محتاجة اى أخت عملت او حضرت خطوبة او فرح اسلامى

[يارب اسألك الرضا]

السلام عليكم ورحمة الله وبركاته
اللهم صل على محمد وعلى آل محمد
سؤالى ببساطة يابنات انا عايزة اعرف الافراح والخطوبة الاسلامية دى بتتعمل ازاااااى؟؟
يعنى بكل بساطة انا واختى زى باقى البنات طول عمرنا نلبس فساتين سواريه ونقعد مع البنات فى الركن بتاعنا ف القاعة بس انا عايزة اعرف هل ممكن نلبس كدة فعلا؟ طب وهنمشى بيهم ازاى دول؟؟
بصوا يا جماعة م الاخر انا مخمرة واختى لابسة ادناء "بين الاسدال والملحفة" تقدروا تقولولى اللبس اللى نلبسه فى مناسبات زى دى بيكون عامل ازاى؟؟ هل هنروح الخطوبة بالادناء كدة عادى ومش هنجيب لبس افراح يعنى؟
وكمان حاجاة تانية عايزة اعرفها ودى اهم حااااااااجة ازاى يعنى انا اكون بتجوز او خطوبتى مثلا او حتى خطوبة اخويا والولاد ف حتة والبنات ف حتة وبابا واخويا دول مش هشوفهم طول الليلة يعنى ومش هشوف اخويا وهو عريس ؟؟!!!!!
ماهو ممنوع البنات تروح عند الرجالة وممنوع الرجالة ييجوا عند البنات
طيب ولو انا اللى بتجوز جوزى دة مش هيشوفنى يعنى وانا عروسة طول اليوم غير لما نروح مع بعض وللا بيحصل ايه يا جماعة
معلش يا جماعة اختكم جاهلة بالمواشيع دى مفيش حد اتجوز عندنا قبل كدة

[القرأن نبض قلبي]

رد: محتاجة اى أخت عملت او حضرت خطوبة او فرح اسلامى



سؤال مهم بس الاجابه عليه صعبه شويه
انا واختى عندنا نفس المشكله
اصلنا منتقبات وفرح اخونا قرب ومش عارفين نعمل ايه
بس عارفه احنا رحنا فرح خالتى من شهرين ورحنا بالنقاب
وقلعناه هناك بس كانت الحنه يعنى مفيش رجاله بس فرح اخونا مش
عارفين نعمل فيه ايه

[يارب اسألك الرضا]

رد: محتاجة اى أخت عملت او حضرت خطوبة او فرح اسلامى

ماهى المشكلة الكبيرة اللى مواجهانى دلوقتى وبتخلينى افكر كتير فيها ازاى يبقى فرح اخويا وانا مش واقفة معاه ومش هشوفه خالص يعنى وللا ينفع ييجى عندنا او احنا نروح عندهم!!؟
ياريت اى أخت اتحطت ف الموقف دة قبل كدة تدخل تفيدنا

[راجية الانس بالله ورضاه]

رد: محتاجة اى أخت عملت او حضرت خطوبة او فرح اسلامى

وعليكم السلام ورحمة اللهِ وبركاته
بارك الله فيكِ أخيتى يارب أسألك الرضا
أسأل الله أن يرضيكِ فى الدنيا والآخرة
سوف أساعدك قدر المستطاع بهذه المعلومات
عن الفرح الاسلامى اقرئيها جيداً
واعلمى أختى أن السعادة فى تنفيذ ما أمر الله ورسوله به
هذا هو الفرح الحقيقى
**اليـــكِ**

المقصود بالفرح الإسلامي
الحفل المنضبط بأحكام الشرع
بحيث يخلو من منكرات الاختلاط
وتبرج النساء أمام الرجال واستعمال الموسيقى والغناء الماجن
ونحو ذلك مما حرم الله تعالى

فحفلات الزواج في الإسلام
حفلات تجمع بين إدخال الفرح والسرور على الحاضرين
والتزام العفة والصيانة والبعد عن المحرمات.
فالنساء يحتفلن بالزواج بمعزل عن الرجال
يفعلن كل ما من شأنه
أن يدخل السرور على الزوجة ومَنْ حولها
من لهو ومرح وغناء مصحوب بالدف ،
وأكل وشرب وغير ذلك
مما يختلف باختلاف العادات والأعراف
إذا كان داخلا في دائرة المباح.
وكذلك الرجال
يجتمعون في مكان خاص بهم يتبادلون التهنئة
ويدعون للزوجين بالبركة ، ويسن أن يصنع الزوج وليمة يأكل منها الحاضرون ، من غير إسراف ولا تبذير.
فالغرض من حفلة الزواج إعلانه وإظهاره
وتمييزه عن السفاح المحرم ، وإدخال السرور على الزوجين وأهاليهما وأصدقائهما ، مع تحقيق العبودية لله تعالى في ذلك كله .
حدود وضوابط لباس المرأة أمام محارمها وأمام النساء
الصحيح أن عورة المرأة مع المرأة كعورة المرأة مع محارمها .
فيجوز أن تُبدي للنساء مواضع الزينة
ومواضع الوضوء لمحارمها ولبنات جنسها .
أما التهتك في اللباس بحجة أن ذلك أمام النساء
فليس من دين الله في شيء .
وليس بصحيح أن عورة المرأة مع المرأة
كعورة الرجل مع الرجل ، أي من السرة إلى الركبة .
فهذا الأمر ليس عليه أثارة من علم ولا رائحة
من دليل فلم يدل عليه دليل صحيح ولا ضعيف .
بل دلّت نصوص الكتاب والسنة على ما ذكرته أعلاه .
قال سبحانه وتعالى : ( وَلا يُبْدِينَ زِينَتَهُنَّ إِلاَّ لِبُعُولَتِهِنَّ أَوْ آبَائِهِنَّ أَوْ آبَاءِ بُعُولَتِهِنَّ أَوْ أَبْنَائِهِنَّ أَوْ أَبْنَاءِ بُعُولَتِهِنَّ أَوْ إِخْوَانِهِنَّ أَوْ بَنِي إِخْوَانِهِنَّ أَوْ بَنِي أَخَوَاتِهِنَّ أَوْ نِسَائِهِنَّ أَوْ مَا مَلَكَتْ أَيْمَانُهُنَّ أَوْ التَّابِعِينَ غَيْرِ أُوْلِي الإِرْبَةِ مِنْ الرِّجَالِ أَوْ الطِّفْلِ الَّذِينَ لَمْ يَظْهَرُوا عَلَى عَوْرَاتِ النِّسَاءِ وَلا يَضْرِبْنَ بِأَرْجُلِهِنَّ لِيُعْلَمَ مَا يُخْفِينَ مِنْ زِينَتِهِنَّ وَتُوبُوا إِلَى اللَّهِ جَمِيعاً أَيُّهَا الْمُؤْمِنُونَ لَعَلَّكُمْ تُفْلِحُونَ
أرجو أن يكون جواباً شافياً
حفظكِ الله ورعاكِ أخية

[يارب اسألك الرضا]

رد: محتاجة اى أخت عملت او حضرت خطوبة او فرح اسلامى

جزاك الله خيرا اختى راجية وعفوا لم اكن اعلم ان هذا القسم يطلع عليه الاخوان حيث ان اسمه فضفضة "الاخوات"
المهم فى الموضوع انى بردو معرفتش احنا بنلبس ايه ف اليوم دة وهل بيعدى علينا اليوم فعلا من غير ما اشوف اخويا او والدى؟؟
انا عارفة ان الفرح الاسلامى بيكون النساء ف قاعة والرجال ف قاعة ومش بيكون فيه اختلاط ولا اغانى وهو دة اللى انا عايزاه وعايزة اعمله ان شاء الرحمن
لكن ليا سؤالين واضحين عايزة اعرف اجابتهم
1-لما يكون يوم فرحى والدى واخويا هيقعدوا ف قاعة الرجال طول اليوم ومش هيشوفوا بنتهم وهى بتتجوز ولا يفرحوا بيها؟؟
2-لبسنا هيكون ايه بالظبط ؟؟ يعنى انا هلبس جيبة وبلوزة والخمار عادى اللبس اللى بخرج بيه عادى وللا ينفع اجيب فستان سواريه والبس عليه الخمار "طبعا اقصد بالسواريه انه يكون بتاع مناسبات ويكون محترم يعنى مش عارى لان طبعا الطريق لغاية القاعة هتبقى الناس شايفانا مش زى القاعة سيدات بس"
وبالنسبة لاختى اللى لابسة اسدال بردو ينفع تلبس فستان وعليه خمار وللا هتيجى بالاسدال عادى ف مناسبة زى دى؟؟ يعنى انتوا عارفين البنات بتحب تجيب لبس جديد ف المناسبات

[يارب اسألك الرضا]

رد: محتاجة اى أخت عملت او حضرت خطوبة او فرح اسلامى

يعنى مفيش اى حد هنا عمل فرح اسلامى قبل كدة !!!!!

[عيون الجنة]

رد: محتاجة اى أخت عملت او حضرت خطوبة او فرح اسلامى

السلام عليكن ورحمة الله وبركاته
حبيبتى يارب اسالك الرضا ممكن تلبسى سواريه وتلبسى عليه اسدال ابيض او ملون ولما تروحى القاعى تخلعى الاسدال والاسدال بتاع الافراح مزود بخمار هو على بعضه كاب افراح تلاقيه عند اى بيوتى سنتر للمحجبات
اما عن والدك واخوك فانتى لما تكونى معاه فى القاعة ممكن تعملى له ايه الفرح فى القلب ورضا الرب وتطبيق الشرع لوكانت خطبتك او خطبة اخوكى تشوفيه لما ترجعوا البيت وان كان زفاف ابقى وصليه لبيته واتصورى معاه على ان تكونى متاكدة ان من يطبع ويحمض الصور اخوات ويوجد استديوهات للمحجبات فقط يعنى العاملات به نساء من الالف الى الياء وتذكرى دائما انه من يتق الله يجعل له مخرجا ويرزقه من حيث لايحتسب وفقك الله الى خير ما يحب ويرضى وجعل ايامك كلها افراح وطاعة

[قرآني طوق نجاتي]

رد: محتاجة اى أخت عملت او حضرت خطوبة او فرح اسلامى

السلام عليكن ورحمة الله وبركاته
حبيبتى يارب اسالك الرضا ممكن تلبسى سواريه وتلبسى عليه اسدال ابيض او ملون ولما تروحى القاعى تخلعى الاسدال والاسدال بتاع الافراح مزود بخمار هو على بعضه كاب افراح تلاقيه عند اى بيوتى سنتر للمحجبات
اما عن والدك واخوك فانتى لما تكونى معاه فى القاعة ممكن تعملى له ايه الفرح فى القلب ورضا الرب وتطبيق الشرع لوكانت خطبتك او خطبة اخوكى تشوفيه لما ترجعوا البيت وان كان زفاف ابقى وصليه لبيته واتصورى معاه على ان تكونى متاكدة ان من يطبع ويحمض الصور اخوات ويوجد استديوهات للمحجبات فقط يعنى العاملات به نساء من الالف الى الياء وتذكرى دائما انه من يتق الله يجعل له مخرجا ويرزقه من حيث لايحتسب وفقك الله الى خير ما يحب ويرضى وجعل ايامك كلها افراح وطاعة

صحيح جزاكم الله خيرا
بس يا عيون الجنه هل انتي متاكده من حكاية التصوير وحتى لو كان نساء فقط ام ماذا افيدينا افادك الله؟

[لؤلؤه بنقابى]

رد: محتاجة اى أخت عملت او حضرت خطوبة او فرح اسلامى

السلام عليكم ورحمة الله وبركاته
و عليكِ السلام و رحمة الله و بركاته
اللهم صل على محمد وعلى آل محمد
اللهم صل و سلم و بارك على سيدنا محمد
سؤالى ببساطة يابنات انا عايزة اعرف الافراح والخطوبة الاسلامية دى بتتعمل ازاااااى؟؟
بصى يا ستى الافراح دى بتكون زى الافراح العادية
بس مفيش اختلاط
مفيش موسيقى
مفيش محرمات
بيكون فيه قاعتين
قاعة للرجال و قاعة للنساء
و بيكون فيه فرقة او دى جى زى ما تحبى

يعنى بكل بساطة انا واختى زى باقى البنات طول عمرنا نلبس فساتين سواريه ونقعد مع البنات فى الركن بتاعنا ف القاعة بس انا عايزة اعرف هل ممكن نلبس كدة فعلا؟ طب وهنمشى بيهم ازاى دول؟؟
بصوا يا جماعة م الاخر انا مخمرة واختى لابسة ادناء "بين الاسدال والملحفة" تقدروا تقولولى اللبس اللى نلبسه فى مناسبات زى دى بيكون عامل ازاى؟؟ هل هنروح الخطوبة بالادناء كدة عادى ومش هنجيب لبس افراح يعنى؟


بالنسبة للبس
فلو كانت الافراح مش اسلامية و فيها مخالفات المفروض اصلا متروحيش
لكن لو فرضنا انك رحتى فأكيد لازم تروحى بكامل حجابك

لكن لو الفرح اسلامى
عاااااااادى جدا اختك تلبس السواريه تحت الادناء و انتى كمان استلفى منها ادناء و البسى تحته الفستان
و لما بتروحى للقاعة بتخلعى الادناء و تبقى بالفستان مع النساء
مفيش اى مشكلة

وكمان حاجاة تانية عايزة اعرفها ودى اهم حااااااااجة ازاى يعنى انا اكون بتجوز او خطوبتى مثلا او حتى خطوبة اخويا والولاد ف حتة والبنات ف حتة وبابا واخويا دول مش هشوفهم طول الليلة يعنى ومش هشوف اخويا وهو عريس ؟؟!!!!!

ماهو ممنوع البنات تروح عند الرجالة وممنوع الرجالة ييجوا عند البنات
طيب ولو انا اللى بتجوز جوزى دة مش هيشوفنى يعنى وانا عروسة طول اليوم غير لما نروح مع بعض وللا بيحصل ايه يا جماعة
معلش يا جماعة اختكم جاهلة بالمواشيع دى مفيش حد اتجوز عندنا قبل كدة

فرحتك بأخوكى و فرحتهم بيكى هتكون فى طاعة الله
مش بأن تشوفيه فى الكوشة او هو وزوجته بيرقصوا و بيعصوا الله
و فيه فى بعض الافراح فى الاخر
لما اغلب الناس تمشى و يكون موجود اقرب الاقربين بيدخل الاب و الاخ و الزوج فى الاخر عشان يسلموا على العروسة و يروحوها بقى
على فكرة انا جربت فرح اخويا و مشفتوش غير فى الاخر زى ما قلتلك و فرحت بيه عادى
فرحتك مش بتضيع ولا حاجة متخافيش

[يارب اسألك الرضا]

رد: محتاجة اى أخت عملت او حضرت خطوبة او فرح اسلامى

انا متشكرة جداااااااا عيون الجنة ولؤلؤة بنقابى على الرد الجميل والمفيد دة
بجد مش عارفة اقولكوا ايه لانى فعلا كنت محتارة ومش عارفة ينفع البس سواريه عادى وللا فيها مشكلة
طيب يا لؤلؤة هل ينفع البس السواريه وعليه الخمار عادى وللا أحسن أخد ادناء من بتوع اختى ولما اوصل القاعة اقلعه؟
والخطوبة طبعا ان شاء الرحمن هتكون اسلامية طبعا

[لؤلؤه بنقابى]

رد: محتاجة اى أخت عملت او حضرت خطوبة او فرح اسلامى

انا متشكرة جداااااااا عيون الجنة ولؤلؤة بنقابى على الرد الجميل والمفيد دة
بجد مش عارفة اقولكوا ايه لانى فعلا كنت محتارة ومش عارفة ينفع البس سواريه عادى وللا فيها مشكلة

ليه لأ
مفيهاش مشكلة طالما مع النساء بس
و زى ما بتقوللى مبيكنش الفستان مكشوف


طيب يا لؤلؤة هل ينفع البس السواريه وعليه الخمار عادى وللا أحسن أخد ادناء من بتوع اختى ولما اوصل القاعة اقلعه؟
والخطوبة طبعا ان شاء الرحمن هتكون اسلامية طبعا

الافضل ادناء
لأن الخمار هيبين الفستان من تحت
و طبعا هيكون باين انه سواريه
لكن الادناء هيداريه كله
و هيكون اسهللك جداااااااا