برده هقولك موقف حصل معايا من يوميها حسيت ان مهنتنا بدها واحد يكون شجاع ومتدرب على مثل هذه المواقف
كانت واحده جايه تدى ابنها حقنه هو كان قولى سنتين او سنتين ونصف فانا كنت لسه فى الاول فكنت بتفرج بس فاللى كان واقف معانا انا والبنت التانيه هو اللى اداله الحقنه هو ليس صيدليا بس اول ما ادى الولد الحقنه الولد جسمه ازرق وراح فى غيبوبه على فكره هو كان غير مسلم وقعدت مامته تنادى مايكل .....مايكل .. مفيش مايكل انا ساعتها محستشى بنفسى وقعدت ارجع بظهرى لورا وانا واضعه ايدى على فمى وقلبى بيدق بسرعه غريبه لحد ما اصطدمت بالمكتب وده كله والعامل كان بيفوق فى الولد ويرفع رجليه لفوق لحد ما فاق الولد ساعتها خت نفسى
ربنا يسترنا ويجعلنا قد المسؤليه

اهلا وسهلا منورة
شوفتي عرفتك ازاي
ربنا يسترها فعلا ويصلح حالنا

[خديجة أحمد]

رد: && يوميـــــــــــــات في الصيدليـــــــــــــة &&

وعليكم السلام ورحمة الله وبركاته
مواقف صعبة فعلا
لكن أختي أمة عندما يطلب أحدا مخدرا وترفض إعطائه له بدعوى أنه غير موجود مع العلم أنه موجود
فليس هذا كذبا؟ يعني من المفترض التصرف بشكل آخر دون اللجوء للكذب
فما رأيكم؟؟

[خديجة أحمد]

رد: && يوميـــــــــــــات في الصيدليـــــــــــــة &&

وعليكم السلام ورحمة الله وبركاته
مواقف صعبة فعلا
لكن أختي أمة عندما يطلب أحدا مخدرا وترفض إعطائه له بدعوى أنه غير موجود مع العلم أنه موجود
فليس هذا كذبا؟ يعني من المفترض التصرف بشكل آخر دون اللجوء للكذب
فما رأيكم؟؟

[امه الله1]

رد: && يوميـــــــــــــات في الصيدليـــــــــــــة &&

وعليكم السلام ورحمة الله وبركاته
مواقف صعبة فعلا
لكن أختي أمة عندما يطلب أحدا مخدرا وترفض إعطائه له بدعوى أنه غير موجود مع العلم أنه موجود
فليس هذا كذبا؟ يعني من المفترض التصرف بشكل آخر دون اللجوء للكذب
فما رأيكم؟؟

اختي خديجه لازم تعرفي مهما تعملتي مع المدمن بأسلوب لائق هو مش هيصدق غير لما تقوليلوا انه غير موجود ده ممكن يعمل جريمه اصلا
كحكم نسأل شيخ أفضل ماشي؟
طب قوليلي مثلا ممكن تقوليلوا ايه؟
مثلا واحد طلب ترامادول, قوليلي رد ليه؟؟؟؟؟؟؟
منتظره اختي

[خديجة أحمد]

رد: && يوميـــــــــــــات في الصيدليـــــــــــــة &&

اختي خديجه لازم تعرفي مهما تعملتي مع المدمن بأسلوب لائق هو مش هيصدق غير لما تقوليلوا انه غير موجود ده ممكن يعمل جريمه اصلا

كحكم نسأل شيخ أفضل ماشي؟
طب قوليلي مثلا ممكن تقوليلوا ايه؟
مثلا واحد طلب ترامادول, قوليلي رد ليه؟؟؟؟؟؟؟
منتظره اختي

أنا عمري أصلا ما رديت عليهم
المدربة هي التي كانت تتصرف معهم
لكن كنت أفكر كيف أتصرف مستقبلا إن شاء الله
فمن بين الأمور التي فكرت فيها بحيث لا ألجأ للكذب هي المراوغة أشرح لك كيف ذلك :
أقول له ليس لدي الدواء المطلوب، وفعلا هو ليس لدي فهو في الدرج
أو مثلا لا نستعمله وأقصد بذلك أننا لا نتناوله وهذا صحيح
يعني نلجأ للمرواغات دون كذب
هذا ما فكرت به والله أعلم